BAINHIRA haʼu-nia apá, Arthur, sei joven, nia hadomi tebes Maromak no nia hakarak sai padre Metodista. Maibé bainhira nia lee livru balu husi Estudante Bíblia sira, nia troka ninia planu, no nia tuir fali Estudante Bíblia sira. Iha tinan 1914 nia hetan batizmu ho idade 17. Kuandu Funu Mundiál Primeiru akontese, ema obriga nia tama militár maibé nia lakohi kaer kilat ba funu. Tan neʼe sira hatama nia iha komarka ba fulan sanulu iha Ontario, rai-Kanadá. Bainhira nia sai husi komarka, nia halaʼo serbisu tempu-tomak nuʼudar pioneiru, iha tempu neʼebá bolu korportór.

Haʼu-nia amá naran Hazel Wilkinson, nia kaben ho apá iha tinan 1926. No haʼu moris iha 24 Abríl 1931, ami hamutuk biin-alin naʼin-haat no haʼu mak oan segundu. Amá nia inan hetan lia-loos iha tinan 1908. Apá gosta no hafolin tebes Bíblia no nia mós hakarak ami hotu halo hanesan nia. Buat importante liu hotu iha ami-nia moris mak adora Jeová. Ami sempre haklaken husi uma ba uma nuʼudar família.—Apóstolu 20:20.

Funu Mundiál Segundu akontese iha 1939. Tinan tuirmai Testemuña ba Jeová nia serbisu hetan bandu iha rai-Kanadá. Alunu hotu tenkesér halo kontinénsia ba bandeira no kanta inu nasionál iha klase laran. Baibain mestre sira husik deʼit haʼu no haʼu-nia biin, Dorothy sai husi klase se sira halo buat hanesan neʼe. Maibé loron ida, haʼu-nia mestre hamoe haʼu hodi hatete katak haʼu mak ema taʼuk-teen. Sai husi eskola, kolega eskola balu ataka no baku haʼu toʼo rai. Maibé neʼe halo haʼu hakarak liután atu “halo tuir Maromak nuʼudar ukun-naʼin duké halo tuir ema”.—Apóstolu 5:29.

Haʼu hetan batizmu iha bee tanke iha fulan-Jullu 1942 ho idade 11. Haʼu gosta tebes foti  pioneiru estra iha tempu eskola feriadu. Tinan ida haʼu bá hamutuk ho irmaun naʼin-tolu iha Ontario parte norte hodi haklaken ba ema neʼebé tesi ai.

Haʼu komesa pioneiru regulár iha 1 Maiu 1949. Tuirmai haʼu hetan konvite atu ajuda halo serbisu konstrusaun iha sukursál Kanadá no ikusmai sai permanente iha Betel iha loron 1 Dezembru. Haʼu-nia knaar iha Betel mak atu halo serbisu print no haʼu aprende buat barak tebes kona-ba oinsá atu uza mákina sira-neʼe. Haʼu sei hanoin-hetan serbisu kalan-kalan ba semana balu hodi ajuda print tratu kona-ba ema fó terus Jeová nia povu iha Kanadá.

Ikusmai haʼu muda fali iha Departamentu Serbisu nian, no haʼu hetan knaar atu halo entrevista ba pioneiru sira neʼebé atu bá serbí iha Kebeke, sidade neʼebé ema barak fó terus makaʼas ba irmaun-irmán sira. Pioneiru ida naran Mary Zazula husi sidade Edmonton, Alberta. Ninia inan-aman husi igreja Ortodoksa. Tanba nia ho ninia maun lakohi para atu estuda Bíblia, sira-nia inan-aman duni sira sai husi uma. Sira naʼin-rua hetan batizmu iha fulan-Juñu 1951, no fulan neen liutiha sira hahú foti pioneiru. Liuhusi entrevista neʼe, haʼu bele haree katak Mary hadomi tebes Jeová. Haʼu sei hanoin-hetan iha tempu neʼebá haʼu-nia hakarak mak atu kaben ho irmán neʼe. Fulan sia liutiha, iha loron 30 Janeiru 1954 ami kaben duni. Liutiha semana ida, haʼu hetan konvite atu simu treinu hodi sai katuas área nian. Ami serbí iha área Ontario parte norte ba tinan rua.

