రాజులు మొదటి గ్రంథం 9:1-28
9 సొలొమోను యెహోవా మందిరాన్ని, రాజభవనాన్ని, తాను కోరుకున్న ప్రతీదాన్ని కట్టించడం పూర్తిచేసిన తర్వాత,+
2 యెహోవా గిబియోనులో కనిపించినట్టే సొలొమోనుకు రెండోసారి కలలో కనిపించాడు.
3 యెహోవా అతనితో ఇలా అన్నాడు: “నువ్వు నా ముందు చేసిన ప్రార్థనను, అనుగ్రహం కోసం నువ్వు చేసిన విన్నపాన్ని నేను విన్నాను. నా పేరును శాశ్వతంగా అక్కడ ఉంచడం ద్వారా,+ నువ్వు కట్టిన ఈ మందిరాన్ని నేను పవిత్రపర్చాను; నా దృష్టి, నా హృదయం ఎప్పుడూ అక్కడ ఉంటాయి.+
4 అయితే నువ్వు నేను ఆజ్ఞాపించినవన్నీ చేస్తూ+ నా నియమాలకు, తీర్పులకు లోబడుతూ+ నీ తండ్రి దావీదులా నా ఎదుట యథార్థ హృదయంతో,+ నిజాయితీగా+ నడుచుకుంటే,+
5 ‘ఇశ్రాయేలు సింహాసనం మీద కూర్చునే ఒక వ్యక్తి నీ రాజవంశంలో ఎప్పుడూ ఉంటాడు’+ అని నేను నీ తండ్రి దావీదుకు వాగ్దానం చేసినట్టు, ఇశ్రాయేలు మీద నీ రాజ్య సింహాసనాన్ని ఎల్లప్పుడూ స్థిరపరుస్తాను.
6 అయితే మీరు గానీ, మీ కుమారులు గానీ నన్ను అనుసరించడం మానేసి, నేను మీకు ఇచ్చిన నా ఆజ్ఞల్ని, శాసనాల్ని పాటించకుండా, వెళ్లి వేరే దేవుళ్లను సేవించి వాటికి మొక్కితే,+
7 నేను ఇశ్రాయేలీయులకు ఇచ్చిన దేశం నుండి వాళ్లను కొట్టివేస్తాను,+ నా పేరు కోసం నేను పవిత్రపర్చిన ఈ మందిరాన్ని నా కళ్లముందు ఉండకుండా తీసేస్తాను,+ అన్నిదేశాలు ఇశ్రాయేలీయుల్ని ఈసడించుకుంటాయి,* అపహాస్యం చేస్తాయి.+
8 ఈ మందిరం శిథిలాల దిబ్బ అవుతుంది.+ దీని పక్కన నుండి వెళ్లే ప్రతీ ఒక్కరు ఆశ్చర్యంగా చూస్తూ, ఈల వేస్తూ, ‘యెహోవా ఈ దేశాన్ని, ఈ మందిరాన్ని ఎందుకు ఇలా చేశాడు?’ అని చెప్పుకుంటారు.+
9 అప్పుడు వాళ్లు ఇలా అంటారు, ‘ఎందుకంటే వాళ్లు తమ పూర్వీకుల్ని ఐగుప్తు దేశం నుండి బయటికి తీసుకొచ్చిన తమ దేవుడైన యెహోవాను విడిచిపెట్టారు; వేరే దేవుళ్లను హత్తుకుని వాటికి మొక్కి, వాటిని సేవించారు. అందుకే యెహోవా వాళ్ల మీద ఈ విపత్తునంతటినీ తీసుకొచ్చాడు.’ ”+
10 సొలొమోను 20 సంవత్సరాల్లో రెండు భవనాల్ని అంటే యెహోవా మందిరాన్ని, రాజభవనాన్ని కట్టించడం పూర్తిచేశాడు.+
11 తూరు రాజైన హీరాము+ సొలొమోనుకు దేవదారు, సరళవృక్ష మ్రానుల్ని, సొలొమోను కోరుకున్నంత బంగారాన్ని పంపించాడు. కాబట్టి సొలొమోను రాజు హీరాముకు గలిలయ ప్రాంతంలో 20 నగరాల్ని ఇచ్చాడు.
12 సొలొమోను తనకిచ్చిన నగరాల్ని చూడడానికి హీరాము తూరు నుండి వచ్చాడు, కానీ అవి అతనికి నచ్చలేదు.*
13 అతను, “నా సహోదరుడా, నువ్వు నాకు ఇలాంటి నగరాలు ఇచ్చావేంటి?” అన్నాడు. కాబట్టి అవి నేటివరకు కాబూల్‌ దేశం* అని పిలవబడుతున్నాయి.
14 ఈలోపు హీరాము సొలొమోను రాజుకు 120 తలాంతుల* బంగారం పంపించాడు.+
15 సొలొమోను యెహోవా మందిరాన్ని, తన రాజభవనాన్ని, మిల్లోను,*+ యెరూషలేము ప్రాకారాన్ని, అలాగే హాసోరును,+ మెగిద్దోను,+ గెజెరును+ కట్టించడం కోసం వెట్టిచాకిరి చేయడానికి పిలిపించిన వాళ్ల+ వివరాలు ఇవి.
