“ኣምላኽ ሰማይ ንዘለኣለም ከቶ ዘይትጠፍእ መንግስቲ ኬቕውም እዩ።”​—ዳንኤል 2:44፡ ትርጉም ሓዳስ ዓለም።

“ወዲ ተዋሂቡና፣ መንግስቲ ኸኣ ኣብ መንኵቡ ኪኸውን እዩ።”​—ኢሳይያስ 9:6፣ እግረ ጽሑፍ።

• ብደረጃ ውልቀ ሰብ ኪጠቕመካ ዚኽእል ቅኑዕ መንግስቲ ትረክብ።​—ኢሳይያስ 48:17, 18።

• ኣብ እትመጽእ ሓዳስ ዓለም፡ ፍጹም ጥዕናን ሓጐስን ዘለዎ ህይወት ይህልወካ።​—ራእይ 21:3, 4።

እወ ንኽእል ኢና፣ እንተ ወሓደ ብኽልተ ምኽንያት።

• የሱስ፡ መንግስቲ ኣምላኽ እንታይ ከም እትዓምም ኣርእዩ እዩ። የሱስ ንሰዓብቱ፡ መንግስቲ ኣምላኽ ክትመጽእን ፍቓድ ኣምላኽ ኣብ ምድሪ ኪኸውንን ኪጽልዩ ምሂርዎም እዩ። (ማቴዎስ 6:9, 10) እቲ ጸሎት ብኸመይ ከም ዚምለስ ድማ ብመርኣያ ኣርእዩ እዩ።

  የሱስ ኣብ ምድሪ ኣብ ዝነበረሉ እዋን፡ ጥሙያት መጊቡ፡ ሕሙማት ኣሕውዩ፡ ምዉታት ከኣ ኣተንሲኡ እዩ። (ማቴዎስ 15:29-38፣ ዮሃንስ 11:38-44) ከም መጻኢ ገዛኢ መንግስቲ ኣምላኽ መጠን፡ እታ መንግስቲ ንተገዛእታ እንታይ ከም እትገብረሎም ዜርኢ ባህ ዜብል መርኣዪ ሂቡ እዩ።​—ራእይ 11:15።

• ኵነታት ዓለም፡ መንግስቲ ኣምላኽ ድሕሪ ቐረባ ግዜ ኸም እትመጽእ የረጋግጽ። የሱስ፡ መንግስቲ ኣምላኽ ናብ ምድሪ ሰላም ቅድሚ ምምጻኣ፡ ኣብ ዓለምና ውግእን ጥሜትን ምንቅጥቃጥ ምድርን ከም ዚኸውን ተነብዩ እዩ።​—ማቴዎስ 24:3, 7።

  ሎሚ እዚ ዅነታት እዚ ኺፍጸም ንርኢ ኣለና። ስለዚ፡ ድሕሪ ቐረባ ግዜ፡ መንግስቲ ኣምላኽ ንዅሉ ጸገማት መወዳእታ ኸም እትገብረሉ ኽንተኣማመን ንኽእል ኢና።