NGEREN U TIMEN SHA MI 19
Se Er Nan Ve Se Seer Nan Jighjigh a Ityendezwa i Yehova i Van a Tar u He Laa?
“[Aôndo] Una kaa kwagh yô, Una kera er sha mi gaa?”—NUM. 23:19.
ICAM 142 Kôr Ave sha Ishimaverenkeghen Yase La
KWAGH U I TIM SHA MI KEN NGEREN NE YÔ a
1-2. Ka nyi i gbe u se er shighe u se lu keghen mve u tar u he nee?
SE WUESE kpishi er Yehova a tende zwa u va karen a tar ne kera, van a tar u he u perapera yô. (2 Pet. 3:13) Se fa shighe u tar u he la ua va jighilii ga. Nahan kpa, akaa a se nenge a lu zan hemen sha tar hegen ne tese ér shighe la zurum.—Mat. 24:32-34, 36; Aer. 1:7.
2 Er shighe la a lu a va ga ne, sea civir Yehova ica a gba nan nan kpa, se cii gba u se seer nan jighjigh a ityendezwa la. Sha ci u nyi? Sha ci u aluer or na jighjigh taveraa je kpa, jighjigh u nan la una fatyô u ndôhôr. Jighilii yô, apostoli Paulu yange yila mban u jighjigh u nan ér “isholibo i i ngôôr tagher se ga la.” (Heb. 12:1) Kwagh u se er ve jighjigh u nan wase una ndôhôr ga yô, a gba u se gbidyen kwar tsembelee sha akaa a a lu za hemen sha tar hegen u tesen ér tar u he zurum la.—Heb. 11:1.
3. Ka nyi se lu timen sha mi ken ngeren nee?
3 Ken ngeren ne, se lu timen sha akaa atar a aa wase se u seer nan jighjigh a ityendezwa i Yehova a er u van a tar u he la yô. Akaa shon yô ka: (1) u henen sha kwagh u nagh ku ipaan kura zulee, man (2) u henen sha tahav mbu Yehova a lu a mi la, kua (3) u eren akaa a se seer kporom hen Yehova yô. Maa shi se time se nenge er loho u Yehova tindi hen Habaku la ua na jighjigh wase una seer taver nyian yô. Nahan kpa, de se hii timen sha mbamlu mbagenev mba alaghga se lu tagher a mi hegen, nahan i gbe u se na jighjigh taveraa a ityendezwa i Yehova a er u van a tar u he la yô.
MBAMLU ASEV MBA I GBE U SE LU A JIGHJIGH U NAN TAVERAA YÔ
4. Ka akaa a nyi nahan ka i gba u saa se lu a jighjigh u nan taveraa ve se tsua u eren sha kwaghfana?
4 Hanma iyange yô, ka se tsua u eren akaa a i gbe u saa se lu a jighjigh u nan taveraa ve se er sha kwaghfan yô. Ikyav i tesen yô, ka se tsua ior mba se luun vea ve yô, man akaa a se er ve a saan se iyol, man makeranta u se za, man or u se vôso, man ônov mba se mar, kua tom u se eren yô. Doo u hanma wase nana pine iyol i nan ér: ‘Akaa a m tsough u eren ken uma wam ne tese ér m na jighjigh mer tar ne ka u tsan gbem ga, shi ica a gba ga tsô Aôndo una kar a u kera, una va a tar u he kpa? Shin m ngu eren akaa a ior mba ve nengen ér ku ka mkur u hanma kwagh la kpa ve eren laa?’ (Mat. 6:19, 20; Luka 12:16-21) Aluer se seer nan jighjigh ser tar u he zurum yô, se tsua akaa a i hembe doon u se er yô.
5-6. Er nan ve i gbe u se lu a jighjigh u nan taveraa ken ashighe a icana? Tese ikyav.