16 (ఐగుప్తు రాజైన ఫరో గెజెరును స్వాధీనం చేసుకుని దాన్ని అగ్నితో కాల్చేశాడు. అతను ఆ నగరంలో నివసిస్తున్న కనానీయుల్ని+ కూడా చంపాడు. అతను ఆ నగరాన్ని తన కూతురికి అంటే సొలొమోను భార్యకు పెళ్లి కానుకగా* ఇచ్చాడు.)
17 సొలొమోను గెజెరును, దిగువ బేత్‌-హోరోనును పటిష్ఠం చేశాడు;+
18 అంతేకాదు బాలాతును,+ ఇశ్రాయేలు దేశంలో* ఎడారిలో ఉన్న తామారును,
19 అలాగే సొలొమోను తన గోదాముల నగరాలన్నిటినీ, రథాల నగరాల్ని,+ గుర్రపురౌతుల నగరాల్ని కట్టించాడు. అతను యెరూషలేములో, లెబానోనులో, తన పరిపాలన కింద ఉన్న దేశమంతటిలో తాను కోరుకున్న ప్రతీది కట్టించాడు.
20 ఇశ్రాయేలీయులుకాని అమోరీయుల, హిత్తీయుల, పెరిజ్జీయుల, హివ్వీయుల, యెబూసీయుల+ వంశస్థుల విషయానికొస్తే,
21 అంటే దేశంలో ఇశ్రాయేలీయులు నాశనం చేయలేకపోయిన మిగిలినవాళ్ల విషయానికొస్తే, ఈ రోజు వరకు సొలొమోను వాళ్లతో వెట్టిచాకిరి చేయిస్తున్నాడు.+
22 అయితే సొలొమోను ఇశ్రాయేలీయుల్లో ఎవర్నీ దాసులుగా చేయలేదు.+ వాళ్లు అతని యోధులుగా, సేవకులుగా, అధిపతులుగా, అధికారులుగా, అలాగే అతని రథసారథుల మీద, గుర్రపురౌతుల మీద అధిపతులుగా ఉన్నారు.
23 సొలొమోను పనుల్ని చూసుకునే ముఖ్య ఉప పాలకులు 550 మంది ఉన్నారు, వీళ్లు పనివాళ్ల మీద పర్యవేక్షకులు.+
24 ఫరో కూతురు+ దావీదు నగరం నుండి తన సొంత ఇంటికి వచ్చింది. ఆ ఇంటిని సొలొమోను ఆమె కోసం కట్టించాడు; ఆ తర్వాత అతను మిల్లోను* కట్టించాడు.
25 సొలొమోను యెహోవా కోసం కట్టించిన బలిపీఠం మీద సంవత్సరానికి మూడుసార్లు+ దహనబలుల్ని, సమాధాన బలుల్ని అర్పించేవాడు;+ అంతేకాదు యెహోవా ఎదుట ఉన్న బలిపీఠం మీద బలులు అర్పించి వాటి పొగ పైకిలేచేలా చేశాడు. అలా అతను మందిరాన్ని పూర్తిచేశాడు.+
26 అంతేకాదు, సొలొమోను రాజు ఎసోన్గెబెరులో+ ఒక నౌకాదళాన్ని కూడా తయారుచేశాడు. ఈ ఎసోన్గెబెరు, ఎదోము దేశంలో ఎర్రసముద్రం తీరాన ఏలతు దగ్గర ఉంది.+
27 హీరాము అనుభవమున్న నావికులైన తన సేవకుల్ని సొలొమోను సేవకులతో కలిసి పనిచేయడానికి ఆ నౌకాదళంతో పాటు పంపించాడు.+
28 వాళ్లు ఓఫీరుకు+ వెళ్లి, అక్కడి నుండి 420 తలాంతుల బంగారాన్ని సొలొమోను రాజు దగ్గరికి తీసుకొచ్చారు.
అధస్సూచీలు
^ లేదా “ఇశ్రాయేలీయుల మీద సామెత చెప్పుకుంటాయి.”
^ అక్ష., “అతని దృష్టికి సరైనవి అనిపించలేదు.”
^ లేదా “పనికిరాని దేశం” అయ్యుంటుంది.
^ అప్పట్లో ఒక తలాంతు 34.2 కిలోలతో సమానం. అనుబంధం B14 చూడండి.
^ ఈ హీబ్రూ పదం, కోటలాంటి నిర్మాణాన్ని సూచిస్తుండవచ్చు. అక్ష., “మట్టిదిబ్బను.”
^ లేదా “కట్నంగా.”
^ అక్ష., “దేశం లోపల.”
^ ఈ హీబ్రూ పదం, కోటలాంటి నిర్మాణాన్ని సూచిస్తుండవచ్చు. అక్ష., “మట్టిదిబ్బను.”
