Pergunta husi lee-naʼin

Tuir Bíblia nia mandamentu kona-ba oinsá atu uza raan, Testemuña ba Jeová hanoin oinsá kona-ba tratamentu médiku neʼebé uza pasiente nia raan rasik?

Ema Kristaun ida nia desizaun la bazeia deʼit ba buat neʼebé nia gosta ka buat neʼebé doutór ida rekomenda, maibé nia mós presiza hanoin didiʼak kona-ba buat neʼebé Bíblia hatete. Neʼe mak desizaun entre nia ho Jeová.

Jeová mak hun ba moris, no nia fó mandamentu atu labele han raan. (Génesis 9:3, 4) Iha Moisés nia Ukun-Fuan ba ema Izraél antigu, Maromak bandu ema atu labele uza sala raan tanba raan reprezenta ema nia moris. Maromak hatete: “Kriatura hotu nia moris mak iha ninia raan, no haʼu fó ona raan ba altár leten atu imi bele hamoos imi-nia sala rasik.” Oinsá se ema oho animál atu han? Maromak hatete: “Nia tenke fakar animál neʼe nia raan no taka ho rai-rahun.” * (Levítico 17:11, 13) Jeová repete mandamentu neʼe dala barak. (Deuteronómio 12:16, 24; 15:23) Ema Judeu nia livru ida (Soncino Chumash) hatete: “Ema labele rai raan atu han maibé tenke fakar ida-neʼe ba rai.” Ema Izraél labele uza ka rai raan husi kriatura sira tanba kriatura sira-nia moris mak Maromak nian.

Bainhira Mesias mate, ema la presiza halo tuir tan Moisés nia Ukun-Fuan. Maski nuneʼe, Maromak nia hanoin kona-ba raan la troka, nia nafatin haree raan nuʼudar buat sagradu. Ho ninia espíritu santu, Maromak dirije apóstolu sira atu haruka ema Kristaun atu ‘hasees an husi raan’. Mandamentu neʼe mak sériu. Mandamentu neʼe importante hanesan ho mandamentu atu hasees an husi sala seksuál no mós adora estátua. (Apóstolu 15:28, 29; 21:25) Depois Funu Mundiál Segundu, ema komesa halo doasaun raan no halo transfuzaun raan, no Testemuña ba Jeová komprende katak ida-neʼe kontra Maromak nia Liafuan. *

Dala ruma, semana balu antes halaʼo operasaun, doutór sei husu atu rai pasiente nia raan balu atu nuneʼe bainhira presiza, doutór sira bele fó transfuzaun raan hodi uza pasiente nia raan rasik. Maibé halibur, rai no halo transfuzaun raan kontra duni buat neʼebé hakerek iha Levítico no Deuteronómio. Maromak bandu atu rai raan. Ema tenke fakar raan ba rai no ida-neʼe fila fali ba Maromak. Ohin loron ita la presiza tan halo tuir Moisés nia Ukun-Fuan. Maski nuneʼe, Testemuña ba Jeová nafatin respeitu prinsípiu sira neʼebé Maromak hakerek iha Moisés nia Ukun-Fuan, no sira hakaʼas an atu ‘hasees an husi raan’. Ita-nia raan tenke fakar ba rai. Tan neʼe, ita la halo doasaun raan no ita mós la rai ita-nia raan rasik atu halo transfuzaun raan. Ida-neʼe kontra Maromak nia ukun-fuan.

Maibé iha mós tratamentu médiku no teste médiku seluk neʼebé envolve pasiente nia raan rasik no neʼe la kontra Bíblia nia prinsípiu sira. Porezemplu, ema Kristaun barak fó lisensa ba doutór sira atu hasai sira-nia raan hodi halo teste médiku no depois teste hotu, raan neʼe sei soe tiha. Maibé iha mós tratamentu médiku seluk neʼebé karik doutór sira rekomenda ba ita no ita presiza hanoin didiʼak kona-ba neʼe.

Porezemplu, durante operasaun balu, doutór sira bele uza tratamentu médiku ida neʼebé hanaran emodiluisaun. Durante operasaun, pasiente nia raan balu sei suli tama ba mákina. No iha tempu hanesan hatama fali ai-moruk been ba pasiente nia isin. Tuirmai raan neʼe suli tama fali ba pasiente nia isin. Iha prosesu seluk tan naran rekuperasaun raan. Durante operasaun, doutór sira halibur pasiente nia raan neʼebé suli tama ba mákina ida, tuirmai mákina hamoos raan neʼe no hatama fali ba pasiente nia isin. Iha mós tratamentu médiku seluk tan, pasiente nia raan sei suli tama ba mákina neʼebé halaʼo funsaun neʼebé baibain ema nia orgaun balu halo (porezemplu, fuan, pulmaun ka rins). Tuirmai raan neʼe suli tama fali ba pasiente nia isin. Iha tan tratamentu médiku seluk, pasiente nia raan sei suli tama ba mákina ida atu nuneʼe bele hasai tiha parte neʼebé la diʼak husi raan. Ka dala ruma objetivu husi prosesu neʼe mak atu hasai raan nia komponente balu hanesan plaketa, no uza fali ida-neʼe nuʼudar tratamentu ba pasiente nia parte isin seluk. Iha mós teste médiku nian neʼebé hasai pasiente nia raan, kahur ho ai-moruk no tuirmai uza fali nuʼudar tratamentu.

Doutór ida-idak halaʼo tratamentu sira-neʼe iha dalan la hanesan, no mós nuʼudar tempu liu daudaun sei mosu dalan foun, tratamentu médiku foun no teste médiku foun. Ami sei la analiza tratamentu médiku ida-idak no la halo desizaun kona-ba neʼe. Ema Kristaun ida-idak tenke deside nanis kona-ba dalan neʼebé doutór sira bele uza ninia raan durante operasaun, tratamentu ruma ka teste médiku. Antes simu tratamentu médiku ruma, ema Kristaun ida-idak tenke buka-hatene uluk kona-ba dalan neʼebé doutór sei uza ninia raan durante operasaun, tratamentu ruma, ka teste médiku. Tuirmai nia tenke halo desizaun rasik tuir ninia konxiénsia. (Haree kaixa.)

Ema Kristaun tenke hanoin kona-ba sira-nia dedikasaun ba Maromak no sira-nia promesa atu ‘hadomi Maromak ho sira-nia laran tomak, moris tomak, kbiit tomak no neon tomak’. (Lucas 10:27) Testemuña ba Jeová hafolin tebes sira-nia relasaun diʼak ho Maromak. Jeová mak hun ba moris, no nia husu ita atu tau fiar ba Jesus nia sakrifísiu. Bíblia hatete: “Liuhusi ninia Oan-Mane nia raan neʼebé sosa fali ita, ita sai livre ona, neʼe katak ita-nia sala sira hetan perdua.”​—Éfeso 1:7.

[Nota-rodapé]

[Kaixa/​Dezeñu]

HUSU BA ITA-NIA AN

Se haʼu-nia raan suli liuhusi mákina ida no karik prosesu neʼe para tiha ba tempu balu, haʼu-nia konxiénsia sei husik haʼu atu haree katak raan neʼe nafatin parte ba haʼu-nia isin no la presiza fakar ba rai ka lae?

Haʼu-nia konxiénsia neʼebé hetan ona treinu husi Bíblia sei sente la diʼak ka lae se durante tratamentu médiku ida, doutór hasai haʼu-nia raan balu, modifika raan neʼe hodi sai ai-moruk, no hatama fali ba haʼu-nia isin ka uza nuʼudar tratamentu ba kanek durante operasaun?