Dooshima Ngu Hange Hange Je Zua Ga

HANMA orumace cii, a lu organden shin wanye, man er aeren a tyôô a nan a lu la, shin ma nyityô zwa i nan lamen cii, a lu oril shin ornyian je kpaa, dooshima ka kwagh u nan lu a isharen sha mi tsung yô. Aluer nan iv isharen i nan ne ga yô, mayange je nana kôr cio u lun saan saan ga. Orgen u timen sha akaa a tweregh nger wener: “Dooshima man mlu u lun a mbagenev ikyooso ikyooso la ka akaa a hange hange a nga a na se lu uange shin se lu gbong gbong yô, shi nga a na se ure shin se lu saan saan gayô se ya ican, shin angev asev mbu bee. Aluer i zua a ma icigh ki hegh ki ki eren tom imba ne nahan yô, hanma ortwer ken kpentar ne cii nana kaa a ior mba nan lu eren ve twer la ér ve ma ki. Aluer nan kaa ér ve ma ki ga yô, nana lu peren tindi.”

Nahan kpa, ior mba ken tar u ainge ne cii, hemban je yô mbaabaver man mbaduenati, mbá hembe ôron kwagh u uyôughyôughmbaakaav man tahav man itizan man ijimba a mgbe u i gbe hange hange u uumace vea lu kundu kundu ayol a ve shi vea doo ayol a ve la. Atica kpishi nga hembe ôron kwagh u akaa a taregh a ior vea er man kwagh u ityom i taregh kpaa, ka ve kar mzehemen u or sha akaa a nan er shin tom u nan lu a mi la. Sha mimi yô, kwaghhenen man mfetom ka akaa a hange hange, kpa doo u or nana zenda akaa ne ityô kpoghuloo je nana hungur a tsombor u nan kua akar a nanaa? Or u ngise ugen u fa takerada je ngeren ityakerada, shi lu or u veren ishima vighe vighe sha kwagh u mlu u uumace yô, yange tôô ior mba ve lu a kwaghfan tsema tsema kpa ve lu a dooshima ga la kar sha ‘iyôgh ki uvan shin kwen u kaan.’ (1 Mbakorinte 13:1) Alaghga amba a ior ne aa lu yôughyôugh shin aa za iti, kpa mayange je vea lu a msaanyol u mimi ga.

Mdoo u Aôndo doon se ishima kua orwanndor a vese la lu kwagh u vesen ken ityesen i Yesu Kristu, un shon u yange fa mlu u uumace vindi vindi shi doo un a ve tsung la. A kaa wener: “Ter Aôndo wou A̱ doo u ishima a ishima you cii man a uma wou cii man a mfe wou cii. . . . or u nan we ndor a we yô, nana̱ doo u ishima er we iyol you nahan.” (Mateu 22:37-39) Ka mba ve dondo mkaanem man tseegh vea lu mbadondon mba Yesu mba mimi ye. Sha nahan yô, a kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yohane 13:35.

Tsô, or a maa dooshima ken tar u ainge ne nena? Man mbamaren vea tese mbayev vev u lun a dooshima nena? Kwaghngeren u a dondo ne una time sha mbampin mban.

[Pictures on page 3]

Taver kpishi u maan dooshima ken tar u hua a dumbur ker yum ne