Apostoli Paulu yange nger Mbakristu mba ken Tesalonika washika, kaa ér: “Aluer ma or wa kwagh u se ôr ken washika ne ikyo ga yô, ver nen nan ikyav.” (2 Tes. 3:14) Kera yô, yange se kaa ser kwaghwan ne ngu sha ci u mbatamen. Yange i gba u mbatamen vea na kwaghôron u tan anmgbianev icin shighe u i we ma anmgbian kwagh kwa imôngo kpa nan ze hemen u vendan kwaghwan u a dugh ken Mkaanem ma Aôndo yô. Yange a naan kwaghôron la kera yô, mbapasenkwagh ve kera lumun ér or u i ver nan ikyav la nana lu imôngo a ve, er shighe u i lu eren iniongo nahan ga.

Nahan kpa, gba u se sôr ityesen ne. Se kav inja i kwaghwan u Paulu ne hegen ser, ka kwagh u hanma Orkristu nana tsua u eren yô. Nahan ityôkyaa kera ngi i mbatamen vea na kwaghôron u tan anmgbianev icin ga. Er nan ve se nyôôso mkav wase? Hen sha kwagh u Paulu lu ôron ve na kwaghwan ne la.

Paulu kaa ér, mbagenev ken tiônnongo la yange ve lu “zenden nzughul nzughul.” Yange wa ve kwagh u har sha Mkaanem ma Aôndo yô, kpa ve venda kwaghwan shon. Kwa masetyô u za sôr ve la, yange wa ve kwagh ér: “Aluer or soo u eren tom ga yô, kwaghyan kpa nana̱ de ye ga.” Nahan kpa, mbagenev lumun u eren tom suen ayol a ve ga, shin er lu u vea fatyô nahan kpaa. Shi ve lu wan ave sha akaa a a lu a ve ga yô. Nahan lu u Mbakristu vea eren kwagh a mba ve lu zenden nzughul nzughul mbara nena?—2 Tes. 3:6, 10-12.

Paulu kaa ér: “Ver nen nan ikyav.” Ishember i ken zwa Grika la ngi ôron kwagh u we veren ishima sha ieren i or la shi fan wer ieren i nan i bo la ia fatyô u tsaren we. Paulu yange nger washika ne hen anmgbianev mba ken tiônnongo la jimin cii, lu mbatamen tseegh ga. (2 Tes. 1:1; 3:6) Nahan hanma Orkristu u nan fe anmgbian u nomso shin u kwase u nan vende u dondon kwaghwan u ken Mkaanem ma Aôndo yô, nana tsua u ‘kera lun vea nan imôngo ga.’

Kwagh ne tese ér gba u a eren kwagh a or shon vough er i eren kwagh a or u i dugh nan ken tiônnongo kera nahanaa? Ei, sha ci u Paulu shi kaa ér: “Za nen hemen u wan nan kwagh sha inja i anmgbian.” Nahan Mbakristu vea za hemen u duen kwaghpasen shi zan mbamkombo vea or u i ver nan ikyav la, kpa hanma Orkristu nana tsua a ishima i nan u kera lun vea nan imôngo er shighe u iniongo nahan ga. Sha ci u nyi? Paulu kaa ér: “Sha er kunya ua kôr nan a iyol i nan yô.” Aluer i er nahan yô, alaghga kunya ua kôr Orkristu u nan lu zenden nzughul nzughul la a iyol i nan sha ci u ieren i nan i shami ga la, nahan nana sôr inja.—2 Tes. 3:14, 15.

Ka hanma shighe Orkristu nana fa or u i gbe u a ver nan ikyava? Hiihii yô, gba u se fa aluer nan ngu eren kwagh nzughul nzughul er Paulu a pase nahan yô. Yange lu ôron kwagh u mba mnenge ve a kaha a u wase sha akaa a Bibilo i we tindi sha mi ga, a or a tsua a ishima i nan la ga. Shi lu kwagh u or u nan er se kwagh u vihin di tsô la lu ôron ga. Kpa Paulu lu ôron kwagh u ior mba ve vende u dondon kwaghwan u Aôndo sha apera la.

Nyian ne, aluer se nenge ma anmgbian nan ngu dondon kwaghwan u Bibilo ga sha apera yô, a se tsua a ishima yase ser se kera luun imôngo a nan ga, er shighe u iniongo nahan. Er i lu kwagh u or a tsua a ishima i nan yô, doo u tsombor ua za ôr mbagen kwagh u ve tsough u eren la ga. Kpa nana duen kwaghpasen shi nana zaan mbamkombo vea vese her. Nana sôron ieren i nan i shami ga la yô, se gba eren hanma kwagh vea nan.