Marku 15:1-47
15 Ka va hingir sha use yô, fese je upristi mba tamen man mbatamen kua mbangerenatindi, jim je yô, Sanhederin* jimin cii, zua er idyu, maa ve kange Yesu ave ve yem a na ve za na un sha ikyev i Pilatu.
2 Nahan Pilatu pine un ér: “U ngu Tor u Mbayuda?” A gema a kaa ér: “U kaa vough.”
3 Kpa upristi mba tamen lu nan un ibo sha akaa kpishi.
4 Tsô Pilatu shi gba pinen un kwagh, kaan ér: “U ngu a kwagh u ôron sha mi gaa? Nenge ve lu nan we ibo sha akaa kpishi sha wono.”
5 Kpa Yesu kera bugh zwa ga, nahan kpiligh Pilatu iyol.
6 Hanma shighe u yange a̱ eren iniongo yô, gomna a pase or môm ken mba i wuhe ve ken purusu yô; or u ve kaa la cii.
7 Hen shighe la, orgen lu ken purusu, i yilan un ér Baraba; i wuhe un vea mbagenev mba ve er ayôôso a gomoti, nahan ve wua or ken ayôôso shon yô.
8 Tsô ikpelaior va, gba va kaan ér Pilatu a er ve kwagh u vanden eren ve la.
9 A gema a pine ve ér: “Ne soo ner m pase Tor u Mbayuda sha ci wene?”
10 Sha ci u Pilatu fa er i lu iyuhwe i ne ve upristi mba tamen ve va yer Yesu ijir hen a na yô.
11 Kpa upristi mba tamen tuur ikpelaior la ken ityô ér ve kaa i̱ pase Baraba sha ci ve.
12 Pilatu shi gema pine ve ér: “Tsô ka nyi m er a un u ne yilan ner Tor u Mbayuda nee?”
13 Shi ve ôr taver taver ér: “I za mande un sha kon!”*
14 Kpa Pilatu shi pine ve ér: “Sha ci u nyi? Ka nyi kwaghbo a ere?” Kpa ve lu hemban ôron taver taver cii ér: “I za mande un sha kon!”*
15 Pilatu ongo nahan yô, a soo u eren sha ishima i ikpelaior la, maa a pase Baraba. Shi ne zwa mba gbidyen Yesu cii yô, a gema un a na ér i za mande un sha kon.
16 Maa ushoja yem a na ken tembeya, ken iyaagh ki gomna, ve za yila ikyum i ushoja cii va kohol.
17 Tsô ve haa un ikyondo i nyian dimiin iyol, shi ve tume idyer i tor sha usaa, ve cir un;
18 ve gba kaan a na ér: “Se mba sughun we, Tor u Mbayuda!”
19 Shi ve lu gbidyen un aga sha ityou shi tan un azer iyol, shi ve gure sha ishigh nagh, ve sua ityough inya.
20 Mba nahan un tar kera yô, ve mase saghen un ikyondo i nyian dimiin la, ve gema akondo a na a haan iyol la ve haa un iyol, maa ve due a na ve gba yemen a na u za manden un sha kon.
21 Shi ve kighir orkarengbenda ugen u mough ken agar lu van yô, ér a tôô kon u za manden Yesu sha mi la. Lu or u ken Shirene, i yilan un ér Shimon, ter u Alekezanda man Rufu.
22 Tsô ve va a na hen ijiir igen, i yilan ér Gologota, inja na yô ér “Ijiir i Igbôndotyou.”
23 Maa ve na un wain, i nungwa megh ku mire sha mi, ér a ma, kpa a venda u man.
24 Tsô ve mande un sha kon, shi ve er ishor sha akondo a na a haan iyol, ve fa i hanmô ve nana tôô yô, maa ve kar a ker ayol a ve.
