దినవృత్తాంతాలు రెండో గ్రంథం 34:1-33
34 యోషీయా+ రాజైనప్పుడు అతనికి ఎనిమిదేళ్లు; అతను యెరూషలేములో 31 సంవత్సరాలు పరిపాలించాడు.+
2 యోషీయా యెహోవా దృష్టిలో సరైనది చేస్తూ తన పూర్వీకుడైన దావీదు మార్గాల్లో నడిచాడు, అతను వాటి నుండి కుడివైపుకు గానీ ఎడమవైపుకు గానీ తిరగలేదు.
3 యోషీయా తన పరిపాలనలోని 8వ సంవత్సరంలో, ఇంకా బాలుడిగా ఉన్నప్పుడే తన పూర్వీకుడైన దావీదు దేవుణ్ణి వెదకడం మొదలుపెట్టాడు;+ 12వ సంవత్సరంలో ఉన్నత స్థలాల్ని,+ పూజా కర్రల్ని,* చెక్కిన విగ్రహాల్ని,+ పోత* విగ్రహాల్ని తీయించి యూదా, యెరూషలేమును శుభ్రం చేయడం ప్రారంభించాడు.+
4 అతని సమక్షంలో వాళ్లు బయలు బలిపీఠాల్ని పడగొట్టారు, అతను వాటి పైన ఉన్న ధూపస్తంభాల్ని పగలగొట్టాడు. అంతేకాదు పూజా కర్రల్ని,* చెక్కిన విగ్రహాల్ని, పోత విగ్రహాల్ని ముక్కలుముక్కలుగా నరికి, వాటిని పొడిగా చేసి ఆ పొడిని వాటికి బలి అర్పించినవాళ్ల సమాధుల మీద చల్లించాడు.+
5 అతను పూజారుల ఎముకల్ని వాళ్ల బలిపీఠాల మీదే కాల్చాడు.+ అలా అతను యూదాను, యెరూషలేమును శుభ్రం చేశాడు.
6 అతను మనష్షేలో, ఎఫ్రాయిములో,+ షిమ్యోనులో, నఫ్తాలి వరకు ఉన్న నగరాల్లో, అలాగే వాటి చుట్టుపక్కల శిథిలాల్లో ఉన్న
7 బలిపీఠాల్ని పడగొట్టాడు; పూజా కర్రల్ని,* చెక్కిన విగ్రహాల్ని+ పగలగొట్టి వాటిని పొడిగా చేశాడు. అతను ఇశ్రాయేలు దేశమంతటా ఉన్న ధూపస్తంభాలన్నిటినీ పగలగొట్టి,+ ఆ తర్వాత యెరూషలేముకు తిరిగొచ్చాడు.
8 యోషీయా తన పరిపాలనలోని 18వ సంవత్సరంలో దేశాన్ని, ఆలయాన్ని శుభ్రం చేసిన తర్వాత, అతను తన దేవుడైన యెహోవా మందిరాన్ని బాగుచేయడానికి అజల్యా కుమారుడైన షాఫానును,+ నగర అధిపతైన మయశేయాను, వివరాలు నమోదు చేసే యోహాహాజు కుమారుడైన యోవాహును పంపించాడు.+
9 వాళ్లు దేవుని మందిరానికి తీసుకురాబడిన డబ్బును ప్రధానయాజకుడైన హిల్కీయాకు అప్పగించారు. ద్వారపాలకులుగా సేవచేస్తున్న లేవీయులు ఆ డబ్బును మనష్షే, ఎఫ్రాయిమువాళ్ల నుండి, మిగతా ఇశ్రాయేలు ప్రజల+ నుండి, యూదా, బెన్యామీనువాళ్ల నుండి, యెరూషలేము నివాసుల నుండి సేకరించారు.
10 ఆ డబ్బును యెహోవా మందిరంలో జరుగుతున్న పనిని పర్యవేక్షిస్తున్నవాళ్లకు ఇచ్చారు. యెహోవా మందిరంలోని పనివాళ్లు ఆ డబ్బును మందిరాన్ని బాగుచేయడానికి, మరమ్మతు చేయడానికి ఉపయోగించారు.
