Kwagh u Yesu Tese Ior sha Kwagh Na La
Kwagh u Yesu Tese Ior sha Kwagh Na La
ORNGEREN TAKERADA u i yer un ér HERBERT LOCKYER la nger ér: “Yesu yange lu a akperan sha kwagh u or u un lu man ape un dugh kua ityôkyaa i un ve shin tar wase, shin kwagh u una va er un ken hemen la cuku tsô kpaa ga.”
CII ve se lumun shi se na jighjigh a akaa a Yesu tesen la yô, doo u se fa kwagh na. Yesu lu nyi or jimi? Yange due hana? Awashima na lu nyi? Se fatyô u ungwan mbamlumun mba sha mbampin mban sha zwa u Yesu iyol na ken ityakerada i ivangeli la, ka Mateu man Marku man Luka man Yohane je la.
Yesu vande lun cii i va mar un shin tar ye Sha shighe ugen la Yesu kaa ér: “Er i lu a mar Aberaham ga je, tsô Mo M lu.” (Yohane 8:58) Aberaham yange lu uma anyom kar kuma er 2,000 nahan cii ve i va mar Yesu ye. Nahan kpa, cii man tertamen u jighjigh ne lu uma shin tar ne yô, Yesu vande lun. Lu hana Yesu vande lunu? A pase wener: “M sen Sha.”—Yohane 6:38.
Wan u Aôndo Yehova ngu a mbatyomov kpishi mba ve lu ônov nav yô. Nahan kpa, Yesu gema kaha kposo. Yange ôr kwagh na iyol na ér un ngu “Wan u môm môm u Aôndo.” (Yohane 3:18) Kwaghôron ne tese ér ka Yesu tseegh Aôndo gba un iyol na jighilii ye. Aôndo yange gba akaa agen cii sha ikyev i Wan na u môm môm la.—Mbakolose 1:16.
“Wan u or” Yesu hemba teren ishember ne a asember agen cii sha u ôron kwagh na iyol na. (Mateu 8:20) Kwagh ne tese ér Yesu lu ortyom u gema iyol hingir orumace ga, shin ma aôndo u va ken mlu u or kpaa ga. Kpa gema lu orumace jighilii je. Aôndo yange tôô uma u wan na ne sha va a mi shin tar sha tahav mbu icighan jijingi na, va wa ken iyav mbu iniunkwase Maria, nahan iniunkwase la jile iyol. Kwagh ne na yô, i mar Yesu lu or u vough, u lun a isholibo iyol shio.—Mateu 1:18; Luka 1:35; Yohane 8:46.
Mesiya u ityendezwa la Kwase Samaria ugen yange kaa a Yesu ér: “M fa Mesiya ngu van.” Yesu gema kaa ér: “Mo u M er kwagh a we ne, ka Mo Un je ne.” (Yohane 4:25, 26) Inja i ishember i “Mesiya” man i “Kristu” la ér “u i shigh Un mkurem la.” Yange Aôndo shighe Yesu mkurem shin tsua un ér a lu sha ian i injaa sha u kuren uityendezwa nav.
Ityôkyaa i yange va shin tar jighilii yô Sha shighe ugen la Yesu kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43) Shin er eren uivande kpishi sha u wasen ior mba ve lu yan ican nahan kpa, a hemba veren ishima sha u pasen ior loho u dedoo u Tartor. Ngeren ugen ken hemen una time sha kwagh u Yesu tese ior sha kwagh u Tartor u Aôndo la.
Sha kpôô yô, Yesu lu or u kaka ga. * Er ngeren mba dondon mban ve pase nahan, mlu u vande lun sha la na yô, mkaanem ma yange ôr shin tar la hemba lun a inja cii. Nahan kera kpiligh se iyol er loho u Yesu pase la hingir u benden a uuma mba ior umiliôn imôngo sha tar cii nahan ga.
[Ngeren u shin kpe]
^ Wea soo u seer fan kwagh u Yesu man kwagh u a er sha u kuren awashima u Aôndo yô, ôr ityough 4 ki takerada u Bibilo Tese ér Nyi Jimi? la, ka Mbashiada mba Yehova ve gber u ye.