Ver Ishima Sha Kwaghôron U Aôndo U Profeti U Sha Ayange A Ase ne
Ver Ishima Sha Kwaghôron U Aôndo U Profeti U Sha Ayange A Ase ne
“Kav, wan u or, gadia mpase u sha mnenge ne ka kwagh u sha shighe u mkur.”—DANIEL 8:17.
1. Kanyi Yehova a soo ér uumace cii ve̱ fa sha kwagh u ayange a asa?
YEHOVA kusun mfe u akaa a aa va e̱r ke’ hemen la lun a mi un tswen ga. Kpa gema ka Orpasenakaamyer. U̱ ôron kwagh sha mimi yô, a soo ér hanmô wase nana̱ fa e̱r se nyer ke’ “shighe u mkur” i ze gighir yô. Ibaver ne ngi iorov biliôn ataratar mba ve lu sha tar hegen ne a inja kpen kpen je!
2. Hii nan asema a lu ior shimi léngè léngè sha kwagh u mlu u orumace u ke’ hemene?
2 Lan ishima e̱r tar ne ú lu zulum u va kuren nahanaa? Orumace kôr cio u za̱ zenden sha uwer, kpa sha ajiir agenegh kpishi shin tar ne yô, nana fatyô u zenden sha ugodobi a mciem iyol shio ga. Ka nan ombo ikyáv mbi sha iwavaren i ainge kpishi ke’ iyou, kpa nan kôr cio u yangen mpav u icombor i lu paven lúgh lúgh la ga kuaa. Shi nan fatyô u van a kov u lun a kwaghfan tsema tsema, kpa u tesen ior ér ve̱ tema bem bem ayol a ave yô nan kôr cio ga. Akaa a a hembe orumace u eren ne cii wase u suen akav a tesen a a lu ke’ Ruamabera kpishi a a tese ér se mba ken ashighe a mkur la.
3. Ka hanma shighe yange i hii yaren tom a mkaanem ma i kaa ér “shighe u mkur” la shin tara?
3 Yange i hii ôron mkaanem ma duran iyol ma í yer ér—“shighe u mkur” ne—tsa hegen kuma anyom 2,600, lù ortyom Gaberiel yange ôr ma ye. Profeti u Aôndo ugen u yange iondo kura un iyol yô ungwa Gaberiel kaa nahan ér: “Kav, wan u or, gadia mpase u sha mnenge ne ka kwagh u sha shighe u mkur.”—Daniel 8:17.
Ka “Shighe u Mkur” Je Ne!
4. Ka sha igbenda igen i nyi shi Bibilo i er kwagh i ter shighe u mkuru?
4 Í nger asemberakwaghôron a í yer ér “shighe u mkur” man “shighe u mkur u i ver la” ke’ takerada u Daniel kuma kwa taratar ke’ zwa u i hii ngeren ú la. (Da 8:17, 19; 11:35, 40; 12:4, 9) Nga ôron ka kwagh u “ayange a masejime” a apostoli Paulu tsengaôron kwagh u á la. (2 Timoteu 3:1-5) Yesu Kristu yange yila shighe shon ne ér ka shighe u “mve” na, zum u una tema Tor sha la.—Mateu 24:37-39.
5, 6. Ka unô ve “zende wue wue” ke’ ashighe a mkur ne, man kanyi i̱ gem i̱ ere?
5 Daniel 12:4 kaa ér: “Kpa we Daniel cir akaaôron man ver ikav sha ruamabera ne zan zan sha shighe u mkur; ior kpishi vea zende wue wue man mfe kpaa una seer.” Akaa agen kpishi a yange Daniel nger la cii i yer á, lu kwaghmyer shi í ver ikyav sha a kpaa, lu kwagh u orumace naná kav á ga zan zan uderimbaanyomov a kar imôngo. Kpa nyian di ye?
