“Aôndo Ka Dooshima”

“Kpa u nan lu a dooshima ga yô, nan fa Aôndo ga, gadia Aôndo ka dooshima je.”—1 YOHANE 4:8.

1-3. (a) Bibilo ôr nyi sha kwagh u ieren i Yehova i dooshima laa, man mkaanem ma i̱ er ne ma due tseer tseer sha nyi gbenda? (b) Er nan ve Bibilo i kaa ér: “Aôndo ka dooshima”?

 AEREN a Yehova cica cii nga a acôghol iyol ga, nga vough, shi a doo kpaa. Kpa ken aeren a Yehova ne cica cii, ka dooshima a hembe doon cii ye. Ma kwagh ugen môm u urugh se kporom a vese ikyua hen Yehova er dooshima na a eren nahan je kpa ngu ga. Kwagh ka a er i doo yô, shi ka dooshima a lu ieren na i hemban samber wuee cii ye. Er nan ve se fe ser kwagh ngu nahana?

² Se fa sha ci u ken aeren a Yehova a á hembe duen tseer tseer ne cii, Bibilo hemba ôron kwagh u dooshima sha gbenda u i ôr sha ma ieren i̱ Yehova igen yô. Ruamabera ôr mape môm tsô kpaa ér Aôndo ka tahav shin Aôndo ka ijirôron i sha mimi ga, shin mape ugen ér Aôndo ka kwaghfan kpaa ga. Ngu a ngu a aeren ne, shi ka un a lu imbor i aeren a atar ne cii ye. Nahan kpa, sha kwagh u dooshima yô, i ôr kwagh ken 1 Yohane 4:8 u a hemba shilen iyol yô, í kaa ér: “Aôndo ka dooshima.” (Ka se se nger i yier ye) Een, dooshima u Yehova za shimi yem ca hiinii je. Mlu na jimin cii ka u dooshima. Aluer se gbidye kwar se nenge sha kwagh ne yô, se fatyô u kaan ser: Tahav mbu Yehova mbu ne eren kwagh. Ijirôron na i sha mimi la di ngi hemen gbenda u a eren kwagh la. Kpa ka dooshima u Yehova la a mgbeghan un u eren kwagh ye. Shi dooshima na la due tseer tseer ken gbenda u a yaren tom a aeren a na agen la cii.

³ Ashighe kpishi ka i kaa ér Yehova ka dooshima. Nahan yô, aluer se soo u fan kwagh u dooshima yô, a gba u se hen kwagh sha kwagh u Yehova kpee je. De ase se time nen sha avegher agen a dooshima u Yehova a hemban cii la.

 Aôndo Tese Dooshima u Hemban Cii La

4, 5. (a) I gbe je ka dooshima u nyi a lu dooshima u hemban cii u i tese? (b) Er nan ve se fatyô u kaan ser Yehova man Wan na mba ken mzough u sha dooshima u̱ oghom mayange ga, u̱ a hembe shawon cii yô?

⁴ Yehova tese dooshima sha igbenda wue wue, kpa gbenda ugen ú a tese un la ú hemba duen tseer tseer cii. Ka nyi gbenda? Ka mtindi u Yehova yange tindi Wan na ér a̱ va ya ican shi a̱ kpe sha ci wase la. Se fatyô u kaan vangertiôr ser i gbe je ka dooshima u hemban cii je la. Er nan ve se er nahana?

⁵ Bibilo yila Yesu ér: “Waniunda ken akaa a i gbe a cii.” (Mbakolose 1:15) Nenge ase yô—Wan u Yehova yange vande lun cii man tar shawon jimin cii mase va lun ye. Ter yange lu vea Wan imôngo kuma shighe nena nahana? Mbatôvonkwaghfan mbagen ker ahaba ér tar shawon jimin cii tsa hegen kuma anyom biliôn 13. Aluer ahaba ve ne una lu shami je kpa, anyom ne yina sha anyom a uma u Waniunda u Yehova la ica je! Lu eren nyi kwagh sha shighe u sha ikyov ikyov laa? Wan lu shiren Ter na tom saan saan “er or u fan tom nahan.” (Anzaakaa 8:30; Yohane 1:3) Yehova er tom a Wan na imôngo sha u gban akaa agenegh cii. Nenge imba er yange ve lu imôngo saan saan la sha wono! Ka an ken a vese nana kôr cio u kaven mzough u kangenaa u a lu hen atô ve hii sha ashighe a tsuaa a sha ikyov ikyov laa? Ikyav tese wang ér, Yehova Aôndo man Wan na mba ken mzough u sha dooshima u̱ oghom mayange ga, u̱ a hembe shawon cii yô.

