MATETEKE nampianatse miomba ty vavake ty Jesosy. Nivavake “tagn’arabey” egne o mpitondra fivavahagne jiosy tamy ty andro’eo. Te “hotrea o ndaty” naho te ho deraegne iareo, le nanao vavake lavabey, sady nagnerenkeregne rehake mitovy avao. Va’e nino iareo fa hijanjigne aze ty Andrianagnahare naho manao hoe izay reke. (Matio 6:5-8) Faie nabaribary i Jesosy fa tsy misy dika’e zay. Nanjare fanta o ndaty soa fò areke ze tsy toko’e hatao naho fa mivavake. Faie nampianatse raha hafa ka reke.

Nampianare’e fa toko’e hotrea amy i vavake ataontikagney tie irientikagne ty hagnamasigne ty tahinan’Andrianagnahare naho ty hiavia i Fanjakà’ey, vaho ty hagnatanterahagne ty zoton’arofo’e. Nirehake ka ty Jesosy fa afake mivavake miomba ty raha ilaentikagne manokagne tika. (Matio 6:9-13; Lioka 11:2-4) Nampiasa fagnoharagne reke mba hampisehoagne fa mila managne fikirizagne naho finoagne vaho fiambaneagne tikagne, naho fa mivavake. (Lioka 11:5-13; 18:1-14) Nagnomey modely ka reke mba hagnamafesagne izay.​—Matio 14:23; Marka 1:35.

Nagnasoa ty vavake natao i mpiana’e rey o toromareke rehoe. Faie tamy i halegne fara’e niaraha’e tamy i mpiana’e reỳ reke ty vaho nagnomey lesogne raike tena lahibey miomba ty vavake.

Nampahery i apostoli’e tsy mivalike rey ty Jesosy tamo o halegne iohoe. Fotoagne mete soa hampahafantaragne raha vaovao tamy izay. Hoe reke: “Izaho ro lalagne, naho hamarenagne, sady havelogne. Tsy misy mahazo mandeha mbaman-dRaeko mbeo naho tsy amy ty alalako.” Nampitamà reke naho fa niavy eo tie: “Ze raha iaby angatahe’areo amy ty agnarako, le hataoko mba hagnomeagne voninahitse i Raey amy ty alala i Anakey. Naho mangata-draha amy ty agnarako nareo, le hanoeko zay.” Hoe reke naho fa namaragne aze: “Mbe tsy nangatake ndra ino ndra ino tamy ty agnarako nareo hatrake amy izao. Mangataha le hahazo nareo, mba ho feno ty hafalea’areo.”​—Jaona 14:6, 13, 14; 16:24.

Tena raha lahibey o reha i Jesosy iohoe. Nirehake ty boke raike fa ‘ninday fiovagne lahibey tamy ty fomba fivavahagne’ o rehake rehoe. Nampahafantatse fomba vaovao ifandrambesagne amy i Jehovah ty Jesosy tie teo, fa tsy nirehake tie ama’e agne ka ro amantagnagne i vavakey fa tsy aman’Andrianagnahare sasa.

Maregne fa nijanjigne ty vavake natao ty mpanompo’e tsy nivalike avao ty Jehovah. (1 Samoela 1:9-19; Salamo 65:2) Faie naho fa nanao fifagnekeagne tamy ty firene o Israelio reke, le tsy maintsy nagneke ty ndaty raike fa vahoake finilin’Andrianagnahare o Israelitao naho tea’e ty hojanjignen’Andrianagnahare ty vavake atao’e. Naho fa vita ka i tempoly i Solomonay, le tsy maintsy nagneke ty ndaty raike fa tao ty finilin’Andrianagnahare hanoloragne i fagnatetsey. (Deoteronomia 9:29; 2 Tantara 6:32, 33) Faie tsy naharetse ela ze fomba fivavahagne zay. Nirehake ty apostoly Paoly fa “talinjo ty raha soa ho avy” i Lalàna nimeagne o Israelitaoy naho ty fagnatetse natao tamy i tempolỳ tao, “fa tsy tena ie.” (Hebreo 10:1, 2) Tsy maintsy sinolo amy “i tena iey” i alokey. (Kolosianina 2:17) Tsy miankigne amy ty fankatoavagne ty Lalà i Mosesy sasa ty fifandrambesa ty ndaty raike amy i Jehovah, nanomboke tamy ty taogne 33, fa miankigne amy ty fankatoavagne “i tena iey”, le i Kristy Jesosy.​—Jaona 15:14-16; Galatianina 3:24, 25.

Nirehake fomba tsotra ifandrambesagne amy i Jehovah ty Jesosy. Nirehafe’e fa namantikagne reke sady mpagnelagnelagne antikagne aman’Andrianagnahare, le mahavy ty vavake ataontikagne ho janjy i Jehovah sady hahazo vale’e. Nagnino ty Jesosy ro afake manao izay?

