Za Hemen U Lun A “Ishima I Wang” Ken Ashighe A Ican ne

ORTÔÔNABAVER a sha kwagh u Mbakatoliko ugen, iti na ér Vittorio Messori, yange ôr kwagh u idya i vihin tsung i ucôôci mba ken tar u Italia sember eren sha igbenda kposo kposo la, ér: “Or môm u nyiman ér mlu u wang ban ken Côôci nyian je kpa nan ngu ga. Shi a fatyô u been a ieren ne sha u saghen tindi u mbahemen adua saan kwav la kera ga sha ci u ka vea er idya a orov 100 nahan yô, iorov 80 ken ve ka ve lu nomsombaiorov man mbayevnomso.”—La Stampa.

Mseer u iferkwagh i lu seer a seer la ka ikyav i tesen ér se mba ken “ayange a masejime” a tar ne. (2 Tim. 3:1-5) Er abaver kpa a tesen nahan, ior kpishi mba eren hôngor u sha aeren u ú dugh ken mseer u iferkwagh ne sha gbenda u vihin kpen kpen kua mba ve yer ayol a ve ér mba ior mba Aôndo la kpaa. Ishima ve i i̱ iv a mbamhen mba wang ga la ngi mgbeghan ve u eren aeren a hôngorough a vihin ishima tsung. (Ef. 2:2) Ka sha ci u ityôkyaa ne Yesu yange ta icin ér ka “ken ishima man aferakaa a henen kua iwoo-or man idya man iv man mbampase mba sha aie man ityuhwanev ve dugh ye.” (Mat. 15:19) Kpa Yehova yô, gema sar un ape “ishima i wang” i doo mbacivir un. (Anz. 22:11) Nahan yô, Orkristu nana fatyô u zan hemen u lun a ishima i wang ken ashighe a ican ne nena?

Inja i u Lun a “Ishima i Wang” la Ér Nyi?

Ka a yar tom a ishember i “ishima” la ken Bibilo yô, ashighe kpishi ka i ôron kwagh u i̱ sha injakwagh. Takerada ugen pase inja i ishima i í er kwagh u i ken Bibilo la ér ka “vegher u or u ken atô” u “kwagh a hembe gban Aôndo a mi shi or ka nan ya ikyar i nan a mi vea Aôndo shi á ne nan u lun a aeren a dedoo kpaa yô.” Ishima tile sha injaor i se lu kpôô kpôô ken atô la. Er takerada u se ter sha heen ne u tese nahan, ka ishima yase Yehova a tev shi kwagh a hembe gban un sha mi ken mbacivir un ye.—1 Pet. 3:4.

Ken Bibilo yô, ka a ôr ér “kwagh ngu wang” shi “ngu a acôghor ga” yô, mba ôron ér ngu tsembelee sha iyol. Kpa shi mba yaren tom a asember ne sha u ôron kwagh u aeren kua mcivir u lun a hôngor ga kpaa, inja na yô ka aeren kua mcivir u i nongo kwagh ugen sha mi shin a cinge shin a lu a ihyogholough iyol ga yô. Yesu yange kaa ken Ityesen na i sha Uwo ér: “Saan mba ve lu asema wang la iyol.” Jighilii yô, yange lu ôron kwagh u ior mba lun wang ken atô. (Mat. 5:8) Akaa a doon ve ishima man asaren a ve man mbamhen vev cii acôghor nga sha mi ga. Mdoo u Yehova a doo ve ishima shi ve wuese un la ka a mgbegha ve u soon un a ishima ve i môm, a atseregh shio. (Luka 10:27) U soo u lun wang sha inja gbenda ne, shin ka nahan ga?

U Zan Hemen u Lun a “Ishima i Wang” la Ka Kwagh u Taver

Gba u or u nan civir Yehova nana “lu a ave a wang” tseegh ga, kpa nana lu or u lun a “ishima i mimi” kpaa. (Ps. 24:3, 4) Nahan kpa, u zan hemen u lun a “ishima i mimi” nyian la, ka taver ior mba Aôndo seer a seer. Satan man tar na u a hemen ne, kua mbamyen asev mba kighir se kpoghuloo sha u se pav a Yehova yô. U se hendan a mbamkighir mban yô, gba hange hange u “ishima i wang” ia doo se shi se kange ishima ser se lu wang ken ishima. Kwagh ne una kura se shi una wase se u zan hemen u lun azende a Aôndo. Se er nan ve se za hemen u lun a ishima i wang-na?