6. Yehova lu pase er ishima i lu un ker sha shighe u Yesu er batisema la nena?

⁶ Nahan cii kpa, Yehova tôô Wan na tindi shin tar, i va mar un lu anikyundan u forototo je. E̱r Yehova er kwagh ne nahan yô, gba u una wa ishima upuembaanyomov imôngo, una kera lu ikyooso ikyooso a Wan na u ishima ishima la shaala ga. Lu sha, lu kenger saan saan er Yesu vese wa ikyondo, lu nomsoor u lun a acôghor iyol ga yô. Ka shin kpuaa u Yesu una lu anyom 30 yô, maa a er batisema. Sha iyange la Ter lam sha, á kaa ér: “Ngun ka Wan Wam u ishima ishima, u i doom a Na yum yô.” (Mateu 3:17) U Ter nengen er Yesu er hanma kwagh u i̱ tsengeôron, shi i̱ kaa a na ér á er cii la vough vough yô, doo un kpishi je gande!—Yohane 5:36; 17:4.

7, 8. (a) Yesu yange wa ishima a nyi kwagh sha iyange i Nisan 14, 33 S.W. laa, man kwagh ne yange bende a Ter na u sha la nena? (b) Er nan ve Yehova yange de ér Wan na a ya ican shi á kpe?

 ⁷ Nahan kpa, ishima yange i lu Yehova ker nan sha iyange i Nisan 14, 33 S.W., sha shighe u i nenge Yesu mker shi ikpelaior i toron asema kôr un yem a na la? Ishima lu un ker shighe u i naha Yesu tar, i haa un azer iyol shi i ta un azu kpaa la nena? Shighe u i gbidye un coholoo, ijime na cii hingir avav la di ye? Man gema shighe u i mande un sha ave man shin angahar sha kon u nôôn, i undu un lu her ior lu tuhwan un la ye? Yange lu Ter ken ishima sha shighe u Wan na u ishima ishima la lu ken mnyoon kpoghuloo ve genger imo taver taver yila un la nena? Man shighe u Yesu mase shirin ishima foo ve kpe la ye, lu Yehova ken ishima nena? Hii sha igbetar je, lu kwa u hiihii u Wan na u ishima ishima kera lu uma ga je la.—Mateu 26:14-16, 46, 47, 56, 59, 67; 27:26, 38-44, 46; Yohane 19:1.

⁸ Er Yehova kpa kwagh a ker un ken ishima yô, mnyoon u yange zua a mi sha ku u Wan na kpishi la ngee je gande se u ôron. Kwagh u se fatyô u ôron yô, ka ityôkyaa i Yehova yange lu a mi ken ishima ve de ér kwagh a̱ er nahan la. Er nan ve Ter yange va a imba mnyoon ne sha iyol na? Yehova pase se kwagh u kpilighyol ken Yohane 3:16—ivur Bibilo i̱ i̱ lu a inja je í gande í gem yilan i̱ ér Ivangeli i asav-asav la. Í kaa her ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” Nahan ityôkyaa i Aôndo yange wa ken ishima yô lu í ne: Lu dooshima. Í gbe je or ngu a̱ tese dooshima imba ne ga.

Gbenda u Yehova A Pase Se Ér Se Doo Un Ishima La

9. Satan soo ér se lu a jighjigh u nan ser nyi sha mnenge u Yehova a nengen se laa, kpa Yehova kaa a vese ér nyi?

⁹ Nahan kpa, mpin u vesen gema due ér: Hanma or doo Aôndo ishima kpa? Alaghga mbagenev vea lumun ér ka mimi tar u orumace jimin cii la ú doo Aôndo ishima, er Yohane 3:16 a kaa nahan. Kpa, sha mnenge ve yô mba henen ér, ‘mo iyol yam yô me fatyô u doon Aôndo ishima ga.’ Kwagh u a lu jim yô, ka sasen a sase Satan Diabolo iyol u ma se ne jighjigh ser se doo Yehova ishima ga, gban kpa se gba kwagh sha ishigh nagh ga. Kpa gema Yehova yô, aluer ka se ken ishima er or a fatyô u soon se ga, se gba ma kwagh kpaa ga kpa, a kaa a vese ér hanma wase u nan civir un sha jighjigh u nan di tsô yô, nan gba kwagh sha ishigh nagh.