Tanba serbisu haklaken laʼo ba oin iha mundu tomak, irmaun sira presiza misionáriu barak atu ajuda. Mary ho haʼu hanoin, se iha rai-Kanadá mak ami bele tahan rai neʼebé malirin tebes no ami la taʼuk susuk sira iha tempu bailoro, entaun ami mós bele moris iha rai naran deʼit. Ami tuir Eskola Gilead klase 27 no ramata iha fulan-Jullu 1956. Iha fulan-Novembru tuirmai ami hetan knaar foun atu serbí iha Brazíl.

Ami hahú aprende lia-portugés bainhira ami toʼo Brazíl. Foufoun ami aprende oinsá atu hahú koʼalia ho ema iha dalan neʼebé fasil deʼit. Tuirmai ami koko atu dekór oinsá bele fahe revista sira. Ikusmai ami bá haklaken no hasoru feto ida neʼebé gosta atu rona kona-ba ita-nia mensajen. Tanba ami-nia planu mak, se ami hasoru ema neʼebé hakarak rona, ami sei lei eskritura ida kona-ba moris iha Maromak nia Ukun. Tan neʼe haʼu lee Apokalipse 21:3, 4, maibé lakleur haʼu monu dezmaia tanba haʼu seidauk toman ho rai neʼebé manas. Rai-manas mak susar boot ida ba haʼu durante ami serbí iha neʼebá.

Ami halaʼo ami-nia knaar misionáriu nian iha sidade  Campos. Ohin loron iha kongregasaun 15 iha sidade neʼe! Bainhira ami foin toʼo iha fatin neʼe, iha deʼit grupu ida neʼebé dook husi sidade no uma misionáriu ida ho irmán naʼin-haat mak hela iha uma neʼe. Sira mak Esther Tracy, Ramona Bauer, Luiza Schwarz, no Lorraine Brookes (agora Wallen). Haʼu-nia knaar iha uma misionáriu mak ajuda fase roupa no buka ai atu teʼin. Iha segunda kalan ida ami halaʼo tiha Estudu Livru Haklaken nian, Mary toba deskansa hela iha sofá no ninia ulun iha xumasu leten. Ami koʼalia hela kona-ba buat sira neʼebé ami halo iha loron neʼe. Bainhira Mary hamriik husi sofá, samea ida dolar sai husi xumasu neʼe. Samea neʼe halo ema hotu iha uma laran hakilar toʼo haʼu oho tiha samea neʼe.

Aprende tiha lia-portugés ba tinan ida, haʼu hetan fali knaar atu serbí nuʼudar katuas área nian. Ami serbí iha fatin neʼebé eletrisidade la iha. Ami toba deʼit iha biti no bá-mai ho kuda-karreta. Loron ida ami saʼe komboiu bá knua ida iha foho atu halaʼo kampaña espesiál hodi haklaken ba ema sira neʼebé hela iha fatin izoladu. Ami aluga deʼit kuartu ida iha neʼebá. Sukursál haruka revista 800 ba ami hodi haklaken iha neʼebá. Ami presiza bá-mai husi korreiu hodi foti revista sira-neʼe.

