దినవృత్తాంతాలు రెండో గ్రంథం 15:1-19
-
ఆసా తెచ్చిన మార్పులు (1-19)
15 ఓదేదు కుమారుడైన అజర్యా మీదికి దేవుని పవిత్రశక్తి వచ్చింది.
2 అతను ఆసా దగ్గరికి వెళ్లి ఇలా అన్నాడు: “ఆసా, యూదా ప్రజలారా, బెన్యామీను ప్రజలారా, అందరూ నేను చెప్పేది వినండి! మీరు యెహోవాతో ఉన్నంతకాలం ఆయన మీతో ఉంటాడు;+ మీరు ఆయన్ని వెదికితే ఆయన మీకు దొరుకుతాడు,+ కానీ మీరు ఆయన్ని విడిచిపెడితే ఆయన మిమ్మల్ని విడిచిపెడతాడు.+
3 ఇశ్రాయేలీయులు చాలాకాలంపాటు* సత్యదేవుడు గానీ, బోధించే ఒక యాజకుడు గానీ, ధర్మశాస్త్రం గానీ లేకుండా ఉన్నారు.+
4 అయితే కష్టాలు వచ్చినప్పుడు వాళ్లు ఇశ్రాయేలు దేవుడైన యెహోవా దగ్గరికి తిరిగొచ్చి ఆయన్ని వెదికారు, ఆయన వాళ్లకు దొరికాడు.+
5 ఆ కాలంలో ఆయా ప్రాంతాల నివాసుల మధ్య ఏమాత్రం శాంతి లేకపోవడంతో ఎవ్వరూ క్షేమంగా ప్రయాణం చేయలేకపోయేవాళ్లు.*
6 ఒక ప్రాంతం మరో ప్రాంతాన్ని, ఒక నగరం మరో నగరాన్ని నాశనం చేస్తూ ఉండేది. ఎందుకంటే వాళ్లు ఎన్నో రకాల కష్టాలతో గందరగోళంలో ఉండేలా దేవుడు చేశాడు.+
7 కానీ మీరైతే నిబ్బరంగా ఉండండి, నిరుత్సాహపడకండి.*+ ఎందుకంటే, మీ పనికి ప్రతిఫలం దొరుకుతుంది.”
8 ఆసా అజర్యా మాటల్ని, ఓదేదు ప్రవక్త ప్రవచనాన్ని వినగానే ధైర్యం తెచ్చుకొని యూదా, బెన్యామీను ప్రాంతమంతటి నుండి, ఎఫ్రాయిము పర్వత ప్రాంతంలో అతను స్వాధీనం చేసుకున్న నగరాల్లో నుండి అసహ్యమైన విగ్రహాల్ని తీసేసి,+ యెహోవా మందిర వసారా ఎదుట ఉన్న యెహోవా బలిపీఠాన్ని+ తిరిగి కట్టించాడు.
9 అతను యూదా, బెన్యామీను వాళ్లందర్నీ, అలాగే వాళ్లమధ్య నివసిస్తున్న విదేశీయుల్ని ఎఫ్రాయిము, మనష్షే, షిమ్యోను ప్రాంతాల నుండి సమకూర్చాడు.+ అతని దేవుడైన యెహోవా అతనికి తోడుగా ఉన్నాడని వాళ్లు చూసినప్పుడు పెద్ద సంఖ్యలో ఇశ్రాయేలు ప్రాంతాన్ని విడిచిపెట్టి అతని దగ్గరికి వచ్చారు.
10 అలా వాళ్లు ఆసా పరిపాలనలోని 15వ సంవత్సరం, మూడో నెలలో యెరూషలేములో సమకూర్చబడ్డారు.
11 ఆ రోజున వాళ్లు తాము తీసుకొచ్చిన దోపుడుసొమ్ములో నుండి 700 ఎద్దుల్ని, 7,000 గొర్రెల్ని యెహోవాకు బలి అర్పించారు.
12 అంతేకాదు, తమ పూర్వీకుల దేవుడైన యెహోవాను నిండు హృదయంతో, నిండు ప్రాణంతో* వెదకాలని ఒప్పందం చేసుకున్నారు.+
13 ఇశ్రాయేలు దేవుడైన యెహోవాను వెదకనివాళ్లు, వాళ్లు చిన్నవాళ్లే గానీ, పెద్దవాళ్లే గానీ, పురుషులే గానీ, స్త్రీలే గానీ చంపబడతారు.+
14 వాళ్లు పెద్ద స్వరంతో సంతోషంగా కేకలు వేస్తూ, బాకాలు, బూరలు* ఊదుతూ యెహోవాకు ప్రమాణం చేశారు.
15 యూదావాళ్లందరూ నిండు హృదయంతో ప్రమాణం చేశారు కాబట్టి వాళ్లు దాన్నిబట్టి ఉల్లసించారు; వాళ్లు ఆయన్ని ఉత్సాహంగా వెదికారు, ఆయన వాళ్లకు దొరికాడు.+ యెహోవా అన్నివైపుల నుండి వాళ్లకు విశ్రాంతినిస్తూ ఉన్నాడు.+
16 అంతేకాదు, రాజైన ఆసా తన అవ్వ మయకాను రాజమాత స్థానంలో నుండి తీసేశాడు. ఎందుకంటే, ఆమె పూజా కర్రను* పూజించడానికి ఒక అసహ్యమైన విగ్రహాన్ని చేయించుకుంది.+ అతను ఆ అసహ్యమైన విగ్రహాన్ని నరికి, ముక్కలు చేసి, దాన్ని కిద్రోను లోయలో కాల్చేశాడు.+
17 కానీ ఇశ్రాయేలులో ఉన్నత స్థలాలు మాత్రం తీసేయబడలేదు.+ అయినా ఆసా జీవించిన కాలమంతా* అతని హృదయం దేవుని పట్ల సంపూర్ణంగా* ఉంది.+
18 తాను, తన తండ్రి ప్రతిష్ఠించిన* వెండిబంగారాల్ని, వేర్వేరు వస్తువుల్ని ఆసా సత్యదేవుని మందిరంలోకి తీసుకొచ్చాడు.+
19 ఆసా పరిపాలనలోని 35వ సంవత్సరం వరకు యుద్ధాలు జరగలేదు.+
అధస్సూచీలు
^ అక్ష., “చాలా రోజులు.”
^ అక్ష., “బయటికి వెళ్లేవాళ్లకు గానీ లోపలికి వచ్చేవాళ్లకు గానీ ఏమాత్రం శాంతి లేదు.”
^ అక్ష., “మీ చేతుల్ని దించకండి.”
^ అక్ష., “కొమ్ములు.”
^ అక్ష., “రోజులన్నిట్లో.”
^ లేదా “పూర్తిగా అంకితమై.”
^ లేదా “పవిత్రపర్చిన.”
