NGEREN U TIMEN SHA MI 22
Kwaghwan u Injaa u Una Wase Se Ayange Ayange Yô
“TER ne kwaghfan.”—ANZ. 2:6.
ICAM 89 Ungwa Imo i Ter, A̱ Ver U
KWAGH U I TIM SHA MI KEN NGEREN NE YÔ *
1. Gba u hanma wase nana lu a kwaghfan u Aôndo a nan la sha ci u nyi? (Anzaakaa 3:13, 15)
ALUER shighe ngu u yange gba u u tsua ma kwagh u vesen ken uma wou yô, ka keng yange u er msen wer Aôndo a na u kwaghfan. Sha ci u u fa je wer gba u u lu a kwaghfan. (Yak. 1:5) Tor Solomon yange nenge er kwaghfan a lu a inja kpishi yô, a nger ér: “Ma kwagh u a kom sha mi ngu ga.” (Ôr Anzaakaa 3:13, 15.) Nahan kpa, lu hanma inja kwaghfan cii Solomon lu ôron heen ga. Lu kwaghfan u Yehova Aôndo a nan la lu ôron ye. (Anz. 2:6) Kpa kwaghfan u Aôndo a nan la una fatyô u wasen se u sôron hanma zayol u se tagher a mi ciili? Een, una fatyô, er se lu nengen ken ngeren ne nahan.
2. Ka nyi se er ve se hingir mbafankwagh jim jimi?
2 Gbenda môm u se fatyô u hingir mbafankwagh sha mimi yô, ka u timen sha atesen a iorov uhar mba yange ior naan ve icivir sha ci u kwaghfan u ve lu a mi kpishi la yô, kua u dondon akaa a yange ve tese la. Se hii timen sha kwagh u Solomon. Bibilo kaa ér yange “Aôndo na Solomon kwaghfan man mkav kpishi je.” (1 Utor 4:29) Se been yô, se time sha kwagh u Yesu, u yange kwaghfan na hemba uumace mba sha won cii la. (Mat. 12:42) Yange i ôr kwaghôron u profeti sha Yesu ér: “Jijingi u TER Una lu sha a Na, ka Jijingi u kwaghfan man u mkav.”—Yes. 11:2.
3. Ka nyi se lu timen sha mi ken ngeren nee?
3 Aôndo yange na Solomon man Yesu kwaghfan kpishi. Sha nahan yô, ve fatyô u wan ior kwagh u wasen ve sha akaa a vesen. Ken ngeren ne, se lu timen sha akaa a vesen atar a i gbe u se nenge a sha gbenda u vough, er ve kpa yange ve nenge a la yô. Akaa shon yô, ka inyaregh, man tom, man iyol yase.
NENGE INYAREGH SHA GBENDA U VOUGH
4. Solomon yange lu kposo a Yesu sha gbaa u inyar nena?
4 Solomon yange lu a inyaregh kpishi, shi lu a ya u doonashe, u kundu iyol ker kpishi yô. (1 Utor 10:7, 14, 15) Kpa Yesu yô, lu a kwagh kpishi ga, ya kpa lu a mi ga. (Mat. 8:20) Nahan kpa, iorov mba uhar mban cii nenge akaa a iyolough sha gbenda u vough, sha ci u ve cii lu Yehova Aôndo na ve kwaghfan ye.
5. Solomon yange nenge inyaregh sha gbenda u vough nena?
5 Solomon yange kaa ér inyaregh ki “kor or.” (Orpa. 7:12) Ka sea lu a inyaregh yô, se fatyô u zuan a akaa a kwagh a gbe se a mi ayange ayange la, kua akaa agen a se soo yô. Solomon yô, er lu a inyaregh kpishi nahan kpa, yange nenge a akaa agen a a hembe inyaregh yô. Ikyav i tesen yô, a nger ér: “Iti i doon yô, ka kwagh u tsuwan je, hemba inyaregh ki ngeen.” (Anz. 22:1) Solomon shi nenge er mbasoon inyaregh cii i fe saan ve iyol a kwagh u ve lu a mi la ga yô. (Orpa. 5:10, 12) Nahan a ta se icin ér, inyaregh ki de lun kwagh u hemban cii ken uma wase ga, sha ci u sea lu a inyaregh nan nan kpa, kia fatyô u been kwa môm.—Anz. 23:4, 5.
