దినవృత్తాంతాలు రెండో గ్రంథం 9:1-31
9 షేబ దేశపు రాణి+ సొలొమోను పేరుప్రఖ్యాతుల గురించి విన్నది. కాబట్టి ఆమె చిక్కు ప్రశ్నలతో* సొలొమోనును పరీక్షించడానికి యెరూషలేముకు వచ్చింది. ఆమె గొప్ప పరివారంతో ఒంటెల మీద సాంబ్రాణి తైలం, పెద్ద మొత్తంలో బంగారం,+ రత్నాలు తీసుకొచ్చింది. ఆమె సొలొమోను దగ్గరికి వచ్చి తన మనసులో ఉన్న వాటన్నిటి గురించి అతనితో మాట్లాడింది.
2 సొలొమోను ఆమె ప్రశ్నలన్నిటికీ జవాబు చెప్పాడు. వాటిలో సొలొమోను వివరించలేనిదంటూ ఏదీ లేదు.
3 షేబ దేశపు రాణి సొలొమోను తెలివిని,+ అతను కట్టించిన రాజభవనాన్ని,+
4 అతని బల్ల మీది ఆహారాన్ని,+ అతని అధికారులు బల్ల దగ్గర కూర్చోవడానికి చేసిన ఏర్పాట్లను, అతని సేవకులు ఆహారం వడ్డించే తీరును, వాళ్ల బట్టల్ని, గిన్నెలు అందించేవాళ్లను, వాళ్ల బట్టల్ని, యెహోవా మందిరంలో అతను క్రమంగా అర్పించే దహనబలుల్ని+ చూసినప్పుడు ఆమె ఆశ్చర్యంలో మునిగిపోయింది.*
5 ఆమె రాజుతో ఇలా అంది: “నువ్వు సాధించినవాటి* గురించి, నీ తెలివి గురించి నేను నా దేశంలో విన్న విషయాలు నిజం.
6 అయితే నేను ఇక్కడికి వచ్చి కళ్లారా చూసేవరకు వాటిని నమ్మలేదు.+ నిజానికి, నీ గొప్ప తెలివితేటల గురించి సగం కూడా నాకు చెప్పబడలేదు.+ నేను విన్నదాని కన్నా నువ్వు చాలా గొప్పవాడివి.+
7 నీ మనుషులు ధన్యులు,* నీతో ఎప్పుడూ ఉంటూ తెలివిగల నీ మాటలు వినే నీ సేవకులు ధన్యులు!
8 నీ దేవుడైన యెహోవా స్తుతించబడాలి, నీ దేవుడైన యెహోవా నీ విషయంలో సంతోషించి నిన్ను తన ప్రతినిధిగా తన సింహాసనం మీద రాజుగా కూర్చోబెట్టాడు. నీ దేవుడు ఇశ్రాయేలును ప్రేమిస్తున్నాడు+ కాబట్టి ఇశ్రాయేలు శాశ్వతంగా కొనసాగేలా నీతిన్యాయాలు జరిగించడానికి ఆయన నిన్ను దాని మీద రాజుగా నియమించాడు.”
9 ఆమె రాజుకు 120 తలాంతుల* బంగారం,+ పెద్ద మొత్తంలో సాంబ్రాణి తైలం, రత్నాలు ఇచ్చింది. షేబ దేశపు రాణి సొలొమోనుకు ఇచ్చినంత పెద్ద మొత్తంలో సాంబ్రాణి తైలం దేశంలోకి మళ్లీ ఎప్పుడూ రాలేదు.+
10 అంతేకాదు, ఓఫీరు నుండి బంగారం తీసుకొచ్చిన హీరాము సేవకులు, సొలొమోను సేవకులు+ చందనపు మ్రానుల్ని, అమూల్యమైన రాళ్లను కూడా తీసుకొచ్చారు.+
11 రాజు ఆ చందనపు మ్రానులతో యెహోవా మందిరం కోసం, రాజభవనం+ కోసం మెట్లను,+ గాయకుల కోసం వీణల్ని,* తంతివాద్యాల్ని+ చేయించాడు. అలాంటి చందనపు మ్రానులు యూదా దేశంలో అంతకుముందు ఎప్పుడూ కనబడలేదు.
12 సొలొమోను రాజు షేబ దేశపు రాణి కోరుకున్న, అడిగిన ప్రతీదీ ఇచ్చాడు. ఆమె రాజు కోసం తీసుకొచ్చిన వాటికన్నా ఎక్కువ* ఇచ్చాడు. తర్వాత ఆమె తన సేవకులతో తన దేశానికి తిరిగెళ్లింది.+
13 ప్రతీ సంవత్సరం, సొలొమోను దగ్గరికి 666 తలాంతుల బంగారం వచ్చేది,+
14 అదీకాక వ్యాపారస్థులు, వర్తకులు అతని దగ్గరికి వస్తువులు తెచ్చేవాళ్లు; అరబీయుల రాజులందరూ, దేశ అధిపతులందరూ సొలొమోను దగ్గరికి బంగారం, వెండి తీసుకొచ్చేవాళ్లు.+
15 సొలొమోను రాజు మిశ్రిత బంగారంతో 200 పెద్ద డాళ్లను చేయించాడు+ (ఒక్కో డాలుకు 600 షెకెల్‌ల* మిశ్రిత బంగారం పట్టింది)+
16 అలాగే మిశ్రిత బంగారంతో 300 చిన్న డాళ్లను* చేయించాడు (ఒక్కో చిన్న డాలుకు మూడు మినాల* బంగారం పట్టింది). రాజు వాటిని లెబానోను అడవి గృహంలో+ పెట్టించాడు.