11 చెక్కిన రాళ్లను, ఆధారాలుగా ఉంచే మ్రానుల్ని కొనడానికి, యూదా రాజుల అశ్రద్ధ వల్ల పాడైపోయిన భవనాల కోసం దూలాల్ని కొనడానికి నైపుణ్యంగల పనివాళ్లకు, నిర్మాణకులకు ఆ డబ్బును ఇచ్చారు.+
12 ఆ మనుషులు ఆ పనిని నమ్మకంగా చేశారు.+ వాళ్ల మీద మెరారీయులైన+ యహతు, ఓబద్యా, కహాతీయులైన+ జెకర్యా, మెషుల్లాము అనే లేవీయులు పర్యవేక్షకులుగా నియమించబడ్డారు. నైపుణ్యంగల సంగీతకారులైన లేవీయులందరూ+
13 మామూలు పనివాళ్ల* మీద నియమించబడ్డారు, అలాగే వాళ్లు అన్నిరకాల సేవలకు సంబంధించిన పనులు చేసే వాళ్లందరి మీద పర్యవేక్షకులుగా ఉన్నారు; లేవీయుల్లో కొంతమంది కార్యదర్శులుగా, అధికారులుగా, ద్వారపాలకులుగా ఉన్నారు.+
14 యెహోవా మందిరానికి తీసుకురాబడిన డబ్బును+ వాళ్లు బయటికి తెస్తుండగా, మోషే ద్వారా యెహోవా ఇచ్చిన ధర్మశాస్త్ర గ్రంథం+ యాజకుడైన హిల్కీయాకు కనిపించింది.+
15 హిల్కీయా అప్పుడు కార్యదర్శి అయిన షాఫానుతో, “యెహోవా మందిరంలో నాకు ధర్మశాస్త్ర గ్రంథం దొరికింది” అని చెప్పి ఆ గ్రంథాన్ని షాఫానుకు ఇచ్చాడు.
16 షాఫాను ఆ గ్రంథాన్ని రాజు దగ్గరికి తీసుకొచ్చి ఇలా అన్నాడు: “నీ సేవకులు వాళ్లకు అప్పగించిన పనంతటినీ చేస్తున్నారు.
17 వాళ్లు యెహోవా మందిరంలో ఉన్న డబ్బును సేకరించి,* దాన్ని పర్యవేక్షకులకు, పనివాళ్లకు ఇచ్చారు.”
18 కార్యదర్శి అయిన షాఫాను రాజుతో ఇంకా ఇలా అన్నాడు: “యాజకుడైన హిల్కీయా నాకు ఒక గ్రంథం ఇచ్చాడు.”+ తర్వాత షాఫాను ఆ గ్రంథాన్ని రాజు ముందు చదవడం మొదలుపెట్టాడు.+
19 ధర్మశాస్త్రంలోని మాటలు వినగానే రాజు తన బట్టలు చింపుకున్నాడు.+
20 తర్వాత రాజు యాజకుడైన హిల్కీయాకు, షాఫాను కుమారుడైన అహీకాముకు,+ మీకా కుమారుడైన అబ్దోనుకు, కార్యదర్శి అయిన షాఫానుకు, రాజు సేవకుడైన అశాయాకు ఈ ఆజ్ఞ ఇచ్చాడు:
21 “మీరు వెళ్లి, దొరికిన ఈ గ్రంథంలో రాయబడిన వాటిగురించి నా తరఫున, ఇశ్రాయేలులో, యూదాలో మిగిలివున్న ప్రజల తరఫున యెహోవా దగ్గర విచారణ చేయండి; మన పూర్వీకులు ఈ గ్రంథంలో రాయబడిన మాటలన్నిటికీ లోబడలేదు. అలా వాళ్లు యెహోవా ఆజ్ఞల్ని పాటించలేదు కాబట్టి యెహోవా తీవ్రమైన కోపం మనమీద కుమ్మరించబడబోతుంది.”+
22 అప్పుడు హిల్కీయా, అలాగే రాజు పంపించినవాళ్లు హుల్దా అనే ప్రవక్త్రి+ దగ్గరికి వెళ్లారు. ఆమె, బట్టల గది మీద అధికారైన షల్లూము భార్య. షల్లూము హర్హషు మనవడు, తిక్వా కుమారుడు. హుల్దా యెరూషలేములోని రెండో భాగంలో నివసిస్తోంది; వాళ్లు అక్కడ ఆమెతో మాట్లాడారు.+
23 ఆమె వాళ్లతో ఇలా అంది: “ఇశ్రాయేలు దేవుడైన యెహోవా చెప్పేదేమిటంటే, ‘మిమ్మల్ని నా దగ్గరికి పంపించిన వ్యక్తితో ఇలా చెప్పండి:
24 “యెహోవా చెప్పేదేమిటంటే, ‘నేను ఈ స్థలం మీదికి, దాని నివాసుల మీదికి విపత్తు తీసుకొస్తాను,+ వాళ్లు యూదా రాజు ముందు చదివిన ఆ గ్రంథంలో రాయబడిన శాపాలన్నీ తీసుకొస్తాను.+
25 వాళ్లు నన్ను విడిచిపెట్టి,+ వేరే దేవుళ్లకు బలులు అర్పిస్తూ వాటి పొగ పైకిలేచేలా చేస్తూ తమ చేతి పనులన్నిటితో నాకు కోపం తెప్పించారు.+ కాబట్టి ఈ స్థలం మీద నా కోపాగ్ని కుమ్మరిస్తాను, అది ఆరిపోదు.’ ”+
26 యెహోవా దగ్గర విచారణ చేయమని మిమ్మల్ని పంపించిన యూదా రాజుకు మీరు ఇలా చెప్పాలి, ‘నువ్వు విన్న మాటల+ గురించి ఇశ్రాయేలు దేవుడైన యెహోవా చెప్పేదేమిటంటే:
27 “ఈ స్థలం గురించి, దాని నివాసుల గురించి దేవుడు చెప్పిన మాటల్ని విన్నప్పుడు నీ హృదయం స్పందించింది, దేవుని ముందు నిన్ను నువ్వు తగ్గించుకున్నావు; నువ్వు నా ఎదుట నిన్ను నువ్వు తగ్గించుకొని, నీ బట్టల్ని చింపుకొని నా ఎదుట ఏడ్చావు కాబట్టి నేను నీ ప్రార్థన విన్నాను+ అని యెహోవా చెప్తున్నాడు.
28 అందుకే నేను నిన్ను నీ పూర్వీకుల దగ్గరికి చేరుస్తాను,* నువ్వు శాంతిగా సమాధిలోకి చేర్చబడతావు; నేను ఈ స్థలం మీదికి, దాని నివాసుల మీదికి తీసుకొచ్చే విపత్తు అంతటినీ నువ్వు చూడవు.’ ” ’ ”+
వాళ్లు రాజు దగ్గరికి వచ్చి ఆ మాటలు చెప్పారు.
29 అప్పుడు రాజు కబురు పంపించి యూదా, యెరూషలేము పెద్దలందర్నీ పిలిపించాడు.+
30 తర్వాత రాజు యూదా వాళ్లందరితో, యెరూషలేము నివాసులతో, యాజకులతో, లేవీయులతో, తక్కువవాళ్లు-గొప్పవాళ్లు అనే తేడా లేకుండా ప్రజలందరితో కలిసి యెహోవా మందిరానికి వెళ్లాడు. అతను యెహోవా మందిరంలో దొరికిన ఒప్పంద గ్రంథంలోని మాటలన్నిటినీ వాళ్లకు చదివి వినిపించాడు.+
31 రాజు తన స్థానంలో నిలబడి, ఆ గ్రంథంలో+ రాయబడిన ఒప్పందంలోని మాటల్ని పాటిస్తూ యెహోవాను అనుసరిస్తానని, నిండు హృదయంతో, నిండు ప్రాణంతో*+ ఆయన ఆజ్ఞల్ని, జ్ఞాపికల్ని, శాసనాల్ని పాటిస్తానని యెహోవా ఎదుట ఒప్పందం చేశాడు.*+
32 అంతేకాదు, దానికి కట్టుబడి ఉండమని అతను యెరూషలేము, బెన్యామీను వాళ్లందర్నీ ప్రోత్సహించాడు. దాంతో యెరూషలేము నివాసులు దేవునితో, అంటే తమ పూర్వీకుల దేవునితో చేసిన ఒప్పందం ప్రకారం ప్రవర్తించారు.+
33 తర్వాత యోషీయా ఇశ్రాయేలీయుల ప్రాంతాలన్నిట్లో నుండి అసహ్యమైన వాటిని* తీయించి,+ ఇశ్రాయేలులో ప్రతీ ఒక్కరు తమ దేవుడైన యెహోవాను సేవించేలా చేశాడు. అతను బ్రతికున్నంత కాలం* ప్రజలు తమ పూర్వీకుల దేవుడైన యెహోవాను అనుసరించడం మానలేదు.
అధస్సూచీలు
^ లేదా “లోహపు.”
^ లేదా “బరువులు మోసేవాళ్ల.”
^ అక్ష., “బయటికి కుమ్మరించి.”
^ మరణాన్ని కావ్యరూపంలో ఇలా వర్ణించారు.
^ లేదా “ఒప్పందాన్ని పునరుద్ధరించాడు.”
^ లేదా “విగ్రహాల్ని.”
^ అక్ష., “అతని రోజులన్నిట్లో.”
