Yehova Nengen Sha Mbatomov Nav Mbabeenyol Mbara Doo doo

“Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.”—HEB. 6:10.

1, 2. (a) Ka wea nenge a or u menden ivu nahan u umbur nyi? (b) Yehova nengen Mbakristu mba beenyol nena?

 KA WEA nenge a mbabeenyol mba menden ivu ken tiônnongo nahan u umbur kwagh u i er ken takerada u Daniel la kpa? Yehova Aôndo yange tese Daniel ken mpase u sha mnenge ér Un ngu a ivu sha ityou. Daniel nger ér: “Er m lu kenger her yô, i ver mkônom ma torom; or u tsan sha won kar za tema, akondo a na kungu er senou nahan, man ice i sha ityough nagh kpaa lu er mou u wang nahan.”—Dan. 7:9.

² Shighe u ka a dughun a dugh mou la, ngu a kungu segh segh, i doo kenger kpen kpen. Sha nahan yô, ivu man ititom i “or u tsan sha won” la cii tese mtse u Aôndo man kwaghfan na, man akaa ne cii tese ér doo u se hemba nan un icivir. Nahan Yehova u a lu or u tsan sha won la nengen mbabeenyol mba ve civir un sha jighjigh la nena? Mkaanem ma Aôndo kaa ér: “Ivu ka tsar u sha ityou u icivirigh, mba zuan a i sha gbenda u perapera.” (Anz. 16:31) Sha mimi yô, aluer Orkristu u jighjigh nan mende ivu yô, ka i lu kwagh u civirigh sha ishigh ki Aôndo kpen kpen. Ú nengen anmgbianev ou mbabeenyol mba nomso man mba kasev mbara er Yehova a nengen ve la kpa?

Mbabeenyol mba Kwagh u Injaa sha ci u Nyi?

3. Mbabeenyol mba ve civir Aôndo a vese imôngo mbara doo se ishima sha ci u nyi?

³ Mbatomov mba Aôndo mba ve lu un kwagh u injaa yô, ka Mbahemenev mba Shin Tine mba Mbashiada mba Yehova man anmgbianev mba yange ve er tom u mbakuran mba ningir sha kua mba ve lu eren u zan a mi her la man upania man mbapasenkwagh u Tartor mba ve vie la, ka anmgbianev mba nomso man mba kasev mba ve lu ken atôônanongo ase, ve lu eren tom sha jighjigh je la. Alaghga we kpa u fa anmgbianev mbagenev mba ve er tom u pasen loho u dedoo ne anyom imôngo, mba ikyav ve i dedoo la i̱ wase agumaior kpishi u sôron uuma ve yô. Mbacivir Yehova mba beenyol mbagenev mba a ityom i vesen shi ve wa ishima a tôvacan sha ci u loho u dedoo ne. Yehova man “wanakiriki u jighjigh man u fan kwagh” wuese iniôngon i anmgbianev mban i ve lu suen tom u Tartor la.—Mat. 24:45.

4. Doo u se eren msen sha ci u Mbakristu mba beenyol shi se naan ve icivir sha ci u nyi?

⁴ Doo u mbacivir Yehova Aôndo vea wuese mbabeenyol mbajighjigh mbara shi vea naan ve icivir kpaa. Jighilii yô, Tindi u Aôndo yange na Mbaiserael sha ikyev i Mose la zua u wan mbabeenyol ikyo shi nan ve icivir la sha mcie u cian Yehova. (Lev. 19:32) Nahan se eren nen msen hanma shighe sha ci u mbajighjigh mban shi se sughun nen Aôndo sha ci u tom u ve lu eren sha dooshima la. Apostoli Paulu yange er msen sha ci u mbashirentom a na imôngo, mbayev kua mbabeenyol cii.—Ôr 1 Mbatesalonika 1:2, 3.

5. Se zua a iwasen sha u lun imôngo vea mbabeenyol mba ve civir Yehova la nena?

⁵ Heela tseegh ga, hanma or ken tiônnongo  nana zua a iwasen sha u lun imôngo vea Mbakristu mba beenyol. Mbabeenyol mba ve civir Yehova sha jighjigh mbara zua a mfe kpishi sha u henen Bibilo man sha akaa agen a a er yô. Nahan ve fa u wan ishima man u zungwen mhôônom kpaa. Shi ka vea tesen mbagenev akaa a ve hen la nahan i saan ve iyol kpen kpen. (Ps. 71:18) Ne agumaior man agumaukase, lu nen mbafankwagh sha er ne zua a kwaghfan ve ne, vough er ka i kese mngerem shin ijôr i zan hweng nahan.—Anz. 20:5.

