Mkaanem ma Yehova Ma Uma Je

U Ôron Takerada u Esekiel Asav-asav—Vegher u Hiihii

KEN inyom i 613 C.S.Y. (Cii man Shighe u Yesu) la, profeti Yeremia lu ken Yuda, lu yôôn vangertiôr ér mtim u Yerusalem man tar u Yuda mgbôghom. Sha shighe la, Tor Nebukadinesar u Babilon vande yemen a Mbayuda kpishi uikyangen ken tar na. Daniel man azende a na atar, a a lu eren tom ken kwa u Tor u Mbakaldi la lu ken ve mba i yem a ve uikyangen la. Mbayuda mba i yem a ve uikyangen la kpishi lu hen kpeifi u Cebar ken “tar u Mbakaldi.” (Esekiel 1:1-3) Yehova yange gba gbihin mba i yem a ve uikyangen ne ga, kpa na ve ortom. A tsua Esekiel u lu anyom 30 hen shighe la ér a̱ lu profeti.

I nger takerada u Esekiel i bee ken inyom i 591 C.S.Y. la. U ôr akaa a yange er ken atô u anyom 22 yô. Esekiel kpe iyol nger takerada ne vighe vighe. A pase iwerayange i a nger akaaôron a profeti la. Vegher u hiihii u loho u Esekiel nger la ôr kwagh u mtim u Yerusalem. Vegher u sha uhar la ôr kwagh u ajir a Aôndo ôr akuraior a a kase Mbayuda la, vegher u sha utar la di gema pase er ior mba Yehova vea hide a civir un yô. Kwaghngeren ne sav ôron akaa a i nger ken Esekiel 1:1–24:27 la. Ityouv mbin ôr kwagh u mbampase mba sha mnenge man akaaôron a profeti man akav a tesen kwagh u una er Yerusalem ken hemen yô.

“M VER U ORKURAN”

(Esekiel 1:1–19:14)

Yange i tese Esekiel mpase u sha mnenge u cieryol u ikyônough ki torough ki Yehova, mba been yô maa i na un tom. Yehova kaa a na ér: “M ver u orkuran sha ya u Iserael, aluer wea ungwa kwaghôron sha zwa Wam yô, wa ve kwagh sha ci Wam.” (Esekiel 3:17) Yange i kaa a Esekiel ér a̱ er anumbe ahar sha u tsenganôron er a kase Yerusalem sha utya man kwagh u una er gar shon yô. Yehova ôr kwagh u tar u Yuda sha ikyev i Esekiel wener: “Ka Mo je, Me va a sanker sha a ven man Me tim ajiir a en a taven la kera” ye. (Esekiel 6:3) A ôr kwagh u una er mba ve tem ken tar u Yuda yô, wener: “Iyevoron i á or u iyev va ve.”—Esekiel 7:7.

Ken inyom i 612 C.S.Y. la, i va a Esekiel ken Yerusalem, ken mpase u sha mnenge. A nenge i lu eren akaa a ndôhôrshima tsung ken tempel u Aôndo! Zum u Yehova una tindi mbatyomov nav (mba ‘iorov ataratar’ ve til sha ityough vev la) ér ve za tim mbavendan mimi mban la, á lu mba i ‘ver ve ikyav sha atsul’ tseegh vea war ye. (Esekiel 9:2-6) Kpa cii man kwagh ne a er yô, a vande tsendan “akausu a kpenger kpenger” sha gar ne. Akausu ne ka loho u Aôndo u mtim u ú lu er ka usu la. (Esekiel 10:2) ‘Yehova una va a gbenda u mbaaferev u bo la sha ityouv vev,’ nahan cii kpa a tôndo zwa ér una hide a kohol Mbaiserael mba i sambe ve wue wue la.—Esekiel 11:17-21.

Jijingi u Aôndo hide a Esekiel ken Kaldia. I er iniumbe i tesen er Tor Sedekia vea ior nav vea yevese a due Yerusalem yô. Shi i na uprofeti mba nomso man mba kasev ibo. Mbacivir akombo kpaa i venda ve. I tôô Yuda i kar sha kon u wain u lun a inja ga. Injakwagh i ugafa man kon u wain tese akaa a vihin tsung a aa tser Yerusalem sha er a gem hen Igipiti ér a̱ wase un yô. Injakwagh ne kure sha ityendezwa i Yehova a er wener una ‘asegh gbaa u kiriki u masen hômon, Una môôr un sha uwo u taven sha tser tser’ la. (Esekiel 17:22) Nahan kpa, “tôgh ku torough” ku a lu ken Yuda ga.—Esekiel 19:14.