6 Ke’ shighe u mkur ne yô, Mbakristu mba mimi kpishi “zende wue wue” ke’ upeeji mba Bibilo, i i lu Mkaanem ma Aôndo la. Kanyi i̱ gem i̱ ere? Yehova hee iveren sha iniôngon ve la mgbeghaa yô maa mfe u mimi dumbur. U̱ tesen ikyav yô, i ver Mbashiada mba Yehova mba i shigh ve mkurem mbara doo doo sha u nan ve mkav sha e̱r vea kav e̱r Yesu Kristu lu tema Tor sha ke’ inyom i 1914 la yô. Mba̱ i shigh ve mkurem mban kua akar a ve a á lu eren tom sha gbashima a ve imôngo la cii mbá eren sha kwaghôron u apostoli, u i nger ke’ 2 Peteru 1:19-21 la, nahan mba ‘wan ikyo sha kwaghôron u profeti’ la shi ve fa wanger wanger ér ka shighe u mkur je ne.
7. Ka akaaôron a nyi a ne ve takerada u Daniel u dugh tseer tseere?
7 Takerada u Daniel due tseer tseer sha igbenda wue wue. Í nger keregh ér, yange tor ugen sùè u̱ wuan mbafankwagh nav sha er ve fatyô u ôron un mnyam ma tsumen ma yange ma cier un la shi pasen un inja i ma ga yum yô. Kpa profeti u Aôndo ti gema pase ikyav i ma. Í gbihi agumaior atar a yange venda u guren inya civir eev mbu taven tsung yô ke’ atse a usu u yeghen kpenger kpenger, nahan kpa ve war, iyol tsô kpa húghùm ve ga. Kwa genegh la i lu yan iniongo ember yáá yáá, ior uderi imôngo nenge uwegh due lu̱ ngeren mkaanem ma cimin sha kpekpe ke’ dwertor la. Aferaior agen zua zwa sha tamenor ugen nahan i kôr un i kende shin ihungwa i ubegha, kpa or ti due iyol tsô kpa pohor un ga. Í nenge a inyam inyiin ke’ mpase u sha mnenge, man i pase ikyav ve ke’ kwaghôron u profeti u a ve zan zan a va ar sha shighe u mkur ne yô.
8, 9. Takerada u Daniel ua fatyô u lun se a iwasen nena, hemban je yô, hegen u se lu ken ayange a masejime ne?
8 Ikyav tese wang je er, i pav takerada u Daniel keregh igbar ihiar i i lu kposo kposo yô. Gbaa môm ka akaa a ôron a ôr, ugen la di ka akaaôron a profeti. Avegher a ahar ne cii aa fatyô u maan jighjigh u nan wase. Gbaa u í lu akaa a ôron a ôr la tese se ér Yehova Aôndo veren mba ve te ikyaa a na la doo doo. Gbaa u akaaôron a profeti la di geman maan jighjigh u nan sha u tesen ér Yehova tsengan fan akaa a aa va e̱r uderimbaanyomov imôngo ke’ hemen—shin udubumbaanyomov je kpaa—cii man akaa shon a mase eren ye.
9 Akaaôron a profeti kpishi a Daniel lu nger la hemba veren ishima u ôron kwagh u Tartor u Aôndo. Zum u ka sea nenge m-iv u akaaôron a profeti angara nahan yô, jighjigh u nan wase ka a hemba taver cii shi ka i hemba wanger se ke’ ishima ser se mba ken ashighe a masejime. Kpa mbapuunakaa mbagenev mba puun Daniel, kaan ér akaa a í lu inja er yange er sha u ivin akaaôron a profeti a i nger ke’ takerada u i yer sha iti na la yange vande eren karen cii ve i mase ngeren á ye. Aluer ambaakaa a ve er la ka a mimi yô, kwagh la una gema a na u̱ a huna kwagh u takerada u Daniel u tsengaôron sha kwagh u shighe u mkur la tsembelee je. Shi mbanahantar kpa mba gban ahon sha akaa a ôron a ôr a takerada ne ú nger la. Nahan yô, de se time nen sha kwagh ne.
Sha Ishigh ki Kwavjir!