6. Ú tese mbabeenyol wer ve doo u ishima sha mimi nena?

⁶ Ú pasen mbabeenyol wer, ve doo u ishima er ve doo Yehova ishima nahan kpa? Gbenda môm u ú fatyô u eren kwagh ne yô, ka u pasen ve wer ve doo u ishima sha ci u jighjigh u nan ve man mbamhen vev. Heela tseegh ga, aluer u ngu eren sha kwaghwan ve yô, u lu tesen wer u ngu nan ve icivir sha mimi. Mbakristu mba beenyol kpishi vea fatyô u umbur kwaghwan u injaa u yange mbabeenyol mbajighjigh mbagenev wa ve la, man er yange ve dondo kwaghwan la ve a wase ve yô. *

Eren a Mbabeenyol sha Dooshima

7. Ka unô jighilii Yehova a we ve tom u nengen sha mbabeenyolo?

⁷ Aôndo wa icombor i mbabeenyol tom u nengen sha ve. (Ôr 1 Timoteu 5:4, 8.) Tsombor ka ua nengen sha mbabeenyol mba hen tsombor ve, vough er Yehova kpa a nengen sha ve nahan i doo un kpen kpen. Aôndo suen tsombor shi veren iniôngon i u i nengen sha mbabeenyol aa iyoltangen shio la. *

8. Doo u atôônanongo aa nengen sha Mbakristu mba beenyol sha ci u nyi?

⁸ Tiônnongo kpa ka una nengen sha mbabeenyol mbajighjigh mba ior mba hen tsombor ve ve civir Yehova ga, shin ve lu a or u wasen ve ga la ve i doo Yehova je la. (1 Tim. 5:3, 5, 9, 10) Atôônanongo ka aa eren nahan yô, a lu tesen ér nga ‘zungu mhôônom; shi ve doo ayol a ve er ka anmgbianev nahan, shi mhôônom ma ker ve’ a mbabeenyol mban. (1 Pet. 3:8) Mwe u ve we mbabeenyol mba ken tiônnongo ikyo la zua sha kwagh u Paulu yange kaa ér ilyeghegh i môm ki  iyol i or ka kia yaan ican yô ‘alegh cii a lu ken ican la imôngo’ la. (1 Kor. 12:26) Ka sea eren a mbabeenyol sha dooshima yô, se lu tesen ser se mba dondon kwaghwan u Paulu ne, ér: “Wasen nen ikyav ayol a en, ka nahan man né er sha tindi u Kristu vough ye.”—Gal. 6:2.

9. Ka mbamzeyol mba nyi mbabeenyol ve lun a mini?

⁹ Ka mbamzeyol mba nyi mbabeenyol ve tagher a mini? Mbabeenyol mbagenev kpishi ka ve vôr fele. Alaghga vea nenge ér vea kera fatyô u eren akaa a kiriki er u za nengen a ortwer shin za tôôn uwashika shin esen ya shin eren kwaghyan nahan ga. Er or ka nana bee iyol ve kwaghyan a kera zaan nan zwa ga yô, vea hen ér ka hange hange u ve yan kwagh shin man kwagh er yange ve vanden eren nahan la ga. Kape kwaghyan u ken jijingi kpa vea hen ér ka hange hange u ve yan ga je la. Er mbabeenyol ka ve kera nengen tsembelee ga shi ve kera ungwan tsembelee ga yô, ka i taver ve u ôron takerada shi ungwan akaawan a ken jijingi, shi ka i lu ve ican kpishi u wan iyol i zan mbamkombo mba Mbakristu. Mbagenev vea er nyi u wasen mbabeenyol mbanaa?

Er U Fatyô u Wasen Yô

10. Mbatamen vea nenge ér i er hanma kwagh vough sha u wasen mbabeenyol nena?

¹⁰ Gbenda u atôônanongo kpishi a nengen sha mbabeenyol la ka ikyav i dedoo. Anmgbianev mba nomso man mba kasev ka ve wase u yamen akaa sha ci ve man u yôron sha ci ve shi kiren ve akaa kpaa. Ka ve sue mbabeenyol sha er vea hen Bibilo shi vea wa iyol i mkombo shi vea pase kwagh hanma shighe yô. Mbashiada mba Yehova mba ve lu agumaior ka ve va kohol ve shi ve tôô ve shin mato. Mbabeenyol ka vea kan shio u zan mkombo yô, i kura akaaôron la ken tser i na ve. Ka a gba a doo yô, mbatamen ve nenge ér i er hanma kwagh vough sha u wasen mbabeenyol mba ken atôônanongo a ve. *