Gbenda u se nengen akaa a iyolough la na yô, ka i taver se u hemban veren ishima sha akaa a Tartor ken uma wase shinii? (Nenge ikyumhiange i sha 6-7) *
6. Yesu yange nenge akaa a iyolough sha gbenda u vough nena? (Mateu 6:31-33)
6 Yesu yange nenge akaa a iyolough sha gbenda u vough. Yange yaan kwagh shi maan kwagh. (Luka 19:2, 6, 7) Kwagen la, er wain u hemban doon cii, shi lu ivande na i hiihii je la. (Yoh. 2:10, 11) Shi sha iyange i Yesu kpe la, yange hua ikyondo i taver ishe. (Yoh. 19:23, 24) Kpa Yesu de ér akaa a iyolough a hingir kwagh u vesen ken uma na ga. A kaa a mbadondon un ér: “Or môm nana fatyô u eren mbavesen uhar tom ga . . . Ne fatyô u eren Aôndo tom kua Inyaregh ga.” (Mat. 6:24) Yesu kaa ér, aluer se mba keren Tartor hiihii yô, akaa a kwagh a gbe se a mi la cii, ka keng Yehova una na se a.—Ôr Mateu 6:31-33.
7. Anmgbian ugen nenge inyaregh sha gbenda u vough nahan, kwagh la wase un nena?
7 Anmgbianev asev mba nomso man mba kasev kpishi dondo akaawan a injaa a Yehova a we sha kwagh u inyar la nahan, kwagh la wase ve kpen kpen. Nenge ase ikyav sha kwagh u anmgbian ugen u lun kwav, iti na ér Daniel. A kaa ér: “Shighe u m lu gumor la, m tsua mer me hemba veren ishima u eren akaa sha ci u Yehova ken uma wam.” Er Daniel lu eren kwagh akuma akuma ken uma na yô, fatyô u eren akaa kpishi a shighe na man mfe na sha ci u Yehova. Shi a kaa ér: “Me fatyô u kaan jighilii mer, m vaa afanyô sha kwagh u m tsua u eren ken uma wam ne ga. Ka mimi, yange mea tsua mer inyaregh ki hemba lun kwagh u vesen ken uma yô, ma m lu a inyaregh kpishi dedoo. Kpa ma m gem ma m lu a azende a injaa a m lu a mi hegen ne ga. Mea hembe veren ishima sha kwagh u inyar yô, ma i saan mo iyol er i saan mo iyol hegen ne ga. Saan mo iyol hegen sha mimi sha ci u, m hemba veren ishima u eren akaa sha ci u Yehova. Msaanyol u Yehova a nem ne ka kwagh u inyaregh ma ki fetyô u nan mô mayange ga.” Kwagh ne tese wang ér, ka sea hemba veren ishima u eren akaa sha ci u Yehova, sea hemba veren ishima sha kwagh u inyar ga yô, kwagh la a wase se kpishi.
NENGE TOM SHA GBENDA U VOUGH
8. Er nan ve se fe ser Solomon yange nenge tom sha gbenda u voughloo? (Orpasenkwagh 5:18, 19)
8 Solomon yange kaa ér aluer or ngu eren tom kpoghuloo yô, kwagh la una na a saan nan iyol. Yange kaa ér kwagh ne “ka iyua i Aôndo A ne nan je.” (Ôr Orpasenkwagh 5:18, 19.) Solomon nger ér: “Hanma tom u nyoon iyol ngu a mtsera.” (Anz. 14:23) Solomon yange fa kwagh u lu ôron yô. Yange lu or u eren tom kpoghuloo. Yange maa uya, kaha ishule i ikyon i wain, shi er ajiir a memen a doonashe kua atungu a mnger, shi maa agar kpaa. (1 Utor 9:19; Orpa. 2:4-6) Kwagh ne cii lu zegetom u kiriki ga, nahan saan Solomon iyol je ka kwagh u henen a hen ga. kpa Solomon nenge ér ka ityom i un er la tseegh ia na a saan un iyol sha mimi ga. Yange er akaa agen sha ci u Yehova kpaa. Ikyav i tesen yô, lu un iyol na nenge sha tom u maan tempel u civir Yehova ker, u i maa un anyom ataankarahar, engem kpishi la ye! (1 Utor 6:38; 9:1) Solomon eren ityom na kua ityom i sha ci u Yehova la cii been yô, mase kaven er ityom i un er sha ci u Yehova la i hembe lun a inja a i un er sha ci na iyol na la yô. A nger ér: “Ngun ka mkur u kwagh, u i vande ungwan la cii: Cia Aôndo, waan atindi Na ikyo.”—Orpa. 12:13.