5 Shi se mba tagher a atsan a i gbe u se lu a jighjigh u nan taveraa yô. Se fatyô u tagher a mtev u sha ican, gayô icôronuange, shin akaa agen a aa na iyol ia kpe se u civir Yehova yô. Sha hiihii la, alaghga se nenge ser se fatyô u taver ishima. Kpa aluer zayol wase la ngu been ga, er mbamzeyol kpishi ve been ga nahan yô, a gba u se lu a jighjigh u nan taveraa sha er se taver ishima, shi se za hemen u civir Yehova saan saan yô.—Rom. 12:12; 1 Pet. 1:6, 7.
6 Shighe u se lu yan ican a zayol yô, alaghga a lu se er tar u he u Yehova a tende zwa u van a mi la ua tsa a va ga nahan. Kpa aluer se hen kwagh nahan yô, tese ér jighjigh wase taver ga shinii? Ei, ka nahan ga. Ikyav i tesen yô, shighe u iceenyolough i ve yô, alaghga a lu se inja er ura a kera tsa a nôô ga nahan. Kpa shighe u fam la ka una kuman je maa ura u nôô. Kape shighe u iyol i kpe se kpishi kpa ka i lu vough je la. Alaghga a lu se inja er tar u he ua tsa a va ga nahan. Kpa aluer jighjigh u nan wase taver yô, se fa ser Aôndo una er akaa a a tende zwa u eren la kpee a bunde ga. (Ps. 94:3, 14, 15; Heb. 6:17-19) Aluer se mba a vangertiôr la yô, mcivir u Yehova una za hemen u lun kwagh u hiihii ken uma wase.
7. Ka mhen u nyi i gbe u se palegha?
7 Shi gba u se lu a jighjigh u nan taveraa ve se fatyô u eren tom u pasen kwagh la ye. Ior kpishi mba se pasen ve kwagh la nenge ér tar ua fatyô u doon er “loho u dedoo” u kaa ér tar u Aôndo a tende zwa u van a mi la ua va lu la ga. (Mat. 24:14; Esek. 33:32) Mayange je se soo u tan akperan sha ma kwagh u Yehova a tende zwa u eren, er ve nahan ga. Aluer se soo u lun er ve nahan ga yô, a gba u se za hemen u seer lun a jighjigh u nan. De se time sha akaa atar a aa wase se u eren kwagh ne yô.
HEN SHA KWAGH U NAGH KU IPAAN
8-9. Aluer se mba henen sha kwagh u nagh ku ipaan kura yô, jighjigh u nan wase una seer taver nena?
8 Kwagh ugen u se er ve jighjigh u nan wase una seer taver yô, ka u henen sha kwagh u nagh ku ipaan kura. Ka nagh ku ipaan kura ku ne i lu u akaa a Aôndo a tende zwa la cii aa kure sha mi ye. Ka sea hen sha ityôkyaa i yange i na nagh ku ipaan, man kwagh u Yehova er sha u nan nagh kura yô, se seer nan jighjigh ser ityendezwa i Aôndo i van a tar u dedoo u se lu uma ker gbem sha won la ka kwagh u bunden ga. Se fatyô u ôron nahan sha ci u nyi?
9 Ka nyi Yehova yange er sha u nan nagh ku ipaan kura? Yehova yange tindi Wan na u ishima ishima, u hemba lun vea na kôôsôô la, i va mar un shin tar lu orumace u lun a isholibo iyol shio. Shighe u Yesu lu shin tar la, yange tagher a atsan atô kposo kposo. Ya ican shi kpe ku u nyoon kpishi. Kwagh ne yange bende a Yehova kpen kpen! Aôndo wase u se doo un ishima la yange ma de ér Wan na a ya ican shi a kpe, nahan se lu uma shi i saan se iyol hen anshighe kpuaa tseegh tsô ga. (Yoh. 3:16; 1 Pet. 1:18, 19) Er Yehova na Wan na u ishima ishima la va paa se yô, se fa keng je ser una er hanma kwagh u i gbe u una er cii, sha er se fatyô u va lun uma gbem sha won ken tar u he la yô.
