“Kanyi I Lu Mimi?”

PONTIU Pilatu, Orroma u lu gomna la yange pine Yesu mpin u tan abusan sha kwagh ne. Yange kwagh gba un sha mlumun ga, shi Yesu kpa bugh zwa ga. Pilatu yange hen ér mimi ka kwagh u or a tsa sha won kpa nana fa ga yô.—Yohane 18:38.

Nyian kpa, ior kpishi mba nengen mimi ér ka kwagh u injaa ga, kape mbahemen kwaghaôndo man atica man mbapativ cii ve nengen mimi je la. Ve na jighjigh ér mimi ka kwagh u vough ga, hemban je yô mimi sha kwagh u aeren a vough man u sha kwagh u Aôndo, shi mimi gem hanma shighe cii. Kwagh ne tese ér ior vea fatyô u eren kwagh u ve nenge ér ka u dedoo shin u bo la. (Yesaia 5:20, 21) Kwagh ne shi tese kpaa ér ior vea nenge aeren a injaa a kov u ken ijime la ér kera nga a inja ga.

Doo u se ver ishima sha ityôkyaa i yange i na ve Pilatu pine Yesu mpin shon la. Yesu yange kaa a na ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:37) Yesu yange na jighjigh ér mimi ka gbilinkwagh u or nana fatyô u fan ga, ga. Yange tôndozwa a mbahenen nav ér: “Né fa mimi, mimi kpaa una pase ne una tuhwa.”—Yohane 8:32.

Se zua a mimi la hana? Yesu yange er msen kwagen la kaa a Aôndo ér: “Ka kwaghôron Wou je a lu mimi ye.” (Yohane 17:17) Bibilo i Aôndo a ne i nger la ngi a mimi u a lu a akaawan a injaa man ishimaverenkeghen i bunden ga la, ka uma u tsôron je la.—2 Timoteu 3:15-17.

Pilatu yange ta ian i injaa i a zua a mi u henen mimi la kera. We di ye? Er nan u pin Mbashiada mba Yehova wer ve ôr u kwagh u “mimi” u Yesu yange tesen ior la ga? A doo ve kpishi u ôron we mimi ne.