Magnova Ndaty ty Baiboly

INO ty natao i ampela raikey mba hampisy dika’e ty fiaigna’e, ie amy izao tena nijale reke tamy tie reke mbe nikede? Ino ty nahavy i mpigoreve mpiarotegney nanjare mpitory tea filongoagne? Vakio ato ty tantara iareo.

“Tena nagniry ty hoteavegne raho.”​—INNA LEZHNINA

TERAKE TAMY: 1981

FIRENENA NIAVIA’E: ROSIA

FIAIGNA’E TALOHA: NIJALE MAFE TAMY TIE MBE NIAJAJA

TY FIAIGNAKO TALOHA: Naho vaho naterake raho, le fa nikaregnegne, sady toe karegnegne ka ty rae aman-dreneko. Nahafinaritse ty fiaignako, hatrake amy iraho ni-6 taogne. Nisarake ty Baba naho i Nene naho fa niavy eo. Mbe tena kidikidy raho, faie le fa nifantako ty dika tihoe misaram-panambaliagne zao, sady tena nampalahelo ahy zay. Nijanogne ta Troitsk agne ty Baba naho i zokeko lahilahỳ tafara izay, fa i Nene nifindra ta Tcheliabinsk agne, sady niente’e niarake tama’e raho. Nanambaly indraike ty Nene naho fa tafara tatoy. Mamo lava i vali’ey sady mateteke namono ty jera anay amy i Nene reke.

Nimate tagnate rano ey i zokeko lahilahỳ tamy 1993. Tena nimafe tama’ay keleian-draike zay. Nanjare ninon-toake ty Nene, sady niarake nampijale ahy iareo amy i vali’ey. Nanomboke nipay fiaignagne soasoa raho. Tena nagniry ty mba hoteavegne raho. Nandeha niangogne tamy ty fivavahagne sambe hafa raho mba hahazoako fampionognagne, faie tsy nahatrea.

TY NAGNOVÀ TY BAIBOLY TY FIAIGNAKO: Tamy iraho ni-13 taogne, le nirehake tantara amy Baiboly ao tamako ze mpiara-mianatse amako Vavolombelo i Jehovah zay. Teako ohatse ty tantara i Noa naho i Joba. Nanompo an’Andrianagnahare iareo ndra tie nijale aza. Nianatse Baiboly areke raho tsiela tafara izay, sady niarake nivory tamy ty Vavolombelo i Jehovah.

Nanjare nahafantatse raha maro raho noho ty fianarako Baiboly. Fale raho satria nahafantatse fa managne tahinagne ty Andrianagnahare. (Salamo 83:18) Nampieke ahy ka ty nahatrea fa maregne ty raha rehafe ty Baiboly miomba ty fiaignagne amy ty “andro fara’e.” (2 Timoty 3:1-5) Fale ka raho nahafantatse fa mbe hovelomegne ty mate, le hahatrea i zokeko lahilahỳ raho.​—Jaona 5:28, 29.

Faie tsy ze ndaty iaby ro fale naho fa nahatrea ahy nianatse. Tena nalaigne o Vavolombelo i Jehovah-o ty Nene naho i vali’ey. Natao iareo ze tsy hianarako Baiboly sasa. Faie teako ze raha nianarako, le tsy nagneke hijanogne raho.

Tsy mora ty niatreke ty fanohera o keleiakò. Faie nisy loza niseho indraike. Mate an-drano egne ka ty zaiko lahilahy, ie amy izao mba fa niarake nivory amako tamo o Vavolombelo i Jehovah-o agne. Faie nanohagne ahy avao i Vavolombelogne rey. Tamy iareo teo ty nahazoako i hatea nirieko ho azo hatrake amy izaỳ. Nino raho fa ty fivavaha iareo ty maregne. Natao badisa raho tamy 1996, le nanjare Vavolombelo i Jehovah.

TY SOA NIRAMBESEKO: Nanambaly i Dmitry raho, fa ho enen-taogne zay sady tena mahafinaritse reke. Manompo amy ty birò ty sampa ty Vavolombelo i Jehovah a Saint-Péterbourg etoagne zahay mirovaly. Tsy le nanohetse sasa i rae aman-dreneko rey naho fa nandeha ty fotoagne.

Tena fale raho fa nahafantatse i Jehovah! Manjare misy dika’e ty fiaignako, noho iraho manompo aze.

“Nisy fagnonteneagne maro nampivali-doha ahy.”​—RAUDEL RODRÍGUEZ RODRÍGUEZ

TERAKE TAMY: 1959

FIRENENA NIAVIA’E: KIBA

FIAIGNA’E TALOHA: MPIGOREVE AMO O FITONDRAGNEO

TY FIAIGNAKO TALOHA: Ta La Havane, a Kiba agne ty niterahagne ahy. Nibey tamy ty faritse mahantra raho, sady fa nahazatse ty nahatrea ndaty mialy an-dalagne ey. Nanjare nahaliagne ahy ty nagnente judo naho ty fagnatanjahan-tegna misy aly hafa naho fa nihabey raho.

