Mbampin mba Mbaôron Takerada Ne Ve Pin La

“Mmem” u i er kwagh na ken Mbaheberu 4:9-11 la kanyi, man or a fatyô u “nyôron ken mmem” shon nena?

Apostoli Paulu yange nger kwagh hen Mbakristu mba ve lu Mbaheberu ken derianyom u hiihii la wener: “Mmem shi her sha ci u nongoior u Aôndo er u sha iyange i Memen la nahan. Gadia u nan nyer ken mmem Na yô, nan mem ityom i nan er Aôndo iyol Na kpaa A mem i Na nahan. Yô, se nôngo nen tsung u nyôron ken mmem la sha er ma or nana̱ de gbaan sha inja i ihembeato la ga” yô.—Mbaheberu 4:9-11.

Zum u yange Paulu kaa wener Aôndo mem ityom Na la, a̱ shi nan kpa yange lu ôron kwagh teren kwagh u i nger ken Genese 2:2 nahan la ér: “Sha iyange i sha utaankaruhar la, Aôndo kure tom Na u A er yô; sha iyange i sha utaankaruhar la, A mem tom Na u A er cii yô.” Hii nan ve yange Yehova ‘mem sha iyange i sha utaankaruhar’ laa? Yange lu sha ci u una mem i kundu un iyol sha ci u ‘tom na u Un er cii’ la ga je ka u henen a hen ga. Ivur i dondon la i̱ ta se ikyughur nahan ér: “Man Aôndo ver iyange i sha utaankaruhar la doo doo, A tsegha i kpaa; sha ci u lu sha i man Aôndo mem tom Na cii, u A er sha u gban a gba u la ye.”—Genese 2:3; Yesaia 40:26, 28.

“Iyange i sha utaankaruhar” la yange i̱ kaha kposo a ayange a ataratar agen a yange vande a i̱ la sha ci u yange lu iyange i Aôndo ver i̱ doo doo shi tsegha i̱ yô, inja na yô, ka iyange i a ver kposo sha ci u awashima u kpôô kpôô je la. Yange lu nyi awashima? Cii man shighe ne yô, Aôndo vande pasen awashima na a orumace man tar. Yange Aôndo kaa a or u hiihii la man kwase na wener: “Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” (Genese 1:28) Shin er yange Aôndo na orumace man tar cii mhii u vough nahan kpa, lu u ica a gba cii ve á seer ngeen shin tar shi a kar geman ú hingir paradiso u ivin a tsombor u orumace u lun vough, e̱r Aôndo vande wan ishima nahan la ye. Nahan, sha “iyange i sha utaankaruhar la” Aôndo maa mem, shin de u seer gban akaa shin tar sha u akaa a un vande gban kera la a̱ mase zan hemen sha ishima na vough vough yô. Sha m-bee u “iyange” la yô, hanma kwagh u Aôndo wa ishima ér i̱ lu la cii una kure nahan vough. Mmem la una shi a kuma shighe nena?

Aluer se hide se nenge sha mkaanem ma Paulu ôr ken Mbaheberu la yô, se kav e̱r yange kaa nahan yô, wener “mmem shi her sha ci u nongoior u Aôndo,” shi yange taver mba ve lu Mbakristu a na imôngo mbara asema ér ve̱ nôngo tsung u “nyôron ken mmem la.” Kwagh ne tese ér zum u yange Paulu nger mkaanem mara la, “iyange i sha utaankaruhar” i Aôndo mem, i̱ ngise i̱ vande hiin tsa hen shighe la kuma er anyom 4,000 nahan la, i̱ lu zan hemen her. Ia bee ga zan zan saa awashima u Aôndo wa a orumace man tar la una kar ivin been kembe kembe ken mkur u Hemen u Kristu u Anyom Dubu la, ka un u a lu “Ter u iyange i memen je” la.—Mateu 12:8; Mpase 20:1-6; 21:1-4.

Er Paulu lu a ishimaverenkeghen i doon tsung ne ken ishima yô, a pase e̱r or a hii ve nana nyôr ken mmem u Aôndo yô. A nger wener: “U nan nyer ken mmem Na yô, nan mem ityom i nan er Aôndo iyol Na kpaa A mem i Na nahan.” Kwagh ne tese se ér shin er yange mhii u orumace lu u vough nahan kpa, ve jimin cii mba a̱ nyôr ken mmem u Aôndo ga. Kwagh ne lu nahan sha ci u Adam man Ifa yange ve kura tindi u Aôndo wa ve sha kwagh u “iyange i sha utaankaruhar la” sha u lumun mserakaa u yange sôr ver sha ci ve la gbem ga. Kpa ve de ve hemba ato shi ve soo u tilen sha tseeneke ve kera lun sha ikyev i Aôndo ga. Je yô, ve ta ikyaa a igbenda i Satan a eren akaa la ve kera lumun hemen u Aôndo u sha dooshima la ga. (Genese 2:15-17) Nahan kwagh u lu va ker yô, ishimaveren ve i va lun uma gbem sha won ken paradiso la maa i saa ve. Hii hen shighe la je maa orumace cii hingir ken kpan sha ikyev i isholibo man ku.—Mbaromanu 5:12, 14.

Ihembeato i orumace la i bunde awashima u Aôndo ga. Iyange na i memen ngi zan hemen her. Nahan cii kpa, Yehova sôr ian sha dooshima ver—ka iwom je la—sha ikyev i Wan na, Yesu Kristu sha er antior u nan lumun iwom shon sha jighjigh u nan yô, nana lu keghen mpasetuhwa man mmem nahan iyohov mbu isholibo man ku a kera lu sha a nan ga. (Mbaromanu 6:23) Ka nahan ve yange Paulu wa mba ve lu Mbakristu a na imôngo mbara kwagh wener ve̱ ‘mem ityom ve ayol a ve’ ye. Yange gba u vea lumun mne u Aôndo a ne sha u ior ve̱ zua a myom la ve̱ de kera nôngon u sôron gbenda sha mnenge ve sha ci u mlu ve u ken hemen, e̱r Adam man Ifa yange  ve er nahan la ga. Shi yange gba u vea palegh u zendan ityom ve i keren ishô ayol a ve la.

U or gbihin ityom i nan i keren mtsera u nan tseegh shin i taregh la kera, geman eren ishima i Aôndo la ka kwagh u yôhôr iyol shi ka kwagh u nan mmem kpaa. Yesu yange lôhô ior nahan ér: “Va nen her a Mo, ne mba i ver ne iyol cii, ikav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikav Yav kpaa peese.”—Mateu 11:28-30.

Kwaghôron u Paulu ôr sha kwagh u mmem u Aôndo man er á hii ve or a nyôr ker la yange lu kwagh u nan ishimataver hen Mbakristu mba ve lu Mbaheberu mba ve lu ken Yerusalem, mba yange ve wa ishima a tôvacan man aheen sha kwagh u jighjigh ve u nan la je ka u henen a hen ga. (Aerenakaa 8:1; 12:1-5) Shi kape mkaanem ma Paulu mara maa fatyô u taver Mbakristu mba ainge ishima di nahan vough je la. Er se kav ser m-iv u ityendezwa i Aôndo a tende u van a paradiso shin tar sha ikyev i Tartor na u perapera la i̱ mgbôghom yô, se kpa se mem nen ityom yase shi se nôngo tsung sha er se nyôr ken mmem la yô.—Mateu 6:10, 33; 2 Peteru 3:13.

[Pictures on page 31]

Ityendezwa i Aôndo a tende u van a tar u paradiso la ia iv sha mkur u iyange i mmem na la