Nombor Ngu a Tahav

NOMBOR u kagher lihe kuma er angahar 18 nahan. Ngu a tahav; ka u due ken zwa u kagher fele u gbor ikya sha gbaa kon. Nombor u zegeinyam i shin mnger, i i yer ér blue whale la di yuhwa er nortar nahan. Sha kpôô yô, agee a ishu ne i lu a mi ve i zenden a nombor ne sha la, kpilighyol!

Aluer i tôô nombor u orumace i kar sha nombor u kagher man u blue whale la yô, nombor u or gba kwagh ga, sha ci u ú lihe ga shi ú yuhwa kpaa ga shi ngu a agee kuma sha iniombor i ishôso ne ga. Nahan cii kpa, u hemba iniombor ne tahav ica je. Bibilo kaa ér, “ku kua uma mba ken tahav mbu nombor” u u lu anlyegh u kpuaa u ken iyol i orumace la. (Anzaakaa 18:21) Sha mimi yô, se nenge acin imôngo er ior ka ve yar tom a nombor u u lu a ku ker ne sha u eren mbaaie shi wan ior kwagh iyol yô, man er kwagh ne ka a va mbaishôôv a ican man ku je kpaa yô.

Kape ahuraior a a lu imôngo ica i gbe kpa, kwaghôron u nyoon ka a vihi ikyaryan ve je la. Iliam i dang ne ior ishimavihin. Akaa a vihin a ahuraior a Yobu ôr sha iyol na la na yô, Yobu var iyol ér, “né vihim ishima nan je, né heren mo sha akaaôrono?” (Yobu 19:2) Orhenen Yakobu pase akaa a vihin a nombor u i ker u tsaha ga ua fatyô u eren yô. A kaa ér: “Kape nombor kpaa u lu anlyegh u kpeghee kpa u hagher sha uzegembaakaav je la. Nenge anusu kpeghee kpaa ka a nande ingbaikyon yô. Nombor kpaa ka usu je.”—Yakobu 3:5, 6.

Nahan kpa ka ku tseegh nombor u ne ga, mbu a tahav mbu nan uma kpaa. Kwaghôron u kundu kundu wase mba ishima i nyian ve tsung yô, shi war mba ve we ishima u wuan ayol a ve je kpaa. Mba man mcimbim ma bov man mbaiv mba ve ngohol kwaghwan u injaa yô, war ku u ma ve kpe sha ayange ve ga la. Sha mimi yô, nombor u or perapera ngu er ka “kon u uma” yô man er “atam a ikyon a zenaria a i we a shin agbande a azurfa nahan.”—Anzaakaa 15:4; 25:11.

Kwagh u hemban u se er a nombor wase yô, ka u wuese Yehova Aôndo shi pasen loho u dedoo u Tartor u Aôndo shi tesen ior mimi u injaa u ken Bibilo. Sha ci u nyi? Yesu kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3; Mateu 24:14; 28:19, 20.