HEN SHA TAHAV MBU YEHOVA A LU A MI LA
10. Mbaefese 3:20 kaa ér ka nyi Yehova una fatyô u erene?
10 Kwagh u sha uhar u se er ve jighjigh u nan wase una seer taver yô, ka u henen sha tahav mbu Yehova a lu a mi la. Ngu a tahav mbu eren hanma kwagh u a tende zwa u eren cii. Ior kpishi nyian nenge ér se fatyô u va lun uma gbem sha won ken tar u he, er Bibilo i tôndo zwa nahan ga. Kpa Yehova tôndo zwa u eren akaa a uumace vea fatyô u eren mayange ga yô. Un yô, una fatyô u eren akaa la sha ci u ngu Aôndo u Hemban Agee Cii. (Yobu 42:2; Mar. 10:27) Sha nahan yô, se fa dedoo ser una er akaa a kpilighyol a a tende zwa la.—Ôr Mbaefese 3:20.
11. Ter kwagh môm ken akaa a kpilighyol a Aôndo yange tôndo zwa ér una er yô. (Nenge ngeren u kiriki u a lu a itinekwagh ér “ Uityendezwa mba Kpilighyol Mbagen mba Ve Kur sha Mi Yô” la.)
11 Nenge akaa a kpilighyol agen a Yehova yange tôndo zwa u eren sha ci u ior nav sha ayange a tsuaa la. Yange kaa a Aberaham man Sara shighe u ve bee iyol la ér vea mar wan u nomso. (Gen. 17:15-17) Shi kaa a Aberaham ér tsombor na ua ya dyako u tar u Kanaan. Ken anyom kpishi a tsombor u Aberaham, ka Mbaiserael je la, lu ikpan ken Igipiti la, ka keng yange a lu ve inja er ityendezwa ne ia fatyô u kuren sha mi ga nahan. Kpa ityendezwa shon va kure sha mi vough. Shighe karen yô, Yehova kaa ér Elisabetu una mar wan, shin er bee iyol nahan kpaa. Shi kaa a Maria u lu iniunkwase la ér una tindi Wan na Maria a va mar un shin tar. Lu u a maren wan ne yô, kwagh la una kure ityendezwa i Yehova er ken Sule u Eden anyom udubu imôngo ken ijime la!—Gen. 3:15.
12. Yosua 23:14 man Yesaia 55:10, 11 ôr se nyi wang sha kwagh u tahav mbu Yehova?
12 Aluer se hen sha uityendezwa mba Yehova yange er kua igbenda i yange kure ve la yô, kwagh la una wase se u nengen er a lu a tahav kpishi yô. Nahan se seer nan jighjigh a ityendezwa na i van a tar u he la. (Ôr Yosua 23:14; Yesaia 55:10, 11.) Kwagh ne una na se hemba wan ago iyol u wasen mbagenev ser ve nenge wang er ityendezwa i tar u he la i lu mnyamciem shin zwanyohon ga yô. Yehova iyol na ôr kwagh sha kwagh u usha mba hev man tar u he ér: “Mkaanem man ma kuma u nan ma jighjigh, shi ka ma mimi.”—Mpa. 21:1, 5.
EREN AKAA A U SEER KPOROM HEN YEHOVA YÔ
MBAMKOMBO MBA TIÔNNONGO
Kwagh u se eren u civir Yehova ne una wase jighjigh u nan wou una seer taver nena? (Nenge ikyumhiange i sha 13)
13. Mbamkombo vea fatyô u seer taver jighjigh u nan wase nena? Ta iwanger.
13 Kwagh u sha utar u se er ve jighjigh u nan wase una seer taver yô, ka u tôôn shighe eren akaa sha ci u Yehova. Ikyav i tesen yô, nenge ase er ka sea zaan mbamkombo mba tiônnongo ve kwagh la a wase se yô. Anmgbian u kwase ugen u a er tom u pasen kwagh la sha igbenda kposo kposo anyom imôngo yô, iti na ér Anna, a kaa ér: “Mbamkombo na yô, jighjigh u nan wam ngu her taveraa. Ornankwaghôron ka nana fa u tesen tsembelee ga shin nana ôr kwagh u he a seer sha akaa a m vande fan la ga kpa, ka m ungwa kwagh u una na me hemba kaven mimi u Bibilo yô, nahan jighjigh wam a seer taver.” b Shi jighjigh u nan wase una fatyô u seer taver zum u se ongo anmgbianev asev mba nomso man kasev ve ne ikyar ken mkombo yô.—Rom. 1:11, 12; 10:17.
