Inja i Dedoo Ume Atam a Injaa

KWASE ugen vea mbayev nav utar yange ve hii Bibilo i henen vea Mbashiada mba Yehova hen ancile ugen ikyua a kpezegemnger, vegher u ken imbusutariyan i tar u Japan la. Mbawanndor a ve mba ken ancile u a lu ica hiinii shi ior mba her ve eren kwagh u ityôô tsembelee ne maa gba nyaghen un. Kwase ne kaa ér: “Kwagh u yange hemba vihin mo je yô, lu mo tseegh ior lu nyaghen ga, ve lu tswamen orya wam kua ônov av kpaa.” Nahan cii kpa, a kaa a mbayev nav ér: “De gbe nen uwer u sughun ior ga. Ka kwagh u Yehova a soo ér ne er je la.”—Mateu 5:47, 48.

Shin er ior lu palegh ve nahan kpa, shighe u kwase ne una lu a mbayev hen ya yô a tesen ve u nan ior icivir. Yange vea due u zan hen amboramnger a tseen a hen ningir ve la yô, mbayev mban ve tema shin mato ve henen er vea sugh ior yô. Nahan vea za nyôron hen imaagh ki amboramnger la á lu yô maa ve gba kaan a ior saan saan ér “Konnichiwa!”—inja na yô “Se sugh ne!” Shin er ior soon u lumun ishughun i tsombor ne ga nahan kpa, ve gba uwer ga. Tsô ior hii u nengen anza a dedoo a mbayev mba kwase ne lu a mi la.

Ken masejime yô, ior hii u lumun ishughun ve kaan a ve ér “Konnichiwa.” Anyom nga kar ahar yô, ior mba hen gar u tsombor ne lu her la kpishi gba lumun ishughun ve. Nahan kwagh ne na yô, ior gema sughun ayol a ve shi ve hemba doon ayol a ve kpaa. Orvesen u lu mue u gar ve la soo ér una er mbayev mban iyua sha inja ve i dedoo i yange ior nenge ve ve gema ieren ve la. Kpa ngô ve kaa a na ér a̱ de we ikyo ga, ve mba eren kwagh u i gbe u Mbakristu vea er tsô. Ayange nga kar yô, ior mba ken icile la cica cii zua gesa u kwaghôron, nahan wan u kwase ne u môm pase er ngô ve yange tese ve u sughun ior shin er ior lu lumun ishughun ve ga nahan kpaa. I na wan ne iyua i hiihii sha kwaghôron na ne shi i gber kwaghôron shon ken ipipaabaver i hen gar la kpaa. Tsombor ne ngu saan saan kpishi, sha ci u ve dondo atindiakaa a Mbakristu nahan kwagh ne ume atam a dedoo. Ior ka vea lu sar sar a vese yô i hemba lun se ican ga u pasen ve loho u dedoo.