9. Ka nyi Yesu yange a er sha er tom u yange eren sha ci u tsombor na la ua hemba lun un kwagh u vesen ga?
9 Yesu yange eren tom kpoghuloo. Shighe u lu gumor la, eren tom u kapinta. (Mar. 6:3) Er mbamaren mba Yesu eren tom kpoghuloo ve ve zuan a kwaghyan sha ci u tsombor ve u u lu a ior kpishi la yô, ka keng yange vea wuese tom u Yesu yange a er sha u wasen ve la. Er Yesu lu a mshi ga shin myen môm môm kpaa ga yô, yange a er tom je ma kwagh u shin môm a lu sha mi ga! Nahan ka keng ior kpishi yange vea soo tomaveegh na. Ka keng tom u Yesu eren la yange ua doo un. Er Yesu eren tom sha ci u tsombor na kpoghuloo nahan kpa, hanma shighe yô, a nôngo ér ian i civir Yehova i de karen un ga. (Yoh. 7:15) Ken masejime, shighe u Yesu va hii u eren tom u pasen kwagh hanma shighe la, a wa mba ve keghen ato a na la kwagh ér: “De eren nen tom sha ci u kwaghyan u ka a saa ishe ne ga, kpa er nen tom sha ci u kwaghyan u una lu her zan zan una kar nan uma u tsôron” la. (Yoh. 6:27) Shi ken Ityesen i sha Uwo la, Yesu kaa ér: “Koson nen akaa a injaa sha ci wen Sha.”—Mat. 6:20.
Se er nan ve tom wase ua hemba lun se kwagh u vesen a akaa a se eren sha ci u Yehova la ga? (Nenge ikyumhiange i sha 10-11) *
10. Aluer se mba eren tom kpoghuloo yô, ka zayol u nyi se fatyô u tagher a mini?
10 Aluer se mba dondon kwaghwan u injaa u Yehova a we se sha kwagh u tom la yô, kwagh la una wase se u nengen tom sha gbenda u vough. I tese se Mbakristu ér se eren “tom kpoghuloo . . . tom u dedoo.” (Ef. 4:28) Mba ve tee se tom la ka ve nenge er se lu a mimi iyol shi se eren tom kpoghuloo yô. Nahan vea fatyô u kaan a vese ér ve soo tom wase kpishi. Kwagh ne una na yô, se seer shighe u eren tom, sha ci u se soo ser or u nan tee se tom la nana wuese Mbashiada mba Yehova. Kpa aluer se er nahan yô, ica ia kera gba ga je maa se kera gba zuan a shighe u lun vea tsombor wase shin eren akaa sha ci u Yehova ga. A gba u se gema gbenda u se nengen tom la sha er se hemba zuan a shighe u eren akaa a a hembe lun hange hange yô.
11. Ka nyi anmgbian ugen a hen sha kwagh u nengen tom sha gbenda u voughlo?
11 Anmgbian ugen u a lu gumor yô, iti na ér William, yange ortamen ugen tôô un tom. Nahan ieren i ortamen la tese un er i gbe hange hange u se nengen tom sha gbenda u vough, shin se de tom ua hemba lun se kwagh u vesen ga yô. William kaa ér: “[Anmgbian] ne ver ikyav i dedoo kpishi i nengen tom sha gbenda u vough. Ka a er tom kpoghuloo, shi mbakasuav nav mba wuese un sha ci u a fa tom. Kpa ka a va kuma u kurun tom yô, a kur a za mase eren kwagh a shighe na man agee a na sha ci u tsombor na man Yehova. Man anmgbian ne kpa ngu ken mba m fe i hembe saan ve iyol cii yô!” *
NENGE IYOL YOU SHA GBENDA U VOUGH
12. Solomon yange tese ér un nenge iyol na sha gbenda u vough nena, kpa va kera nenge iyol na sha gbenda u vough ga nena?
