1. Se na jighjigh ser nyi, man ka sha ci u nyi?

 KA WEA hen sha mbamzeyol mba ve lu sha tar kpishi la nahan, i taver we u nan jighjigh wer tar a va doo ken hemene? Ikyav i tesen yô, noov a kasev kpa kera doo ayol a ve er yange ve doo sha hiihii la ga. Ior mba hemban wan ayol a ve tseegh ikyo, shi eren ipila shin tswam seer a seer. Ior kpishi ka i taver ve u nan mbautahav mba ve hemen ve la jighjigh. Er akaa ne a lu eren nahan kpa, se na jighjigh ser tar a va doo ken hemen. Sha ci u nyi? Sha ci u ior mba eren kwagh vough er yange i tsenga ôron ken kwaghôron u profeti u sha kwagh u “ayange a masejime” la nahan. (2 Tim. 3:1-5) Kwaghôron u profeti ne ngu kuren sha mi hegen je ka ashe tugh ga. Mkur u kwaghôron u profeti ne ka ikyav i tesen ér Tor Kristu Yesu hii u hemen Tartor u Aôndo. Kpa ka kwaghôron u profeti ngun tseegh Bibilo i ôr sha kwagh u Tartor la ga. Aluer se time sha akaaôron a profeti agen a sha kwagh u Tartor, a a kure sha mi ken anyom a sember karen ne yô, jighjigh wase un seer taver.

2. Ka nyi se lu timen sha mi ken ngeren nee, man ka sha ci u nyi? (Lam sha foto u sha igbende.)

² Ken ngeren ne, se time sha (1) kwaghôron u profeti u una wase se u kaven shighe u Tartor u Aôndo hii u hemen la, man (2) akaaôron a profeti a aa wase se u kaven er Yesu a hingir Tor u Tartor u Aôndo sha yô, kua (3) akaaôron a profeti a a tese er mbaihyomov mba Tartor u Aôndo vea va kure la. Se nenge er akaaôron a profeti ne a zua kpiaan, u wasen se u kaven wang er i lu u ica ia kera gba ga tsô mkurtar una va, sha u kuren ityendezwa i Yehova yô.

3. Kwaghôron u profeti u ken Daniel 7:13, 14 la pase se nyi wang sha kwagh u Tartor u Aôndo?

³ Kwaghôron u profeti u ken Daniel 7:13, 14 la pase se wang ér  Kristu Yesu una hemba lun Tor u vough u hemen Tartor u Aôndo. Sha ci u i kaa ér ior mba ken akuraior cii vea lu ‘eren un tom’ saan saan. Shi a dugh un tor kera a na orgen mayange ga. Kwaghôron u profeti ugen ken takeda u Daniel tsenga ôron ér Yesu una hii u hemen Tartor u Aôndo zum u shighe u i ver la una bee yô. I yila shighe shon u i ver la ken kwaghôron u profeti ér ashighe ataankarahar. Nahan se fatyô u fan shighe u yange i na Yesu Tor ve hii u hemen la kpa?

4. Pase er Daniel 4:10-17 a wase se u gbidyen kwar fan inyom i lu u Kristu una hingir Tor u Tartor la yô. (Nenge ngeren u shin kpe.)

⁴ Ôr Daniel 4:10-17. ‘Ashighe ataankarahar’ la ka anyom 2,520. Ashighe ne yange hii zum u shi anyom 607 u a mar Yesu la. Lu shighe u Mbababilon kar a tor u masetyô sha ikyônough ki torough ki Yehova ken Yerusalem kera je la. Ashighe ataankarahar, shin anyom 2,520 la yange va iv ken inyom i 1914 la. Yehova maa ver Yesu, ‘un u ikyônough ki torough kira ki lu kwagh na jim la’ sha ki. Yesu maa hingir Tor u Tartor u Aôndo. *—Esek. 21:25-27.

5. Ka sha gbenda ugen u nyi nahan kwaghôron u profeti u sha kwagh u ‘ashighe ataankarahar’ la una fatyô u wasen se?

⁵ Kwaghôron u profeti ne una wase se nena? Aluer se kav kwaghôron u profeti u sha kwagh u ‘ashighe ataankarahar’ la yô, se nenge wang er Yehova a kuren uityendezwa nav sha shighe vough yô. Yehova yange ver shighe u una ver Yesu Tor yô. Shighe la va kuman vough yô, Yehova ver un Tor. Nahan se fa tsô ser una kure hanma ityendezwa na cii sha shighe u a ver la vough. Sha mimi yô, iyange i Yehova ia “bunde ga.”—Hab. 2:3.

6. (a) Ka nyi se nenge a mi shin tar i tesen ér Kristu hii u hemen sha? (b) Kwaghôron u profeti u ken Mpase 6:2-8 la tese mimi u kwagh ne nena?