 I ta se icin ken Mbaheberu 3:12 ér: “Ver nen ishima, anmgbianev, sha u boshima u nan jighjigh ga a̱ de luun ken hanmô wen sha u né undu Aôndo u uma ga.” Aluer se mba a ishima i “nan jighjigh ga” yô, se fatyô u zan hemen u lun a “ishima i wang” ga. Ka mbamhen mba nyi Satan a samber a mi sha u vihin jighjigh wase u nan ken Aôndoo? Mbamhen mban wa ityesen i gbaduen man u or eren aeren a nan nenge i doo nan la man u henen ér tindi u mimi je kpa ngu u paven kwagh u dedoo a u bo ga la kpa ker, kua akperan a mbagenev ve lu a mi ér Aôndo yange na i nger Icighan Ruamabera ga la. Mayange se de ser mbamhen mba bov mban ve nyôr se ken ishima ga. (Kol. 2:8) Akaa a vesen a a wase se u kuran ayol a ase sha mbamhen mban yô, ka u ôron Bibilo hanma iyange shi timen sha mi tsembelee. Mfe u vough u se zough a mi ken Mkaanem ma Aôndo la una wase se u seer soon Yehova shi kaven igbenda i a eren kwagh a ior la kpaa. Aluer se soo u vendan mbamhen mbaaiev shi nan Yehova jighjigh her dông, sha er se za hemen u lun a ishima i wang yô, gba hange hange u se lu a imba dooshima man mkav la—1 Tim. 1:3-5.

Zum u Se Tagher a Asaren a Yolough Yô

Isharen i yolough man isharen i lun a akaa kpishi la kpa ka mhen ugen u una fatyô u nyôron ken a vese, er se lu nôngon ser se za hemen u lun a “ishima i wang” ne. (1 Yoh. 2:15, 16) Inyaregh ki soon shin isharen i ombon inyaregh shi lun a uyôughyôughmbaakaav la ia fatyô u vihin ishima i Orkristu ker, nahan mgbeghan nan u eren akaa a sha ishima i Aôndo ga. Mbakristu mbagenev kpuaa er kwagh sha mimi ga hen ijiir i tom ve, shin ve er mbagenev anyighe shin ve ii inyaregh gayô ve tôô akaa agenegh a a lu a ve ga je kpaa.—1 Tim. 6:9, 10.

Sha gbenda ugen di yô, aluer se mba cian u eren kwagh u vihin Yehova, shi se soo ijirôron i sha mimi shi se kange ishima u lun a imoshima i dedoo yô, se lu tesen ser se soo “ishima i wang.” Dooshima ne ngu a mgbegha se u zan hemen u tesen ser “sar se u zenden tsembelee sha akaa cii.” (Heb. 13:18) Ka sea zenden tsembelee yô, kwagh la ka a hingir shiada i dedoo hen mbagenev. Orshiada ugen ken tar u Italia  u lu deraba u kômpeni u matoo ugen yô, iti na ér Emilio, yange nenge a anikpa u lu a inyaregh ker kuma udola 680 (₦96,560) yô. Yange kpiligh mbaaboki nav mba hen tom iyol a na er gema anikpa ne na orvesen na, nahan orvesen na la va mase geman nan or u i saa nan la yô. Ieren i Emilio ne yange i doo mbaaboki nav mbagenev kpishi je yô, ve tese isharen ér i hen Bibilo a ve shi ve hii kwaghhenen shon kpaa. Sha nahan yô, iorov utaankaruhar ken icombor ihiar ngohol mimi. Sha mimi yô, u zenden tsembelee la ngu a mgbegha mbagenev u va wuese Yehova.—Titu 2:10.