12 Shighe u Solomon lu civir Yehova sha mimi la, yange nenge iyol na sha gbenda u vough. Shighe u lu gumor la, hide a iyol na ijime, pase er un yen yô. Nahan sôn Yehova ér a na un kwaghfan u una wase un u eren kwagh sha gbenda u vough yô. (1 Utor 3:7-9) Shighe u Solomon lu tor la, yange fa er u kenden a iyol sha i lu kwaghbo yô. A nger ér: “Ken ijime i iyolgengese yô, ka mtim, ken ijime i iceen ka mgbe.” (Anz. 16:18) Kpa kwagh er vihi yô, Solomon va kera dondo kwaghwan na ne ga. Tem tor shighe karen yô, va hii u kenden a iyol sha, man kera wa atindi a Aôndo ikyo ga. Ikyav i tesen yô, tindi ugen ken atindi a Aôndo wa Mbaiserael yô kaa ér, tor u Mbaheberu nana de “seer a seer kasev kpishi ga, sha er ishima i nan i̱ de danen ga yô.” (Dut. 17:17) Solomon yange venda u dondon tindi la, gema er kasev 700, shi lu a kasev mbagenev mba vôso a vôso ga yô 300, man kasev mban kpishi lu mbafan Aôndo ga. (1 Utor 11:1-3) Alaghga Solomon tôô ér kwagh a zayol ga. Yange una hen nahan shin una hen nahan ga kpa, er Solomon kera ungwa imo i Yehova ga yô, akaa va er un a vihin kpishi.—1 Utor 11:9-13.
13. Aluer se gbidye kwar sha ieren i Yesu i hiden a iyol ijime la yô, ka nyi se fatyô u henene?
13 Yesu yange za hemen u nengen iyol na sha gbenda u vough, shi hide a iyol na ijime ken uma na cii. Shighe u lu eren Ter na tom sha la, yange er akaa a kpilighyol kpishi cii mase van shin tar ye. Ka sha ikyev i Yesu “i gbe akaa agen cii ye, a sha man a shin tar.” (Kol. 1:16) Shighe u i lu eren Yesu batisema la, ikyav tese ér yange umbur akaa a yange er shighe u lu sha vea Ter na la. (Mat. 3:16; Yoh. 17:5) Er Yesu umbur akaa la nahan kpa, kwagh la na hingir u kenden a iyol na sha ga. Ma shighe môm kpa Yesu er kwagh u tesen ér yange nenge ér un hemba hanma or cii ga. Yange pase mbahenen nav er un ve shin tar i lu sha ci u “i er un tom ga, kpa i lu sha u una er mbagenev tom, shi una na uma na sha u paan ior kpishi” yô. (Mat. 20:28) Shi yange hide a iyol na ijime kaa wang ér, una fatyô u gban karen a ishima na tsô eren ma kwagh ga. (Yoh. 5:19) Kwagh ne tese ér Yesu lu or u hiden a iyol ijime kpen kpen! A ver se ikyav i dedoo i se dondo yô.
14. Ka nyi se fatyô u henen hen Yesu sha gbaa u nengen iyol yase sha gbenda u vough laa?
14 Yesu yange tese mbadondon un ér ve nengen iyol ve sha gbenda u vough. Kwagen la Yesu pase ve wang ér: “Ice yen i sha ityou je kpa [Aôndo] fa iyenge i i cii.” (Mat. 10:30) Mkaanem man ka ma surun se ishima kpen kpen, hemban cii je yô, shighe u se hii u nengen iyol yase sha gbenda u vough ga yô. Mkaanem man tese ér kwagh wase gba Ter wase u sha la ishima kpishi; nengen se ér se gba kwagh. Aluer Yehova lumun ér se civir un shi a nenge ér se kuma u va lun una gbem sha won ken tar na u he la yô, doo u mayange je se nenge ser a er se ma kwagh u vihin ga.