⁶ Er lu zurum u Yesu una kure tom na u pasen kwagh shin tar la, a tsenga ôron akaa agen a aa er sha tar ve, a wase mbadondon un fan ér un hii u hemen sha yô. Yange ter ityav man ijen man mtenger u tar, kua akaa agen. Shi tsenga ôron ér ubombauangev vea lu “sha ajiir wue wue,” er angev mbu Korona mbu mbu sember van ne nahan. Bibilo kaa ér akaa ne cii ka “ikyav” i tesen ér Kristu ngu vea mbahenen nav imôngo. (Mat. 24:3, 7; Luka 21:7, 10, 11) Yange i nder Yesu shin ku shi hide kôndo yem sha, anyom kar hemba 60 nahan, maa shi tese Yohane er lu u akaa ne aa va er nahan mimi yô. (Ôr Mpase 6:2-8.) Akaa ne cii yange er shighe u i na Yesu Tor hii u hemen Tartor u Aôndo ken inyom 1914 la.

7. Er nan Yesu a hingir Tor ve maa kwagh a tser tar yum nahana?

⁷ Er nan Yesu a hingir Tor ve, akaa a vihin a er sha tar kpishi nahana? Mpase 6:2 ôr ityôkyaa la vighe vighe. Kwagh u hiihii u Yesu er zum u i na un Tor u Tartor u Aôndo kera yô, yange nôngo ityav. Nôngo ityav a unô? Yange nôngo ityav a Diabolo man azôv a na. Mpase ityough 12 kaa ér yange ityav mbira hemba Satan, nahan un vea azôv cii i ker ve ve va gba shin tar. Er ishima vihi Satan kpishi yô, a gba tesen ishimavihin na la sha uumace. Tsô ‘kwagh tser tar.’—Mpa. 12:7-12.

8. Aluer se nenge er akaa a a lu eren sha tar la a lu kuren akaaôron a profeti a sha kwagh u Tartor la yô, kwagh la una wase se nena?

⁸ Akaaôron a profeti ne aa wase se nena? Akaa a se nenge a lu zan hemen sha tar hegen la, kua gbenda u ior ve gem eren kwagh ainge la cii, ka akaa a wasen se u kaven er Yesu a hingir Tor yô. Nahan aluer se nenge ior wa iyol ve tseegh ikyo shi mba tswamen mbagenev  kpa, ishima i de vihin se ga. Se umbur nen er aeren a ve la a lu kuren kwaghôron u profeti u Bibilo i ôr yô. Tartor u Aôndo ngu hemen! (Ps. 37:1) Shi er Armagedon a zurum yô, mbamzeyol vea lu seer a seer sha tar. (Mar. 13:8; 2 Tim. 3:13) U wuese Ter wase u sha u se doo un ishima la er a wase se u fan ityôkyaa i mbamzeyol ve lu sha tar ne kpishi yum la gaa?

9. Kwaghôron u profeti u i nger ken Daniel 2:28, 31-35 la yila gomoti u masetyô u una hemen tar cii la ér nyi, man lu hanma shighe gomoti shon hii u hemene?

⁹ Ôr Daniel 2:28, 31-35. Shi se nenge er kwaghôron u profeti ne kpa a lu kuren sha mi nyian yô. Mnyam ma Nebukadinesar la lu tesen kwagh u una va za hemen “sha ayange a masetyô,” zum u hemen u Kristu ua hii kera yô. Gomoti ugen u lun a tahav sha tar cii u masetyô, u kwaghôron u profeti u ken Bibilo la a yila ér “akevangahar a a lu iyôgh nungwa inyatyuu” la, una lu ken mbaihyomov mba Yesu mba shin tar. Gomoti shon u a lu a tahav sha tar cii ne hii u hemen shighe wa karen hegen. Yange hii sha shighe u i lu nôngon Ityav mbi Tar cii Mbi Hiihii mbira ve, tar u Ingila hii u eren kwagh ken ijoughave vea tar u Amerika la. Ijoughave ne hingir Tahav mbu Tar u Amerika Vea Ingila Ve Lu a Mi sha Tar Cii La. Eev mbu Nebukadinesar nenge a mi ken mnya la shi tsenga ôron akaa agen, er ahar nahan, sha kwagh u gomoti u masetyô u lun a tahav sha tar cii ne, a aa na una lu kposo a ityartor i yange i hemen tar cii man shighe na ne yô.

10. (a) Ka nyi se nenge a mi ken Tahav mbu Tar u Amerika Vea Ingila Ve Lu a Mi sha Tar Cii La i tesen ér ka kwagh u i tsenga ôron ken kwaghôron u profeti u Daniel la? (b) Ka kwaghbo u nyi i gbe u se palegha? (Nenge ngeren u kiriki u a lu a itinekwagh ér “ U Nenge a Kwaghbo la Kpa?” la.)