Iha tinan 1962, ami halaʼo Eskola ba Katuas no Atan ba Kongregasaun iha sidade oioin iha Brazíl. Haʼu hetan knaar atu hanorin iha eskola neʼe iha sidade oioin. Ba fulan neen haʼu presiza ba mesak atu hanorin iha Manaus, Belém, Fortaleza, Recife, no Salvador. Bainhira iha Manaus, haʼu organiza reuniaun boot ba loron tolu nian iha fatin teatru ida. Maibé tanba udan tun makaʼas, ami la bele hetan bee moos atu hemu, no fatin atu han ba irmaun-irmán sira mós la iha. Tan neʼe haʼu koʼalia ba komandante militár ida no esplika kona-ba situasaun neʼe. Ho laran-diʼak nia buka bee moos ba ami hotu no nia haruka soldadu sira harii tenda boot rua ba ami atu uza nuʼudar dapur no fatin atu han.

Bainhira haʼu bá hela iha fatin sira-neʼe, Mary bá haklaken iha área neʼebé ema halaʼo bisnis no ema la iha interese kona-ba Bíblia. Ema sira neʼebé hela iha fatin neʼe mai husi Portugál atu buka osan. Tanba ema lakohi rona, neʼe halo Mary laran-tun no nia koʼalia ba ninia kolega balu, “Haʼu bele bá fatin hotu, maibé Portugál mak lae.” Siʼik toʼok ami-nia knaar tuirmai mak atu serbí iha neʼebé? Portugál, rai neʼebé bandu ita-nia serbisu haklaken. Mary hakfodak, maibé ami simu deʼit knaar neʼe hodi muda fali ba Portugál.

Ami toʼo iha Lizboa, Portugál iha fulan-Agostu 1964. Polísia intelijénsia halo susar tebes ba irmaun-irmán sira iha neʼebá. Tan neʼe ami hanoin  katak matenek atu la kontaktu uluk irmaun-irmán sira. Ami aluga deʼit kuartu ida iha ema nia uma. Bainhira ami hetan tiha vistu mak ami foin aluga uma. Fulan lima liutiha, ami sente diʼak ona atu kontaktu irmaun sira iha sukursál. Ami haksolok tebes tanba ikusmai ami bele tuir reuniaun!

Tanba governu bandu ita-nia serbisu haklaken, Reuniaun-Fatin hotu taka no reuniaun sira halaʼo deʼit iha uma. Polísia cek beibeik irmaun-irmán sira-nia uma. Polísia lori irmaun-irmán atus ba atus iha estasaun polísia nian atu husu informasaun. Polísia trata sira iha dalan neʼebé ladiʼak no mós koko atu obriga sira fó-hatene sé mak tau matan ba sira-nia serbisu. Tan neʼe, irmaun sira la uza tan sira-nia apelidu bainhira bolu malu, maibé uza deʼit naran primeiru hodi nuneʼe ema la bele hatene sira.

Ami-nia planu mak atu fó nafatin ai-han espirituál ba irmaun-irmán sira hodi sira bele tahan. Mary mak ketik Livru Haklaken estudu nian no livru seluk ho surat tahan espesiál ida. No liuhusi surat tahan espesiál neʼe mak halo fali kopia seluk.

Iha fulan-Juñu 1966, tribunál halaʼo kazu boot ida iha Lizboa. Ema lori irmaun-irmán naʼin-49 husi kongregasaun Feijó tomak ba tribunál tanba sira duun katak irmaun-irmán sira-neʼe halaʼo reuniaun ilegál iha uma ida. Dalan ami prepara ba julgamentu neʼe mak haʼu finje sai advogadu neʼebé koko atu duun irmaun sira. Ami hatene katak ami sei lakon, no ami lakon duni kazu neʼe. Tan neʼe irmaun-irmán naʼin-49 hetan kastigu iha komarka. Balu tama kadeia ba loron 45 no balu tan toʼo fulan lima ho balun. Maski nuneʼe, julgamentu neʼe fó sasin ba ema barak. Iha tempu halaʼo hela julgamentu, ami-nia advogadu mós temi liafuan sira husi Gamaliel neʼebé foti husi Bíblia. (Apóstolu 5:33-39) Hotu tiha, notísias sira fó sai kona-ba kazu neʼe. Ami kontente tebes tanba ami-nia advogadu mós komesa estuda Bíblia no tuir reuniaun sira.

