Lu Nen Mbasundan Sunda A Iember!
Lu Nen Mbasundan Sunda A Iember!
“Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.”—MATEU 9:37, 38.
1. Kanyi ka i wase se u zan hemen eren ishima i Aôndo?
K A SEA umbur iyange i yange se er batisema se hingir môm ken mbacivir Yehova la nahan, ka i lu se er ka nyen nyen yô, shin aluer se er sember sember shin anyom a̱ kar kpishi je kpaa. U wuese Yehova hingir kwagh u hiihii ken uuma asev mba se tsegh sha ci na la. Er sé we ian yase i wasen mbagenev u ungwan shi ngohol loho u Tartor ne ikyo yô, yange tom u eren Yehova saan saan la lu se kwagh u vesen. (Mbaefese 5:15, 16) Zan zan nyian kpa, shighe ka a yinan se a yina zum u se tum ityough ‘eren tom u Ter ngegh’ yô. (1 Mbakorinte 15:58) Shin er se tagher a mbamzeyol nahan kpaa, iember i se lu a mi u eren ishima i Yehova la ngi taver se ishima u zan hemen.—Nehemia 8:10.
2. Kanyi i ne se iember i se lu a mi ken tom sunda u sha injakwagh ne?
2 Se Mbakristu se mba eren tom sunda u sha injakwagh. Yesu Kristu yange tôô mkohol u kohol ior sha ci u uma u tsôron la kar sha sunda. (Yohane 4:35-38) Er se lu eren tom sunda ne yô, a lu kwagh u dedoo u timen sha iember i Mbakristu mba tsuaa mba eren tom sunda yange ve zua a mi la. Se hide se time sha akaa atar a ka a na se iember ken tom sunda u ainge ne yô. Akaa shon yô ka (1) loho wase u ishimaverenkeghen ne man (2) mze ikyura u mker u se keren ne man (3) ieren yase i sha bem i mbasundav la.
I Tindi Ve Er Mbasundav Yô
3. Ka sha nyi gbenda nahan mbadondon Yesu mba tsuaa mbara yange ve zua a iembere?
3 Uma u mbasundav mba tsuaa mbara—hemban cii je yô mbahenen mba Yesu mba 11 mba jighjigh mbara—yange gema sha iyange i môm ken inyom i 33 S.W. shighe u ve yem sha uwo ugen ken Galilia sha u za zuan gbenda vea Kristu u yange nder shin ku la! (Mateu 28:16) Alaghga yange “anmgbianev” lu her “hemba deri utaan” nahan sha iyange la. (1 Mbakorinte 15:6) Yange ve zer umbur ityom i Yesu tindi ve la gbem. Yange kaa a ve ér: “Za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii.” (Mateu 28:19, 20) Shin er i tôvon ve a ican tsung nahan kpa, ve zua a iember ken tom sunda er ve nenge mver u i lu veren atôônanongo a mbadondon Kristu sha ajiir wue wue la. Ka tse deghôô yô, ‘i yôô Loho u Dedoo hen akaa a i gba a sha won cii.’—Mbakolose 1:23; Aerenakaa 1:8; 16:5.
4. Ka ken mbamlu mba nyi nahan yange i tindi mbahenen mba Kristu?
4 Yesu yange yila mbaapostoli nav 12 ken mhii u tom na ken Galilia la a tindi ve a kaa ér ve̱ za yôô ér: “Tartor u Sha mgbôghom ve.” (Mateu 10:1-7) Un iyol na za “ken agar a vesen kua ken angarev mba kiriki la cii, lu tesen ken ushinagoge vev, lu ôron Loho u Dedoo u tartor, lu been hanma inja i uange man i mkpeyolga kpaa.” Yange mhôônom kôr Yesu a ikpelaior la tsung “sha ci u i tumbul a ve, ve sambe wuee er iyôngo i i lu a orkuran i ga nahan.” (Mateu 9:35, 36) Er mhôônom kôr un yum yô, a kaa a mbahenen nav ér: “Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda [Yehova Aôndo], A̱ tindi mbatomov ken sunda Na.” (Mateu 9:37, 38) Mnenge u Yesu yange nenge ér kwagh gba sha mbasundav la yange lu kwagh môm a mnenge u lu a mi ken Yudia zum u mase shin a iwer ataratar i eren tom na shin tar la. (Luka 10:2) Sha ashighe a ahar ne cii, yange tindi mbadondon un ér ve̱ lu mbasundav.—Mateu 10:5; Luka 10:3.
