1. Avizu saida mak Paulo hakerek ba ema Kristaun neʼebé iha esperansa atu moris iha lalehan?

APÓSTOLU PAULO fó avizu: “Keta halo tuir mundu ohin neʼe.” (Rom 12:2) Paulo hakerek avizu neʼe ba ema Kristaun iha apóstolu sira-nia tempu. Tanbasá mak Paulo fó avizu makaʼas hanesan neʼe ba feto no mane neʼebé dedika an ona ba Maromak no iha esperansa atu moris iha lalehan?​—Rom 1:7.

2-3. Iha dalan oinsá mak Satanás koko atu hadook ita husi Jeová, maibé oinsá mak ita bele sobu hanoin neʼebé sala husi ita-nia neon?

² Paulo hanoin barak tanba mundu nia ideia no filozofia neʼebé mai husi Satanás fó influénsia ba ema Kristaun balu. (Éf 4:17-19) Ida-neʼe mós bele akontese ba ita hotu. Satanás neʼebé ukun mundu neʼe uza lasu oioin atu koko hadook ita husi Jeová. Lasu ida mak hodi aproveita ita-nia hakarak atu hetan naran-boot. Karik nia mós uza ita-nia situasaun moris, ita-nia kultura ka buat neʼebé ita aprende iha eskola atu book ita halo tuir ninia hanoin.

³ Bele ka lae sobu hanoin neʼebé metin ona iha ita-nia neon? (2 Kor 10:4) Haree toʼok saida mak Paulo hatete: “Ami sobu rahun hanoin neʼebé sala no ideia hotu neʼebé foti an kontra koñesimentu kona-ba Maromak. Neʼe hanesan ami kaer no lori hanoin hotu hodi halo tuir Kristu.” (2 Kor 10:5) Loos duni, ho Jeová nia ajuda, ita bele  hadiʼa ita-nia hanoin neʼebé sala. Hanesan ai-moruk bele halakon rezultadu aat husi venenu, nuneʼe mós Maromak nia Liafuan bele ajuda ita atu halakon hanoin sala husi Satanás nia mundu neʼebé metin ona iha ita-nia neon.

4. Mudansa saida deʼit mak ita barak presiza halo bainhira ita simu lia-loos?

⁴ Hanoin fali toʼok mudansa sira neʼebé uluk Ita presiza halo bainhira Ita simu lia-loos husi Maromak nia Liafuan no deside atu serbí Jeová. Atu bele serbí Jeová, ita barak para atu la halo tan buat neʼebé sala. (1 Kor 6:9-11) Ita sente agradese tebes ba Jeová tanba nia ajuda ita atu la halo tan buat neʼebé sala.

5. Tuir Roma 12:2 ita presiza halo buat rua saida?

⁵ Maibé, ita labele hanoin katak ita la presiza tan halo mudansa. Maski ita la halo tan sala sériu sira neʼebé ita halo antes ita hetan batizmu, maibé ita presiza nafatin hakaʼas an atu hadook an husi buat naran deʼit neʼebé bele tenta ita atu halo fali hahalok sala. Oinsá? Paulo hatán: “Keta halo tuir mundu ohin neʼe, maibé troka imi-nia an hodi hafoun imi-nia hanoin.” (Rom 12:2) Entaun, ita presiza halo buat rua. Primeiru, ita “keta halo tuir” mundu neʼe. Segundu, ita presiza “troka” hodi hafoun ita-nia hanoin.

6. Lisaun saida mak ita bele aprende husi Jesus nia liafuan iha Mateus 12:43-45?

⁶ Mudansa neʼebé Paulo temi, laʼós deʼit kona-ba buat neʼebé ema seluk bele haree husi liʼur. Neʼe envolve buat hotu iha ita-nia moris. (Haree kaixa “ Ita troka duni ka finje deʼit?”) Ita presiza hafoun ita-nia hanoin, katak ita-nia sentimentu no hakarak sira. Ita ida-idak presiza husu ba Ita-nia an: ‘Mudansa neʼebé haʼu halo atu banati-tuir Kristu mak iha  liʼur deʼit ka haʼu mós halo mudansa iha haʼu-nia laran no hanoin?’ Resposta ba pergunta neʼe mak importante tebes. Jesus nia liafuan neʼebé hakerek iha Mateus 12:43-45 hatudu buat neʼebé ita presiza halo. (Lee.) Liafuan sira-neʼe hanorin ita lisaun importante ida: La toʼo atu hasai deʼit hanoin neʼebé sala, ita mós presiza tau fali hanoin neʼebé tuir Maromak nia hakarak.