TOM U PASEN KWAGH
Kwagh u se eren u civir Yehova ne una wase jighjigh u nan wou una seer taver nena? (Nenge ikyumhiange i sha 14)
14. Tom u pasen kwagh la ka u na jighjigh wase a seer taver nena?
14 Shi ka sea eren tom u pasen kwagh la yô, jighjigh u nan wase a seer taver. (Heb. 10:23) Anmgbian u kwase ugen u a civir Yehova i hemba anyom 70 yô mba yer un ér Barbara, a kaa ér: “Zan zan hegen kpa m nenge mer tom u pasen kwagh la na jighjigh u nan wam seer taver. Ka mea lamen a ior sha akaa a kpilighyol a Yehova a tende zwa u eren la yô, jighjigh u nan wam kpa a seer taver.”
KWAGHHENEN U SHA TSEENEKE
Kwagh u se eren u civir Yehova ne una wase jighjigh u nan wou una seer taver nena? (Nenge ikyumhiange i sha 15)
15. Kwaghhenen u sha tseeneke ka a seer taver jighjigh wase nena? (Shi nenge ufoto kpaa.)
15 Shi nenge kwagh ugen u una fatyô u seer taver jighjigh u nan wase yô, ka: kwaghhenen u sha tseeneke. Anmgbian u kwase ugen iti na ér Susan, a pase er u veren ashighe a henen kwagh la i wase un yô, a kaa ér: “Hanma iyange i Lahadi yô, ka m wa iyol sha ngeren u Iyoukura u a va hen sha iyange i Lahadi ken kasua u dondon la yô. Sha iyange i Hiitom man Tomahar di, ka m wa iyol sha mkombo u ken atô u kasua. Ayange agen cii ka m hen akaa a m soo u fan la ken kwaghhenen wam u sha tseeneke.” Er Susan a lu dondon ashighe a a ver u henen kwagh ne vough vough yô, kwagh la wase un u seer lun a jighjigh u nan. Anmgbian u kwase ugen u a er tom hen afishi a shin itine la ica i gbe yô, iti na ér Irene, a nenge ér ka una timen sha akaaôron a profeti a ken Bibilo yô, jighjigh na a seer taver. A kaa ér: “Ka mea nenge er akaa a Yehova a tsenga ôron la agen a hila kur sha mi vough nahan, i kpiligh mo iyol kpishi.” c
“UNA VA KPEE, UNA BUNDE GA”
16. Kwagh u Yehova yange ôr sha u taver Habaku ishima la ngu se a inja nyian sha ci u nyi? (Mbaheberu 10:36, 37)
16 Mbacivir Yehova kegh mkur u tar ne ica i gba hegen. Mbagenev yô ka ve er mkurtar timbir u van yum nahan. Kpa Yehova fa er ka i lu ior nav ken ishima yô. Jighilii yô, yange kaa a profeti Habaku ér: “Mpase u sha mnenge ne ngu keghen shighe na, ngu zan fefa sha u kuren, una er aie ga; shin er una ngôôr kpaa, kegh un, gadia una va kpee, una bunde ga.” (Hab. 2:3) Kwagh u Yehova pase wang ne lu sha ci u Habaku tseeghlee? Shin mkaanem nam man ma sha ci wase nyian kpaa? Yehova yange kaa a apostoli Paulu ér a ôr mkaanem mara sha kwagh u Mbakristu mba ve lu keghen tar u he la. (Ôr Mbaheberu 10:36, 37.) Sha kpôô yô, se fatyô u nan jighjigh ser, aluer ka inja er myom wase u Yehova a tende zwa la timbir u van nahan kpa, “una va kpee, una bunde ga,” man a lu sha shighe vough.