Loho Wase u Ishimaverenkeghen
5. Ka loho u nyi nahan se pasena?
5 Er se lu mbacivir Yehova ainge yô, se lumun myer u i lu yilan mbasundav la a iember. Kwagh u a ne se iember kpishi je yô ka er ka se za a loho u ishimaverenkeghen ne hen mba ve lu a ishima i vôron man mzungu la. Er mbahenen mba Yesu mba sha derianyom u sha hiihii la nahan, se mba a ian icivirigh u pasen loho u dedoo je zua ga—loho u van a ishimaverenkeghen i mimi—hen mba “i tumbul a ve, ve sambe wuee er iyôngo i i lu a orkuran i ga” la!
6. Kanyi tom mbaapostoli yange ve wa ave eren ken derianyom u hiihii laa?
6 Ken atô u derianyom u hiihii la, apostoli Paulu lu pasen loho u dedoo yughur yughur. Man tom sunda na la yange ú za ikyura kpishi, sha ci u ken kwaghngeren na u yange nger hen Mbakristu mba ken Korinte ikyua ikyua a inyom i 55 S.W. la, a kaa ér: “Anmgbianev, m ngu pasen ne sha u fa nen Loho u Dedoo u m ôr ne, ne ngohol ne til sha mi la.” (1 Mbakorinte 15:1) Mbaapostoli man Mbakristu mbagenev mba tsuaa mbara yange ve lu mbasundav mba fan tom kpen kpen. Shin er Bibilo i kera pase se iyenge i mbaapostoli mba yange ve war uzegembaakaav mba yange ve mase kuren sha mtim u gar u Yerusalem ken inyom i 70 S.W. la ga nahan kpa, se fa ser hii hen shighe la tsa kuma anyom 25 kpa apostoli Yohane lu pasen kwagh her.—Mpase 1:9.
7, 8. Ka loho u ishimaverenkeghen ú nyi jim mbacivir Yehova ve lu yôôn torough torough er i gbe je ve lu a̱ vande eren nahan ga?
7 Ka been yô, uderimbaanyomov mba mkighir u sha ikyev i mbahemenev mba Mbakristu Mbaaiev za va, mba undun mimi mba ve lu “or u vendan atindi” la. (2 Mbatesalonika 2:3) Nahan kpa derianyom u sha 19 la ngur yemen u za been yô, mba yange ve lu keren u dondon Kwagh u Kristu u tsuaa la tôô loho u ishimaverenkeghen la, gba yôôn Tartor. Sha kpôô yô, er mgber u hiihii (Julai 1879) u takerada ne hii la je itinekwagh i takerada ne wa asemberakaa ker e̱r “Myer u Yôôn M-Ande u Kristu,” man “Myer u Yôôn Tartor u Kristu” shin “U Yôôn Tartor u Yehova” nahan.
8 Yange i ver Tartor u Aôndo sha sha ikyev i Yesu Kristu ken inyom i 1914 la, man hegen se mba hemban yôôn loho u ishimaverenkeghen ne torough torough cii. Sha ci u nyi? Ityôkyaa yô, averen a hemen u Tartor shon ua va a mi la wa mkur u tar u ifer u hegen i mase shin ikyua ikyua u a tim ú ne ker. (Daniel 2:44) Ka loho ugen u hemban doon u nyi shi ú lu? Man ka iember i vesen i nyi se fatyô u lun a mi je a hemba u lun a ci ken myee u yôôn Tartor cii man “zegecan” una va ase?—Mateu 24:21; Marku 13:10.