10, 11. Injakwagh i Yesu á er kwagh u mbaatsator la tese ér se gba kwagh sha ishigh ki Yehova nena?

¹⁰ Ikyav i tesen yô, nenge mkaanem ma Yesu, ma i nger ken Mateu 10:29-31 la. Yange Yesu ngur tesen ikyav er mbahenen nav ve gbe kwagh yô, a kaa ér: “Mba teen mbaatsator uhar sha toro gaa? Nahan kpaa mô ve môm tsô kpaa una gba gban shin inya ga saa Ter wen Una fa. Zan zan ice yen i sha ityou kpaa, i ôr i cii. Nahan yô, de cie nen ga; mbaatsator kpishi kpaa ne hemba ve.” Time ase sha er mkaanem mara yange ma lu a inja hen mba ve lu ungwan a Yesu sha derianyom u hiihii la yô.

¹¹ Sha ayange a Yesu la, atsator lu annyon u hemban gban ishe ga cii u yange i teen ior yamen yaan yô. Yange or a̱ lu a toro tseegh kpa, nan yam mbaatsator uhar. Kpa, ken hemen yô, Yesu za hemen kaa ér, aluer or vihi toro uhar yô, á lu mbaatsator unyiin tsô nana yam ga, kpa á lu utaan je, er i nger ken Luka 12:6, 7 nahan. Yange i kôr annyon la môm í na isheer, inja er á gba ma kwagh tsô kpaa ga nahan. Alaghga sha mnenge u ior yô, annyonov mbara yange ve gba kwagh ga, kpa Orgbanakaa yange gema nenge ve nena? Yesu kaa ér: “Mô ve môm kpaa i hungul Aôndo ga [shin u i  ne a na isheer a mi la tsô kpaa ga].” Hegen alaghga se hii u nengen a kwagh u Yesu yange lu ôron la. Er atsator môm tseegh kpa a lu zege kwagh sha ishigh ki Yehova yô, hide orumace yee? Er Yesu yange ôr nahan, Yehova fa hanma kwagh wase vindi vindi. Nenge ase yô, ice i sha ityough yasegh je kpaa i ôr í!

12. Er nan ve se fe doo doo ser, mkaanem ma Yesu yange ôr wener ice yase i sha ityou kpaa, i ôr i cii la lu ôron lu kwagh u mimi?

¹² Alaghga mbagenev vea hen ér Yesu yange lu kehen a kehe a kwagh zwa tsô. Nahan kpa, hen ase sha ishimaverenkeghen i mnder u shin ku la yôô. Saa Yehova una fa se vindi vindi kpee ve una fatyô u hiden gban se ye! Se gba kwagh sha ishigh nagh je yô, á umbur hanma kwagh wase cii vindi vindi, kua kpelegh kpelegh u mwe u iyol yase ken atô la kpaa man hanma kwagh u se er ken uma wase cii. Aluer i tôô kwagh ne i kar sha u ôron ice yase, í ka i lu sha ityou i môm i kuma agar 100,000 la yô, gba ma kwagh je ga cii. Nahan mkaanem ma Yesu man ma taver se ishima ér Yehova we hanmô wase cii ikyo asange asange!

13. Kwagh u Tor Yehoshafati ne tese se ér shin er se lu vough ga nahan kpa Yehova nengen a inja yase i dedoo nena?

¹³ Bibilo pase se kwagh ugen u a tese ér se doo Yehova ishima yô. Nengen a inja yase i dedoo la shi ngi un kwagh u injaa kpaa. Ikyav i tesen yô, nenge ase kwagh u Tor u dedoo Yehoshafati la. Shighe u tor er kwagh u shami ga yô, profeti u Yehova kaa a na ér: “Sha ci u kwagh ne yô, iyugh i TER ngi van sha a we.” Kwaghôron ne shire iyol tsô! Kpa loho u Yehova saa heela tseegh ga. Loho ne shi kaa ér: “Nahan kpaa i zua a akaadoon her a we.” (2 Kroniku 19:1-3) Nahan yô, iyugh i Yehova i sha kwagh u perapera ne yange un u nengen a “akaadoon” a Yehoshafati lu er la ga. Ka kwagh u taver se ishima u fan ser Aôndo nengen a inja yase i dedoo la shin er se lu vough ga nahan ga he?