7. Oinsá ita bele troka ita-nia hanoin no laran?

⁷ Ita bele troka duni ita-nia hanoin no laran ka lae? Maromak nia Liafuan hatete: “Imi tenke kontinua hafoun imi-nia dalan atu hanoin, no imi tenke tau hahalok foun nuʼudar imi-nia roupa, katak hahalok foun neʼebé Maromak kria tuir ninia hakarak. Hahalok neʼe mak loos liu no laran-metin.” (Éf 4:23, 24) Sin, ita bele troka duni ita-nia hanoin no laran, maibé la fasil atu halo nuneʼe. La toʼo atu tahan deʼit hakarak neʼebé sala no la halo tan sala. Maibé ita mós presiza troka ita-nia “dalan atu hanoin”. Neʼe inklui troka ita-nia hakarak, hahalok no motivu. No ita presiza hakaʼas an atu kontinua halo ida-neʼe.

8-9. Irmaun ida nia esperiénsia hatudu saida kona-ba importante atu troka ita-nia hanoin no laran?

⁸ Mai ita koʼalia kona-ba irmaun ida neʼebé uluk gosta atu halo violénsia. Kuandu nia para hemu tua no la baku malu tan, nia kumpre kritéria atu hetan batizmu, no mudansa neʼebé nia halo fó sasin diʼak ba ninia viziñu sira. Maibé depois nia hetan batizmu, mosu situasaun ida neʼebé koko nia. Iha kalan ida, mane lanu ida bá ninia uma no sadik nia atu baku malu. Foufoun, irmaun neʼe bele kontrola ninia hakarak atu baku malu. Maibé kuandu mane neʼe koʼalia aat Jeová nia naran, nia sai hirus toʼo labele kontrola tan ninia an. Nia sai husi uma no baku mane neʼe. Tanbasá mak nia halo nuneʼe? Maski buat neʼebé nia estuda husi Bíblia ajuda nia atu tahan ninia hakarak atu baku malu, maibé nia seidauk troka ninia dalan atu hanoin.

⁹ Maski nuneʼe, irmaun neʼe la rende an. (Prov 24:16) Ho katuas sira-nia ajuda, nia kontinua halo mudansa. Ikusmai nia kumpre kritéria atu sai katuas kongregasaun ida. Kalan ida iha Reuniaun-Fatin nia liʼur, nia hasoru tan situasaun neʼebé koko nia hanesan uluk. Mane lanu ida atu baku katuas seluk. Saida mak irmaun neʼe halo? Ho kalma no haraik an nia koʼalia ho mane neʼe. Nia ajuda mane neʼe sai kalma no mós ajuda mane neʼe laʼo ba uma. Tanbasá irmaun neʼe nia reasaun la hanesan uluk? Ita-nia irmaun neʼe troka ona ninia dalan atu hanoin. Nia sai ema neʼebé nakonu ho dame no haraik an. Ida-neʼe lori glória ba Jeová.

10. Saida mak ita tenke halo atu troka ita-nia hanoin no laran?

¹⁰ Mudansa hanesan neʼe la akontese derrepente deʼit. Ita presiza “hakaʼas an ho kbiit tomak” ba tempu kleur. (2 Ped 1:5) Mudansa neʼe la akontese tan deʼit ita serbí Jeová ba tinan barak. Ita presiza hakaʼas an atu troka ita-nia hanoin no laran. Iha hakat balu neʼebé bele ajuda ita atu halo mudansa neʼe. Mai ita koʼalia kona-ba hakat sira-neʼe.

11. Oinsá mak orasaun ajuda ita atu troka ita-nia dalan atu hanoin?

¹¹ Hakat importante primeiru mak orasaun. Ita presiza halo orasaun hanesan David: “Oh Maromak, fó laran neʼebé moos ba haʼu, no fó espíritu foun no neon metin ba haʼu.” (Sal 51:10) Ita tenke rekoñese katak ita presiza troka ita-nia dalan atu hanoin no husu Jeová nia ajuda. Oinsá mak ita bele fiar katak Jeová sei ajuda ita atu halo mudansa? Jeová nia promete ba ema Izraél neʼebé ulun-toos iha Ezequiel nia tempu bele hametin ita-nia fiar. Jeová dehan: “Haʼu sei halo sira iha laran ida deʼit, no haʼu sei tau espíritu foun iha sira . . . no fó fali laran neʼebé mamar ba sira, [neʼe katak laran neʼebé simu Maromak nia matadalan].” (Eze 11:19, nota) Jeová hakarak ajuda ema Izraél sira atu halo mudansa, no nia mós hakarak ajuda ita.

12-13. (a) Tuir Salmo 119:59, ita presiza hanoin kleʼan kona-ba saida? (b) Pergunta saida deʼit mak Ita presiza husu ba Ita-nia an?

¹² Hakat importante segundu mak hanoin kleʼan. Bainhira ita lee Maromak nia Liafuan loroloron, ita presiza buka tempu atu hanoin kleʼan kona-ba ita-nia hanoin no sentimentu neʼebé ita presiza troka. (Lee Salmo 119:59; Ebr 4:12; Tgo 1:25) Ita tenke buka-hatene se ita-nia hanoin no sentimentu hetan ona influénsia ka lae husi mundu nia filozofia. Ita presiza rekoñese ita-nia fraku sira no tuirmai hakaʼas an atu hadiʼa fraku sira-neʼe.