Mbamlumun sha mbampin mba sha akaa a ken Ruamabera:

1:4-28—Ikyekyeutya i sha la tile sha ityough ki nyi? Ikyekyeutya ne tile sha ityough ki vegher u nongo u Yehova u ú lu sha la. Ka akaauma a jighjigh la á lu nongo ne ye. Nga zough a tahav hen icighan jijingi u Yehova. Iengem i or u a hende ikyekye ne, u a til sha ityough ki Yehova la ngee je gande ôron. Ikyume i doonashe la tese bem na.

1:5-11—Ka unô ve lu akaauma a anyiin la? Esekiel pase kwagh u a lu akaauma a anyiin la ken mpase u sha mnenge na u sha uhar la ér ka ucerubi. (Esekiel 10:1-11; 11:22) Ken mpase na u sha uhar la, a kaa ér ishigh ki bua la ka “ishigh ki cerubi.” (Esekiel 10:14) A ôr nahan ka shami sha ci u bua ka  ikyav i tahav man agee, man ucerubi ka mbatyomov mba lun a tahav kpen kpen.

2:6—Er nan i yer Esekiel acin imôngo ér ‘wan u oro’? Yehova yila Esekiel ér “wan u or” sha u umbur profeti ne er á lu orumace yô, shi kwagh ne tese mkposo u vesen u a lu hen atô u orumace u i tindi nan loho man Aôndo u i lu loho na la. Yesu Kristu kpa i yila un sha iti ne ken Ivangeli i Mateu man Marku man Luka kua Yohane kuma er kwa 80 nahan. Kwagh ne tese ér i mar Wan u Aôndo shin tar, lu orumace kpôô kpôô, yange gema a gema iyol na hingir or ga.

2:9–3:3—Er nan ve Esekiel ya ihurenruamabera u ukwelegh man u mzungu nyoho unu? Ka ieren i Esekiel lu a mi sha tom na la i̱ na ve ya ihurenruamabera nyoho un ye. Tom u profeti u Esekiel lu eren Yehova la doo un kpishi.

4:1-17—Esekiel er iniumbe i tesen mkase u a va kase Yerusalem sha utya la mimii? Esekiel yange zamber a Yehova ér a̱ na un kwagh ugen una wa usu a mi una kaa kwaghyan na la. Yehova ungwa zamber na ne. Nahan kwagh ne tese ér profeti ne er iniumbe ne kpôô kpôô. Myav u Esekiel yav ken hian na i ken imese la lu sha ci u iferkwagh i tartor u Iserael u ken imbusutarimese la er kuma anyom 390 la. Iferkwagh ne hii ken inyom i 997 C.S.Y. la, zan zan mtim u Yerusalem ken inyom i 607 C.S.Y. la. Myav u a yav ken hian na i ken iyan la di lu sha ci u iferkwagh i Yuda er anyom 40 la. Iferkwagh ne hii shighe u i ver Yeremia profeti ken inyom i 647 C.S.Y. la zan zan inyom i 607 C.S.Y. la. Ken atô u ayange 430 la cii, Esekiel lu yan kwagh sha inja ga shi mngerem kpa lu man kpishi ga. Kwagh ne tese ér ijen ia gba shighe u a kase Yerusalem sha utya la.

5:1-3—Msange u Esekiel sange ice côhiin ken ice i yange gba u una tsenda i sha ahumbe gema kange ken riga la tese nyi? Kwagh ne tese ér anyom 70 a karen yô, asande a Mbayuda aa hide ken tar ve aa va hii mcivir u mimi.—Esekiel 11:17-20.

17:1-24—Ka unô ve lu ugafa uhar mba vesen mbara, man i tôndo agbaa a kiriki a sha azenger a sedar nena, man ka an nan lu “gbaa u kiriki u masen hômon” u Yehova a môôr un laa? Ugafa mba uhar mbara tile sha ityough ki tor u Babilon man u Igipiti. Gafa u hiihii la va tema sha azenger a kon u sedar, ka tor u gomoti u tsombor u Davidi je la. Gafa ne tôndo agbaa a kiriki a sha azenger la, á er kwagh ne sha u veren Sedekia tor sha ityough ki Tor Yehoyakin u Yuda. Shin er Sedekia yange bum ér una ungwan imo i tor u Babilon nahan kpa, gema hen gafa ugen la, ka tor u Igipiti je la, ér a wase un, kpa zua a iwasen ga. Nahan gba u a yem a na uikyangen ken Babilon, una kpe ker. Yehova kpa asegh “gbaa u kiriki u masen hômon” la, ka Tor Mesiya je la. A môôr Un sha “Uwo u taven sha tser tser,” ka Uwo u Shion u sha je la. Ka heela man una hingir “kon u sedar u dedoo,” una va tar cii a iveren i mimi ye.—Mpase 14:1.