10. Ka sha nyi gbenda i we takerada u Daniel kwagh iyolo?
10 Tôô wer ú ngu ke’ atejir, mba ôron ijir. Orfanatindi u a er ijir la ngù sendegh ér or u i yer nan ijir la nan nyighe or nahan nan ngu a ibo. Takerada u Daniel tese ér kwaghngeren u ú ka u mimi, u̱ profeti u ke’ Mbaheberu u ngise lu ke’ derianyom u sha utaankaruhar man ataratar C.S.W. la yange nger yô. Kpa mbapuunakaa mba di tsô ér takerada la ka u icughugh. Yô de se hii nengen nen aluer vegher u takerada ne u̱ a lu a akaa a ôron a ôr la una zua sha akaa a yange er mimi mimi la yô.
11, 12. Kwagh u yange i kaa ér Beleshasar lu a lu di or u ke’ kwaghhir tsô la za nena?
11 De se time nen sha ikyaa i alaghga se yila ser ka tor u i fe kwagh na ga la. Daniel ityough 5 tese ér lu̱ Beleshasar yange tema tor lu hemen Babilon zum u i tìm gar la ke’ inyom i 539 C.S.W la ye. Mbapuunakaa nyiman kwagh ne sha ci u í lu a̱ zua a iti i Beleshasar ma ijiir igen ga saa di ke’ Bibilo tseegh yum yô. Mbatimen sha akaa a mbayiase mba tsuaa mbara dè gèmà kaa ér ka Nabonidu lu tor u Babilon u masetyô ye.
12 Nahan cii kpa ka va kom ke’ inyom i 1854 la yô, i za dugh mbaanar mba kiriki shin inya ve lu túmùùn nahan, i màà ve sha inyatyuu, i dugh ve he’ atse a gar u Ur u ke’ Babilon u tsuaa, he’ ijiir i i yer nyian ér Iraq la. Ke’ akaa a yange i pììn a pììn ngeren ne, msen u Tor Nabonidu yange e̱r kaa ér “wan wam u vesen, Bel-sar-ussur” la kpa lu sha mi. Kwagh gande, mbapuunakaa je kpa lumun ér: Ka Beleshasar shon u i er kwagh na ke’ takerada u Daniel je ne. Nahan tor u yange lu inja er kwagh na ndiir la kpa kera lu nahan ga, ka di tsô e̱r i lù a̱ fa a fa kwagh na ke’ ityakerada i taregh he’ shighe la ga di tsô. Kwagh ne ka di ikyav i môm ke’ atô u akav kpishi a a tese ér akaangeren a Daniel la ka a mimi je ne. Imba ikyav ne tese ér sha mimi yô takerada u Daniel kpa ka vegher u mkaanem ma Aôndo mà i doo u se time ke’ ma vie vie hegen, er se lu ke’ shighe u mkur ne je ne.
13, 14. Kan an yange i yilan ér Nebukadinesar, man ka hanma aôndo u aiegh yange hemban civiri?
13 Tamen kwagh u a lu ke’ takerada u Daniel hoghom hoghom yô ka akaaôron a profeti a a er kwagh u zende-karen u ityahav mbi hemban ke’ tar cii man aeren a mbahemenev vev mbagenev la. Á fatyô u yilan môm ke’ mbahemenev mbara ér orutya u yange maa zegetartor yô. E̱r á lù wantor u yan dyako u ikyônough ki torough ki tar u Babilon yô, un man ikyumutya na ve ta num sha akumautya a Farao Neko u ke’ Igipiti he’ harga u Karkemishi, ve tim á gbùrú gbùrú. Kpa loho va ar a wantor u Babilon u yange hemba ityav ne nahan gba u una undu ukurmbautyaav nav a ityav mbila ér ve̱ mase kengese mbi. Gumor shon u yange i yilan un iti ér Nebukadinesar ne ongo ér ter na, Nabopolasar kpe yô, á ngohol ikyônough ki torough kira a tema tor ke’ inyom i 624 C.S.W. la. Ken anyom 43 a yange hemen la cii, a ver zegetartor u yange u samber u za kighir sha ajiir a ngise lu ikyasen i tar u Ashiria la shi a naregh aa hemen na zan zan za ar ke’ tar u Shiria man Palesetina, kar yem za ar he’ joughtar i Igipiti la.
