1, 2. Jeová fó kmaan ba ita liuhusi saida, no nia promete saida ba ita liuhusi ninia Liafuan?

IRMAUN klosan ida husu pergunta ba katuas kongregasaun neʼebé kaben ona kona-ba 1 Korinto 7:28 neʼebé hatete katak ema neʼebé kaben “sei hetan susar iha sira-nia isin”. Nia husu: “‘Susar’ neʼe mak saida, no oinsá mak haʼu bele hasoru susar neʼe bainhira haʼu kaben?” Antes irmaun katuas hatán ninia pergunta, nia hatete ba irmaun klosan neʼe katak apóstolu Paulo hakerek tan buat ida iha ninia karta, Paulo dehan katak Jeová mak “Maromak neʼebé fó kmaan ba ema iha situasaun hotu, nia fó kmaan ba ita iha ita-nia susar hotu”.​—2 Korinto 1:3, 4.

² Ita hatene katak Aman Jeová hadomi ita, no nia fó kmaan bainhira ita hasoru susar ruma. Karik Ita sei hanoin-hetan tempu neʼebé Jeová fó apoiu no matadalan ba Ita liuhusi ninia Liafuan. Ita bele fiar katak Jeová sempre fó buat neʼebé diʼak liu hotu ba ita hanesan buat neʼebé nia halo ona ba  ninia atan sira iha tempu antigu.​—Lee Jeremias (Yeremia) 29:11, 12. *

3. Lisaun neʼe sei hatán ba pergunta saida deʼit?

³ Baibain, se ita hatene saida mak hamosu susar no problema ruma, neʼe sei halo fasil ba ita atu tahan. Entaun, saida mak hamosu susar ba moris kaben nian ka ba família? Ezemplu saida deʼit husi tempu antigu no mós ohin loron mak bele ajuda ita atu hetan kmaan? Mai ita buka resposta ba pergunta sira-neʼe no haree toʼok oinsá mak ita bele tahan hasoru susar sira.

4, 5. Saida deʼit mak bele lori susar ba moris kaben nian?

⁴ Bainhira Jeová kria tiha feto primeiru, nia lori feto neʼe ba Adão, no nia sai Adão nia feen. Tuirmai Jeová hatete: “Mane ida sei husik ninia aman no inan no nia sei hela hamutuk ho nia feen, no sira sei sai isin ida deʼit.” (Gênesis [Kejadian] 2:24) Ita hotu la perfeitu, tan neʼe mak bainhira mane ho feto ida kaben, problema bele mosu iha sira-nia moris. (Roma 3:23) Porezemplu, antes kaben, karik feto neʼe halo tuir ninia inan-aman. Maibé Bíblia hatete katak, kaben tiha, ninia laʼen mak sai fali ninia ulun. (1 Korinto 11:3) Foufoun, karik ninia laʼen sente la fasil atu foti desizaun ba ninia feen, no karik feen sente fasil liu atu halo tuir inan-aman duké halo tuir ninia laʼen. No mós bainhira sira foin kaben, karik sira bele hasoru problema ruma ho sira-nia banin, no ida-neʼe mós bele hamosu susar ba moris kaben nian.

⁵ Hanoin mós kona-ba feen-laʼen nia sentimentu bainhira sira hatene katak feen sai isin-rua. Karik sira sai kontente tebes, maibé baibain neʼe mós halo sira komesa hanoin kona-ba buat barak. Karik sira bele hanoin kona-ba feen no bebé nia saúde durante feen isin-rua no mós bainhira bebé moris mai. Sira mós hatene katak sira presiza osan barak. Bainhira bebé moris ona, sira mós presiza halo mudansa barak ba sira-nia moris. Karik inan presiza gasta tempu barak atu tau matan ba bebé neʼe. Karik feen ho laʼen neʼe la iha tan tempu barak hanesan uluk. Aman nia responsabilidade mós sei aumenta liután. Nia tenke tau matan ba ninia feen ho bebé nia presiza.

6-8. La bele iha oan lori susar saida ba moris kaben nian?

⁶ Kaben-naʼin balu hasoru susar seluk tan. Sira hakarak tebes atu iha oan, maibé sira la bele iha oan. Situasaun hanesan neʼe bele halo feen sai laran-tun. (Provérbios [Amsal] 13:12) Iha tempu antigu, importante tebes ba feto sira atu kaben no iha oan. Tan neʼe mak bainhira Jacob nia feen Rakel haree ninia biin iha oan maibé nia lae, neʼe halo nia laran-tun tebes. (Gênesis [Kejadian] 30:1, 2) Ohin loron, iha rai balu ema barak hanoin katak importante tebes atu iha oan barak. Tan neʼe mak sira sempre husu misionáriu neʼebé hela iha sira-nia rai tanbasá mak sira seidauk iha oan. Maski misionáriu sira koko atu esplika razaun, maibé sira sempre dehan fali, “Ami sei reza ba imi!”

