Fagnonteneagne Boake amo o Mpamakio

Fomba ty ndaty amy izao ty mifandom-bera. Faie nagnino o Vavolombelo i Jehovah-o ro tsy manao izay, ndra tie tsy mirehake izay aza ty Baiboly?

Fa fomba ty ndaty fa ela ty mifandom-bera naho fa minogne divay, ndra raha hafa misy toake. Tena miparitake o fomba iohoe, ndra tie tsy tena mitovy aza ty fomba anoa o ndatio aze. Mateteke, ndaty raike ty manognogne i firarean-tsoay. Magnonjogne i vera’ey magnambone reke sady magniry ty ndaty raike hafa mba ho salama, ndra ho sambatse, ndra ho ela velogne, naho ty maro hafa. Ty hafa ka mirehake ho fagnekeagne izay, ndra magnonjogne i vera’ey sady minogne amy i divai’ey. Hoe raha fanehoagne fahalalam-pomba avao o fombafomba iohoe fa tsy misy maharaty aze, arake ty fihevera ty ndaty maro aze. Faie misy anto’e soa tsy anoa ty Vavolombelo i Jehovah izay.

Tsy tihoe tsy magniry ty hafa ho salama naho ho sambatse o Kristianao. Naho fa nanoratse hoahy o fiangonagneo ty filan-keve-pitantanagne tamy ty taonjato voaloha’e, le namaragne ty reha’e hoe izao: “Lonike abey mba hanintsigne nareo!” (Asan’ny Apostoly 15:29) Nisy ka mpanompo i Jehovah hafa nirehake tamy i mpanjakay tie: ‘Ho velogne nainai’e abey [rehe] tompoko!’ ndra “Ho ela velogne abey rehe mpanjaka.” 1 Mpanjaka 1:31; Nehemia 2:3.

Faie inogne ty nahavy o ndatio hifandom-bera? Hoe ty Fitalakesan-davitse (angilé) tamy 1 Janvie 1968, naho fa nagneregne ty raha rehafe ty Fangalan-kilala Britanika (1910, angilé), Boke faha-13, peje 121: ‘Fombafomba tamy ty fivavahagne taloha ty mifandom-bera ho fagnomezam-boninahitse o andrianagnahareo naho o mateo. Azo antoke fa tena boake amy izay i mifandom-beray ho fagniriagne fahasalamagne i ndaty velogney. Nagniligne toake hoahy ty andrianagnahare’e o Grikeo naho o Romanao naho fa nihinagne. Nifandom-bera mba ho fagnomezam-boninahitse irey naho ty mate ka iareo, naho fa nanao fete.’ Izao ty mbe rehafe i fangalan-kilalay: “Azo antoke fa nisy fifandrambesa’e tamy ty fifandognam-bera ho firarean-tsoa o velogneo, i fombafomba nitovitovy tamy ty fanoloragne fagnatetse rey.”

Mbe maregne avao vao zay tie amy izao? Hoe ty boke raike miomba ty toake naho ty kolontsaigne, niboake tamy 1995: “[Ty mifandom-bera] varagne ro sisa tamy ty fombafomba o mpanompo sampy talohao, tamy iareo nagniligne raha inomegne hoahy ty andrianagnahare’ey. Nanolotse lio ndra divay iareo tamy izay naho fa nisy raha nirie’e ndra tea’e ho azo, sady nirehake tie ‘ho ela velogne!’ ndra ‘lonike mba ho salama iaby e!’”

Maregne fa tsy ze raha ndra fombafomba niatomboke tamy ty fivavahan-diso taloha, ndra ty mitovitovy amy izay, le tsy azo ty Kristiana ampiasaegne ndra atao. Izao ohatse ty rehafe ty fangalan-kilala raike marom-pahafantatse miomba o apongabeindagnitseo: ‘Hoe nagnamasigne naho nampiasa io tamy ty fivavaha’e o mpanompo sampio.’ Nampagnisien’Andrianagnahare peta-kofehe saren’apongabeindagnitse ty moron’akanjo o mpisorom-beio. Niravahegne ty sare io ka i tohagne saba tamy i tempoly i Solomonaỳ. (Eksodosy 28:33; 2 Mpanjaka 25:17) Nanagne heve’e ara-pivavahagne ka ty peratse mariazy tie taloha, faie tsy fanta ty ankamaroa ty ndaty amy izao zay. Mihevetse iareo fa famantaragne avao io tie fa manambaly ty ndaty raike.

