Kwaghyôôn U Vesen

YANGE mba kur mkombo u sha inyom u Watch Tower Bible and Tract Society of Pennsylvania la sha iyange i Oktoba 7, 2000 yô, orkyôn John E. Barr u a lu môm ken Mbahemenev mba Shin Tine la yôô kwaghyôôn u vesen. Kwaghyôôn ne yange seer maan akaaôron a yange Theodore Jaracz man Daniel Sydlik vande nan sha iyange shon la.—Nenge sha peeji 3-7 man 24-27 ken magazin ne.

Anmgbian Barr yange na ityôkyaa i vesen zum u a kaa nahan la, wener: “I wa ‘wanakiriki u jighjigh man u fan kwagh’ man Mbahemenev nav mba Shin Tine mbara akaa sha ikyev yuhwa shi ngee hemba akaa a i we sha ikyev i iniongo i í ver í sha tindi la ca je. Mbaawashima mba i nger ken atindi a veren amba a iniongo shon la mba di ciôn tsô. Nahan kpa, Ter wase Yesu Kristu yange gema tsua wanakiriki u jighjigh wa un ‘akaa’ na, shin akaa a Tartor a shin tar ne cii sha ikyev.”—Mateu 24:45-47.

Sha kwagh u nongo u Pennsylvania la yô, Anmgbian Barr seer kaan wener: “Hii sha shighe u yange i ver Watch Tower Bible and Tract Society of Pennsylvania ken inyom i 1884 la je tsô, a ndera eren tom u injaa ken mlu wase u ainge ne. Nahan kpa, ka a ka di ikyágh ki tomough ki sha tindi ki ‘wanakiriki u jighjigh man u fan kwagh’ a yaren tom a ki shighe u kwagh a gbe sha mi la tseegh tsô.”

Ken mkaanem ma Anmgbian Sydlik man Jaracz vande nan la, ve pase ér, shin er i we akaa a Ter a shin tar cii sha ikyev i “wanakiriki u jighjigh man u fan kwagh” nahan kpa, kwagh la yàngè nongo u wanakiriki la u den ér mba ve vie ken atô u “iyôngo igen” la ve̱ nengen sha ityom igen ga. (Yohane 10:16) Shi ma ityôkyaa kpa ngi ken Ruamabera í hanger ér saa mba vea lu mbahemenev mba iniongo i í ver í sha tindi í Mbashiada mba Yehova ve yaren tom a í la ci ca cii, shin mbagen keregh kpaa vea lu Mbakristu mba i shigh ve mkurem la keng ga.

Anmgbian Barr kaa a mbaungwan mbara ér sember sember ne, mbagenev mba ve lu ken Mbahemenev mba Shin Tine mba Mbashiada mba Yehova mba yange ve lu mbahemenev shin mbatomov mba iniongo i “wanakiriki u jighjigh man u fan kwagh” a yaren tom a í ken tar u United States la, ve kar a ishima ve hungwa sha mkônom ma mbahemenev mba iniongo shon kera. Yange i tsuwa anmgbianev mba ve vie tsembelee ken nongo u iyôngo igen la ve kar ve tema sha ityough vev.

Kwagh ne ngu a inja kpen kpen. A na mba ve lu Mbahemenev mba Shin Tine mbara hemba mban a ian i eren kwaghyan u ken jijingi la shi wan ikyo sha ugbayol mba mzough u anmgbianev u sha tar cii la sha igbenda igenegh kpaa.

U masen kuren yô, orkyôn la mase ôron mba ve lu ungwan a na, mba yange ve lu a iember kpishi la nahan ér: “Er i gem ityom i sha tindi man i hemenegh kpishi i we sha ikyev i mbakuran mba lun a mkav tsor tsor nahan kpa, . . . ve cii mba eren tom sha gbendatesen u ken jijingi ú Mbahemenev mba Shin Tine. . . . Se cii se mba veren ashe a Yehova a msen u eren tsung ser a̱ ver iniôngon i se zough ave se lu nôngon sha u eren ishima na ne doo doo, sha er icivir man iengem ia lu sha zege iti na yô.”