Iha fulan-Dezembru 1966, haʼu hetan fali knaar hodi serbí nuʼudar koordenadór ba sukursál no haʼu-nia serbisu barak liu kona-ba buat legál nian. Ami hakaʼas an tebes atu hetan direitu legál nuʼudar Testemuña ba Jeová kona-ba liberdade atu adora Jeová iha Portugál. (Filipe 1:7) Ikusmai iha loron 18 Dezembru 1974 governu rekoñese duni ita-nia serbisu neʼe. Tanba razaun neʼe, irmaun Nathan Knorr no Frederick Franz mai husi sede-jerál hodi halaʼo reuniaun ida neʼebé ami sei nunka haluha iha sidade Oporto no Lizboa, no ema hamutuk naʼin–46.870 mak tuir reuniaun sira-neʼe.

Jeová mós loke dalan ba ema neʼebé hela iha illa sira hodi bele rona kona-ba Bíblia nia mensajen.  Illa hanesan Asores, Kabuverde, Madeira, São Tomé no Prínsipe. Ema iha illa sira-neʼe koʼalia lia-portugés. Tanba haklaken-naʼin aumenta, ami mós presiza sukursál neʼebé boot liután. Harii sukursál neʼe ramata iha 23 Abríl 1988 no irmaun Milton Henschel mak hatoʼo diskursu dedikasaun nian. Irmaun-irmán hamutuk naʼin–45.522 mak tuir dedikasaun neʼe, inklui mós misionáriu naʼin-20 neʼebé uluk serbí iha Portugál.

Serbí tiha ba tinan barak, Mary ho haʼu mós aprende buat barak husi irmaun seluk. Porezemplu, bainhira irmaun Theodore Jaracz halo vizita zona, haʼu konsege serbisu hamutuk ho nia no haʼu aprende buat barak husi nia. Iha sukursál neʼebé ami vizita daudauk mosu problema boot ida, no Grupu Koordenadór ba Sukursál hakaʼas an ona atu rezolve problema neʼe. Irmaun sira sente triste tanba sira seidauk bele rezolve problema neʼe. Maibé irmaun Jaracz fó kmaan ba sira hodi dehan: “Agora mak tempu atu husik espíritu santu ajuda ita.” Haʼu mós nunka haluha irmaun Franz nia liafuan bainhira haʼu no Mary bá vizita Brooklyn tinan hirak liubá. Ema balu husu sujestaun husi nia no nia dehan: “Haʼu-nia sujestaun mak neʼe: Maski saida deʼit mak mosu, keta husik Jeová nia organizasaun parte rai nian. Tanba organizasaun neʼe deʼit mak halo tuir Jesus nia mandamentu atu haklaken liafuan diʼak kona-ba Maromak nia Ukun!”

Mary no haʼu halo tuir duni, neʼe lori ksolok ba ami-nia moris. Ami mós hafolin ami-nia knaar atu halaʼo vizita zona nian iha sukursál oioin iha mundu tomak. Ami hafolin tebes oportunidade neʼebé ami iha hodi bele fó laran-manas ba irmaun-irmán sira katak Jeová hafolin tebes sira-nia serbisu ba nia. Ami sempre fó laran-manas ba sira atu kontinua serbí Jeová.

Tempu mós liu ba beibeik, no agora ami naʼin-rua tinan 80 resin ona. Mary hasoru daudauk problema ho saúde. (2 Korinto 12:9) Ami hasoru ona susar oioin. Maibé susar sira-neʼe hametin liután ami-nia fiar no halo ami hakarak laran-metin liután ba Jeová. Bainhira ami hanoin fali tinan sira neʼebé ami uza ami-nia moris hodi serbí Jeová, ami bele haree katak ho laran-diʼak neʼebé boot, Jeová fó duni bensaun oioin ba ami. *—Haree nota iha kraik.