Aluer se nenge iyol yase sha gbenda u vough ga yô, ka aan a nyi man akaadoon a nyi nahan a kar se? (Nenge ikyumhiange i sha 15) *
15. (a) Iyoukura yange i kaa ér se nôngo se nengen iyol yase sha gbenda u vough nena? (b) Er foto u a lu sha peeji u sha 24 la a tese nahan, aluer or nenge ér nan gba kwagh je nan hingir u kenden a iyol i nan sha yô, ka akaa a doon a nyi nahan aa kar nana?
15 Iyoukura yange i ôr kwagh ugen u tesen er i doo u se nengen iyol yase sha gbenda u vough yô, anyom kar hegen 15, i kaa ér: ‘Doo u se nenge ser se gba kwagh je, se za hingir u kenden a iyol sha ga. Kpa shi doo u se nenge ser se mba kwagh ga je se za hingir u uren ga. Kpa gba u se nôngo se nengen iyol yase gbenda u vough shin akuma akuma. Inja na yô, gba u se fa ser, se mba fetyô u eren akaa agen tsembelee, kpa agen se mba fetyô ga. Kwase Kristu ugen kaa ér: M neer kwaghbo u eren ga, shi m hemba doon inja ga. M eren akaa agen tsembelee, kpa agen m fetyô ga, shi kape hanma or kpa i lu je la.’ * Kwagh ne tese wang er i doo u se nengen iyol yase sha gbenda u vough yô.
16. Yehova wan se kwagh u una wase yô, sha ci u nyi?
16 Yehova wan se kwagh u una wase se yô ken Bibilo i i lu Mkaanem nam la, sha ci u se doo un ishima shi a soo ér i saan se iyol. (Yes. 48:17, 18) Nahan kwagh u i hembe doon u se tsua u eren ken uma wase yô, ka kwagh u una na a saan se iyol sha mimi la. Man kwagh shon yô, ka u eren akaa a a na a saan Yehova iyol la hanma shighe cii. Aluer se er nahan yô, se palegh mbamzeyol kpishi mba mbara mba ve hembe veren ishima sha kwagh u inyar man tom man iyol ve la ve lu tagher a mi la. Sha nahan yô, hanmô wase nana nôngo kpoghuloo, nana lu orfankwagh sha er a saan Yehova ken ishima yô!—Anz. 23:15.
ICAM 94 Sugh Aôndo sha Mkaanem Nam
^ Solomon man Yesu yange ve lu a kwaghfan kpishi. Man lu Yehova Aôndo na ve kwaghfan la ye. Ken ngeren ne, se nenge kwagh u Aôndo yange na Solomon man Yesu ôr sha kwagh u nengen inyaregh, man tom, man iyol yase sha gbenda u vough la yô. Shi se nenge er anmgbianev asev mba nomso man mba kasev mbagenev ve lu dondon kwagh u ve hen ken Bibilo sha akaa ne sha kwaghfan ve, i wase ve kpishi yô.
^ Nenge ngeren u a lu a itinekwagh ér, “How to Enjoy Hard Work” la, ken Iyoukura i ken zwa buter i Febewari 1, 2015.
^ Nenge ngeren u a lu a itinekwagh ér “Bibilo ia Wase U U zua a Msaanyol” la, ken Iyoukura i Agusutu 1, 2005.
^ NGEREN U PASEN FOTO: Agumaior ahar a hen tiônnongo môm. U môm la iti na ér John, ugen la di ér Tom. John ka a vihi shighe kpishi u nengen sha kwagh u mato na. Tom di ka a wasen mbagenev u duen kwaghpasen shi van mbamkombo sha mato na.
^ NGEREN U PASEN FOTO: I kur tom kpa John ngu a kur ga. A soo ér i doo orvesen na a na. Nahan hanma shighe u orvesen na a kaa a na ér a de kurun tom fele ga yô, ka a lumun. Hen aikighe shon u John a lu a kur ga la, Tom u a lu orshiren tiônnongo la di gema za vea ortamen ugen u za sôron anmgbian. Tom yange vande pasen orvesen na u a tôô un tom la ér, ayange agen ken atô u kasua ka i gba u una civir Yehova aikighe, nahan una fatyô u eren tom sha ashighe la ga.
^ NGEREN U PASEN FOTO: John hemba veren ishima sha akaa a na. Tom di Yehova hemba gban un kwagh a hanma orgen ken uma na cii. Nahan a seer zuan a azende a he shighe u a lu sôron Iyou i Mkohol igen yô.