Ityesen hen Avese:

2:6-8; 3:8, 9, 18-21. Mayange se cia nen mbaaferev se wa tsa ityô shin se cia u pasen ve loho u Aôndo, u ú we icintan kpa ker la ga. Shighe u ior ve lu nahan se tar shin se tagher a ahendan yô, gba u se taver er daimondi nahan. Nahan kpa, doo u se cighir asema, gayô se tswam mbagenev shin se wa ve ikyo ga ze. Mhôônom yange ma kôron Yesu a ior mba pasen ve kwagh la, nahan se kpa doo u mhôônom ma a mgbegha se se pase mbagenev kwagh.—Mateu 9:36.

3:15. Er i na Esekiel tom yô, ‘kunda un iyol, a tema ayange ataankarahar’ ken Telabiba. Lu henen sha loho u gba u una pase ior la. Se kpa doo u se henen kwagh kpoghuloo shi se gbidyen kwar sha kwagh u se hen la sha er se kav akaa a cimin a ken jijingi la yô.

4:1–5:4. Esekiel hide a iyol ijime shi taver ishima, ka nahan ve fatyô u eren anumbe a ahar a yange tsenga pasen kwagh u una er ken hemen la ye. Se kpa gba u se hiden a iyol ijime shi se taver ishima se er nyityô tom u Aôndo a ne se cii.

7:4, 9; 8:18; 9:5, 10. Doo u kunya shin mhôônom ma a kôr se a ior mba Aôndo a tsaha ve ga.

7:19. Shighe u Yehova una tim tar ungun ne la, inyaregh kia lu a iwasen ga.

8:5-18. Or ka nana venda mimi yô, nan vihi mlu u nan vea Aôndo. “Or u cian Aôndo ga, ka nan tim or u wan ndor a nan sha zwa u nan je.” (Anzaakaa 11:9) Nahan yô, doo u se kegh ato a mbavendan mimi ga, mhen ne a de ve se ken ishima tsô kpaa ga.

9:3-6. Gba u se lu a ikyav—inja na yô se tese ser se tsegha ayol a ase sha ci u Aôndo, i er se batisema se hingir mbacivir un shi se mba a inja i Orkristu kpaa—ka nahan man se war “zegecan” la ye. (Mateu 24:21) Mbakristu mba i shigh ve mkurem, mba or u a lu a korough ku inki ku orngeren a til sha ityough  vev la, hemen tom u veren ikyav sha atsul a ior ne, ka tom u pasen loho u Tartor shi geman ior hingir mbahenen je la. Aluer se soo ser se za hemen u lun a ikyav la yô, se wase nen ve tom ne kpoghuloo je.

12:26-28. Mba yange ve lahan loho u Esekiel la je kpa, Esekiel kaa a ve ér: “Ma kwaghôron [u Yehova] môm tsô kpaa, una kera timbir ga.” Se wase nen mbagenev sha tahav asev cii ve na Yehova jighjigh cii man una tim tar ne ye.

14:12-23. Hanmaor nana nôngo iyol i nan ve nana zua a myom ye. Ka kwagh u orgen nana er sha ci wase ga.—Mbaromanu 14:12.

18:1-29. Ka kwagh u se lee sha aeren a ase la se sunda ye.

“MTIM, MTIM, ME TIM UN KERA”

(Esekiel 20:1–24:27)

Ken inyom i 611 C.S.Y. la, inyom i sha utaankaruhar i í yem a Mbayuda uikyangen la, mbatamen mba Iserael va hen Esekiel sha u va “pinen TER kwagh.” Nahan i ôr ve ihyembeato i Iserael hii sha ayange a uter vev la je shi i ta ve icin ér Yehova una ‘tsuwe sanker na’ una wua ve. (Esekiel 20:1; 21:3) Yehova ôr kwagh a ityoor u Iserael (ka Sedekia je la), wener: “Sagh atsar kera, bugh idyer i tor kpaa; kwagh una kera va lu nahan ga; kende kwagh u gban ijime la sha, gema hide a u a kende sha la ijime. Mtim, mtim, Me tim un kera; kwagh ne kpaa una kera va ga, zan zan un u i lu kwagh na jim [Yesu Kristu], una kar van, u Me na un yô.”—Esekiel 21:25-27.

