1. Dooshima u Aôndo la ngu a na i lu u ken ishima nena?

APOSTOLI YOHANE nger ér, “Aôndo ka dooshima.” (1 Yoh. 4:8) Se fa ser ka Aôndo a gbe akaauma ye. Nahan kpa, mkaanem ma Yohane ôr tiônôô ne ma umbur se er Aôndo iyol na a lu dooshima yô. Se doo Yehova ishima! Er se fe ser se doo un ishima yô, kwagh la ngu a na se lu ken mkor shi i saan se iyol kpaa.

2. Ka atindi ahar a hemban cii a nyi i er kwagh u a ken Mateu 22:37-40, man ka nyi alaghga ia na a taver se u kuran tindi u sha uhar laa?

² Gba u Mbakristu cii vea doo ayol a ve man kwagh ne ka tindi je. (Ôr Mateu 22:37-40.) Ka sea fa Yehova tsembelee yô, i lu se zange u kuran tindi u hiihii la. Sha ci u Yehova ngu a mshi ga, we se ikyo shi eren a vese kundu kundu kpaa. Nahan kpa alaghga a taver se u kuran tindi u sha uhar la. Sha ci u nyi? Sha ci u anmgbianev asev mba nomso man mba kasev mba ve hembe lun mba wan ndor a vese cii la ve yina. Alaghga ashighe agen vea ôr shin vea er kwagh a vese a lu se inja er se doo ve ishima ga shi ve wa se ikyo ga nahan. Yehova yange fa je ér a taver se u dondon tindi ne. Ka nahan ve yange mgbegha ior mba ngeren Bibilo mbagen sha er ve tese se er i hii ve i gbe hange hange u se tesen dooshima man er se er kwagh ne yô. Môm ken ve yô, lu Yohane.—1 Yoh. 3:11, 12.

3. Lu nyi Yohane ôr kwagh u i var vara?

³ Yohane pase ken akaa a yange nger la kwa kimbir kimbir er i gbe u Mbakristu vea doo ayol a ve yô. Ken takeda u Bibilo u Yohane nger sha kwagh u uma u Yesu la, a ter ishember i “dooshima” la hemba ngeen a ikwa i i nger i ken Mateu man Luka  kua Marku la cii. Shighe u Yohane nger takeda u ivangeli man uwashika mba utar mbara la, zulum anyom deri môm. Ityakeda i Bibilo ne tese se ér, gba u hanma kwagh u se lu eren cii una har sha dooshima. (1 Yoh. 4:10, 11) Nahan cii kpa, yange shighe kar cii ve Yohane hen kwagh ne ye.

4. Lu hanma shighe cii Yohane eren kwagh a ior sha dooshima yee?

⁴ Shighe u Yohane lu gumor la, lu hanma shighe cii tesen ior dooshima ga. U tesen ikyav yô, shighe ugen la, Yesu vea mbahenen nav lu zan ken Yerusalem, nahan ve due gbenda ken Samaria. Ior mba ken angar ugen ken Samaria venda u ngohol ve. Nahan Yohane er nena? Yange ishima vihi Yohane ker vea anngô na Yakobu ve pine Yesu, aluer ka u ve yila usu u sen sha u hia ior mba hen angar la kera yô! (Luka 9:52-56) Shighe ugen la di, Yohane er kwagh a mbaapostoli mbagen mbara sha dooshima ga. Ikyav tese ér lu un vea anngô na Yakobu yange ve kaa a ngô ve ér a za ôr Yesu a ver ve sha aan a icivirigh ken Tartor ye. Mbaapostoli mbagen mbara va fe kwagh u Yohane man Yakobu er ne yô, asema vihi ve ker kpishi! (Mat. 20:20, 21, 24) Er Yohane er akaa shami ga nahan kpa, yange doo Yesu ishima.—Yoh. 21:7.

5. Ka nyi se lu timen sha mi ken ngeren nee?

⁵ Se lu timen sha kwagh u Yohane man akaa agen a yange nger sha kwagh u dooshima la ken ngeren ne. Se nguren timen sha akaa ne yô, se hen igbenda i se fatyô u eren kwagh a anmgbianev asev mba nomso man mba kasev sha dooshima yô. Shi se hen gbenda u injaa u orya nana fatyô u tesen ér tsombor u nan doo nan ishima yô.

