Ita lee didiʼak informasaun sira husi ita-nia Livru Haklaken foin daudauk neʼe ka lae? Koko atu hatán ba pergunta sira tuirmai neʼe:

Bainhira matadalan mai husi Maromak nia organizasaun, irmaun sira neʼebé serbí nuʼudar katuas área no katuas kongregasaun sei halo saida?

Sira lalais atu halo tuir. Sira bele husu ba sira-nia an: ‘Haʼu ajuda irmaun-irmán sira atu hatudu laran-metin ba Jeová ka lae? Haʼu simu no halo tuir kedas matadalan husi irmaun sira neʼebé dirije ka lae?’​—w16.11, p. 11.

Horibainhira mak ema kristaun loos sai dadur ba Babilónia Boot?

Bainhira apóstolu hotu mate, liutiha tempu balu mak ida-neʼe akontese. Iha tempu neʼebá, iha ema balu komesa forma pozisaun iha kongregasaun atu sai ulun-naʼin. Igreja no governu sira apoia ema kristaun falsu sira no lakohi rona ba ema kristaun sira neʼebé hanesan fini diʼak. Maibé antes tinan 1914, ema kristaun loos komesa sai livre.​—w16.11, p. 23-25.

Tanbasá mak Lefèvre d’Étaples nia serbisu iha folin-boot?

Maizumenus iha tinan 1520, Lefèvre tradús Bíblia ba lia-fransés atu halo ba ema baibain. Ninia esplikasaun kona-ba eskritura sira, neʼe fó influénsia boot ba matenek-naʼin Martin Luther, William Tyndale, no John Calvin.​—wp16.6, p. 10-12.

Saida mak la hanesan entre “hanoin buat isin nian” no “hanoin buat espíritu nian”? (Rom 8:6)

Ema neʼebé hanoin buat isin nian tau fokus ba hakarak isin nian neʼebé sala. Nia iha interese deʼit no koʼalia la para kona-ba hakarak isin nian. Halo hanesan neʼe bele lori ba mate. Ema neʼebé hanoin buat espíritu nian tau fokus ba Maromak no ninia hakarak. Nia sei husik espíritu mak book ninia neon. Neʼe lori ba moris no dame.​—w16.12, p. 15-17.

Saida mak dalan balu atu hamenus laran-taridu?

Halo uluk buat neʼebé importante liu hotu, hanoin kona-ba ita-nia kbiit, iha loron ida-idak buka tempu atu hakmatek, keta sériu demais, halo desportu ruma no deskansa didiʼak.​—w16.12, p. 22-23.

Oinsá mak “Enoc la haree mate”? (Ebr 11:5)

Karik Maromak Jeová ho laran-diʼak halo Enoc mate la ho terus ka moras.​—wp17.1, p. 12-13.

Tanbasá mak haraik-an importante nafatin?

Ema neʼebé haraik an hatene ninia an, nia hatene katak iha buat balu nia la iha kbiit atu halo, ka la iha direitu atu halo. Ita presiza hanoin oinsá ita-nia hahalok bele kona ema seluk no labele hanoin katak ita mak importante liu fali ema seluk.​—w17.01, p. 18.

Evidénsia saida mak hatudu katak Maromak mak dirije grupu administradór iha apóstolu sira-nia tempu hanesan nia dirije daudauk Grupu Administradór ohin loron?

Espíritu santu mak ajuda sira komprende lia-loos sira husi Bíblia. Ho anju sira-nia ajuda mak sira dirije serbisu haklaken, no sira sadere ba Maromak nia Liafuan bainhira fó matadalan. Hanesan neʼe mós ho ohin loron.​—w17.02, p. 26-28.

Tanba razaun saida deʼit mak book ita atu hafolin Jesus nia sakrifísiu?

Razaun haat mak: Sé mak fó prezente neʼe ba ita, tanbasá nia fó ida-neʼe, sakrifísiu saida mak nia presiza halo atu fó prezente neʼe, no tanbasá mak presiza duni. Ita tenke hanoin kleʼan kona-ba buat sira-neʼe.​—wp17.2, p. 4-6.

Ema kristaun ida neʼebé halo ona desizaun, bele troka fali ninia hanoin ka lae?

Maski ita tenke kumpre ita-nia liafuan, maibé dala ruma ita presiza haree fali desizaun neʼebé ita halo ona. Bainhira ema Nínive hakribi sira-nia sala, Maromak troka ninia desizaun kona-ba sira. Karik ita-nia situasaun moris troka ka ita hetan informasaun foun, tan neʼe presiza halo mudansa ba ita-nia desizaun.​—w17.03, p. 16-17.

Tanbasá mak perigu tebes atu konta aat ema seluk?

Se la kontrola an, bele halo problema ida sai boot liután. Maski ita mak loos ka sala, koʼalia liafuan neʼebé hakanek ema la bele ajuda atu hadiʼa situasaun neʼe.​—w17.04, p. 21.