¹³ Porezemplu, husu ba Ita-nia an: ‘Haʼu laran-moras ba ema seluk ka lae?’ (1 Ped 2:1) ‘Haʼu sente katak haʼu diʼak liu fali ema seluk tanba haʼu-nia rasa, edukasaun ka rikusoin ka lae?’ (Prov 16:5) ‘Haʼu la hafolin ema neʼebé la iha pozisaun ka rasa hanesan haʼu ka lae?’ (Tgo 2:2-4) ‘Haʼu gosta buat neʼebé Satanás nia mundu oferese ka lae?’ (1 João 2:15-17) ‘Haʼu gosta atividade halimar nian neʼebé nakonu ho violénsia no buat seksuál ka lae?’ (Sal 97:10; 101:3; Amós 5:15) Resposta ba pergunta sira-neʼe, sei ajuda Ita hatene buat neʼebé Ita presiza hadiʼa. Hodi sobu rahun hanoin neʼebé metin ona iha ita-nia laran, ita sei halo ita-nia Aman iha lalehan kontente.​—Sal 19:14.

14. Tanbasá importante tebes atu hili didiʼak ema neʼebé ita ransu?

¹⁴ Hakat importante terseiru mak hili didiʼak ema neʼebé ita ransu. Maski ita nota ka lae, maibé ema neʼebé ita ransu bele fó influénsia ba ita. (Prov 13:20) Ema iha eskola ka serbisu-fatin la ajuda ita atu hanoin iha dalan neʼebé Maromak simu. Maibé ita bele hetan duni belun neʼebé diʼak iha reuniaun Kristaun sira. Iha Reuniaun-Fatin, ita bele hetan laran-manas atu “hatudu domin no hahalok diʼak”.—Ebr 10:24, 25, nota.

15-16. Satanás koko atu troka ita-nia hanoin iha dalan oinsá?

¹⁵ Hanoin-hetan, Satanás hakarak tebes atu troka ita-nia hanoin. Nia uza hanorin no ideia oioin atu estraga ita-nia hanoin neʼebé hetan ona treinu husi Maromak nia Liafuan.

¹⁶ Satanás kontinua halo ema duvida hodi uza pergunta neʼebé uluk nia husu ba Eva iha jardín Eden: “Maromak dehan duni katak . . . ?” (Gén 3:1) Iha mundu  neʼebé Satanás mak ukun, ita rona beibeik pergunta sira hanesan: ‘Maromak la simu duni mane kaben ho mane ka feto kaben ho feto ka lae? Maromak lakohi duni atu Ita selebra Natál no loron-moris ka lae? Ita-nia Maromak haruka duni Ita atu la simu transfuzaun raan ka lae? Maromak neʼebé nakonu ho domin haruka duni Ita atu la ransu tan ho ema neʼebé kongregasaun hasai ka lae?’

17. Saida mak ita presiza halo bainhira ema husu pergunta no koko atu halo ita duvida? Tuir Koloso 2:6, 7, ita sei hetan rezultadu saida?

¹⁷ Ita presiza hametin ita-nia fiar. Se ita la buka-hatene resposta ba pergunta importante kona-ba Ita-nia fiar, ida-neʼe bele halo ita komesa duvida. Sentimentu duvida bele estraga ita-nia hanoin no halakon ita-nia fiar. Entaun saida mak ita presiza halo? Maromak nia Liafuan haruka ita atu troka ita-nia hanoin, hodi nuneʼe ita bele prova ba ita-nia an “Maromak nia hakarak neʼebé diʼak no perfeitu no halo Maromak kontente”. (Rom 12:2) Hodi badinas estuda mesak, ita bele prova ba ita-nia an katak buat neʼebé ita aprende husi Bíblia mak lia-loos. Ita bele fiar metin katak Jeová nia morál mak loos. No hanesan ai-hun neʼebé iha abut metin, ita sei hamriik metin, ita-nia fiar mós sei sai metin.—Lee Koloso 2:6, 7.

18. Saida mak bele ajuda ita atu proteje ita-nia an husi Satanás nia mundu?

¹⁸ Ita rasik mak bele hametin Ita-nia fiar. Tan neʼe, Ita presiza hafoun Ita-nia hanoin no laran. Halo orasaun beibeik, harohan ba Maromak atu fó ninia espíritu santu. Hanoin kleʼan no kontinua buka-hatene kona-ba Ita-nia hanoin no motivu. Hili didiʼak Ita-nia belun no halibur ho ema sira neʼebé bele ajuda Ita troka Ita-nia hanoin. Hodi halo nuneʼe, Ita sei proteje Ita-nia an husi Satanás nia mundu no sobu rahun “hanoin neʼebé sala no ideia hotu neʼebé foti an kontra koñesimentu kona-ba Maromak”.​—2 Kor 10:5.