17. Anmgbian u kwase ugen yange dondo kwaghwan u Yehova wa Habaku la nena?
17 Mbacivir Yehova kpishi mba dondon kwaghwan na u a kaa ér “kegh” la. Mbagenev je yô kegh anyom kar kpishi hegen. Ikyav i tesen yô, anmgbian u kwase ugen mba yer un ér Louise, yange hii u civir Yehova ken inyom i 1939 la je, a kaa ér: “Yange m hen mer me lu a bee kôleeji ga je tsô Armagedon una va, kpa kwagh er nahan ga. Ken anyom a a kar kpishi ne, m zua a iwasen kpishi sha u ôron Bibilo sha ajiir a i ôr kwagh u ior mba yange ve kegh Yehova ér a kure uityendezwa nav la. Nahan kwagh la wasem u keghen shighe u Yehova una va kure uityendezwa nav la. M ôr kwagh u Noa man Aberaham man Yosev, kua mbagenev mba yange ve kegh Yehova shighe gôgônan cii ve, ve va zua a injar i tôndo zwa u nan ve la. Er hanma shighe ka m na jighjigh mer akaa a Yehova a tende zwa la cii aa kure sha mi vough yô, kwagh la wasem kua mbagenev kpaa, se hingir u lun a vangertiôr ser tar u he zurum.” Mbagenev kpishi mba ve kpa ve civir Yehova ica i gbe la kpa nenge nahan!
18. Aluer se mba kenger akaa a Aôndo a gbe la yô, se seer nan jighjigh ser tar u he ua va sha ci u nyi?
18 Tar u he la ngu a va ga. Nahan kpa, hide nenge akaa a a lu hegen ne, er asan man ikyon man annyamev kua uumace nahan. Hanma or cii nan nengen ér akaa ne nga kpôô kpôô, shin er sha hiihii la akaa shon lu ga nahan kpaa. Hegen yô, akaa shon nga, sha ci u Yehova gba a. (Gen. 1:1, 26, 27) Aôndo wase shi tôndo zwa ér una gba tar u he, man ka u una kure ityendezwa na ne. Ken tar u he la, ior vea lu gbang gbang shi a saan ve iyol gbem sha won. Se fatyô u lun a jighjigh u nan ser tar u he la ua va sha shighe u Aôndo a soo la.—Yes. 65:17; Mpa. 21:3, 4.
19. U er nan ve jighjigh wou una seer tavera?
19 Shighe u u lu keghen mve u tar u he ne, nôngo sha afatyô wou cii jighjigh wou a seer taver. Wuese nagh ku ipaan kura hanma shighe cii. Henen sha tahav mbu Yehova a lu a mi la. Shi eren akaa a u tsough u eren sha ci u Yehova la kpoghuloo. Aluer u ngu eren nahan yô, we kpa u lu ken “mba yan dyako sha akaa a i tende zwa u nan ve, sha ci u jighjigh u nan man ishimawan ve la.”—Heb. 6:11, 12; Rom. 5:5.
ICAM 139 Tôô Wer u Ngu ken Tar u He
a Ior kpishi nyian na jighjigh a ityendezwa i Bibilo i sha kwagh u tar u he la ga. Ve hen ér ka mnyamciem shin ka kwaghalôm, shin kwagh shon doo gande; kwagh a fatyô u eren nahan ga. Kpa se yô, se na jighjigh ser akaa a Yehova a tende zwa u eren cii yô, una er a keng a bunde ga. Nahan kpa, gba u se za hemen u nôngon kwagh kpoghuloo sha er jighjigh u nan wase una lu her taveraa yô. Se er kwagh ne nena? Ngeren ne una pase se.
b I yila mbagenev ken ngeren ne sha ati a ve kpôô kpôô ga.
c U fatyô u zuan a ngeren mba sha kwagh u akaaôron a profeti a ken Bibilo kpishi ken Takeda u Tôvon sha Kwagh u Mbashiada mba Yehova, sha itinekwagh i “Kwaghôron u Profeti” la. Ikyav i tesen yô, nenge ngeren u a lu a itinekwagh ér “Kwaghôron u Yehova Gbe Inya Ga” la, ken Iyoukura i Janawari 1, 2008.
