Mgber u He u Iyoukura i Henen ken Tiônnongo

MAGAZIN u ú lu ôron ne ka mgber u Iyoukura i henen ken tiônnongo u hiihii. Se soo u pasen ne er magazin u he ne una lu yô.

Mgber u henen ken tiônnongo ne ngu sha ci u Mbashiada mba Yehova man mbahenen Bibilo, mba ve lu zan ikyura ken kwaghhenen yô. A duen a mgber ne kwa môm ken hanma uwer, man una luun a ngeren mba timen sha mi unyiin shin utaan. A gberen atineakaa a ngeren mba timen sha mi la sha igbende i magazin ne. Er a lu nan ior mba ken won mgber u henen ken tiônnongo ne ga yô, igbende i mgber ne ia kera luun a ufoto kposo kposo er mgber u a lu sha ci u ior mba ken won la nahan ga.

Ken hanma mgber yô a pase kwagh u ngeren u timen sha mi man ngeren mbagenev ve er la tiônôô sha peeji u sha 2 u magazin ne. Ngeren u sha peeji u sha 2 ne una wase mba ve hemen Iyoukura i henen ken tiônnongo la shighe u ve lu wan iyol i kwaghhenen la sha er vea hemen un tsembelee yô.

Aluer ne ver ishima yô, akumahiange agen ken ngeren mba timen sha mi mban kera lihe er mba tsev mbara nahan ga. Sha nahan yô, shighe a lu kpishi u timen sha avur a Bibilo aa a lu hange hange la shighe u i lu henen Iyoukura yô. Se mba taver ne asema ser, timen nen sha avur a Bibilo a i ter ken kwaghhenen ne ken hanma sati. I nger hen avur a Bibilo agen ér “ôr” nahan gba u a ôr shi a lam sha mi shighe u i lu henen Iyoukura yô. Aluer shighe ngu yô, a fatyô u ôron avur agen kpaa. Ken ngeren mbagen yô, i nger hen avur agen ér “nenge.” Er avur ne aa sue atôakaa a vesen a ken akumahiange la jighilii ga yô, a faan ôron a ken mkombo u tiônnongo ga. Nahan kpa, avur a ruamabera a i nger her ér “nenge” la aa fatyô u seer tan iwanger sha kwaghhenen la shin aa sue kwagh u a lu timen sha mi la. Se mba taver ne asema ser ôr nen avur shon shighe u ne lu wan iyol i Iyoukura i Henen yô. Alaghga ne fatyô u teren a shighe u ne lu nan mlumun yô.

A kera gberen ibaver i sha inyom la ken Iyoukura ga. Hii ken inyom i 2008 je, a gema duen a ibaver i sha inyom ken kwa u ken atô u Tom Wase ú Tartor kua ken Yearbook. Kpa a duen a ngeren mbagenev ken mgber u Iyoukura i henen ken tiônnongo la, er i vande ôron nahan. Er a timen sha ngeren mban mbagenev ken mkombo u tiônnongo ga nahan kpa, se mba taver ne asema ser kundu nen ishima ôr nen ve. Ngeren mban kpa mba a kwaghyan u ken jijingi u “wanakiriki u jighjigh man u fan kwagh” a ne yô.—Mat. 24:45-47.

U masen kuren yô, mgber u Iyoukura henen ken tiônnongo man u a lu sha ci u ior mba ken won la cii ka magazin uhar ga, ka môm. Mbamgber mban cii ka Iyoukura u Yôôn Tartor u Yehova. A pase awashima u Iyoukura ken mbamgber mban cii sha peeji 2. Shi a kohol mbamgber mban cii a magh ve ijiir i môm ken mkur u hanma inyom. Man a wa ngeren mbagenev ken mbamgber mba uhar mban cii ken ngeren u a lu a itinekwagh ér, “Ú Umbur Kpa?” u a lu duen a mi ken mgber u henen ken tiônnongo la.

Hii ken inyom i 1879 la zan zan hegen, mba yaren tom a Iyoukura sha u pasen ior mimi sha kwagh u Tartor u Aôndo sha ashighe a uitya man ashighe a mban u inyar man ashighe a i lu tôvon ior mba Aôndo a ican kpaa. Se mba eren msen ser Yehova a ver mgber u he ne doo doo sha er una za hemen u pasen mimi sha kwagh u Tartor u Aôndo yô. Shi se mba sônon ser Yehova a ver ne mbaôron Iyoukura ne sha er ne er tom a mgber u Iyoukura i henen ken tiônnongo ne doo doo yô.