6. Ka nyi Yehova a er u tesen ér se doo un ishima?

⁶ Ka a ôron kwagh u dooshima yô, ashighe kpishi se hen ser ka u soon kwagh u mbagenev shin ôron akaa a dedoo sha iyol ve la. Kpa aluer mbagenev doo se ishima sha mimi yô, a gba u se eren akaa a dedoo a ve u tesen ser ve doo se ishima. (Nenge Yakobu 2:17, 26.) Ikyav i tesen yô, se doo Yehova ishima. (1 Yoh. 4:19) Shi a pase se ken Mkaanem nam ér se doo un ishima sha akaaôron a doon tsung aa a ne i nger ker la. (Ps. 25:10; Rom. 8:38, 39) Nahan cii kpa, se mba a vangertiôr ser se doo Aôndo ishima ka sha ci u akaa aa a ôr la tsô ga, kpa ka sha ci u akaa aa a eren la. Yohane nger ér: “Ka sha kwagh ne i pase er se doo Aôndo ishima ye: Aôndo tindi Wan na u môm môm la shin tar, sha u se̱ zua a uma sha a na.” (1 Yoh. 4:9) Yehova yange de ér Wan na u môm môm la a va ya ican shi a kpe sha ci wase. (Yoh. 3:16) Kwagh la tese wang je ér se doo Yehova ishima sha mimi.

7. Ka nyi Yesu yange er u tesen ér se doo un ishima?

⁷ Yesu yange kaa a mbahenen nav ér ve doo  un ishima. (Yoh. 13:1; 15:15) Yange ôr ér mbahenen nav mbara man se cii se doo un ishima, man lu sha kwagh u ôr la tsô ga, kpa kua sha kwagh u er la. Yesu kaa ér: “Or môm ngu a dooshima u a hembe u or nan uma u nan sha ci u azende a nan la ga.” (Yoh. 15:13) Zum u se hen sha kwagh u Yehova man Yesu ve er a vese ne yô, ka nyi i doo u se ere?

8. Ka nyi 1 Yohane 3:18 a kaa ér se ere?

⁸ Ka se tese ser Yehova man Yesu doo se ishima sha u ungwan imo ve. (Yoh. 14:15; 1 Yoh. 5:3) Yesu yange wa se tindi ér se doo ayol a ase. (Yoh. 13:34, 35) Gba u se tesen anmgbianev asev mba nomso man mba kasev ser ve doo se ishima sha iliam tseegh ga, kpa kua sha gbenda u se eren kwagh a ve la. (Ôr 1 Yohane 3:18.) Ka akaa a nyi se fatyô u eren u tesen ser ve doo se ishima?

9. Dooshima yange mgbegha Yohane u eren nyi?

⁹ Yohane yange una soo yô, ma lu vea ter na, ma eren kpenga u kôron ishu teen u tsombor na eren la, kpa er nahan ga. Yange gema uma na cii na sha u wasen ior u fan mimi sha kwagh u Yehova man Yesu. Kpa kwagh u Yohane tsua u eren ne lu kwagh u zange ga. Yange i tôv un a ican shi shighe u bee iyol la i yem a na ukyangen. (Aer. 3:1; 4:1-3; 5:18; Mpa. 1:9) Shighe u i wuhe Yohane ken purusu ér ngu pasen kwagh u Yesu la kpa, yange er kwagh u tesen ér mbagenev doo un ishima. U tesen ikyav yô, shighe u lu ken icile i Patemo la, yange nger mpase u sha mnenge u i tese un la, tindi a mi hen atôônanongo sha er a fa “akaa a ica ia gba ga tsô aa er yô.” (Mpa. 1:1) Ikyav tese ér lu shighe u Yohane due ken icile i Patemo la yange nger takeda u ivangeli u sha kwagh u uma u Yesu man tom na u pasen kwagh la ye. Shi yange nger uwashika utar u taver anmgbianev nav mba nomso man mba kasev asema. Ka sha nyi gbenda nahan u fatyô u dondon ikyav i Yohane i tangen iyol ga laa?

10. U tese wer ior doo u ishima nena?

¹⁰ U fatyô u tesen wer ior doo u ishima sha kwagh u u tsough u eren a uma wou la. Tar u Satan ne ka u soo ér u henen sha kwagh wou tseegh shi i lu iyol you tseegh u wa i ikyo ye, shi u soo ér we u lu a inyaregh kpishi shi u za iti. Kpa gema di mba ve ne ayol ave sha u pasen kwagh u Tartor u Aôndo yô, ka ve tôô shighe ve u pasen loho u dedoo shi wasen ior u kporom ikyua a Yehova. Mbagenev je yô, mba eren tom u pasen kwagh shi tesen ior ne hanma shighe.

11. Ka sha nyi gbenda nahan mbacivir Yehova sha mimi kpishi ka ve tese ér Yehova man anmgbianev vev mba nomso man mba kasev doo ve ishima?

