Kwagh ka a gba Aôndo sha akaa a se henen ken ishima la. (Yeremia 17:10) Gba u se palegh u eren shin ôron ma kwagh u tesen ér se kôr mbagenev ihyom la tseegh tsô se de ga. Ka ken ishima mhen u kôron ior ihyom la ka a hii ye. Nahan, shighe u mhen la a hii u van se ken ishima yô, a gba u se dugh un kera fese je. Saa se er nahan keng ve se “gema” sha mimi, se de u kôron ior ihyom ye.

Hide gbidye kwar nenge gbenda u u henen kwagh sha mbagenev shi u nengen ve la, hemban je yô ior mba kwavyolough shin tar ve u lu kposo a u wou la, nahan pine iyol you wer, ‘M nengen ve nena? Gbenda u m nengen ve la, ka mfe u m lu a mi sha kwagh ve la a ne ve m nengen ve nahan yee, shin ka sha ci u m soo kwagh ve ga?’ Palegh ajiir a lamen a ior sha Intanet a i ôron akaa a samber a ihyom i kôron her la, man uvidio kua ugyeem mba sha kwagh u ihyom i kôron man tswam.

Ashighe agen ka i taver se u ôron er se henen sha kwagh u mbagenev shi se nengen ve la jighilii. Kpa Mkaanem ma Aôndo ma a wase se u “ponon mbamhen man mbaawashima” asev. (Mbaheberu 4:12) Sha nahan yô, za hemen u ôron Bibilo gbidyen kwar. Hanma shighe yô, tôô kwagh u Bibilo i ôr la kar sha kwagh u u lu henen ken ishima la. Shi nôngo sha afatyô wou cii tsaase iyol you u henen kwagh sha gbenda u a doo Aôndo a we yô. Mkaanem ma Aôndo ma a fatyô u wasen se sha er se de ihyom i kôron i i lu er “ayou a taver tsung” nahan ken asema a ase la.—2 Mbakorinte 10:4, 5.