14 Kwagh u yange Nebukadinesar hemban civir yô lù Marduk, tamen aôndo u Babilon la. Ityav mbi yange tor la una hemba cii a gema gwa a na Marduk. Nebukadinesar maa utempel mba Marduk ke’ Babilon man utempel mba mbaaôndo mbagenev kpishi mba ior i Babilon, shi a wuha utempel mbara iyol sha akaainjaa kpaa. A̱ shi nan kpa a lu sha ci u Marduk yange i tsegha eev mbu zenaria mbu̱ tor u Babilon ne yange tím shin pev u Dura la ye. (Daniel 3:1, 2) Shi ka inja e̱r Nebukadinesar yange suur sha ishor i kpehen man ahir a eren je hunde ishima sha u zuan a iwasen zum u una waan ago a nôngon ityav nahan.
15, 16. Kanyi yange Nebukadinesar er sha ci u Babilono, man kanyi yange i̱ er zum u yange kaa ihyagh sha agee a gar laa?
15 E̱r Nebukadinesar maan zege girgar u Babilon u lun a ukpèkpè uhar, u̱ ter na yange hii u maan la been kera yô, a na hingir inja e̱r or á fatyô u nyôron ke’ gartamen la ga nahan. E̱r Nebukadinesar soo u eren ér i̱ doo torkwase na, wan Mbamedia, u̱ agungu man akô a tar u he’ ityô na yange zer saren un yum la yô, a̱ môôr ikyon sha ityouv mbi ayough—lù môm ke’ akaa ataankarahar a kpilighyol a yange lu shin tar u ngise la je la. Yange na Babilon hingir gar u yange tar gba je gar ugen lu a girgar u hemban u na ga yô. Yange kehe un iyol er un lu gartamen u mcivir u aiegh la je zua ga!
16 Iyange igen yô Nebukadinesar kaa ihyagh nahan ér: ‘Ngun kera ka zege Babilon, u mo iyol yam m maa ne gaa?’ Nahan cii kpa, sha kwagh u Daniel 4:30-36 a er yô, “er tor lu ôron kwagh ave la je, tsô” ihyundugh ta sha a na. A kera kuma u̱ hemen ga zan zan anyom kar ataankarahar, lu yan toho, di vough e̱r Daniel tsengaôron nahan. Ke’ masejime yô, i hide un aa tartor na her. Ú fa kwaghôron u profeti u kwagh ne a tese la kpa? Ú fatyô u pasen e̱r m-iv na u vesen la a ve zan zan a va ar a vese he’ shighe u mkur ne kpa?
U̱ Kaven Avindir a Kwaghôron u Profeti
17. Ú pase mnyam ma profeti ma yange Aôndo tindi he’ Nebukadinesar ke’ inyom na i sha uhar i̱ lu orhemen tar cii la nena?
17 Hegen yô, de se nôngo nen u kaven avindir a kwaghôron u profeti agen ke’ takerada u Daniel. Ke’ inyom i sha uhar i Nebukadinesar tema tor (606/605 C.S.W.), lu hemen tar cii e̱r i ér kwaghôron u profeti ke’ Bibilo nahan la yô Aôndo er mnyam ma kpiligh iyol cier un. Sha kwagh u Daniel ityough 2 a er yô, mnyam mara cier un aa zege eev mbù mbú lu a ityough ki sha zenaria yô, vanger man ave a mbu lù sha azurfa, iyav man anam a mbu lu sha togula, ahambeangahar a mbu lu sha iyôgh man akevangahar di lu sha iyôgh nungwa inyatyuu sha mi. Alegh a eev mbun cii tile sha ityough ki nyi?
