BÍBLIA NIA MATADALAN: “Sé mak sei sai bainaka iha [Maromak nia] tenda? . . . Ema neʼebé . . . halo hahalok neʼebé loos no hatete lia-loos iha nia laran.”—Salmo (Mazmur) 15:1, 2.

OINSÁ MAK HAHALOK NEʼE LORI DIʼAK BA ITA? Ema barak hatete katak importante atu hatudu laran-moos. Maibé se iha oportunidade ida neʼebé bele halo ita lohi ema hodi manán osan no la iha ema ida mak hatene, saida mak ita sei halo? Buat neʼebé ita halo iha tempu hanesan neʼe mak sei hatudu sai ita loloos ema oinsá iha laran.

Serbisu-naʼin ida naran Raquel, neʼebé dala ruma bá sosa sasán kompañia nian, hatete: “Loja balu neʼebé hakarak faʼan sasán ba ami hatete katak sira bele halo nota falsu. Sira hatete, se haʼu hola sasán husi sira, sira sei ‘hatún folin’, no osan neʼebé sira koʼa mak sei sai haʼu-nian. Maibé haʼu hanoin fali Bíblia nia konsellu kona-ba laran-moos, tan neʼe haʼu la simu. Haʼu-nia xefe rona kona-ba neʼe, no nia tau fiar liután mai haʼu.”

Se Raquel hatán atu simu nota falsu, karik ida-neʼe bele halo nia hetan osan barak kedas. Maibé oinsá se loron ida ninia xefe hatene kona-ba neʼe? Raquel bele kontinua serbisu ka lae? Ka nia bele hetan fali serbisu seluk ka lae? Ba Raquel, buat neʼebé importante liu fali osan mak ninia konxiénsia no dignidade. Provérbios (Amsal) 22:1 hatete: “Diʼak liu atu iha naran diʼak duké iha rikusoin boot; diʼak liu simu respeitu duké simu osan-mutin no osan-mean.”

Mane ida naran Jessie mós serbisu-naʼin neʼebé laran-moos no ninia patraun tau fiar ba nia. Buat diʼak saida mak Jessie hetan? Patraun foti Jessie sai diretór. Patraun mós fó lisensa ba nia atu troka oras serbisu nian tuir ninia situasaun rasik. Ida-neʼe halo Jessie bele uza tempu barak hamutuk ho ninia feen no oan sira no mós halaʼo ninia atividade kristaun nian.

Ohin loron, kompañia balu buka serbisu-naʼin neʼebé laran-moos hodi husu ba organizasaun sira neʼebé iha naran diʼak kona-ba hahalok laran-moos. Porezemplu iha rai-Filipinas, diretór ba kompañia ida hakerek karta ba sukursál Testemuña ba Jeová nian atu konvida ema Testemuña balu serbisu ba sira. Nia dehan: ‘Testemuña sira mak ema neʼebé serbisu badinas, laran-moos no laran-metin.’ Maibé ami-nia naran diʼak neʼe lori hahiʼi ba Maromak Jeová, tanba Nia mak hanorin ami atu “odi buat neʼebé aat no hadomi buat neʼebé diʼak”.—Amós 5:15.