Yakobu 2:1-26
2 Anmgbianev av, a er nan ve ne na Yesu Kristu, Ter wase u icivirigh la jighjigh, shi ne lu sangen a sange ioro?
2 Gadia or ka nana̱ wa ikyunya i zanaria ken ave shi nana̱ hua akondo a doon tsung nana̱ va nyôr hen mkombo wen, kpa icanor nana̱ hua akondo a côu côu nana̱ va nyôr her nahan,
3 ka ne nenge or u a wuhu iyol sha akondo a doon tsung la a icivir, ne kaa ner, “Tema sha ikyagh kin hen ijiir i dedoo heen,” kpa icanor la yô, ne kaa ner, “We tile sha,” shin, “Za shar ikyua a kpenga wam u pendan angahar sha mi la” zee?
4 Aluer ka nahan yô, ne mba nengen ner mbagenev hemba mbagenev hen atô wen ga zee? Shi ne hingir mbaajiriv mba ôron ajir sha ifer ga zee?
5 Ver nen atô, anmgbianev av mba doon mo ishima. Ka Aôndo a tsough mba tar u nengen ve ér mba atsanaior la sha u ve̱ hingir yôughyôugh sha jighjigh u nan, shi ve̱ lu mbayandyako u Tartor u a tende zwa u nan mba a doo ve ishima la gaa?
6 Kpa ne mba ne mbaatsanev icivir ga. Ka mbanyarev ka ve eren ne ican, shi ve kôr ne ve yem a mi ken mbaatejir gaa?
7 Ka ve laha iti i dedoo i i yer ne sha mi la gaa?
8 Man aluer ne mba kuran tindi u tor, u i nger ken ruamabera ér, “Or u wan ndor a we nana̱ doo u ishima kpee je, er iyol you nahan” la yô, ka kwagh u dedoo ne lu eren ye.
9 Kpa aluer ne za hemen u sangen a sange yô, ne mba eren isholibo, shi tindi la na ne ibo ér ne mba mbaperenatindi.
10 Gadia aluer or ngu kuran Atindi cii kpa nan va per tindi môm ken a yô, nan hingir or u peren a jimin cii.
11 Gadia un u a kaa ér, “Mayange de eren idya ga” la shi kaa ér, “Mayange de woo or ga.” Nahan aluer u er idya ga kpa u gema u wua or yô, u hingir or u peren tindi.
12 Ôron nen kwagh shi eren nen kwagh sha inja i ne mba mba̱ i gbe u a va ôr ne ijir sha atindi a ka a na ior ve kera lu uikyangen ga la yô.
13 Gadia or u nan zungwen mbagenev mhôônom ga yô, a ôr nan ijir a mhôônom ma zungwen shio. Mhôônom ma zungwen hemba ijirôron.
14 Anmgbianev, aluer or kaa ér nan ngu a jighjigh u nan, kpa nan ngu tesen sha aeren ga yô, ka a inja sha nyi? Jighjigh u nan la una fatyô u yiman nana?
15 Aluer anmgbianev mba nomso shin mba kasev mba a ikyondo ga,* shi mba a kwaghyan u vea ya hen sev mbu gen ga,
16 man ma or ken a ven nan kaa a ve ér, “Za nen dedoo; zua nen a akondo, shi kwaghyan a̱ de banen ne ga,” kpa ne kera na ve kwagh u kuren gbayol ve ga yô, ka a inja sha nyi?
17 Nahan, jighjigh u nan kpaa, aluer ngu a aeren ga yô, ngu kpenegh.
18 Nahan kpa, orgen nana kaa ér: “We u ngu a jighjigh u nan, kpa mo yô, m ngu a aeren. Nahan tesem jighjigh u nan wou u a lu a aeren ga la, mo di m tese u jighjigh u nan wam sha aeren a am.”
19 U na jighjigh wer Aôndo ngu môm zee? U er doo. Azôv kpa na jighjigh, shi nga gbidi akarkase iyol sha kwagh na.
20 Kpa we or u banen a mkav, u soo u fan er jighjigh u nan u a lu a aeren ga la a lu a inja ga yôô?
21 Lu sha aeren a ter wase Aberaham i nenge un ér ngu orperapera, zum u a penda wan na Isaka sha atse a nan nagh, sha u una na nagh sha a na la gaa?
22 Alu u nenge yô, yange na jighjigh taveraa shi lu tesen un sha aeren, nahan aeren a na la na jighjigh u nan na hingir vough,
23 nahan kwagh u ruamabera ôr ne kure sha mi vough, ér: “Aberaham na Yehova* jighjigh, nahan i nenge un ér ngu orperapera,” shi i va hingir u yilan un ér ijende i Yehova.*
24 Er ne nenge nahan, a fatyô u kaan ér or ngu orperapera sha aeren, a lu sha jighjigh u nan tseegh ga.
25 Kape Rahabi u lu gbagakwase la kpa yange i nenge un ér ngu kwase u perapera sha aeren a na, zum u a ngohol ior mba ve za mker la sar sar, shi tese ve gbenda ugen ve yem la gaa?
26 Jighilii yô, er iyol i lun a iôôn* ga i lu kpenegh nahan, kape jighjigh u nan u a lu a aeren ga la kpa a lu kpenegh je la.
Ngeren mba shin kpe
^ Zwa Grika, “mba idyelegh.”
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “jijingi.”
