Mbampin mba Mbaôron Takerada Ne Ve Pin La

Er nan ve Mbashiada mba Yehova ve kaa ér namba u 144,000 u i ter ken takerada u Mpase la ka namba u kpôô kpôô, ka u sha ikyav ga?

Apostoli Yohane nger wener: “M ungwa iyenge i mba i ver ve ikav la, ka ior dubu deri môm man dubu akunduahar kar unyiin.” (Mpase 7:4) Ken Bibilo yô, ishemberkwaghôron i̱ i̱ kaa ér “mba i ver ve ikav la” ngi ôron kwagh u annongo u uumace mba i tsough ve ér ve tema tor a Kristu sha, ve nenge sha tar u Paradiso la. (2 Mbakorinte 1:21, 22; Mpase 5:9, 10; 20:6) Atôakyaa nga kpishi a a ne ve í fe ér iyenge ve i 144,000 la ka iyenge i kpôô kpôô yô. Se zua a ityôkyaa i môm ken kwagh u i nger ken Mpase 7:4 la.

Yange mba er apostoli Yohane kwagh u nongo u iorov 144,000 ne ken mpase u sha mnenge mba been yô maa i tese un nongoior ugen kpaa. Yohane pase wener nongo u sha uhar ne ka ‘zegeikpelaior, i ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa.’ Zegeikpelaior ne ka mba vea war “zegecan” u una tim tar u bo ungun ne la.—Mpase 7:9, 14.

Kpa gema nenge ase mkposo u a lu sha kwagh u Yohane a er ken ivur i sha 4 man kwagh u a er ken ivur i sha 9 ken Mpase ityough 7 la. Á pase wener nongo u hiihii u “mba i ver ve ikav” la, i fa iyenge ve. Nahan kpa, nongo u sha uhar u “zegeikpelaior” la yô, i fa iyenge ve ga. Nahan yô, ka a inja u kaan ser namba u 144,000 ne ka namba u kpôô kpôô. Lun er namba ne una lu namba u sha ikyav, shi lun er una til sha ityough ki nongoior u i fe iyenge ve ga yô, mkposo ma a kera lu sha kwagh u i er ken avur a ahar ne ga. Nahan yô, kwagh u i er ken avur ne la tese wanger wanger ér namba u 144,000 la ka u kpôô kpôô.

Mbatimen ken Bibilo mba sha ayange a ngise man mba ainge kpaa cii kure zwa môm ér namba ne ka u kpôô kpôô. U tesen ikyav yô, Dr Ethelbert Bullinger, or u ken tar u Britain u yange ngeren ityakerada i pasen asemberatii yô ôr kwagh u Mpase 7:4, 9 ken takerada u i yer ér The Apocalypse shin “The Day of the Lord” la, sha peeji 282, á ôr kwagh ne anyom kar hegen er 100 nahan, wener: “Mkaanem man ma ôr kwagh jighilii: ityough kin ôr kwagh u iyenge i i fe í yô kua iyenge i i fe í ga yô.” Sha ayange ne kpaa, Robert L. Thomas u Kiriki u a lu profesôr u timen sha kwagh u Ikyuryan i He ken makeranta u i yer ér The Master’s Seminary u ken tar u Amerika la nger ken takerada u i yer ér Revelation: An Exegetical Commentary, Tihi u sha 1, peeji 474 la, wener: “Ma ityôkyaa injaa ngi i se kaa ser namba u 144,000 ne ka u sha ikyav ga.” Shi á kaa ér: “Namba u ken [Mpase 7:4] la i fa un jighilii, kpa u ken [Mpase 7:9] la yô, i fa ga. Aluer se kaa ser namba ne ka u sha ikyav yô, kwagh ne tese ér namba môm tsô kera ngu ken takerada u Mpase u se kaa ser ka namba u kpôô kpôô ga.”

Mbagenev yô gba anyiman sha kwagh ne kaa ér, takerada u Mpase ôr akaa kpishi a sha ikyav, nahan yô unamba mba ken takerada ne cica cii, kua namba u 144,000 la kpaa ka u sha ikyav. (Mpase 1:1, 4; 2:10) Kpa mhen ne ngu shami ga  kuaa je. Sha mimi yô, Mpase ngu a unamba mba sha ikyav kpishi je, kpa ngu a unamba mba kpôô kpôô kpaa. U tesen ikyav yô, Yohane ôr kwagh u “ati pue kar ahar a mbaapostoli mba pue kar uhar mba Waniyôngo” la. (Mpase 21:14) Mimi yô, 12 u i ter ken ivur ne ne ka namba u kpôô kpôô, ka u sha ikyav ga. U seer yô, apostoli Yohane shi ôr kwagh u mtemtor u Kristu u “anyom dubu” la. Namba ne kpaa ka namba u kpôô kpôô, gadia aluer se time ken Bibilo vighe vighe yô se nenge ser ka nahan. * (Mpase 20:3, 5–7) Nahan yô, aluer ma ivur i ken Mpase ôr kwagh ter ma namba yô, ka kwagh u avur agen a a dondo a ivur la a er la man kwagh u ivur shon í er la una wase se u fan aluer namba la ka u kpôô kpôô shin ka u sha ikyav ye.

Ka shami vough u kaan ér namba u 144,000 la ka namba u kpôô kpôô, u ior mba i fe iyenge ve, mba aluer i tôô iyenge ve i kar sha nongo u “zegeikpelaior” la yô mba annongo u kpuaa tsô, gadia u ôron kwagh ne nahan ne zua sha kwagh u avur a Bibilo agen kpaa a er yô. U tesen ikyav yô, shi i ôr kwagh u mba ve lu iyenge 144,000 la ken mpase u sha mnenge u Yohane ne, í kaa ér ka ‘mba i paa ve ken ior, ve lu iyiagh ki tsutswaagh’ yô. (Mpase 14:1, 4) Ishember i “iyiagh ki tsutswaagh” ne tese ér mba annongo u iorov kpuaa mba i tsough ve yô. Yesu kpa, shighe u lu shin tar ne la, ôr kwagh u mba vea tema tor a na imôngo sha Tartor u sha la, shi á yila ve kpaa ér ka ‘anikumuile u kpeghee.’ (Luka 12:32; 22:29) Sha kpôô yô, aluer i tôô iyenge i ior mba vea tema tor sha ne i kar sha ior mba vea tema ken Paradiso u a lu van la yô, mba kpuaa tsô.

Nahan yô, kwagh u i nger ken Mpase 7:4 kua akaa agen a i er sha kwagh ne ken ajiir agen a ken Bibilo kpaa tese ér namba u 144,000 ne ka namba u kpôô kpôô. Ka namba u ior mba vea tema tor sha a Kristu imôngo, vea hemen tar u Paradiso u ua iv a ior mba sar sar mba civir Yehova Aôndo, mba or fe iyenge ve ga la.—Pasalmi 37:29.

[Footnote]

[Blurb on page 31]

Iyenge i mbayandyako i tartor u sha la ka iorov 144,000 tseegh

[Picture on page 31]

I fa iyenge i “zegeikpelaior” la ga

[Picture Credit Line on page 31]

Asan: I zua a mi sha ikyev i Anglo-Australian Observatory, or u tôôn foto ka David Malin