⁷ Ezemplu seluk tan mak kona-ba irmán ida neʼebé hela iha rai-Inglaterra, nia hakarak tebes atu iha oan. Maibé bainhira nia hatene katak nia liu ona tempu atu iha oan, nia sai laran-tun tebes. Tan neʼe  nia ho ninia laʼen deside atu foti oan ida hodi hakiak. Maibé dala ruma nia sente triste nafatin. Nia dehan: “Haʼu hatene, hakiak ema nia oan la hanesan duni ho iha oan rasik.”

⁸ Bíblia hatete katak “hodi sai inan mak feto sira proteje sira-nia an”. (1 Timóteo 2:15) Maibé neʼe la dehan katak tanba feto ida iha oan, nia sei hetan moris rohan-laek. Entaun, eskritura neʼe koʼalia kona-ba saida? Inan ida uza tempu barak tebes atu tau matan ba ninia oan no ba uma. Preokupa ho buat sira-neʼe ajuda nia atu la konta ema nia vida ka mete ema seluk nia problema. (1 Timóteo 5:13) Maski nuneʼe, karik nia sei hasoru nafatin problema ruma iha ninia moris kaben nian ka iha ninia família.

9. Susar saida tan mak kaben-naʼin sira bele hasoru?

⁹ Susar ida tan neʼebé kaben-naʼin sira hasoru mak se sira-nia feen ka laʼen mate. Karik sira hanoin buat hanesan neʼe sei nunka akontese, maibé ema barak hasoru ona susar neʼe. Ema kristaun sira fiar metin ba Bíblia nia promesa kona-ba moris-hiʼas, no esperansa neʼe fó kmaan duni ba sira. (João 5:28, 29) Liuhusi ninia Liafuan, Jeová halo promesa barak neʼebé halo ita sente kmaan iha tempu ita hasoru susar sira. Agora, mai ita haree oinsá mak Jeová fó kmaan ba ninia atan balu, no oinsá mak neʼe ajuda sira.

10. Oinsá mak Ana hetan kmaan? (Haree dezeñu iha pájina 4.)

¹⁰ Hanoin toʼok kona-ba Ana nia esperiénsia, Elcana nia feen. Nia hakarak tebes atu iha oan, maibé la bele iha oan. Elcana nia feen seluk, Penina, iha oan barak. (Lee 1 Samuel 1:4-7. *) Aat liután mak “tinan-tinan”, Penina goza Ana kona-ba neʼe. Neʼe halo Ana sente laran-kanek tebes. Saida mak nia halo atu sente kmaan? Nia “halo orasaun ba tempu kleur iha Jeová nia oin”. Nia husu atu Jeová fó oan-mane ida ba nia, no Ana fiar katak Jeová sei ajuda nia. Halo tiha orasaun, nia sente kmaan fali no “ninia oin la murón tan”. (1 Samuel 1:12, 17, 18) Ana hatene katak Jeová sei fó oan-mane ida ba nia, ka selae, Jeová sei fó kmaan ba nia iha dalan seluk.

11. Oinsá mak orasaun bele ajuda ita atu hetan kmaan?

¹¹ Tanba ita hotu ema sala-naʼin no moris iha Satanás nia mundu, ita sei kontinua hasoru susar oioin. (1 João 5:19) Maibé Jeová sei ajuda ita. Ita bele halo orasaun ba “Maromak neʼebé fó kmaan ba ema iha situasaun hotu”. Neʼe mak buat neʼebé Ana halo. Nia fó-hatene ba Jeová saida mak nia sente iha laran, no husu makaʼas Jeová atu ajuda nia. Hanesan neʼe mós, bainhira ita hasoru hela susar, diʼak atu laʼós deʼit temi ita-nia problema ba Jeová. Ita presiza husu makaʼas nia atu ajuda ita no fó-hatene nia ita-nia sentimentu iha laran.​—Filipe 4:6, 7.

12. Saida mak ajuda feto-faluk Ana atu hetan haksolok?

¹² Karik ita sente triste tebes tanba ita la iha oan, ka tanba ema neʼebé ita hadomi mate. Maibé ita bele sente kmaan fali. Hanoin toʼok kona-ba feto ida tan naran  Ana. Nia mak profeta ida neʼebé moris iha Jesus nia tempu. Ana kaben ba tinan hitu deʼit, depois ninia laʼen mate. No Bíblia la dehan katak nia iha oan. Maibé saida mak ajuda nia, maski nia tinan 84 ona? Lucas 2:37 hatete: “Kalan-loron nia sempre bá iha templu atu adora Maromak hodi halo jejún no harohan.” Sin, buat neʼebé halo nia sente kmaan no haksolok mak hodi adora Jeová.