18. Ityough ki sha zenaria ki eev mbu ke’ mnya la tile sha ityough ki nyi?
18 Profeti u Aôndo kaa a Nebukadinesar ér: “We tor, . . . ka we je u lu ityough ki sha zenaria la ye.” (Daniel 2:37, 38) Nebukadinesar yange lu ityough sha tsombor-tor u yange hemen Zegetartor u Babilon la. Yange Mbamedia man Mbapershia va ngohol ú tahav, lù ve mbà vanger man ave a sha azurfa a eev mbura tile sha ityough vev je la. U̱ dondon yô, lù Zegetartor u Grika, ú iyav man anam a sha togula a til sha ityough ki ú la. Tahav mbu tar cii mbun yange mbu hii nena?
19, 20. Ka an yange i yilan ér Alekesander u Tamene, man yange yar tom nan ve Grika va hingir u lun tahav mbu hemban sha won ciili?
19 Ken derianyom u sha unyiin C.S.W. la, gumor ugen er tamenkwagh ke’ m-iv u kwaghôron u profeti u Daniel ne. Yange i mar un ke’ inyom i 356 C.S.W. la, man tar va hingir u yilan un ér Alekesander u Tamen. E̱r yange mba woo ter na Filibu ke’ inyom i 336 C.S.W. yô, Alekesander u lu anyom 20 la maa ya dyako i ikyônough ki torough ki tar u Masedonia la.
20 Ke’ mhii u uwer u Mei ke’ inyom i 334 C.S.W. la, Alekesander mough u nôngon ityav hemban akuraior. Yange lu a ikyumutya, lù mbautyaav mba zenden sha angahar iorov 30,000 man mbaanyinyav di gema lu 5,000, lù ikyumutya i kiriki kpa i̱ gema i̱ fa ityav kpishi. Ke’ inyom i 334 C.S.W. la, Alekesander nôngo ityav nav mbi hiihii a Mbapershia hemba ve he’ Ifi u Granicus u a lu vegher u he’ atô u imbusutarimese man ityôtar i tar u Ashia u Kiriki, (ape ainge i lu tar u Tôki la). Ka kom ke’ inyom i 326 C.S.W. yô, orhembanityav u yange lu hemban gban uwer ga ne nenger ve, ngohol ve ajiir zan zan je za ar sha ityoughkitaregh he’ Ifi u Indus, u a lu ke’ tar u i yer ainge ér Pakistan la. Kpa i hemba Alekesander ityav mbi masetyô zum u yange lu ke’ Babilon la. Ka kom ke’ uwer u Jun 13, 323 C.S.W. yô, kwagh hemba Alekesander u lu anyom a mar 32 man iwer 8 tseegh la, orihyom u hemban cier iyol gure un, ka ku je la. (1 Mbakorinte 15:55) Nahan cii kpa, lu sha mhembe na man Grika hingir tahav mbu tar sha won cii ye, di vough e̱r i tsengaôron ke’ kwaghôron u profeti u Daniel la nahan.
21. U shi seer sha Zegetartor u Roma la yô, ka tahav mbu tar cii mbugenev mbu nyi angahar a iyôô a eev mbu ken mnya la a til sha ityough ki ú?
21 Angahar a iyôô a eev mbu gban ikyôr la tile sha ityough ki nyi? Ka Roma u̱ lu̱ iyolyôugh la yange cagh Zegetartor u Grika la, hembe ú avur avur ye. Yange Mbaromanu kenger Tartor u Aôndo u yange Yesu Kristu yôô angwe u ú la dang, nahan ve kôr un ve mande sha kon u mtsaha ke’ inyom i 33 C.S.W. la. Tar u Roma tôv mbahenen mba Yesu a ican sha er vea nôngo vea sar Kwagh u Kristu u mimi la kera yô. Nahan cii kpa, angahar a iyôô a eev mbu ke’ mnyam ma Nebukadinesar la tile sha ityough ki Zegetartor u Roma la tseegh ga kpa shi kua icèrén i patii i yange i ta gbaa i̱ due ke’ a na la kpaa—ka Tahav mbu Tar cii mbu Amerika vea Ingila je la.