Tsy fagneva ty hanagne fifandrambesagne soa amy i Jehovah, i Andrianagnahare masigney tikagne iaby, satria nandova ota. Tsy afake magnalio antikagne amy izay ndra ty fanompoagne ndra ty fagnatetse ataontikagne. (Romanina 3:20, 24; Hebreo 1:3, 4) Faie nanolotse i fiai’e voririkey ty Jesosy, mba hagnafahagne o ndaty fagneva ty havotagneo. (Romanina 5:12, 18, 19) Naho magniry hafahagne amy ty ota areke tikagne, le tsy maintsy maneho finoagne i sorogne natao’ey sady mivavake amy ty agnara’e. Amy izay avao vaho halio agnatreha i Jehovah eo, sady ‘hahavany’ hirehake ama’e tikagne.​—Efesianina 3:11, 12.

Naho mivavake amy ty agnara i Jesosy tikagne, le asehontikagne fa mino ty andraikitse tana’e amy ty fagnatanterahagne ty zoton’arofon’Andrianagnahare tikagne. Misy telo zay fara fahakede’e. 1) “Anak’agnondrin’Andrianagnahare” reke, le ty sorogne natao’e ro hahazoantikagne famelan-keloke. 2) Nivelomegne tamy ty mate reke, sady manao ty asa ty “mpisorom-bey” mba handrambesantikagne soa amy i solovoigney. 3) I reke avao ro “lalagne” mampifandrambe antikagne amy i Jehovah.​—Jaona 1:29; 14:6; Hebreo 4:14, 15.

Magnomey voninahitse i Jesosy tikagne naho fa mivavake amy ty agnara’e. Fagneva izay reke, satria zoton’arofo i Jehovah naho ‘amy ty agnara i Jesosy ro hitongaleha ty ongotse iaby, naho hagnekea ze lela iaby fa i Jesosy Kristy ro Tompo ho voninahin’Andrianagnahare Baba.’ (Filipianina 2:10, 11) Mbe raha lahibey noho izay tihoe, naho fa mivavake amy ty agnara i Jesosy tikagne, le magnomey voninahitse i Jehovah, i nagnomey i Ana’ey mba hahasoa antikagney.​—Jaona 3:16.

Meagne agnaragne maro ty Jesosy ty amy Baiboly ao, mba hahatakarantikagne fa managne anjara asa lahibey reke. I agnaragne rey ro magnampe antikagne hahatsapa ty soa rambesentikagne, boake amy ty raha natao i Jesosy taloha naho amy izao vaho amy ty hoavy. (Henteo “ Ty Anjara Asa Lahibey Tana i Jesosy”.) Tena nimeagne “agnaragne ambone noho ty hafa vata’e ty Jesosy. * Fa nimeagne aze ze fahefagne an-dagnitse agne naho an-tane etoa.​—Filipianina 2:9; Matio 28:18.

Mila mivavake amy ty agnara i Jesosy vata’e tikagne naho teantikagne ho janjy i Jehovah ty vavake ataontikagne. (Jaona 14:13, 14) Faie tsy teantikagne hatao fahazaragne avao areke i tihoey “amy ty agnara i Jesosy.” Ino ty anto’e?

Intoy misy ohatse: Faragnegne amy ty rehake hoe izao mateteke ty taratasy alefa amy ty ndaty ambone: “Rambeso aba ty haja naho ty voninahitse atoloko azo.” Naho ty heve’o, tena mampiseho ty fihetseham-po i mpanoratsey vao io, sa fombafomba mahazatse avao? Toko’e ho raha lahibey mandikoatse i famaragnan-drehake amy i taratasỳ, ty fampiasantikagne ty rehake tihoe “amy ty agnara i Jesosy.” Maregne fa toko’e “hivavake lognandro” tikagne, faie toko’e hataontikagne amy ty fontikagne io fa tsy hatao fahazaragne avao.​—1 Tesalonianina 5:17; Salamo 119:145.

Ino ty toko’e hatao’o mba tsy hanjare fahazaragne avao ty fampiasa’o ty rehake tihoe “amy ty agnara i Jesosy”? Saintsaigno i toetse i Jesosy fanjaka iaby rey. Saintsaigno ka ty raha fa natao’e naho ty mbe hatao’e ho azo. Toko’e hisaotse naho hidera i Jehovah rehe naho fa mivavake, noho ireke nampiasa i Ana’ey tamy ty fomba miambake. Naho manao izay rehe, le hatoky i fampitamà i Jesosy tihoey: “Ndra ino ndra ino angatahe’areo amy i Baba, le homea’e anareo amy ty agnarako zay.”​—Jaona 16:23.