Tom u Keren Ior la Za Doo
9. Yesu yange wa mbahenen nav kwagh ér nyi, man ior mba nengen loho u Tartor ne nena?
9 Kwagh ugen u a ne se iember i mbasundav yô, ka mdoo u tom wase ú keren mba vea hingir mbahenen vea kohol se ken sunda ne ú ze i doon yum la. Ngise Yesu vande tesen mbahenen nav kwagh ken inyom i 31 zan zan 32 S.W. la ér: “Hanma gar shin angar u kiriki u nea nyôr yô, ker nen or u injaa keregh, tsa nen her zan zan né kar duen.” (Mateu 10:11) Ka hanma or cii yange nan lu or u injaa ga, er ieren ve sha loho u Tartor ne i̱ tese nahan. Nahan kpa, mbahenen mba Yesu za hemen pase loho u dedoo a ishimatseen hanma ijiir ape ior vea lu cii.
10. Paulu yange yar tom u keren ior mba injaav la nena?
10 Yesu yange kpen shi mba nderen un shin ku kera yô, tom u keren ior mba injaav la hemba taver a taver cii. Paulu yange tesen Mbayuda ken shinagoge man mba ve zaan kasua ken Atene la. Zum u yange er shiada ken Areopagu ken gar u Grika la yô, “mbagenev var a na, na jighjigh; ken ve yô, lu Dioneshiu, or u Areopagu, man shi kwase ugen, iti na er Damari, man shi mbagenev a ve imôngo kpaa.” Hanpe u yange Paulu una za cii, shi yange a lu ikyav i tesen sha ikyaa i kwaghpasen ken “igbar man ken uya” kpaa.—Aerenakaa 17:17, 34; 20:20.
11. Ka igbenda i nyi yange i yaren tom a mi u eren tom ken anyom a a kar ken ijime laa?
11 Upuembaanyomov mba ve mase kuusu derianyom u sha 19 la, Mbakristu mba i shigh ve mkurem mbara tôô tom u keren ior mba injaav la. I nger itinekwagh i i yer ér “Anointed to Preach” (Í Shighe Ve Mkurem sha u Pasen Kwagh) la ken Zion’s Watch Tower u uwer u Julai man Agusutu 1881 la i kaa ér: “Loho u dedoo u pasen . . . ngu zan hemen hen ‘mbaasemaleghlegh’ her—ka mba ve lumun shi ve fetyô u ungwan je la, sha er a zua a mbagen ken a ve vea lu iyol i Kristu, mbayandyako yô.” Ashighe kpishi yange mbatomov mba Aôndo mba sundan sunda ve zua a ior shighe u ior mba shon vea za adua vea duen ken ucôôci vev la, maa ve na ve antyakerada mba kiriki mba ve lu a ilyoho i i dugh ken Ruamabera i ser sha u i̱ kpoghor mwongor u dedoo ken ior mba injaav yô. Er mba timen sha mzekera u gbaa kwaghpasen ngun ne vighe vighe yô, Iyoukura (zwa Buter) i uwer u Mei 15, 1903 la taver mbasundan sunda asema ér ve̱ samber a antyakerada mba kiriki mbara “sha uya uya, sha iyange i Lahadi pepe zan zan iyange sha tembe nahan.”
