ብሚልዮናት ዚቝጸሩ ሰባት፡ ናብ ሰማይ ኪኸዱ ይደልዩ እዮም። የሱስ እውን፡ እቶም እሙናት ሃዋርያቱ፡ ኣብ ሰማይ ከም ዚነብሩ ተዛሪቡ ነይሩ እዩ። ቅድሚ ሙማቱ፡ ምስ ሰማያዊ ኣቦኡ ቦታ ኸም ዜዳልወሎም ተመባጺዑሎም እዩ።—ዮሃንስ 14:2 ኣንብብ።

ኣብ ምድሪ ዚነብሩ ዝነበሩ ሰባት፡ ሰማያዊ ትንሳኤ ዚረኽቡ ስለምንታይ እዮም፧ ኣብኡ እንታይ እዮም ኪገብሩ፧ የሱስ ንሃዋርያቱ፡ ነገስታት ከም ዚዀኑ ነጊርዎም ነይሩ እዩ። ኣብ ልዕሊ ምድሪ ድማ ኪገዝኡ እዮም።—ሉቃስ 22:28-30፣ ራእይ 5:10 ኣንብብ።

ኣብ ሓያሎ ሃገራት፡ ቍጽሪ እቶም መራሕቲ ሒደት እዩ። ብተመሳሳሊ፡ እቶም የሱስ ካብ ሞት ኣተንሲኡ ሰማያዊ ህይወት ዚህቦም ሰባት፡ ኣብ ልዕሊ ምድሪ ስለ ዚገዝኡ፡ ቍጽሮም ሒደት ኪኸውን ኢና እንጽበ። (ሉቃስ 12:32) መጽሓፍ ቅዱስ፡ ቍጽሪ እቶም ምስ የሱስ ዚገዝኡ ሰባት ክንደይ ምዃኑ ብንጹር ይገልጽ እዩ።—ራእይ 14:1 ኣንብብ።

ይኹን እምበር፡ እቶም ናብ ሰማይ ዚኸዱ ጥራይ ኣይኰኑን ዓስቦም ዚረኽቡ። እሙናት ተገዛእቲ እታ የሱስ ዝንጉሳ መንግስቲ እውን፡ ኣብታ ገነት እትኸውን ምድሪ ንዘለኣለም ኪነብሩ እዮም። (ዮሃንስ 3:16) ገሊኣቶም ድማ፡ ካብ ጥፍኣት እዚ ሕጂ ዘሎ እኩይ ስርዓት ድሒኖም ናብ ገነት ኪኣትዉ እዮም። ገሊኣቶም ከኣ ኣብታ ገነት እትኸውን ምድሪ ኺትንስኡ እዮም።—ምሳሌ 2:21፣ ዮሃንስ 5:28, 29 ኣንብብ።