లేవీయకాండం 12:1-8
-
ప్రసవం తర్వాత శుద్ధీకరణ (1-8)
12 యెహోవా మోషేతో ఇంకా ఇలా అన్నాడు:
2 “నువ్వు ఇశ్రాయేలీయులకు ఇలా చెప్పు: ‘ఒక స్త్రీ గర్భవతి అయ్యి మగబిడ్డను కంటే, రుతుస్రావం జరుగుతున్న రోజుల్లోలాగే ఏడురోజుల పాటు ఆమె అపవిత్రురాలిగా ఉంటుంది.+
3 ఎనిమిదో రోజున ఆ పిల్లవాడికి సున్నతి చేయాలి.+
4 రక్తస్రావం కారణంగా ఏర్పడిన అపవిత్రతను శుద్ధి చేసుకోవడానికి ఆమెకు ఇంకా 33 రోజులు పడుతుంది. తన శుద్ధీకరణ రోజులు పూర్తయ్యే వరకు ఆమె పవిత్రమైన ఏ వస్తువునూ ముట్టకూడదు, పవిత్ర స్థలంలోకి రాకూడదు.
5 “ ‘ఒకవేళ ఆమె ఆడపిల్లను కంటే, రుతుస్రావం సమయంలోలాగే 14 రోజులపాటు ఆమె అపవిత్రురాలిగా ఉంటుంది. రక్తస్రావం కారణంగా ఏర్పడిన అపవిత్రతను శుద్ధి చేసుకోవడానికి ఆమెకు ఇంకా 66 రోజులు పడుతుంది.
6 కుమారుడు లేదా కూతురు పుట్టిన తర్వాత శుద్ధీకరణ రోజులు పూర్తయినప్పుడు, ఆమె దహనబలి కోసం ఏడాది మగ గొర్రెపిల్లను,+ పాపపరిహారార్థ బలి కోసం ఒక పావురం పిల్లను లేదా ఒక గువ్వను ప్రత్యక్ష గుడారపు ప్రవేశ ద్వారం దగ్గరికి తీసుకొచ్చి యాజకునికి ఇవ్వాలి.
7 అతను యెహోవా ముందు దాన్ని అర్పించి, ఆమె కోసం ప్రాయశ్చిత్తం చేస్తాడు. అప్పుడు ఆమె తన రక్తస్రావం వల్ల కలిగిన అపవిత్రత నుండి శుద్ధురాలు అవుతుంది. ఒక స్త్రీ కుమారుణ్ణి గానీ కూతుర్ని గానీ కన్నప్పుడు పాటించాల్సిన నియమం ఇది.
8 ఒకవేళ గొర్రెను అర్పించేంత స్తోమత ఆమెకు లేకపోతే, ఆమె రెండు గువ్వల్ని గానీ రెండు పావురం పిల్లల్ని గానీ తీసుకురావాలి.+ ఒకటి దహనబలి కోసం, ఇంకొకటి పాపపరిహారార్థ బలి కోసం. అప్పుడు యాజకుడు ఆమె కోసం ప్రాయశ్చిత్తం చేస్తాడు, ఆమె శుద్ధురాలు అవుతుంది.’ ”