Nahay raho ty tan-dakilasy agne, le nandrisike ahy hianatse amy oniverisite ey o rae aman-drenekò. Nanjare nieretseretse raho naho fa nianatse tagne fa mila ovagne ty rafitse politike i Kiba. Nanomboke nigoreve areke raho. Nanafike ze polisy raike zay zahay amo o mpiara-mianatse amakò, satria tea’ay halaegne i basi’ey. Tena naratse ty loha i polisỳ tamy izay. Ginadra zahay amy i mpiara-mianatse amakoy. Voaheloke ho mate zahay, le antoko mpitifitse ty hamono anay. Vaho 20 taogne raho tamy izay, faie fa ho mate sahady!

Naho fa irery tam-pirizò tao raho, le nieretseretse ty hataoko naho fa ho tifiregne. Tsy teako ho trea tie matahotse raho. Faie nisy fagnonteneagne maro nampivali-doha ahy. Nieretseretse raho tie: ‘Nagnino ro maro o tsy rare’eo? Izao avao vao ty fiaignagne?’

TY NAGNOVÀ TY BAIBOLY TY FIAIGNAKO: Tamy ty fara’e, le novagne i saze’aỳ. Nanjare voaheloke higadra 30 taogne zahay. Tamy izay raho ro nifankatrea tamy ty Vavolombelo i Jehovah ila’e ginadra noho ty finoa’e. Nampieke ahy iareo satria bey herim-po faie tea filongoagne. Tsy boseke ndra nagniry ty hamale fate iareo ndra tie ginadra tsy ara-drare’e aza.

Nampianare o Vavolombelogne reo ahy fa nanagne raha safiriegne soa hoahy o ndatio ty Andrianagnahare. Natoro iareo ahy amy Baiboly ao fa hovagne ho paradisa ty tane toy, sady tsy hisy sasa ty hampiarotegne naho ty tsy rare’e. Nampianare iareo ahy ka fa ho feno ndaty soa fagnahy ty tane toy, sady ho afake hiaigne amy tontolo voririkey ao iareo.​—Salamo 37:29.

Teako ty raha nianarako tamy i Vavolombelogne rey faie tena nifanohetse amy ty ahy iareo ty toetseko. Nihevetse raho fa tena tsy ho vitako ze o tsy hizilike amy ty politike zao, ndra tsy hamale fate ka. Nanapa-kevetse areke raho fa hamaky Baiboly irerike. Naho fa vitako zay, le nitreako fa ty Vavolombelo i Jehovah avao ty manao manahake i Kristiana voaloha’e rey.

Fantako boake amy ty fianarako Baiboly fa nila nanao fiovagne lahibey raho. Nila nihasoaeko ohatse ty fomba firehako, satria zatse nirehake raty raho. Nila niala tamo o sigarao ka raho. Tsy toko’e hanohagne ndra ia ndra ia ka raho naho fa misy aly hevetse ara-politike. Tsy mora ty nanao o fiovagne rehoe, faie nivitako tsikede avao noho ty fagnampea i Jehovah.

Agnisa ty tena nisarotse tamako ty nifehe tegna naho fa niboseke. Hatrake amy izao aza raho mbe mivavake mba hahay hifehe tegna. Tena nagnampe ahy ohatse ty Ohabolana 16:32, manao tihoe: “Ndra aleo ndaty tsy tsiela boseke ta ty lahilahy maozatse, sady ndra aleo ndaty mahafehe tegna ta ty ndaty maharese tanàgne.”

Natao badisa raho tamy 1991, le nanjare Vavolombelo i Jehovah. Tagnate ty barìka tam-pirizo tagne ty nanoagne aze. Nafahagne ty ila’e tama’ay herentaogne tafara tatoy sady nalefa ta Espaigne teto satria nanagne keleiagne teto. Vaho niavy teto raho, le avy le nagnatreke ty fivoria ty Vavolombelo i Jehovah. Hoe raha fa nahafantatse ahy fa ela i Vavolombelogne rey, le tena nirambese iareo soa raho. Nampea iareo ka raho mba hanomboke fiaignagne vaovao indraike.

TY SOA NIRAMBESEKO: Sambatse raho ty amy izao manompo i Jehovah miarake amy i valiko naho i anak’ampela’ay rey. Fale raho mandany ty fotoako hagnampeagne ty hafa hianatse Baiboly. Mieretseretse ty raha niseho tamy iraho hovonoegney raho kindraike, le fale fa nandrambe soa maro nanomboke teo. Tsy tihoe velogne avao raho ty amy izao, fa managne fanantenagne ka. Tsy ligneko ty hiavia i Paradisay, le amy izay hanjaka ty rare’e sady “tsy hisy sasa ty fahafatezagne.”​—Apokalypsy 21:3, 4.

[Hevetse Lahibey]

“Fale raho satria nahafantatse fa managne tahinagne ty Andrianagnahare”

[Sare]

Fale zahay mirovaly mampiasa DVD misy o boke naho gazete amy ty baiko moagneo, mba hitoriagne amy ty karegnegne