11. Pase er yange tsombor ugen wase anmgbian u beenyol yô.

¹¹ Mbakristu mbagenev kpa vea fatyô u lôhôn ve iwer shi eren a ve dedoo. Shighe u kwase u anmgbian u beenyol ugen kpe kera yô, taver un kpishi u zuan a inyaregh ki kimbin ya, sha ci u lu kwase na tseegh ngohol penshen ye. Un vea kwase na yange ve hen Bibilo a tsombor ugen, lu ter man ngô man ônov mba kasev uhar, tsombor ne lu a zegeya. Nahan ve na un ayou a tsan ahar. Ve yaan kwaghyan imôngo shi ve eren akaa a nan ve msaanyol imôngo shi ve tesen dooshima ayol a ve kpaa. Ve er nahan anyom 15. Jighjigh u nan man mfe u anmgbian u beenyol ne wase mbayevkasev mba uhar mbara kpishi, shi un kpa saan un iyol u lun a ve imôngo. Anmgbian u beenyol ne lu vea ve zan zan kar kpen shighe u lu anyom 89 la. Zan zan nyian kpa tsombor ne ngu sughun Aôndo sha averen a yange ve zua a mi hen anmgbian u beenyol ne. Er ve wase orhenen u Yesu Kristu yô, ‘injar ve i bunde ve ga.’—Mat. 10:42. *

12. U tese anmgbianev mba beenyol dooshima nena?

¹² Alaghga u lu sha ian i wasen anmgbianev mba beenyol er tsombor ne nahan ga, kpa u fatyô u wasen ve u zan mbamkombo shin duen kwaghpasen. U fatyô u lôhôn ve iwer hen ya wou shin man ahumbe vea ve imôngo kpaa. Shi u fatyô u za sôron ve shighe u ve gbe angev shin ve kera lu a tahav mbu zenden ga yô. Kwagh ugen yô, eren a ve er ka mbaganden yô. Aluer Mbakristu mba beenyol mban mba henen kwagh sha inja her yô, i ôr ve hanma kwagh u i soo u eren sha ci ve la cii. Mbabeenyol mba ve kera fetyô u henen kwagh sha inja ga je kpa ka a er a ve sha icivir yô ve fa.

Tom Wen Ua Hungur Yehova Ga

13. Ka hange hange u wan mbamhen mba Mbakristu mba beenyol ikyo sha ci u nyi?

¹³ Ka hange hange u tesen ikyo i wan sha mbamhen mba mbabeenyol. Ishima ka i vihi  mbabeenyol ker kpishi, sha ci u mba kera fetyô u eren akaa a yange ve eren shighe u ve lu agumaior shi ve lu a gbong gbong iyol la ga. U tesen ikyav yô, anmgbian u kwase ugen u civir Yehova kpoghuloo je kuma anyom 50 shi er tom u pania u keke yô, yange va gba angev kpishi nahan kera faantyô u zan mbamkombo ga. Shighe u tema hen sha tom u yange vanden eren la man kwagh u kôr cio u eren hen shighe u lu uange ne yô, a gba vaan. Tsô a sua ityough inya maa ôr sha ikyenge i mlia ér, “M kera ngu fantyô u eren kwagh môm môm ga.”

14. Mbacivir Yehova mba beenyol vea fatyô u zuan a ishimataver i nyi ken pasalmi?

¹⁴ Aluer u bee iyol yô, kape we kpa i lun we ken ishima laa? Shin ka i lu u ashighe agen er Yehova ta u kera yôô? Alaghga tsô kape lu orngeren pasalmi ken ishima shighe u bee iyol je la, gadia a sôn Yehova ér: “De tem kera sha shighe u iyolibeen la ga, de undun mo shighe u agee am a bee la ga. . . . zan zan shighe u m bee iyol, m mende ivu kpaa, de undun mo ga, Aôndo.” (Ps. 71:9, 18) U ngu wer Yehova yange ta orngeren pasalmi la kera ga, man we kpa una ta u kera ga. Davidi pase vangertiôr u un lu a mi ken iwasen i Aôndo la ken pasalmi ugen. (Ôr Pasalmi 68:19.) Er u lu Orkristu u beenyol nahan kpa, aluer u ngu civir Yehova sha mimi her yô, fa wer we kpa u fatyô u lun a vangertiôr wer Yehova una za hemen u suen we ayange ayange.

