VEGHER 2
Kanyi i Lu Jighjigh u Nan u Mimi?
Saa jighjigh u nan wase una lu u mimi ve una lu se a inja ye, vough er inyaregh nahan
U LUN a jighjigh u nan u mimi hemba u gban nan di jighjigh tsô ér Aôndo ngu la. Ior umiliôn umiliôn na jighjigh ér Aôndo ngu kpa mba gem mba eren aferakaa sha apera. Imba “jighjigh” la ngu er ka jebu inyar nahan. Ka ki lu er ka inyaregh ki dedoo, kpa ki gema ki lu a inja ga. Nahan yô, kanyi i lu jighjigh u nan u mimi?
Jighjigh u nan u mimi har sha mfe u vough u ken Icighanruamabera la. Takerada u Aôndo a ne i nger ne ôr se mimi sha kwagh u Aôndo shi u wase se u fan un kpaa. U pase se atindi a na man mbaawashima nav kua atesen a na. Ka atesen shon agen je ne:
-
Aôndo ngu môm. Orgen ngu er un ga.
-
Yesu ka Aôndo Uhembanagee ga. Un ka profeti u Aôndo.
-
Aôndo venda eev mbu civir sha hanma gbenda cii.
-
Iyange i jirigh ngi van i á ôr uumace cii ijir yô.
-
A va nder uumace kpishi mba or fe iyenge ve ga yô, vea hide a lu uma ken Paradiso.
Jighjigh u nan u mimi mgbeghan se u eren aeren a dedoo. Aeren shon nga ne Aôndo icivir shi nga wasen se kua mbagenev kpaa. Ka aeren shon agen je ne:
-
u civir Aôndo.
-
u lun a aeren a Aôndo —hemban cii je yô dooshima.
-
u vendan mbamhen mba bov man asaren a bo.
-
u nan Aôndo jighjigh kua sha shighe u se tagher a ameen je kpaa.
-
u tesen mbagenev kwagh u Aôndo.
Jighjigh u nan u mimi wasen se u eren aeren a dedoo
U Er Nan Ve U Hingir u Lun a Jighjigh u Nan u Mimi?
Ka sea eren kwagh sha jighjigh yô, jighjigh wase a taver er azuugh a inyam a ken iyol i or u eren anumbe nahan
Sôn Aôndo iwasen. Profeti Mose yange er msen hen Aôndo ér: “Shi tesem igbenda You sha er me fa U yô; sha er i̱ doo U a mo yô.” a Aôndo yange ungwa msen u Mose ne shi er kwagh sha mi kpaa. Nahan Mose hingir or u lun a jighjigh u nan u mimi. We kpa Aôndo una wase u ú lu a jighjigh u nan u mimi.
Ver shighe u henen Icighanruamabera. Se fatyô u zuan a ityakerada i Aôndo a ne i nger, er ityakerada i itian i Mose nger la man Upasalmi kua ityakerada i Ivangeli nahan ken Icighan Bibilo, i̱ i̱ lu takerada u i hembe geman u ken ijô kpishi shi i hembe samber a u sha tar cii la. U ngu a kôpi u ungeren mba Aôndo a ne i nger mban kpa?
Dondo kwaghwan u ken Icighanruamabera la ken uma wou ayange ayange. Jighjigh u nan ngu er ka azuugh a inyam a ken iyol i or nahan. Aluer u ngu eren anumbe yô, azuugh a inyam a ou aa seer taver. Kape u eren kwagh sha jighjigh u nan ve, jighjigh wou una seer taver je la. Nahan u nenge iyol you er kwaghwan u Aôndo a lu a inja yô. Sha mimi yô, kwaghwan u injaa u ken Icighanruamabera la gema ior kpishi je. Ôr sen tsô u nenge er Icighanruamabera a gem ior mbagenev yô.
a Ekesodu 33:13.