¹¹ Mbakristu mbagen kpishi ka i gba u vea er tom kpoghuloo ve, vea fatyô u nengen sha ayol a ve kua icombor ve ye. Nahan cii kpa, mbapasenkwagh mbacivir Aôndo sha mimi mban ka ve sue nongo u Yehova sha afatyô ve cii. U tesen ikyav yô, mbagen ka ve na iwasen shighe u aahe a er yô, mbagen di ve za wase tom ape nongo u Yehova u lu maan kwagh yô, shi hanma or ngu a ian i suen tom u i lu eren tar sha won cii ne sha inyaregh ki nan. Ka ve er akaa ne sha ci u Aôndo man mbagen doo ve ishima. Hanma kasua yô, ka se tese ser anmgbianev asev mba nomso man mba kasev doo se ishima sha u zan mbamkombo mba tiônnongo shi wan zwa ker. Ka sea vôr je kpa, se nôngo sha afatyô wase se za mbamkombo. Ka a cier se iyol u nan ikyar ken mkombo je kpa, se nôngo se na. Shin er hanma wase nan lu a mbamzeyol mba nan nahan kpa, ka se taver mbagenev ishima cii ve i hii mkombo shin shighe u i dugh mkombo la. (Heb. 10:24, 25) Se wuese tom u anmgbianev asev mba nomso man mba kasev ve eren la kpen kpen!

12. Ka gbenda ugen u nyi Yohane tese ér anmgbianev nav mba nomso man mba kasev doo un ishima?

 ¹² Yohane yange tese ér anmgbianev nav mba nomso man mba kasev doo un ishima sha u wuese ve tseegh ga, yange a wa ve kwagh kpaa. Ikyav i tesen yô, yange wuese anmgbianev nav mba nomso man mba kasev ken uwashika mba nger la sha jighjigh ve u nan kua ityom i dedoo i ve lu eren la. Nahan kpa, shi wa ve kwagh taveraa sha kwagh u isholibo. (1 Yoh. 1:8–2:1, 13, 14) Se kpa doo u se wuese anmgbianev ase mba nomso man mba kasev sha akaa a dedoo a ve lu eren la. Kpa aluer or hii u lun a ieren i bo shin eren kwagh u una pav ijende i nan ye vea Yehova la yô, se fatyô u wan nan kwagh sha kwaghfan. Ka i gba u se taver ishima ve se fatyô u wan ijende yase kwagh ye. Kpa Bibilo kaa ér, mba ve lu azende a mimi yô, ka ve kôôm ayol a ve.—Anz. 27:17.

13. Ka nyi i doo u se palegh u erene?

¹³ Ashighe agen ka se er kwagh a anmgbianev asev mba nomso man mba kasev sha dooshima sha u palegh u eren akaa agen. Ikyav i tesen yô, ishima i vihin se fele sha ma kwagh u ve ôr a vese ga. Hen ase sha kwagh u er shighe u Yesu lu shin tar la. Yange kaa a mbahenen nav ér, cii ve ve zua a uma u tsôron yô, saa vea ya iyol na shi vea ma awambe a na. (Yoh. 6:53-57) Kwagh u ôr ne kunda ve iyol je yô, mbahenen nav mbagen undu un, kpa azende a na a mimi er Yohane nahan yô, undu un ga. Yange ve kav kwagh u Yesu ôr la ga, man a shi nan kpa ve kpa kwaghôron la kpiligh ve iyol. Nahan kpa azende a Yesu a mimi ne hen ér kwagh u Yesu ôr la lu shami ga maa ishima hingir u vihin ve a na ga. Kpa ve na un jighjigh sha ci u ve fa je ér ngu ôron ka kwagh u mimi. (Yoh. 6:60, 66-69) Sha nahan yô, se kpa gba hange hange u se vihin ishima fese sha kwagh u azende a ase a ôr a vese ga! Kpa hemba doon u se na ve ian i pasen inja i kwagh u ve ôr la.—Anz. 18:13; Orpa. 7:9.

14. Er nan i doo u mayange se kôr anmgbianev asev mba nomso man mba kasev ihyom ga?

¹⁴ Shi Yohane wa se kwagh ér, se de ker anmgbianev asev mba nomso man mba kasev ihyom ga. Aluer se ungwa kwaghwan ne ga yô, se na Satan ian i mgbeghan se u eren ishima na. (1 Yoh. 2:11; 3:15) Kwagh ne yange er Mbakristu mbagen sha ayange a mbaapostoli la. Satan yange lu nôngon sha afatyô na cii ér una kema ior mba Aôndo ityough nahan una va a mpav hen atô ve. Shighe u Yohane nger  uwashika nav mban ne nahan, ior mba soon u van a mpav hen atô u anmgbianev er Satan nahan la nyôr ken tiônnongo myer. U tesen ikyav yô, Diotrefe lu van a mpav ken tiônnongo kpoghuloo. (3 Yoh. 9, 10) Yange naan mbatamen mba ningir sha mba mbahemenev mba shin itine tindin la icivir ga. Shi mbagen vea ngohol ior mba a ker ve ihyom la doo doo kpa, a nôngo ér una dugh ve ken tiônnongo kera. Nenge imba icihi la sha wono! Nyian kpa Satan ngu nôngon kpoghuloo ér una va a mpav hen atô u ior mba Aôndo sha u ve de u wasen ayol a ve yô. Mayange se lumun ser ihyom i va a mpav hen atô wase ga.