13. Oinsá mak belun neʼebé diʼak bele fó kmaan ba ita se ita-nia família halo ita laran-tun? Fó toʼok ezemplu.

¹³ Ita mós bele hetan kmaan husi irmaun-irmán sira. (Provérbios [Amsal] 18:24) Paula nia inan lakohi tan adora Jeová bainhira Paula foin tinan lima no neʼe halo nia sente triste tebes. Maibé iha irmán pioneiru ida naran Ann mak fó laran-manas no ajuda Paula laʼo ba oin. Paula dehan: “Maski Ann laʼós haʼu-nia família, maibé ninia domin ba haʼu ajuda haʼu atu kontinua serbí Jeová.” Ikusmai Paula nia inan serbí fali Jeová no neʼe halo Paula kontente tebes. Ann mós sente kontente tanba nia bele ajuda Paula hodi kontinua serbí Jeová.

14. Fó kmaan ba ema seluk lori diʼak saida ba ita?

¹⁴ Bainhira ita fó ajuda ba ema, baibain neʼe halo ita haluha ita rasik nia problema sira. Porezemplu, iha irmán barak neʼebé seidauk kaben ka kaben ona rekoñese katak, bainhira sira haklaken ba ema seluk kona-ba Maromak nia Ukun, sira serbisu hamutuk ho  Jeová no halo tuir ninia hakarak. Neʼe lori ksolok ba sira. Loos duni, ita hotu bele hatudu domin ba ema seluk liuhusi haklaken ba sira. No se ita mak halo buat diʼak ba ita-nia irmaun-irmán, ita sei hakbesik liután ba sira. (Filipe 2:4) Apóstolu Paulo hatudu ezemplu neʼebé diʼak kona-ba neʼe. Ninia hahalok diʼak sira neʼebé nia hatudu ba ema seluk “hanesan inan neʼebé fó-susu no tau matan didiʼak ba nia oan”. Nia mós fó kmaan no laran-manas ba irmaun-irmán sira “hanesan aman ida halo ba ninia oan”.​—Lee 1 Tesalónika 2:7, 11, 12.

15. Sé mak iha responsabilidade atu hanorin oan kona-ba Jeová?

¹⁵ Oinsá mak ita bele fó kmaan ba família sira iha kongregasaun? Dala ruma ema balu husu ita-nia ajuda atu hanorin sira-nia oan kona-ba Jeová ka atu estuda Bíblia ho sira-nia oan. Bíblia hatete katak Jeová fó responsabilidade ba inan-aman mak atu hanorin no fó treinu ba sira-nia oan rasik. (Provérbios [Amsal] 23:22; Éfeso 6:1-4) Maski iha situasaun balu ema seluk bele ajuda, maibé importante tebes ba inan-aman rasik mak atu hanorin sira-nia oan. Sin, inan-aman presiza koʼalia beibeik ho sira-nia oan.

16. Ita tenkesér hanoin-hetan saida bainhira estuda ho ema seluk nia oan?

¹⁶ Se inan ka aman ida husu ita atu estuda ho ninia oan, diʼak atu hanoin-hetan katak ita la bele halaʼo fali inan-aman nia knaar. Dala ruma, karik ita presiza estuda ho oan neʼebé inan-aman la iha lia-loos. Se ita mak estuda ho ema seluk nia oan, matenek atu estuda bainhira inan-aman iha uma ka bainhira Testemuña maduru ida iha uma, ka selae, estuda iha fatin públiku, hodi nuneʼe ita la halo ema seluk iha hanoin neʼebé sala kona-ba ita. Ita-nia hakarak mak atu hein ba loron ida inan-aman mak hanorin fali sira-nia oan kona-ba Jeová.

17. Oinsá mak oan bele fó kmaan ba ema seluk iha sira-nia família laran?

¹⁷ Irmaun-irmán joven sira neʼebé aprende ona oinsá atu hadomi Jeová bele fó kmaan fali no laran-manas ba sira-nia família. Oinsá? Hodi hatudu respeitu ba sira-nia inan-aman no fó ajuda ba sira. No mós se oan mak laran-metin ba Jeová, neʼe sei fó laran-manas ba ema hotu iha família laran. Lamek adora Jeová antes Rai-Nabeen akontese iha Noé nia tempu, no nia koʼalia kona-ba ninia oan Noé: “Nia sei fó kmaan ba ita husi ita-nia serbisu todan no husi ita-nia liman neʼebé sai kole tanba rai neʼebé Jeová fó-malisan ona.” Bainhira Rai-Nabeen liu tiha, profesia neʼe sai loos duni. Jeová hasai fali malisan neʼebé nia fó ba rai. (Gênesis [Kejadian] 5:29; 8:21) Ohin loron, oan sira neʼebé hatudu laran-metin ba Jeová mós bele fó kmaan ba sira-nia família. Sira bele ajuda ema ida-idak iha família laran atu tahan hasoru susar ohin loron no iha futuru.

18. Saida mak bele ajuda ita atu tahan hasoru susar sira?

¹⁸ Jeová nia povu ohin loron hetan kmaan husi orasaun, medita kona-ba ezemplu sira husi Bíblia, no relasaun diʼak ho irmaun-irmán sira. (Lee Salmo [Mazmur] 145:18, 19. *) Ita hatene katak Jeová sempre prontu atu fó kmaan ba ita, no nia mós sei ajuda ita atu tahan hasoru susar naran deʼit neʼebé ita hasoru!