“Kasev Uhar Va Kuma Se Uwegh sha Hunda”

“WAN wase u kwase u sha ikyum kpe hegen ka anyom a har je ne, ku ne yange u nyoon se kpishi.” Mkaanem man ka ma yange i hii washika ugen a mi u i nger ken ipipaabaver i i̱ yer ér Le Progrès la yô; ipipaabaver ne ka i ken gar u Saint Étienne ken tar u France.

“Mélissa lu iwer itiar tseegh, shi lu a angev mbu vihin tsung mbu i yer ér trisomy 18 la. Imba ku i vihin i wan wase a kpe ne, nyoon se je, a hungur se mayange ga. Shin er i yese se ken kwaghaôndo u Mbakatoliko la nahan kpa, shighe u wan wase saa ku la, se zer pinen kpii ser, ‘Aôndo, aluer ú ngu yô, er nan ve ú ne ian akaa ne nahan a lu erenee?’ ” Sha kpôô yô, kwagh ne nyoon ngô u yange nger washika ne ken ishima, shi á nenge wener kwagh hemba un a hemba je. Washika shon shi kaa ér:

“Wan wase saa ku ayange nga karen kpuaa yô, kasev uhar va kuma se uwegh sha hunda. Fese nahan m kav er ve lu Mbashiada mba Yehova yô. M washima mer me zenda ve sha ayom ve yem, kpa m nenge ve a antakerada ugen u ve lu nan ior yô. Antakerada ne ôr er i hii ve Aôndo a ne ican i yan ian yô. Tsô m lumun mer ve tema inya, kpa awashima wam yô, lu u me tese ve mer mba shami ga. M hen a ishima yam mer, aluer se mba ôron kwagh u ican i yan yô, tsombor wam ya ican je zua ga, hanma shighe yô ka i shi kaan a vese ér ‘ka Aôndo á ne ne un ye, shi ka Aôndo a tee un ye.’ Mbashiada mban shi a mo hemba ihwa môm daalaa. Ve ker ato a mo zulee sha mhôôn kpishi, nahan shighe u ve mough u yemen la ishima hemba kundun mo shimi, tsô m kaa a ve mer, ve hide ve vam inya kwagen kpaa. Kwagh ne er hegen ka anyom ahar je ne. M ngu a hingir Orshiada u Yehova ga, kpa m ngu henen Bibilo a ve, shi m ze mbamkombo vev sha hanma shighe u m zough a ian cii.”