15. Ka nyi i gbe u orya nana umbur?

¹⁵ Gbenda môm u injaa u orya nana tese ér tsombor u nan doo nan ishima yô, ka u nengen sha u tsembelee. (1 Tim. 5:8) Shi doo u nana umbur ér, gba hange hange u nana wase tsombor u nan u yan ijende a Yehova kôôsôô. (Mat. 5:3) Nenge ase ikyav i dedoo i Yesu a ver mbayaav yô. Takeda u Yohane ôr a vese ér, shighe u Yesu lu nôngon ku sha kon la kpa, lu henen sha kwagh u tsombor na her. Shighe u i lu wuan Yesu la, Yohane vea Maria, u lu ngô u Yesu la, lu her. Er Yesu lu ken mnyoon tsung nahan kpa, a kaa a Yohane ér a nengen sha Maria. (Yoh. 19:26, 27) Yesu yange lu a anmgbianev mba nomso man mba kasev mba vea nenge sha Maria tsembelee yô, kpa ikyav tese ér or môm ve kpa yange nan dondo Yesu hen shighe la ga. Nahan Yesu lu nôngon ér una zua a or u nana nengen sha Maria tsembelee shi nana taver un ishima sha er una za hemen u civir Yehova yô.

16. Ka ityom i nyi Yohane lu a mi?

¹⁶ Yohane yange lu a tom u eren ave kpishi. Yange lu apostoli nahan i gba u una lu eren tom u kwaghpasen sha gbashima. Shi alaghga tsô yange una er kwase nahan a gba u una nengen sha mbamgbe mba tsombor na mba sha iyol kua mba ken jijingi. (1 Kor. 9:5) Ka nyi noov vea hen ken kwagh ne nyiana?

17. Er nan i gbe hange hange u orya nana nengen sha mbamgbe mba tsombor u nan mba ken jijingi?

¹⁷ Alaghga anmgbian u nan lu a tsombor yô, nana lu a ityom igen kpaa i i gbe hange hange u nana eren yô. Ikyav i tesen yô, a gba u nana eren tom hen ijiirtom i nan sha gbashima sha er nana va a iwuese sha iti i Yehova yô. (Ef. 6:5, 6; Titu 2:9, 10) Shi alaghga nana lu a ityom igen kpa ken tiônnongo, er u taver anmgbianev  ishima shi nengen sha a ve doo doo shi hemen ken kwaghpasen nahan. Heela tseegh ga, gba hange hange u nana henen Bibilo vea kwase u nan man mbayev mba nan. Aluer nan ngu eren nahan yô, vea wuese nan kpishi sha iniôngon i nan lu nôngon ér nana wase ve, ve lu gbang gbang shi i saan ve iyol shi ve za hemen u lun azende a Yehova her la.—Ef. 5:28, 29; 6:4.

18. Yohane yange lu a vangertiôr ér nyi?

¹⁸ Yohane yange tsa sha won shi akaa er un ken uma a doon kpishi. Yange tagher a mbamtaver kposo kposo mba alaghga ma ve na jighjigh na ma vôr yô. Kpa hanma shighe yô, a nôngo sha afatyô na cii u kuran atindi a Yesu kua tindi u kaa ér, anmgbianev nav mba nomso man mba kasev ve doo un ishima la. Sha nahan yô, Yohane lu a vangertiôr ér un doo Yehova man Yesu ishima shi vea na un agee a wan ishima a nyityôkwagh i una tagher a mi i karen jighjigh na cii. (Yoh. 14:15-17; 15:10; 1 Yoh. 4:16) Yange Satan man tar na fatyô u yangen Yohane u tesen sha ieren man sha kwaghôron na ér anmgbianev nav mba nomso man mba kasev doo un ishima ga.

19. I taver se ishima ken 1 Yohane 4:7 ér se er nyi, man ka sha ci u nyi?

¹⁹ Se kpa, se mba ken tar u i lu Satan u or môm nan doo un ishima ga la a lu hemen u yô, er Yohane nahan. (1 Yoh. 3:1, 10) Er a soo ér se de u soon anmgbianev asev mba nomso man mba kasev nahan kpa, una fatyô ga, saa se na un ian di je. Yô se kange nen ishima, se za nen hemen u tesen ser anmgbianev asev mba nomso man mba kasev doo se ishima sha kwaghôron man sha ieren yase. Aluer se er nahan yô, a saan se iyol er se lu ken tsombor u Yehova ne yô, shi se hemba zuan a iember ken uma wase kpaa.—Ôr 1 Yohane 4:7.