22. Eev mbu ke’ mnya mbula wase se u nengen ser se za gighir ke’ ashighe a mkur ne nena?
22 Í time vie vie yô, í kav ér se za gighir ke’ mlu u ashighe a mkur ne je zua ga, gadia se va ar shin akevangahar á eev mbu ken mnya, a sha iyôugh man inyatyuu la. Ugomoti mbagenev mba ve lu ainge ne mba iyolyôugh shin mbá hemen sha tswam kpaa. Mbagenev di yô, mba e̱r inyatyuu nahan. Shin e̱r inyatyuu i leghem, man i lu í je i tee i mar ‘icombor i orumace’ a mi nahan kpaa, i kighir hemen u ú taver gbang e̱r ka iyôgh la sha u mba ve gbe kwagh ga mbara kpa ve̱ lu a imo i kaan ke’ gomoti u a lu hemen ve la yô. (Daniel 2:43; Yobu 10:9) Nahan kpa sha mimi yô, hemen u sha nomor la fa zuan vea atsanaior ga, di vough e̱r iyôgh ki zough a inyatyuu ga nahan. Kpa ica ia gba ga tsô Tartor u Aôndo ua tim tar u ú pav keregh ver ver sha ikyaa i patii ne cii kera.—Daniel 2:44.
23. Ú pase mnyam mà yange má cier Daniel la kua mpase u sha mnenge u i tese un ken inyom i hiihii i Beleshasar tema tor la nena?
23 Ityough ki sha 7 ki kwaghôron u profeti u Daniel u doon ungwan ne shi va a vese sha shighe u mkur ne. Ki ôr kwagh ugen u yange er ke’ inyom i hiihii i Tor Beleshasar u Mbababilon tema tor la. Nahan Daniel nyer anyom 70 kar yô, “Mnyam [cier un], a nenge mbampase er a yav sha gambe na yô.” Mbampase mba sha mnenge la yange ve cier un iyol mimi! Yange kaa sha ikyenge nahan ér: “Nenge, ahumbe a anyiin a Sha la, ve gbuusu zegemnger. Inyam i vesen inyiin due shin zegemnger, hanimô lu kposo a igen.” (Daniel 7:1-8, 15) Inyam ne shi cier iyol tsôô! U hiihii la ka begha u a we akper yô, man u sha uhar la di ngu e̱r ka inyam i i yer ér bear la nahan. Tsô anyam za ande saghera, lu a akper anyiin man ityouv di inyiin! Inyam i sha unyiin i̱ i̱ hembe cier iyol shi i̱ hembe taver cii la lu a uzegembaanyiiv mba iyôôv man akor pue. “Korough kugenegh ku kiriki” gema due ken akor a i̱ man “ashe lu sha korough kun er ashe a or nahan” man “zwa u ôron uzegembaakaav kpaa.” Ùwú, ínyam ne ka ínyámkyume í tan ihindi iyol tsôô!
24. Sha kwagh u Daniel 7:9-14 a er yô, Daniel nenge a nyi sha aôndo, man mpase u sha mnenge ne hôn uwegh sha nyi?
24 Ka been heela kera yô, mpase u sha mnenge u Daniel kôr gema ver ishigh sha aôndo. (Daniel 7:9-14) Í nenge ‘Or u Tsan sha won,’ Yehova Aôndo, tema tor sha shagba, lù Orjir. “Ior udubu dubu lu eren Un tom, man dubu pue kwa dubu pue tile sha ishigh Nagh.” Aôndo ôr inyam la cii ijir na í ibo, nahan a ngohol hementor sha ikyev i í kera shi a tìm inyam i sha unyiin la kpaa. Í kéndè mtemtor u tsôron, u una hemen “ior man akuraior man ijô cii” la i wa sha ikyev i un u a “lu er ka wan u or nahan” la. Kwagh ne hôn uwegh sha shighe u mkur man mker u lù u a va kôr Wan u or, Yesu Kristu tor ke’ inyom i 1914 la.
25, 26. Zum u se er takerada u Daniel yô, ka mbampin mba nyiiv nahan alaghga se pine, man ka takerada u nyi ua wase u nan mlumun sha mbampin mba shono?