¹⁰ Hiihii yô, i ôr kwagh u gomoti u a lu Tahav  mbu Tar u Amerika vea Ingila Ve Lu a Mi sha Tar Cii La ér ka iyôgh ki taver er zenaria shin azurfa nahan ga, kpa ér ka iyôgh nungwa inyatyuu. Inyatyuu la gema ka ishamior shin ior mba ken ityar i ihiar ne mba ve suen gomoti ne la. (Dan. 2:43) Nyian ne, se fatyô u nengen wang er ishamior ne ka i haa ior mba ve soo la ishangen ér ve hemen gomoti ne, shi ve gbidyen mbahemenev mba gomoti ne akpa ityô ér ve na ve ian i eren akaa sha asema a ve, shi ve mough ayôôso a ve kpoghuloo ér ve er ve ma kwagh u ve soo yô. Heela tseegh ga, ishamior ne ka i lu ken mbamzough mba mbatomov, nahan ashighe agen ve gba num ve kera yaren tom ga, ér saa gomoti a er kwagh u ve soo la. Akaa ne cii ka a na yô, mbahemenev mba gomoti u a lu a tahav sha tar cii ne ve kera fatyô u eren akaa a ve we ishima u eren la ga.

11. Er Tahav mbu Tar u Amerika vea Ingila Ve Lu a Mi sha Tar Cii La mbu lu hemen yô, kwagh la wase se u seer nan jighjigh ser se mba ken ayange a masejime sha ci u nyi?

¹¹ Sha uhar yô, “akevangahar a a lu iyôgh nungwa inyatyuu,” shin Tahav mbu Tar u Amerika Vea Ingila Ve Lu a Mi sha Tar Cii La, ka gomoti u masetyô u una hemen tar cii, u i tsenga ôron ken Bibilo yô. Gomoti ne una va karen kera yô, gomoti u uumace ugen môm una kera hemen tar mayange ga. Kpa Tartor u Aôndo ua kar a gomoti ne sha won kera elegh elegh, kua ugomoti mba uumace mbagenev cii, sha ityav mbi Armagedon. *—Mpa. 16:13, 14, 16; 19:19, 20.

12. Shi ka nyi igen kpa kwaghôron u profeti u Daniel la a tese, man kwagh shon sur se ishima shi na se ishimaverenkeghen sha ci u nyi?

¹² Kwaghôron u profeti ne una wase se nena? Kwaghôron u profeti u Daniel ôr la wase se u nengen a kwagh ugen u a tese ér se mba ken ayange a masejime yô. Profeti Daniel yange tsenga ôron kwagh ugen anyom kar hegen hemba 2,500 nahan, ér tartor u Babilon ua karen kera yô, tartor ugen kpa ua mough a hemen tar cii, shi ugen kpa ua mough, nahan zan zan a kuma ityartor inyiin, man i cii ia er tahav sha nongoior u Aôndo kpishi. Shi a pase ér Tahav mbu Tar u Amerika vea Ingila Ve Lu a Mi sha Tar Cii La mbua lu gomoti u masetyô ken ugomoti mba ityartor i inyiin ne. Kwagh ne sur se ishima, shi a na se mba a ishimaverenkeghen ser, ica ia kera gba ga tsô Tartor u Aôndo ua bee a hemen u uumace sha won cii kera elegh elegh, ua kar a hemen tar.—Dan. 2:44.

13. “Tor u sha anigheni” man utor pue mba i ter ve ken Mpase 17:9-12 la ka nyi man nyi, man kwaghôron u profeti ne kure sha mi nena?

¹³ Ôr Mpase 17:9-12. Er Ityav mbi Tar cii Mbi Hiihii mbira yange mbi na i vihi akaa kpishi yô, kwagh ugen er u kure kwaghôron u profeti ugen ken Bibilo sha kwagh u ayange a masejime yô. Mbahemenev mba tar ne lu keren ér bem a gba sha tar cii. Nahan ken uwer u Janawari, inyom i 1920 la, ve bugh mzough u i yilan ér Mzough u Ityar Sha Won Cii (League of Nations), u i va gema hingir Mzough u Ityar Cii (United Nations) ken uwer u Oktoba, inyom 1945 la. I yila mzough ne ér “tor u sha anigheni.” Kpa mzough shon ngu er ma gomoti u lun a tahav sha tar cii nahan ga. Sha ci u ka u ugomoti mba tar ne mba ve suen un la ve ne a lu a tahav ye. Bibilo zom ugomoti mba ve suen un la cii yila ér “akor pue,” ka utor pue je la.

14-15. (a) Ka nyi Mpase 17:3-5 a ôr sha kwagh u “Zegebabilon”? (b) Ka nyi i lu zan hemen sha kwagh u mbasuen kwaghaôndo u aiegh?