Akore ka i fampiasagne divay amy i fotoam-pivavaha ty mpanompo sampỳ? Nisy fotoagne, i mpivavake tamy i Bala ta Sekema tao rey, le ‘nilitse tan-tragno i andrianagnahare’ey ao, nihinagne naho ninogne sady nagnozogne i Abimeleka’ ana i Gideona. (Mpitsara 9:22-28) Naho ty heve’o, le ho nisy mpanompo i Jehovah tsy nivalike vao niarake ninogne tamy iareo, sady va’e nangatake andrianagnahare diso mba hagnisy raty i Abimeleka? Hoe ka ty Amosa miomba Israelita nivalike tamy i Jehovah rey: “Mitsileralera ambone i akanjo natao antokey eo iareo, agnila i alitara rey iaby. Ivilia’e divay ty vola azo’e tamy ty ndaty nampandoave’e saze, le inome’e an-tragno i andrianagnahare’ey ao naho fa avy eo.” (Amosa 2:8) Ho nandrambe anjara tamy izay vao ty tena mpivavake tamy i Jehovah, le nagniligne divay hoahy o andrianagnahareo, ndra ninogne tamy izay aza? (Jeremia 7:18) Ho nagnonjogne i vera’ey vao iareo sady nangatake i andrianagnahare disoy hitahy ty ndaty raike mba hanagna’e hoavy sambatse?

Maregne fa kindraike o mpanompo i Jehovah-o le nagnonjogne ty tagna’e sady nangatake fitahiagne. Nivavake tamy i Andrianagnahare maregney iareo tie tamy izay. Hoe ty Baiboly: ‘Nitsangagne taloha i alitara i Jehovah-y eo ty Solomona, sady namelatse ty tagna’e nanandrife i lagnitsey mba hivavake, le nanao tihoe: O Jehovah Andrianagnahare o Israelio, tsy misy Andrianagnahare manahake azo. Lonike abey rehe mba hijanjigne an-dagnitse misy azo agne! Lonike abey rehe mba hijanjigne le hamela heloke!’ (1 Mpanjaka 8:22, 23, 30) “Nagnonjogne ty tagna’e” iaby ka o ndatio, naho fa “nisaotse i Jehovah” ty Ezra. ‘Namale [iareo naho fa niavy eo] tie: Amena, Amena; sady niondreke tagnatreha i Jehovah eo.’ (Nehemia 8:6; 1 Timoty 2:8) Mazava hoaze fa tsy nagnonjogne ty tagna’e mba hangatake fitahiagne amy ty andrianagnahare ty vintagne o mpanompo i Jehovah tsy nivalikeo.​—Isaia 65:11.

Maro amy ty ndaty mifandom-bera amy izao ro tsy mieretseretse tie mangatake fitahiagne amy ty andrianagnahare diso iareo. Toe tsy hai’e iaby aza ty magnazava ty anto’e mahavy aze magnonjogne magnambone i vera’ey. Faie ndra tie tsy miasa loha amy izay aza iareo, le tsy toko’e hagnorike avao amy izao ty raha atao’e o tena Kristianao.

Tsy misy ndaty tsy hahay tie misy fombafomba fanoe o ndatio tsy atao ty Vavolombelo i Jehovah. Maro ohatse ty manao fombafomba ho fagnajagne o saim-pirenenao, faie tsy mihevetse izay ho fivavahagne amy io. Tsy mikalagne o ndatio tsy hanao izay ty tena Kristiana, faie tsy mandrambe anjara avao. Maro ty Vavolombelogne tsy nagnatreke ty fotoagne nanoagne irey, naho fa fanta’e mialoha zay, mba tsy hahaboseke ty hafa. Tapa-kevetse ty tsy hanao fombafomba mampiseho hatea tanendrazagne iareo, satria tsy mifagnarake amy ty raha rehafe ty Baiboly zay. (Eksodosy 20:4, 5; 1 Jaona 5:21) Maro amy ty ndaty mifandom-bera amy izao ro tsy mihevetse izay ho fombafomba ara-pivavahagne. Faie misy anto’e marem-pototse tsy anoa ty Kristiana io. Boake amy ty fivavahan-diso o fanao iohoe, sady mbe heveregne ho mangatake fitahiagne amy i ‘lagnitsey’ ze manao io. Hoe raha mangatake fitahiagne amy ty fagnahy mahery noho o ndatio iareo.​—Eksodosy 23:2.