12. Sé seer mfetom wase sha gbaa u kwaghpasen nena? Tese ikyav.
12 Ken anyom a a sember karen ne, se samber a tom wase ne sha u lamen a ior sha ajiir a á kera lu hen uyaav vev tseegh ga yô. Kwagh ne na tom za kera ken ityar i mlu u kpenga kua shi u keren iemberyolough a ne ior ve kera lu hen uya vev ga la. Zum u Kwaseshiada u ken Ingila vea ijende na nenge er hanma shighe mbavannya lu nyôron umato yemen zum u ve bee msaanyol shin kpe mnger yô, ve kange ishima sha u nyôron umato mbara nan ior mba ve lu shimi la ukôpi mba Iyoukura man Awake! Ken uwer môm tseegh, ve kar ior ukôpi mba magazin 229. Ve kaa ér: “Se mba a mciem ma eren shiada shin kpemnger man ken ijiir i kpenga ga, shin ma nyityô ijiir i taver i se tagher a mi kpaa ga, gadia se fa ser Yehova ngu a vese hanma shighe cii.” Ve dugh gbenda u zeren nan ior magazin la shi ve hii Bibilo i henen a ior kpaa man ve cii ve tôô tom u ishuen pania la.
13. Kanyi mkôôm i gbe u a kôôm ken tom wase ne sha ajiir agen hegene?
13 Er tom u keren ior mbainjaav ne ú lu zan hemen her yô, alaghga a lu a inja u hiden nengen sha tom wase ne sha ajiir agen. Er i lu ieren i Mbashiada kpishi u pasen kwagh sha uya uya sha iyange i Lahadi pepe nahan kpaa, sha ajiir agen yô, ve kav e̱r mzehemen a kera lu lun ga sha ci u mbayaav ka ve lu a̱ nder ga yô. Sha u Mbashiada vea kôôm mver u ashighe ve yô, hegen ve kpishi mba eren tom u keren ior ne atetan, alaghga sha shighe u i hembe mkombo u Mbakristu la. Man sha kpôô yô tom u keren ior ne ume atam. Ken inyom i i kar la, ingyegh ki mbayôôn Tartor sha tar cii seer kuma 2.3 ken atô u deri. Kwagh ne na Ter u sunda icivir shi va se a iember ken asema kpaa.
Lu a Bem ken Tom Sunda Ne
14. Se mba ôron loho wase ne a nyi ierene?
14 Ityôkyaa igen i i ne se iember yô ka i i bende a ieren yase i lun bem bem ken tom sunda la. Yesu lu kaa ér: “Nea nyôr ken ya yô, sugh nen ya la. Aluer ya la una lu a inja yô, bem wen a̱ lu sha a na.” (Mateu 10:12, 13) Ishughun i Mbaheberu man ishember i i lu kwagh môm vea ishember i ken Bibilo i ken zwa Grika la cii tese kwagh môm tsô ér ‘I̱ kpe ne iyol.’ Imba mnenge ne i̱ hemen se sha ieren yase a ior zum u se lu pasen loho u dedoo la. Ishimaveren yase yô, ka u vea lumun loho u Tartor u se lu nan ve la. Hen mba vea lumun u ungwan la yô, ishimaveren ngi i mhim u himen ve a Aôndo ér ve̱ gema asema sha asorabo ve, ve̱ undu igbenda ve, ve̱ gema eren ishima na. Mlu u ve lu bem bem a Aôndo la di gem ne uma u tsôron.—Yohane 17:3; Aerenakaa 3:19; 13:38, 48; 2 Mbakorinte 5:18-20.
15. Se fatyô u lun bem bem zum u se tagher a ieren i eren a vese sha inja ga ken tom kwaghpasen wase la nena?
15 Á er nan ve se lu a bem wase her e̱r ior ve eren a vese sha inja ga laa? Yesu tese wener: “[Ya la] una lu a inja ga yô, bem wen a̱ hide sha a ven.” (Mateu 10:13) Kwaghngeren u Luka sha kwagh u ityom i yange i tindi mbahenen mba 70 la wa mkaanem ma Yesu mara ker, ér: “Aluer wan u bem una lu her yô, bem wen una lu sha a nan; una lu ga yô, una shi á hire hen a ven.” (Luka 10:6) Ka sea za a loho u dedoo ne hen ior yô, ka i lu a ishima i doo doo man sha gbenda u bem kpaa. Mvende u ka or venda man ahon a gban man shi kwaghôron u dang u orya la ka a wase a wase loho u bem wase la u ‘hiden hen avese tseegh.’ Kpa akaa ne cii tagher se bem u a lu ityamegh ki icighan jijingi u Yehova la ga.—Mbagalatia 5:22, 23.