17 రాజు ఒక గొప్ప దంతపు సింహాసనాన్ని కూడా చేయించి, దాన్ని స్వచ్ఛమైన బంగారు రేకుతో కప్పించాడు.+
18 ఆ సింహాసనానికి ఆరు మెట్లు ఉన్నాయి, దానికి ఒక బంగారు పాదపీఠం జతచేయబడివుంది. సింహాసనానికి రెండువైపులా చేతులు పెట్టుకోవడానికి ఊతలున్నాయి. ఆ ఊతల పక్కన రెండు సింహాలు+ నిలబడి ఉన్నాయి.
19 ఆరు మెట్ల మీద ఈ చివర ఒకటి ఆ చివర ఒకటి చొప్పున మొత్తం 12 సింహాలు+ ఉన్నాయి. వేరే ఏ రాజ్యంలో అలాంటిది తయారు చేయబడలేదు.
20 సొలొమోను రాజు తాగే పాత్రలన్నీ బంగారువి, లెబానోను అడవి గృహంలో ఉన్న పాత్రలన్నీ స్వచ్ఛమైన బంగారంతో చేసినవి. వెండితో చేసినవేవీ లేవు, సొలొమోను రోజుల్లో వెండికి అసలు విలువే లేదు.+
21 ఎందుకంటే, రాజు నౌకలు హీరాము సేవకులతోపాటు+ తర్షీషుకు+ వెళ్లేవి. మూడు సంవత్సరాలకు ఒకసారి తర్షీషు నౌకలు బంగారాన్ని, వెండిని, దంతాల్ని,+ కోతుల్ని, నెమళ్లను తీసుకొచ్చేవి.
22 ఆ విధంగా, సొలొమోను రాజు సిరిసంపదల్లో, తెలివిలో భూరాజులందర్నీ మించిపోయాడు.+
23 సత్యదేవుడు సొలొమోనుకు తెలివి అనుగ్రహించాడు, అతని తెలివిగల మాటల్ని వినాలనే ఉద్దేశంతో భూరాజులందరూ అతన్ని చూడడానికి వచ్చేవాళ్లు.+
24 వాళ్లలో ప్రతీ ఒక్కరు వెండి వస్తువులు, బంగారు వస్తువులు, బట్టలు,+ ఆయుధాలు, సాంబ్రాణి తైలం, గుర్రాలు, కంచర గాడిదలు కానుకగా తీసుకొచ్చేవాళ్లు; ఇలా ప్రతీ సంవత్సరం జరిగేది.
25 సొలొమోను గుర్రాల కోసం, రథాల కోసం 4,000 గుర్రపు శాలలు అలాగే 12,000 గుర్రాలు ఉండేవి,*+ అతను వాటిని రథాల నగరాల్లో, అలాగే యెరూషలేములో తన దగ్గర ఉంచుకున్నాడు.+
26 నది* దగ్గర నుండి ఫిలిష్తీయుల దేశం వరకు, ఐగుప్తు సరిహద్దు వరకు ఉన్న రాజులందరి మీద సొలొమోను పరిపాలన చేశాడు.+
27 రాజు, రాళ్లంత విస్తారంగా వెండిని, షెఫేలాలోని అత్తి చెట్లంత విస్తారంగా దేవదారు మ్రానుల్ని యెరూషలేములో ఉంచాడు.+
28 ఐగుప్తు నుండి, ఇతర దేశాలన్నిటి నుండి సొలొమోను దగ్గరికి గుర్రాలు తెచ్చేవాళ్లు.+
29 సొలొమోను మిగతా చరిత్ర+ మొదటి నుండి చివరి వరకు నాతాను+ ప్రవక్త రాసిన పుస్తకంలో, షిలోనీయుడైన అహీయా+ ప్రవచన పుస్తకంలో, దర్శనాలు చూసే ఇద్దో నెబాతు కుమారుడైన యరొబాము+ గురించి రాసిన దర్శనాల గ్రంథంలో+ రాయబడివుంది.
30 సొలొమోను యెరూషలేములో ఇశ్రాయేలు అంతటి మీద 40 సంవత్సరాలు పరిపాలించాడు.
31 తర్వాత సొలొమోను చనిపోయాడు.* అతన్ని తన తండ్రైన దావీదు నగరంలో+ పాతిపెట్టారు; అతని స్థానంలో అతని కుమారుడు రెహబాము రాజయ్యాడు.+
అధస్సూచీలు
^ లేదా “పొడుపు కథలతో.”
^ లేదా “ఆమెకు ఊపిరి ఆగినంత పనైంది.”
^ లేదా “నీ మాటల.”
^ లేదా “సంతోషంగా ఉంటారు.”
^ అప్పట్లో ఒక తలాంతు 34.2 కిలోలతో సమానం. అనుబంధం B14 చూడండి.
^ ఇది ప్రాచీనకాల తంతివాద్యం; ఇప్పటి వీణలాంటిది కాదు.
^ లేదా “వాటి విలువకు సమానమైన కానుకలు కూడా” అయ్యుంటుంది.
^ అప్పట్లో ఒక షెకెల్‌ 11.4 గ్రాములతో సమానం. అనుబంధం B14 చూడండి.
^ లేదా “కేడెములను.” ఎక్కువగా విలుకాండ్రు వీటిని తీసుకెళ్లేవాళ్లు.
^ హీబ్రూ లేఖనాల్లో ఒక మినా 570 గ్రాములతో సమానం. అనుబంధం B14 చూడండి.
^ లేదా “గుర్రపురౌతులు ఉండేవాళ్లు.”
^ అంటే, యూఫ్రటీసు.
^ అక్ష., “తన పూర్వీకులతో నిద్రించాడు.”