Aôndo U A “Kegh Iyol u Den Kwaghbo” La

14. Zum u se er kwaghbo yô, ka mbamhen mba yuhwan se ken ishima mba nyi alaghga se lu a mi, kpa Yehova una fatyô u den se asorabo a ase nena?

¹⁴ Zum u se er kwaghbo yô, lanshima man kunya man ibo i ken ishima ka i na se̱ se hen ser, mayange je se kera kuma u se civir Yehova ga. Kpa, umbur wer, Yehova “kegh iyol u den kwaghbo.” (Pasalmi 86:5) Een, aluer se de asorabo ase aa se eren la shi se nôngo kpoghuloo ser se kera kimbir á ga yô, alaghga Yehova una zungwe se. Nenge ase er Bibilo i pase vegher u dooshima u Yehova u kpilighyol ne yô.

15. Yehova gbihin asorabo ase ica a vese ka kom nena?

¹⁵ Orpasalmi Davidi lu ôr kwagh vighe vighe u a pase gbenda u Yehova a den asorabo yô, a kaa ér: “Er ica i ityoughkitaregh a ityôtar nahan, kape ngu A pav akaabo ase a vese la.” (Ka se se nger i yier ye; Pasalmi 103:12) Ityoughkitaregh gba ica a ityôtar nan je? A fatyô u kaan ér, hanma ijiir cii ityoughkitaregh ka ki gba ica a ityôtar hiinii kpishi; avegher a ahar ne aa fatyô u zuan mayange ga. Orfantakerada ugen kaa wener, kwaghôron ne tese “mgbe u i gbe ica hiinii i za kighir la; er se fe ser gba ica za kighir la cii.” Mkaanem ma i na Davidi nger ne ma pase se ér, zum u Yehova a de se asorabo ase yô, ngu a gbihi asorabo ase ne ica a vese kpen kpen je.

16. Zum u Yehova a de se asorabo a ase kera yô, er nan ve i doo u se lu a vangertiôr ser, hii sha shighe la je, a nenge se ér se mba wang-na?

¹⁶ Er i lu je nahan ú nôngo wer u kire ii sha ikondo i̱ í we í beba daalaa vee? Alaghga er yange ú nôngo kpoghuloo nahan kpa, ii la lu di her tsô. Ver ase ishima nenge er Yehova a pase tahav nav mbu a lu a mi mbu den se asorabo la yô, a kaa wener: “Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan.” (Ka se se nger i yier ye; Yesaia 1:18) Ishember i i̱ er ér “nyian bong” ne tese kwagh u a nyian kpishi, á lu baang yô. * ‘Beba u nyian er kpagh’ nahan la, lu môm ken icigh ki nyian dindee ki yange i waan sha akondo yô. Sha iniôngon yase tseegh yô, mayange je se kôr cio u been a acôghor a isholibo ga. Kpa Yehova yô, una tôô asorabo a a nyian bong shin a a nyian er kpagh nahan la, una er á aa kungu er awombo nahan shin er mou u i mir shin beba ga nahan. Nahan zum u Yehova a de se asorabo a ase yô, kera doo u  se hen ser acôghor a asorabo shon aa lu ken vese gbem sha won ga.

17. A fatyô u kaan ér Yehova gbihi asorabo ase ken ijime na nena?

¹⁷ Zum u Yehova war Hesekia sha ikyev i bouange yô, á dugh icam i kôron ken ishima i tesen ér un ngu a iwuese la, á kaa a na wener: “U gema asorabo am cii U gbihi ken ijime You.” (Ka se se nger i yier ye; Yesaia 38:17) Ijiir ne tese ér, Yehova tee asorabo a mba ve er kwagh shami ga kpa ve gem ishima la gbihin á ken ijime Na, ape una nenge a á ga shin una kera ver ishima sha á ga la. Sha kwagh u takerada ugen u er yô, a fatyô u pasen kwagh u ijiir ne i er ne ér: “U gema asorabo [am] ú er á á hingir er m er asorabo ga nahan.” Kwagh ne ka kwagh u surun se ishima ga he?