I yila Yerusalem ijir. I pase ibo i Ohola (Iserael) man Oholiba (Yuda) ken igbar. Yange i vande nan Ohola “sha ikyev i mba ve doo un ishima la, ka sha ikyev i Mbaashiria je la.” (Esekiel 23:9) Oholiba kpaa mtim na mgbôghom. Ken inyom i 609 C.S.Y. la, i kase Yerusalem sha utya kuma iwer 18. Shighe u gar shon una gba la, a cier Mbayuda iyol je a gande ve u zungwen. Gba u Esekiel una ôr Mbayuda mba i yem a ve uikyangen la loho u Aôndo ga, saa una vande ungwan ibaver ér i tim gar la sha zwa u “or u nan wer” mtim shon yô.—Esekiel 24:26, 27.

Mbamlumun sha mbampin mba sha akaa a ken Ruamabera:

21:3—Kanyi i lu “sanker” u Yehova a tsuwe ken var na laa? “Sanker” shon u Yehova yange tim Yerusalem man Yuda a mi la ka Tor Nebukadinesar u Babilon kua akumautya na. Shi alaghga sanker ne wa vegher u nongo u Aôndo u ú lu sha la kpa ker; ka mbatyomov nav mba ageegh je la.

24:6-14—Nduran ma ityegh ki i er kwagh u ki heen ne tile sha ityough ki nyi? Shighe u i kase Yerusalem sha utya la lu er ityegh nahan. Nduran ma ityegh kin tile sha ityough ki aeren a dang a i eren ken gar ne la—ka hôngor man ijimba kua awambe a i haa inya ken gar shon la. Hôngor u gar ne ngee je i penda ityegh ki shon sha usu gbilin, ki tsee kpishi, kpa nduran u ki la bugh kera ga.

Ityesen hen Avese:

20:1, 49. Kwagh u mbatamen mba Iserael er la tese ér akperan lu ve ken ishima sha kwagh u Esekiel ôr a ve la. Mayange je akperan a̱ de lu se ken ishima sha acin a tan a Aôndo ga.

21:18-22. Er Nebukadinesar kpehen ishor nahan kpa, lu Yehova tuur tor u fanaôndoga ne ér a va ta num sha Yerusalem ye. Kwagh ne tese ér azôv je kpa aa fatyô u yangen mbatyomov mba Yehova u timin mba Yehova a we ishima u timin la ga.

22:6-16. Anger man inja i dang man ieren i nzughul a mbagenev kua ingyatu doo Yehova ishima ga. Nahan se kange nen ishima tsung se venda nen aferakaa ne.

23:5-49. Er Iserael man Yuda ya ikyur a akuraior agen yô, ve ngohol mcivir ve u a aiegh la ve wa ikyum. Se wa nen ikyo tsung sha er se ya ikyar a ior i tar ne, se vihi jighjigh wase u nan ga yô.—Yakobu 4:4.

Loho u U Lu Uma, U Tem Gbilin Ga Yô

Se hen akaa a doon tsung ken takerada u Esekiel ityough 1 zan zan ityough 24! Akaawan a injaa a a lu ken ityouv mbin ne tese akaa a ka a na ve kwagh u or a vihi Aôndo ishima yô. Shi a tese kwagh u se er ve Aôndo una zungwe se mhôônom man er i hii ve i doo u se ta mbaaferev icin yô. Kwaghôron u profeti u a er kwagh u mtim u Yerusalem la tese wang ér Yehova Aôndo ‘ôron ior nav akaa a he, er a lu a due ga la je.’—Yesaia 42:9.

Akaaôron a profeti a i nger ken Esekiel 17:22-24 man 21:26, 27 la tese er a va ver Tartor u Mesiya la sha yô. Ica a gba ga tsô, mtemtor la una na a er ishima i Aôndo shin tar. (Mateu 6:9, 10) Aluer se mba a jighjigh u nan u vesen man vangertiôr yô, se fatyô u veren ashe gbenda a averen a Tartor ua va a mi la. Sha kpôô yô, “mkaanem ma Aôndo ma uma je, ma tem gbilin ga.”—Mbaheberu 4:12.