¹⁴ Ôr Mpase 17:3-5. Aôndo yange tese apostoli Yohane kwagh ugen ken mpase u sha mnenge, Yohane nenge a gbagakwase, ka “Zegebabilon,” u a lu tartor u kwaghaôndo u aiegh sha tar cii la je la. Kwaghôron u profeti ne kure sha mi nena? Iniongo i kwaghaôndo u aiegh sha tar ndera eren kwagh ken ijoughave vea ugomoti mba tar ne shi suen ve ka kwagh u nyian ga. Nahan kpa, ica ia gba ga tsô Yehova una wa ken  asema a ugomoti mban “sha u ve̱ er sha awashima na.” Nahan nyi ia ere? Ugomoti mba tar ne, mba i yer ve ér “akor pue” shin utor pue la, vea ta num sha iniongo i kwaghaôndo u aiegh, vea kar a i sha tar kera elegh elegh.—Mpa. 17:1, 2, 16, 17.

¹⁵ Er nan se fe ser mkur u Zegebabilon zurumu? Kwagh u una wase u u zuan a mlumun sha mpin la yô, umbur wer, kwagh ugen u yange kura gar u Babilon u sha ayange a tsuaa la lu mngerem ma Zegeifi u Yuferati, u ta agbaa ningir wa un atô la. Takeda u Mpase tôô ior umiliôn imôngo mba ve suen Zegebabilon la kar sha “mngerem” mara. (Mpa. 17:15) Shi u kaa ér mngerem mara ma a “uma kera,” u tesen je ér ior kpishi vea de u suen tartor u kwaghaôndo u aiegh la. (Mpa. 16:12) Ior kpishi nyian undu kwaghaôndo u aiegh, hide mba keren igbenda igen i been a mbamzeyol vev.

16. Aluer se kav kwaghôron u profeti u sha kwagh u Mzough u Ityar Cii kua mtim u Zegebabilon la yô, a wase se nena?

¹⁶ Akaaôron a profeti ne aa wase se nena? Mzough u Ityar Cii u yange i ver la, kua kwagh u ior kpishi ve de u suen kwaghaôndo u aiegh la cii, ka ikyav i tesen ér mimi je se mba ken ayange  a masejime. Er mngerem ma sha injakwagh ma ma wasen Babilon ne ma lu uman kera nahan kpa, ka kwagh u una kar a iniongo i kwaghaôndo u aiegh sha tar kera la ga. Er se vande ôron nahan, Yehova una wa ken asema a utor pue mbara, ka ugomoti mba tar ne mba ve suen Mzough u Ityar Cii mbara je la, “sha u ve̱ er sha awashima [u Yehova].” Ugomoti mba ityar shon vea va gema kwa môm kpoo vea ta num sha kwaghaôndo u aiegh je a kpiligh ior i tar ne iyol. * (Mpa. 18:8-10) Hen shighe la, tar cii ua gbuusu shi uma una taver kpishi. Kpa nongoior u Aôndo ua ember sha atôakyaa ahar: hiihii yô, kwaghaôndo u aiegh u a hendan a Yehova Aôndo ica i gbe yum la una kera lu sha won mayange ga; u dondon yô, se fa je ser shighe kuma u a due a vese ken tar u ifer ne kera!—Luka 21:28.

17-18. (a) Se za hemen u seer jighjigh u nan wase nena? (b) Ka nyi se lu timen sha mi ken ngeren u dondon laa?

¹⁷ Daniel yange tsenga ôron ér “mfe” u mimi una “seer.” Man kape i lu vough je la! Hegen se kav akaaôron a profeti a sha kwagh u shighe wase ne. (Dan. 12:4, 9, 10) Akaaôron a profeti ne nga kuren sha mi nyian vough je hindi ta se iyol kpishi sha kwagh u Yehova kua Bibilo i i lu Mkaanem nam la. (Yes. 46:10; 55:11) Sha nahan yô, za hemen u seer jighjigh u nan wou, man gbenda u u er kwagh ne yô, za hemen u timen ken Bibilo sha gbashima, shi wasen mbagenev wer ve civir Yehova sha gbenda u a lumun a mi la. Fa wer, una kura mba ve suur sha a na sha mimi la cii, shi una na vea “lu bem bem.”—Yes. 26:3.

¹⁸ Ken ngeren u dondon la, se lu timen sha akaaôron a profeti a a tsenga ôron kwagh u tiônnongo u Kristu u sha ayange a masejime yô. Nahan se nenge er akaaôron a profeti shon kpa a tese wang ér se mba ken ayange a masejime yô. Shi se seer nengen a ikyav i tesen wang er Yesu, u a lu Tor wase hegen la, a lu hemen mbadondon un mba mimi yô.