18. Profeti Mika tese ér zum u Yehova a zungu se yô, Ngu a tôô asorabo ase kera gbem sha won nena?

¹⁸ Profeti Mika ngur ôron ityendezwa i Yehova a er wener una hide a ior nav la yô, a pase a vangertiôr wener una zungwe ior nav mba ve gem asema la, a kaa ér: “Ka an nan lu Aôndo er We nahan, u U . . . deen atindi a peren a asande a dyako Wou a a shi her laa? . . . Man Ú haa asorabo ase cii shin aiv a zegemnger.” (Ka se se nger i yier ye; Mika 7:18, 19) Nenge er mkaanem man yange maa lu ior mba ve lu sha ayange a i lu ngeren Bibilo la ken ishima yô. Ma gbenda lu u dughun kwagh u i haa “shin aiv a zegemnger” la kpa? Nahan yô, mkaanem ma Mika man tese ér zum u Yehova a zungu se yô, ngu a tôô asorabo ase kera gbem sha won je.

‘Mhôônom Ma Kôron ma Aôndo Wase La’

19, 20. (a) Inja i ishemberti i ken zwa Heberu i tesen ieren, i i̱ gem ér “u zungwen mhôônom” shin “u lun a mhôônom ma kôron” la ér nyi? (b) Bibilo ôr kwagh u mhôônom ma ngô sha anikyundan na u forototo la sha u tesen se kwagh u mhôônom ma kôron ma Yehova nena?

¹⁹ Mhôônom ma kôron ka vegher u dooshima u Yehova ugen. Kanyi i lu mhôônom ma kôrono? Ken Bibilo yô, mhôônom ma kôron man mhôônom ma zungwen zua kôôsôô je. Asemberatii a ken zwa Heberu man zwa Grika kpishi ôr kwagh u mhôônom ma kôron. Ikyav i tesen yô, ashighe kpishi ka i gema ishemberti i ken zwa Heberu i tesen ieren, i í yer ér ra·chamʹ la ér “u zungwen mhôônom” shin “u lun a mhôônom ma kôron.” Ishember shon i ken zwa Heberu i Yehova a yar tom a i̱ u ôron kwagh na ne, i̱ zua a ishemberti i i til sha ityough ki “iyav” la, man a fatyô u pasen i̱ ér “mhôônom ma kôron ma ngô a lu a mi la.”

²⁰ Bibilo yar tom a mhôônom ma ngô ngu a lu a mi sha wan na la u tesen se kwagh u mhôônom ma kôron ma Yehova a lu a mi la. Yesaia 49:15 kaa ér: “Wan u man atumba una hungul ngô na je kpa, mhôônom maa kôr [ra·chamʹ] un a wan u a dugh ken iyav nav la gaa? Shin ve yô, á hungul ve, kpa Mo yô, ú hungur Mo ga.” A cier iyol kpishi aluer ma ngô hungur u nan anikyundan u nan u forototo atumba shi nengen sha a nan doo doo yô. Sha kpôô yô, anikyundan ngu a ma tahav ga; tugh man atetan kpaa anikyundan ngu a har sha ngô na. Nahan kpa, kwagh er vihi yô, ieren i ungô  mbagen ve lu a mi i wan anikyundanev vev ikyo ga la i dumbur kpishi, hemban je yô, ken “ashighe a ican” ne. (2 Timoteu 3:1, 3) “Kpa,” Yehova yôô wener, “Mo yô, ú hungur Mo ga.” Mhôônom ma kôron ma Yehova a lu a mi sha mbashiren un la ma hemba mhôônom ma sha gbaaôndo ma vesen ma ngô ngu a lu a mi sha wanikyundan na la, yem zende zende.

21, 22. Kanyi yange i er Mbaiserael ken tar u Igipiti, man Yehova er nyi kwagh sha mliam vem ma ve vaa a na laa?

²¹ Mhôônom ma ker Yehova er ormaren u lun a dooshima nahan nena? Ieren ne i due tseer tseer sha gbenda u yange er kwagh a Iserael u sha ayange a ngise la. Ken mkur u sha derianyom u sha 16 C.S.W. la, Mbaiserael umiliôn umiliôn lu ikpan ken tar u Igipiti, i lu eren ve ican kpoghuloo je. (Ekesodu 1:11, 14) Er Mbaiserael lu ken ican la, ve vaa ve yila Yehova. Aôndo u mhôôn ne yange er nyi kwagh sha mliam vem maraa?