Ishimaveren i Dedoo sha ci u Mbasundav
16, 17. (a) Kanyi ka i lu ishimaveren yase zum u se hidi se ze u za sôron ior laa? (b) Se fatyô u wasen mba ve lu a mbampin ken Bibilo la nena?
16 Er se lu mbasundav yô se mba a iember i lun a ci ken mkohol u kohol ior sha ci u uma u tsôron ne. Man nenge iember i ka se lu a mi shighe u or u se pase nan kwagh la ka nana̱ wongor iyol sha inja man ishima ia lu nan ape fan seer shi nana lu “wan u bem” la sha wono! Alaghga nan ngu a mbampin mba ken Bibilo kpishi man taver se u nan mlumun sha mi cii ken icin i môm. Er u shin hen ijiir i môm gbem sha kwa u hiihii la i lu kwagh u shami ga yô, kanyi se fatyô u erene? Se fatyô u lun a ishimaveren imba i yange í tese je i kuma anyom 60 nahan la.
17 “Mbashiada mba Yehova cii ve̱ wa ago iyol sha u lun a kwaghhenen ken Bibilo u lun ikyav i tesen la.” Yange i nger kwaghôron la ken mgber u sha utar u takerada u i yilan ér Model Study la, yange i hii u gberen antakerada u wan ior kwagh ne ken inyom i 1937 zan zan 1941 la. Ú za hemen ú kaa ér: “Mbapasen kwagh u [Tartor] cii ve̱ de gbe uwer ga ve̱ wasen ior mba i doo Aôndo a ve, mba ve lu tesen sha hanma gbenda u ve fetyô cii ér loho u Tartor sar ve la. I̱ hurugh i̱ zaan [i hiden i za sôron] ior mban ne inya shi i̱ naan ve mbamlumun sha mbampin wue wue . . . shi i̱ hii kwaghhenen u lun ikyav i tesen la . . . er i fetyô la cii.” Een, awashima wase u hiden za sôron ior yô ka u hiin Bibilo i henen ken ya a ve shi henen i̱ hanma shighe kpaa. * Ieren i dedoo i eren a ior mba i sar ve u fan la kua mgbe u kwagh ve a gbe se ishima la ka a na se u wan ago iyol tsembelee shi za henen kwagh a ve sha inja kpaa.
18. Se fatyô u wasen mbahev u hingir mbahenen mba Yesu Kristu nena?
18 Sha iwasen i takerada u Mfe u Una Va a Uma u Tsôron La man amba a antakerada er Kanyi Aôndo a Soo her Avese? la yô, ka se fatyô u henen Bibilo a ior ken ya nahan se fatyô u lun uwegh ken tom u wasen mbahev mba i sar ve u fan la sha u ve̱ hingir mbahenen yô. Er se lu keren ser se dondo Ortesen u Tamen, Yesu Kristu yô, alaghga amba a mbahenen Bibilo la kpaa vea hen bem wase la man iember yase man mimi wase man icivir i̱ se lu a mi sha uiniezwa man akaawan a Yehova la. Shighe u se ne mbahev mban iwasen sha u nan mlumun sha mbampin vev yô, se nôngo nen sha afatyô wase cii sha u tesen ve er vea fatyô u nan mba vea pine ve kwagh la mlumun yô. (2 Timoteu 2:1, 2; 1 Peteru 2:21) Er se lu mba eren tom sunda u sha injakwagh ne yô, se fatyô u lun a iember ser sha kwarkaren u vough yô, ken inyom i tom i i kar la se hen Bibilo a ior ken ya kuma 4,766,631 sha tar cii. Se hemba lun a iember cii aluer se ayol ase se mba ken mbasundav mba ve lu a ci ken tom u henen Bibilo a ior ken ya ne yô.