Kwagh ugen u una na ishima i Orkristu ia kera lu wang ga yô, ka mnenge u kpeegh shin u dang sha kwagh u yavaor la. Mnenge u ior kpishi ve lu a mi ér u yaven a or cii ve masen eren ivaa man u kwase gayô nom yaven a or u ve vese nan ga kua u nomsoor yaven a nomsoor ugen ka kwagh u vough la, una fatyô u hôngor ishima i Orkristu. Alaghga or u nan gbe ken idya yô, nana hingir or u wan atseregh, u lun a uma uhar shi yeren isholibo i nan la. Mimi je, kwagh ne una tese ér nan ngu a “ishima i wang” ga.

Yange i er Gabriele batisema shighe u lu anyom 15 la, maa fese je hii u eren tom u pania. Nahan kpa shighe kar yô, a hii u zan hen ubaa tugh vea azende a bo. (Ps. 26:4) Kwagh ne na un hii u eren aeren a dang shi lun a uma uhar, nahan i va hingir u dughun un ken tiônnongo u Kristu kera. Tsaha u Yehova tsaha un la na un u henen a ishima. Gabriele kaa nahan ér: “Yange m hii u eren akaa a ngise mayange kwagh gbaan mo sha mi ga la cii. M hingir u ôron Bibilo hanma iyange, nôngon mer me kav kwagh u Yehova a lu kaan mo jim jim la, shi henen ityakerada i nongo u Aôndo u gber la vighe vighe kpaa. Yange m zua a mtsera man mkom u a lu ken kwaghhenen u sha tseeneke la, shi m kav er u ôron Bibilo shi eren msen la a ne or tahav kpishi yô.” Kwagh ne yange wase Gabriele undu aeren a dang shi hide ya ikyar vea Yehova kpaa.

Hegen yô, Gabriele hide shi ngu eren tom u pania vea kwase na. Kwagh u er un la tese ér u henen Bibilo shi ôron ityakerada i “wanakiriki u jighjigh man u fan kwagh” la una wase or u lun a ishima i wang shi palegh aeren a dang.—Mat. 24:45; Ps. 143:10.

U Lun a “Ishima i Wang” Zum u Se Tagher a Ameen Yô

Mkighir u mbahendan a vese man ican i inyar kua côron uange, vea na mbacivir Aôndo mbagenev iyolkpen. Ashighe agen asema a ve nga a hen kwagh sha gbenda u vough ga. Tor Davidi je kpa imba kwagh ne yange er un. A kaa ér: “Jijingi wam ure ken a mo, ishima kondom ker cii.” (Ps. 143:4) Kanyi yange i wase un u wan ishima a ashighe a ican laa? Davidi yange umbur akaa a Aôndo er sha ci u ior Nav man er un iyol na kpa Aôndo war un la. Yange time sha akaa a Yehova er sha ci u ihyemban iti na la. Davidi yange hemban henen sha ityom i Aôndo. (Ps. 143:5) Kape se kpa aluer se mba henen kwagh u Orgban wase man akaa a a er shi a za hemen u eren sha ci wase ve, a wase se shighe u se tagher a ameen je la.

Shighe u or nan hii se shin se hen ser nan hii se yô, ishima ka i vihi se ker. Aluer se zer henen sha iyongo la yô, se hii u lun a mbamhen mbabov sha anmgbianev asev. Alaghga se gba nyaghen ve, lun kwagh wase kposo shi kwagh u mbagenev una kera gbaan se ishima kpishi ga. Nahan kpa, imba ieren ne ia tese ér sar se u lun a “ishima i wang” je he? Sha mimi yô, awashima wase u lun a imba ishima ne bende a gbenda u se eren kwagh a anmgbianev asev mba ken Kristu la kua kwagh u ka se er shighe u anyiman a gbe hen ato wase la kpaa.

Er se lu Mbakristu mba mimi yô, se tile kposo a tar u aeren a dedoo a lu vihin seer a seer ne sha ci u se soo u lun a “ishima i wang.” Bem u ken ishima u se zough a mi sha u eren ishima i Aôndo la ngu a kôôm uma wase sha gbenda u injaa. U hemban cii yô, ka se ya ikyar kangenaa vea Orgban wase, Yehova Aôndo, u mba lun a “asema a wang” ve doo un ishima la. (Ps. 73:1) Sha mimi yô, se fatyô u lun môm ken mbara mba a va saan ve iyol la sha ci u Yesu tôndo zwa ér “vea nenge a Aôndo,” U una yima mba “ishima i wang” i doo ve la.—Mat. 5:8.