2 Mbakorinte 5:1-21
5 Gadia se fa, aluer iyou yase i shin tar, tenti ne, hembe* kera kpa, Aôndo una na se iyou igen sha, iyou i tsôron i̱ i maa sha ave ga yô.
2 Gadia mimi je, se mba kinen ken iyou* ne, ka saren se tsung u ma se haa iyou i̱ sha, i̱ i̱ lu sha ci wase* la iyol,
3 sha er zum u se va haa i̱ iyol la, se lu idyelegh ga yô.
4 Jighilii yô, se mba se lu ken tenti shon ne se mba kinen shi ishima ngi nyian se tsung, sha ci u se soo u eren ngun kera ga, kpa se gema se soo u haan ugen la iyol, sha er uma una mena kwagh u a kpen ne* yô.
5 Man un u a we se ago iyol sha kwagh ne la ka Aôndo; a na se jijingi na, ka ibumun i kwagh u a lu van la.
6 Nahan hanma shighe ka se lu a vangertiôr taveraa, shi se fa ser, er se lu ken ya u iyol yase ne her ne, se mba ica a Ter,
7 gadia se mba zenden ka sha jighjigh u nan, ka sha akaa a se nengen a mi sha ashe la ga.
8 Kpa se mba a vangertiôr taveraa shi se hemba soon u za teman ya vea Ter, a u lun ken iyol ne.
9 Nahan, sea lu ya môm vea na shin sea lu ica a na kpa, awashima wase yô, ka u a̱ lumun se.
10 Gadia ka u se cii a va a vese* sha ishigh ki ikyônough ki ijirigh ki Kristu keng, sha er a kimbi hanma or injar sha akaa a yange nan eren shighe u nan lu ken iyol her la yô, a̱ lu kwagh u dedoo shin u bo* kpaa.
11 Nahan er se fe inja i u cian Ter yô, ka se shi nôngon ser ior ve̱ na jighjigh a kwagh u se tesen la. Kpa Aôndo fa kwagh wase dedoo.* Nahan kpa, se na jighjigh ser ne kpa imoshima yen fa se* tsembelee.
12 Se mba hiden pasen ayol a ase hen a ven ga, kpa se mba nan ne ityôkyaa i tan ihyagh sha kwagh wase, sha er ne lu a imo i kaan mba ve te ihyagh sha kwagh u i nengen a mi sha ashe, i lu kwagh u ken ishima ga la yô.
13 Gadia aluer yange sea nyôr ihyundugh kpa, lu sha ci u Aôndo; man aluer se mba eren kwagh sha inja yô, ka sha ci wen.
14 Gadia dooshima u Kristu a lu a mi la ngu mgbeghan se, sha ci u se kure ikyaa nahan ser, or môm kpe sha ci u ior cii; sha nahan yô, ior cii kpe.
15 Shi yange kpe sha ci u ior cii sha er mba ve lu uma kpaa, vea kera lu uma sha ci ve ayol a ve ga, kpa a lu sha ci u un u yange kpe sha ci ve, shi i nder un shin ku la yô.
16 Nahan hii hegen je, se kera fa ma or sha mnenge u orumace* ga. Aluer yange sea fa Kristu sha iyol yô, hegen ne, se kera fa un sha imba gbenda la ga.
17 Sha nahan yô, aluer or ngu ken mzough vea Kristu yô, i gba nan, nan ngu kwagh u he; akaa a tse la kar kera; nenge! i gba akaa a he.
18 Kpa akaa cii ka hen Aôndo a dugh ye, un u a hime se a iyol na sha ikyev i Kristu, shi a ne se tom u himen ior a na la,
19 inja na yô, Aôndo lu himen tar a iyol na sha ikyev i Kristu, wan akaabo a ve ikyo ga, shi a gema loho u himen ior a na ne a wa se sha ikyev.
20 Sha nahan yô, se mba mbatomov mba Aôndo; a tindi se ér se ôr kwagh na sha ityough ki Kristu, inja er Aôndo ngu zamber a ior sha ikyev yase nahan. Er se lu mbaôron kwagh sha ityough ki Kristu yô, se mba zamber ser: “Hime nen a Aôndo.”
21 Yange er un u fa isholibo ga la hingir isholibo* sha ci wase, sha er se fatyô u hingir mbaperapera sha ishigh ki* Aôndo sha ikyev na yô.
Ngeren mba shin kpe
^ Shin “yôhôr.”
^ Shin “ya.”
^ Shin “ma se haa ya wase u sha.”
^ Shin “una kar a kwagh u a kpen ne kera.”
^ Shin “kwagh u hanma wase cii una va due ken igbar.”
^ Shin “a̱ lu ifer.”
^ Shin “kpa kwagh wase ngu ken igbar sha ishigh ki Aôndo.”
^ Shin “ne kpa imoshima yen ngi nengen a vese.”
^ Zwa Grika, “sha mnenge u iyolough.”
^ Shin “hingir nagh ku isholibo.”
^ Shin “hingir perapera u.”