Za Hemen u Ember ken Tom Sunda Ne
19. Er nan ve atôakyaa a injaa yange lu a ember ken sunda sha shighe u tom u Yesu la, kua er shighe pande kar kpuaa laa?
19 Yange atôakyaa a injaa a ember ken sunda lu sha shighe u tom u Yesu la man e̱r shighe pande kar kpuaa la kpaa. Sha shighe la ior kpishi yange ve ngohol loho u dedoo ne. Iember i vesen yange i hemba lun sha iyange i Pentekosti u ken inyom i 33 S.W. la, sha ci u iorov er 3,000 nahan ve lumun ityesen i Peteru la shi ve ngohol icighan jijingi u Yehova kpaa, ve hingir vegher u ikurior i Aôndo i i̱ lu Iserael u ken jijingi la. Sha kpôô yô, ingyegh vev za hemen u seer a seer, man iember dumbur e̱r “Ter lu seer mba i lu yiman ve la sha iyenge ve ayange ayange” yô.—Aerenakaa 2:37-41, 46, 47; Mbagalatia 6:16; 1 Peteru 2:9.
20. Kanyi i ne se iember kpishi ken tom sunda wase nee?
20 Hen shighe la, kwaghôron u profeti u Yesaia lu kuren sha mi vough, ér: “[We Yehova] U seer ikurior ne, i ngee, U seer ve iember kpishi kpaa; mba ember sha ishigh Yough sha inja i m-ember i sha iyange i sunda, er ior ve ember shighe u ka vea karen kwar sha ishar yô.” (Yesaia 9:3) Shin er hegen se nenge ‘ikurior i vesen’ i mba i shigh ve mkurem la i̱ kohol i bee nahan je kpa, iember yase ngi kpishi er se nenge ingyegh i mbasundan sunda mbagen i lu seer anyom a anyom yô.—Pasalmi 4:7; Sekaria 8:23; Yohane 10:16.
21. Kanyi kwagh se time sha mi ken kwaghngeren u a dondo ne?
21 Se mba a atôakyaa kpishi a zan hemen u ember ken tom sunda ne. Loho wase u ishimaverenkeghen, man mker u keren mba ve lu a inja la man mlu wase u lun bem bem la—akaa ne cii kohol na se iember er se lu mbasundav yô. Nahan kpa, nga ne asema nga gem nga vihin ior kpishi a vese. Kwagh ne yange er apostoli Yohane. Yange i wuhe un ken gaadi ken icile i Patemo “sha ci u mkaanem ma Aôndo man sha ci u shiada u Yesu.” (Mpase 1:9) Nahan a er nan ve se lu a iember yase her shighe u se tagher a tôvacan man ahendan laa? Kanyi ia wase se u wan ishima a ior mba cighir asema mba se lu pasen ve kwagh hegen ne? Kwaghngeren wase u a ve la ngu a iwasen i i dugh ken Ruamabera i i wase u nan ikyar sha mbampin mban yô.
[Footnote]
^ Yange i sôr aan i ver sha ajiir a ior mba i sar ve u fan la vea fatyô u kohol her yô. Nahan kpa ica gbe ga yô, i hii u henen kwagh a ior man icombor.—Nenge ken takerada u i yer ér Jehovah’s Witnesses—Proclaimers of God’s Kingdom la, peeji 574, ka Mbashiada mba Yehova ve gber ye.
Ú Na Mlumun Wer Nyi?
• Kanyi i lu tom sunda u sha injakwagh ne?
• Kanyi loho nahan se lu yôôno?
• Er nan ve mker u se keren mbahenen ne a ze kera yumu?
• Se lu a bem ken tom sunda wase ne nena?
• Er nan se lu a iember ken sunda here?
[Study Questions]
[Pictures on pages 10, 11]
U pasen kwagh ken derianyom u sha 1 man u sha 20 ne
[Pictures on page 11]
Mbasundav mba ainge ne mba nôngon sha u aren a ior sha hanma ijiir cii, di er Paulu nahan
[Picture on page 11]
Yôô loho u dedoo a mlu u saan saan