²² Kwagh ne kôr Yehova ken ishima kpishi. A kaa wener: “M nenge ican i ior Av mba ve lu ken Igipiti la, shi M ungwa mliam vem . . . M fa atsan a ve la.” (Ekesodu 3:7) Mayange je lu kwagh u Yehova a̱ nenge er ior nav ve lu yan ican shin una ungwa mliam vem nahan kpa, kunya a kôr un a ve ga ze. Yehova ka Aôndo u kunya u ker un a ior yô. Man ieren ne i zua kôôsôô a mhôônom ma kôron. Nahan kpa, ka kunya tseegh yange u kôr Yehova a ior nav ga; ishima yange i mgbegha un ker, nahan a er kwagh sha ci ve. Yesaia 63:9 kaa ér: “Sha dooshima Na man mhôônom Nam ma kôron A paa ve.” A yima Mbaiserael sha “uwegh ku ageegh,” a due a ve ken Igipiti kera. (Duteronomi 4:34) Ka been heela yô, a na ve kwaghyan sha ivande shi a na ve tar u iyiav dumbur ker yô.

23. (a) Mkaanem ma Orpasalmi la taver se ishima ér kwagh u hanmô or wase gba Yehova ishima kpishi nena? (b) Yehova wase se sha nyi igbenda?

²³ Ka nongoior u Yehova tseegh mhôônom ma ker un a ve ga. Kwagh u hanmô or wase gba Aôndo wase u dooshima ne ishima kpishi je. Hanma ican i se ye cii yô, a lan i̱ ga. Orpasalmi kaa ér: “Ashe a TER nga sha mbaperapera, A kegh ato sha u ungwan myer ve kpaa. TER ngu ikua a mba asema a vihin ve la, yem mba ve lu a ishima i zamber yô.” (Pasalmi 34:15, 18) Yehova wasen se asange asange nena? U ngu wer ka a kar a kwagh u a lu nan se ican i yan la kera keng ga. Kpa ngu a er akaa kpishi a wasen ior mba ve lu vaan yilan un la. Mkaanem nam na akaawan a injaa a a wase kpishi yô. A ver mbakuran ken tiônnongo mba ve vie ken jijingi, mba ka ve tese mhôônom ma kôron ma a lu a mi la zum u ve lu wasen mbagenev yô. (Yakobu 5:14, 15) Er Yehova a “ongo msen” yô, ne “mba ve sen Un la Icighan Jijingi” na. (Pasalmi 65:2; Luka 11:13) Mbamne mban cii ka igbenda i “mhôônom ma zungwen tsung ma Aôndo wase.”—Luka 1:78.

24. Kanyi kwagh ú er sha dooshima u Yehova a tese laa?

²⁴ Doo u timen sha dooshima u Ter wase u sha ne ga he? Ken kwaghhenen u a kar la, i umbur se ér Yehova tese tahav man ijirôron i sha mimi man kwaghfan na sha igbenda i sha dooshima sha ci u iwasen yase. Man ken kwaghhenen ne di, se nenge er Yehova a tese dooshima na jighilii hen uumace jimin cii—man hen hanma wase asange asange—sha igbenda i kpilighyol yô. Nahan, hanmô or wase nana pine iyol i nan ér, ‘Kanyi me er sha dooshima u Yehova a tese nee?’ Kwagh u ú er yô, Yehova a doo ú shima sha ishima you cii man sha mfe wou cii man a uma wou cii kua sha agee ou cii. (Marku 12:29, 30) Gbenda u ú lu eren uma wou sha hanma iyange la ma ú tese isharen i ken atô ishima you i̱ ú lu a mi i̱ seer kporom ikyua hen Yehova la. Shi Yehova Aôndo u a lu dooshima la kpa á hemba kporom ikyua hen a we gbem sha won!—Yakobu 4:8.

[Footnote]

Baver We Kpa?

• Er nan ve se fe ser dooshima ka ieren i Yehova i hemban samber wuee ciilii?

• Er nan ve se fatyô u kaan vangertiôr ser, mtindi u Yehova yange tindi Wan na ér a̱ va ya ican shi a̱ kpe sha ci wase la, i gbe je ka dooshima u hemban cii je laa?

• Yehova tese ér se asange asange se doo un ishima nena?

• Ka sha nyi igbenda nahan Bibilo i pase er Yehova a den se asorabo vindi vindii?

[Study Questions]

[Picture on page 27]

“Aôndo . . . na Wan Na u môm môm la”

[Picture on pages 28, 29]

“Mbaatsator kpishi kpaa ne hemba ve”

[Credit Line]

© J. Heidecker/VIREO

[Picture on page 30]

Mhôônom ma ngô ngu a lu a mi sha anikyundan na la ma tese se kwagh sha kwagh u mhôônom ma Yehova