25 Ve mande un sha kon er ahwa ataankaranyiin* pepe nahan.
26 Shi ve nger ityôkyaa i ve lu wuan un sha mi la, ér: “Tor u Mbayuda.”
27 Shi ve mande mbaiv uhar sha kon ikyua a na, u môm ken uwegh nagh ku yanegh, ugen ken uwegh nagh ku imesegh.
28 *——
29 Nahan mbakarengbenda gba lamen sha a na dang dang, jingir ityough kaan ér: “Ha! We u u hemben tempel, u hiden u maan ken ayange atar ne,
30 hungwa sha kon* ne, yima ase iyol you!”
31 Upristi mba tamen man mbangerenatindi kpa lu nahan un tar, kaan ér: “A yima mbagenev; kpa ngu fan ityô u yiman iyol na ga!
32 We Kristu, Tor u Iserael, hungwa ase sha kon* ne se nenge, nahan se na jighjigh.” Mba i mande ve sha kon ikyua a na la je kpa lu lahan un.
33 Ka va kom er ahwa 12 atetan* nahan yô, ime wa hen tar la cii, zan zan va kighir er ahwa atar* atetan nahan.
34 Tsô sha ahwa atar atetan la, Yesu ôr kwagh genger genger kaa ér, “Eli, Eli, lama sabatani?” inja na yô ér, “Aôndo wam, Aôndo wam, er nan u undumu?”
35 Mbagenev ken mba ve tile her la mba ongo nahan yô, ve gba kaan ér: “Nenge! Ngu yilan Eliya.”
36 Maa orgen yevese za wa soso shin wain u angen gema shindi sha aga, za un a mi sha zwa ér a ma, lu kaan ér: “De un nen! De se nenge Eliya una va hungwa a na shin inya yô.”
37 Kpa Yesu shi ôr kwagh genger genger, maa sule.*
38 Ikyondo i yisan i ken tempel la maa pav, hii sha tume shin inya.
39 Orshoja u vesen u tile her lu kenger un la nengen er akaa ne er zum u a kpe la yô, a kaa ér: “Sha mimi yô, or ne lu Wan u Aôndo.”
40 Kasev mbagenev kpa tile ken ica lu kenger, ken a ve yô lu Maria Madalina, man Maria u ônov nav lu Yakobu u Kiriki kua Yose la, man Salome;
41 lu kasev mba ve vanden zenden vea na ve wasen un shighe u lu ken Galilia la, kua kasev mbagenev kpishi mba ve va ken Yerusalem a na imôngo yô.
42 Er hen shighe ne iyange bee, shi lu sha Iyange i Kohol Iyol, u kper a lu Iyange i Memen yô,
43 Yosev u ken Arematia za va, lu or u tagher tagher ken Mkohol u Mbaajiriv,* u un kpa lu keghen Tartor u Aôndo yô. A taver ishima a nyôr a za tile sha ishigh ki Pilatu, a pine ian i tôôn ikyom i Yesu.
44 Kpa Pilatu lu a fa jighilii ér a kpe hen shighe la ga, nahan a yila orshoja u vesen la, a pine un sha u una fa aluer Yesu kpe kera yô.
45 Orshoja u vesen la pasen un fe ér a kpe mimi yô, a na Yosev ikyom na.
46 Nahan a za yam ikyondo i taver ishe a va hungwa a ikyom na shin inya, a kange i ken ikyondo i taver ishe shon a za wa ken uwar u i time ken vande yô, maa a menger iwen a cir sha zwa u uwar shon.
47 Kpa Maria Madalina man Maria, ngô u Yose lu her lu kenger ape i gbir un la.
Ngeren mba shin kpe
^ Shin “Mkohol u Mbaajiriv.”
^ Shin “kon u manden or sha mi.” Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “er ihwa i sha utar nahan.” Yange i hii u ôron ahwa ne pepe shighe u iyange ka i hii u duen la.
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
^ Shin “kon u manden or sha mi.” Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “ka va lun ihwa i sha ataratar yô.”
^ Zwa Grika, “ihwa i sha utaankarunyiin.”
^ Shin “kpe.”
^ Shin “Sanhederin.”