15. Kanyi ia wase mbabeenyol vea lu a mnenge u voughloo?

¹⁵ Yehova hungur ityom i ne Mbashiada nav mba ne bee iyol hegen ne yange ne er sha ci na shi ne lu eren sha ci u icivir na hegen ne ga. Bibilo kaa ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.” (Heb. 6:10) Sha nahan yô, mayange de lun a mhen u kpeghee wer, er u bee yol yô u kera ngu Yehova a iwasen ga ze. Kpa gema henen akaa a dedoo, i de lu a bo ga. I saan we iyol sha averen ou kua ishimaverenkeghen you i ken hemen la. Se mba a “ishimaverenkeghen i dedoo ken masetyô,” man kwagh u kuman sha mi môm ngu ga, shi ka Orgban se a ne se lu a vangertiôr ne ye. (Yer. 29:11, 12; Aer. 17:31; 1 Tim. 6:19) Henen sha kwagh u ishimaverenkeghen you shi lu a mnenge u vough, nahan mayange de henen wer u ngu tiônnongo a iwasen ga ze! *

16. Anmgbian u beenyol ugen yange soo u kera lun ortamen ga sha ci u nyi, kpa mzough u mbatamen taver un ishima nena?

¹⁶ Nenge ase kwagh u Johan, u a lu anyom 80 kpa a lu nengen sha kwase na Sannie, u a lu uange hegen ne. * Anmgbianev mba kasev yange ve va nengen sha Sannie sha er Johan una fatyô u zan mbamkombo shi duen kwaghpasen yô. Kpa, semberee ne Johan nengen ér un vôr a hanma kwagh, nahan a kera soo u lun ortamen ken tiônnongo ga. Yange pine sha imo i mlia ér, “Ityôkyaa i m lu ortamen her yô ka nyi? M kera fetyô u eren kwagh môm u wasen tiônnongo ga.” Mbatamen mbagenev taver un ishima ér kwaghfan na ngu tiônnongo a inja kpishi. Nahan ve taver un ishima ér una kera fantyô u eren akaa a yange vanden eren la ga je kpa, a za hemen u eren tom u ortamen her. Er ve taver Johan ishima kpishi yô, ngu eren tom u ortamen her, nahan ngu tiônnongo a inja kpishi.

Yehova We Ve Ikyo sha Mimi

17. Bibilo taver Mbakristu mba beenyol asema nena?

¹⁷ Ruamabera tese wang ér mbabeenyol vea fatyô u zan ikyura ken mcivir u Yehova, shin  er vea tagher a mbamzeyol mba iyolbeen i ve a mi la nahan kpaa. Orngeren pasalmi kaa ér: “I môôr ve ken iyou i TER, . . . Vea ume atam a iyol i been ve her; vea lu a zar kpishi, shi vea lu gese gese kpaa.” (Ps. 92:13, 14) Apostoli Paulu u adooga lu nôngon a ma mnyoon la kpa ‘ishima yina un ga, shin er or na u ken won la lu vihin kera nahan kpaa.’—Ôr 2 Mbakorinte 4:16-18.

18. Doo u mbagenev vea wasen mbabeenyol mba ve lu civir Aôndo mbara kua mba ve lu nengen sha a ve laa?

¹⁸ Akav nga kpishi nyian aa a tesen ér mbabeenyol vea fatyô u ‘umen atam a iyol i been ve her’ yô. Nahan kpa, mbabeenyol mba icombor ve i nengen sha ve tsembelee je kpa, angev man iyolbeen ka i na ve ican tsung. Mbawasen mba beenyol kpa ashighe agen ka ve vôr. Tiônnongo ngu a tom u civirigh u tesen mbabeenyol man mba ve nengen sha a ve mbara dooshima. (Gal. 6:10) Aluer se mba tesen ve dooshima sha mimi yô, se mba kaan a ve ser ve yem shi ‘i̱ tsee ve iyol, ve ide’ tseegh, a u nan ve iwasen shio ga.—Yak. 2:15-17.

19. Mbakristu mba beenyol vea fatyô u lun a vangertiôr sha kwagh u ken hemen sha ci u nyi?

¹⁹ Alaghga iyolbeen ia pande kwagh u Orkristu nana er yô, kpa shighe panden dooshima u Yehova a lu a mi sha mba beenyol mba ve civir un sha mimi la ga. Yehova soo Mbakristu mban cii, man una ta ve kera mayange ga. (Ps. 37:28; Yes. 46:4) Una za hemen u kuran shi nengen sha ve ken iyolbeen ve cii.—Ps. 48:14.

[Footnotes]

Ú Na Mlumun Wer Nyi?

• U nenge wer Mbakristu mba beenyol mba a inja sha ci u nyi?

• Se tese ser Mbakristu mba beenyol doo se ishima nena?

• Kanyi ia wase mbacivir Yehova mba beenyol u lun a mnenge u voughloo?

[Study Questions]

[Pictures on page 18]

Ior mba ken tiônnongo mba ne mbabeenyol icivir kpishi