25 Mbaôron takerada u Daniel vea lu a mbampin mba pinen je ka u kera henen a hen ga. U tesen ikyav yô, inyam i ke’ Daniel ityough 7 la tile sha ityough ki nyi? A na mpase sha kwagh u “ulahadi akunduatargber” mba sha kwaghôron u profeti u ke’ Daniel 9:24-27 la nena? Man hide sha kwagh u Daniel ityough 11 kua ahendan a sha kwaghôron u profeti a a lu he’ atô u “tor u sha imbusutarimese” man “tor u sha imbusutariyan” la di ye? Kanyi se ver ishima ser ator ne aa er sha shighe u mkur nee?
26 Yehova na mbacivir un mba i shigh ve mkurem, ve lu sha tar mbara mkav sha akaa ne, ka ve mba i yer ve ke’ Daniel 7:18 ér, “uicighanmbaiorov mba Uhembansha” la je la. Heela tseegh ga, “wanakiriki u jighjigh man u fan kwagh” ker gbenda sha ci wase sha u se̱ kav akaangeren a yange i na profeti Daniel nger la cii. (Mateu 24:45) Mkav ne ngu hegen ke’ takerada u i sember duen a ú ke’ igbar, ú i yer ér Pay Attention to Daniel’s Prophecy! la. Takerada u ú doo ashe tsung shi ú lu a ufoto keregh, ú lu peeji 320 ne yisa hanma vegher u takerada u Daniel cii. Ú time sha hanma kwaghôron u profeti u maan a maa jighjigh wase u nan man akaa a ôron a ôr a profeti Daniel u doon se ishima yange nger la cii.
Nga a Inja sha Ayange Ase Ne Mimi
27, 28. (a) Kwagh u mimi u se nenge a mi ken m-iv u akaaôron a profeti a ke’ takerada u Daniel la kanyi? (b) Ka shighe u nyi se lu kere, man kanyi i gbe u se ere?
27 Time ase sha kwagh u vesen ne yôô: Akaaôron a profeti a ke’ takerada u Daniel cii iv, mase shin di avurakaa agen kpuaa. U tesen ikyav yô, hegen se mba nengen a mlu u taregh u yange i tese ikyav na sha akevangahar a eev mbu ke’ mnyam ma ke’ Daniel ityough 2 la. Yange i sagh ikyangenev sha ikpughurkon i ke’ Daniel ityough 4 la sha. Lu sha shighe u mtem u Tor Mesiya, Yesu Kristu lu tema tor ke’ inyom i 1914 la je yange i sagh ikyangenev mbila ye. Een, di vough e̱r i tsengaôron ke’ Daniel ityough 7 nahan, Or u Tsan Sha Won la gema hementor na Wan u Or.—Daniel 7:13, 14; Mateu 16:27–17:9.
28 Ayange 2,300 man 1,290 a ke’ Daniel ityough 8 la kua shi ayange 1,335 a ke’ Daniel ityough 12 la cii kar—ashighe ne kar se ke’ ijime yem zende zende. Mtím u i time ke’ Daniel ityough 11 la tese ér ahendan a he’ atô u “tor u sha imbusutarimese” man “tor u sha imbusutariyan” la zulum u za kuren. Akaa ne cii nungwa sha akav a a lu ke’ Ruamabera a tesen ér hegen se mbá ke’ ashighe a mkur yem ica hiinii la. Aluer se gbidye kwar sha ian i civirigh i se til sha mi ken mze u ashighe a ze kweng yum ne yô, gba u se kange ishima u eren nyi? Gba u se huna ga, kpa se gema se ver ishima sha kwaghôron u profeti u Yehova Aôndo la.
Ú Na Mlumun Wer Nyi?
• Kanyi Aôndo a soo ér uumace cii ve̱ fa sha kwagh u ayange asa?
• Takerada u Daniel ua fatyô u maan jighjigh u nan wase nena?
• Eev mbu ke’ mnyam ma Nebukadinesar mbula mbua nyi akaa, man á tile sha ityough ki nyi?
• Ka semakwagh u nyi ú lu ke’ m-iv u akaaôron a profeti a ke’ takerada u Daniel la jimi?
[Study Questions]