Mzough U A Lu Tar Sha Won Cii La Ngu Wan Mbagenev Ikyo

WEA gema hanma vegher kpa, ior har gbir gbir yem ca. Kpishi ken ave ka mba beenyol, mbagenev gba awan, je yô mba kanen zende shio. Kasev mbagenev mba iyav kpera kpera, mbagenev di mba a ônov sha ave. Ve mban cii ka mba yevese ityav—nomso man kasev man mbayev—ka ior mba ityav mbi hen tar ve shin aahe shin mbamzeyol mbagenev ve num ve ve undu uyaav vev sha u keren ijiir i yeren ken ityar i i lu ikyua a ve la yô. Kwagh gande mbagenev undu ajiir a ve a tsan la kwa kimbir kimbir. Ka vea ungwan iov i utya shin aahe je maa ve gese uwegh ve tôô an uikya mba hen ya kpuaa shi ve kura mbayev vev maa ve gba mi keren ijiir i yeren je. Mzeyol la ka una pever yô, mba yevese ityav mbara kpishi ka ve hide hen ajiir a ve ve va gba ityô he, ve hide ve gba maan uyaav vev.

Tar u Central African Republic ngohol ior mba ve yevese ityav ken ityar igen la anyom barem hegen. Sember sember ne kpa ityav num ior udubu imôngo ken tar u Democratic Republic of Congo, ve yevese ve yem ken tar u Central African Republic, ape mzeyol a lu yum ga la, Mbashiada mba Yehova mbagenev kpishi kpa lu ken atô ve.

Anmgbianev Na Iwasen

Mbashiada mba ve lu ken tar u Central African Republic la yange ve nenge lu ve ian i civirigh u nan mba ve lu ken ican mbara iwasen. Yange i sôr ajiir atsan i ver sha ci u anmgbianev Mbakristu mba ve̱ lu van la. Sha hiihii la i sôr ajiir atsan ken uyaav mbaiorov, kpa er ingyegh ki mba yevese ityav lu seer a seer yô, ikyav tese ér gba u a ker gbenda ugen u been a mzeyol la. Yange i gema Ayough a Tartor agenegh hingir ajiir a tsan. Yange Mbashiada mba ve lu hen ningir la na ayol a ve sha u shi seer wan usu u tsaren shi wan ugôngul mbamngerev shi kôngor ajiir a tsan la hen inya tsembelee sha semetu sha ci u mkpeyol u mba vea tsa hen ajiir shon la. Mbayevese ityav mbara kpa yange ve wa ityough eren tom la ikyooso kyooso vea anmgbianev mba ve lu hen ningir shon la imôngo sha u seer sôron ajiir a tsan. Yange i sôr aaven a zuan mbamkombo mba Mbakristu ken zwa u Lingala i ver sha ci u nan mba vea va nyôr la kwaghyan u ken jijingi u waren uma la. Ijoughave i kangenaa i yange i̱ lu hen atô u Mbashiada mba hen ningir la man mbavannya vev la tese ér mlu u anmgbianev lun ken mzough tar sha won cii la ka kwagh u mimi.

Ka ashighe cii icombor í yange i lu yevese ityav la i va nyôron imôngo icin i môm ga. Ashighe agen yô, mba ken tsombor mba yange ve yem sarem sarem la yange ve hide ve va zua imôngo sha ajiir a ve za nyer la. Hanma kwe u yange ua nyôr  doo doo cii i nger ati a ve i ver ken Ayou a Tartor kaveraa. Shi yange i ker igbenda i nôngon zuan a mbara mba i lu a̱ zua a ve ga la kpaa. Gbar u afishi a nengen sha tom u Mbashiada mba Yehova ken tar la yange a tindi a umato utar hanma sev cii sha u i̱ wase Mbashiada mba ve lu van sha gbenda la shi i̱ ker mba alaghga vea tsume gbenda la kpaa. Yange i nger ikyav kpeher kpeher sha akaahendan shon la ér “WATCH TOWER—Jehovah’s Witnesses” (WATCH TOWER —Mbashiada mba Yehova).

Nenge ase ken ishima er mbayev utaankaruhar mba̱ ve yevese ityav ve undu mbamaren vev la yange ve nenge a kwaghhendan u lu u Mbashiada mba Yehova la ve, ve ember la yôô. Yange ve timbir ga je, ve yevese ve za ikyua a kwaghhendan la ve za pase ayol a ve e̱r ve lu Mbashiada yô. Anmgbianev mbara maa tôô ve shin mato la yem a ve ken Iyou i Tartor, ape ve za kohol mbamaren vev la.

Kanyi kwagh yange i̱ wase Mbakristu mba mimi mban u wan ishima ken imba mlu ne kwa môm tseegh ga kpa kwa imôngo imôngôô? Mba a vangertiôr e̱r Icighan Ruamabera i tsenge ôron nahan, ér, se mba ken ayange a masejime.—2 Timoteu 3:1-5; Mpase 6:3-8.

Nahan, ve fa je ér shi côhiin tsô, Yehova Aôndo una va kar a ityav mbi nôngon man ihyom i kôron man ipila i eren man num u nôngon kera. Azayol u ityav mbi yevese la kpa una kar kera. Kpa hegen di yô, Mbashiada mba Yehova mba nôngon u wan ayol a ve ikyo, sha u zuan sha kwaghwan u apostoli Paulu a we ken 1 Mbakorinte 12:14-26 la. Shin er uifi man ujuan mba tarev man ijô kua mgbeica a pav ve nahan kpaa, mba we kwagh u mbagenev ikyo. Nahan zum u kwagh una tsure ma or yô, ka ve timbir a timbir ga je maa ve za u nan iwasen.—Yakobu 1:22-27

[Map on page 30]

AFRIKA

Central African Republic

Democratic Republic of Congo

[Credit Line]

Mountain High Maps® Ian i eren © 1997 Digital Wisdom, Inc.

[Pictures on page 30]

Yange i gema Ayou a Tartor atar hingir ajiir a ngohol ior her

[Picture on page 31]

Yange i ngôôr ga je tsô maa i va ver akaa a yôron iwer a mi

[Picture on page 31]

Ior lu seer van a va

[Picture on page 31]

Ka maren ve je ne kpa maa ka mbayevese ityav