Bibilo Gem Ior

KANYI yange i mgbegha orshoja petali ugen, u lu ormbaiv kpaa yô, gema uma naa? Er nan ve kwase ugen u tôô iyongo i anumbe a nôngon num yô, yange de akaa a a wa ishima u eren laa? Ter ugen yange yina ishima sha kwagh u wan na ga, nahan lu nyi i dedoo i due kere? Ôr kwaghngeren ne tsô u zua a mbamlumun sha mbampin mban.

“Shin er yange m er akaabo ken uma wam kpishi nahan kpa, saan mo iyol hegen.”—GARRY P. AMBROCIO

ANYOM: 47

TAR NA: PHILIPPINES

INJAOR I YANGE LU YÔ: ORSHOJA PETALI

YIASE YAM: Yange m vese hen angar u i yer ér Vintar la. Iwo i lun a imendenev sha mi kpishi, kua uifi mba lun wang kase zege pev u lun gburumaa, ape se lu la, shi ahumbe a dedoo lu hen ijiir la. Shin er kundu iyol hen ijiir ne nahan kpa, uma gema taver her. Ior iin se uzendenya kua akaa agenegh hen ya.

Shighe u m lu hian or la, m maan msôrom kpishi vea azende am shi m maan taav, shi m iin sha u me zua a inyaregh ki eren afer am la yô. Shighe ugen la, m ii ngôm u tamen asa a haren sha mon. Shoja i gomoti yange i henen ér mo m ngu ken nongo u shoja-petali ugen, u i yilan u ér New People’s Army (NPA) la, nahan vea nenge a mo je ve gbidyem coholoo. Kwagh ne na yô, m za nyôr nongo u shoja petali la. M tsaan sha iwo vea shoja i NPA la zan zan anyom kuma ataan. Uma yange taver kpishi. Yange se luun ijiir i môm ga, hanma shighe yô se saa yevese shoja i gomoti. Shighe kar yô, m vôr u zeren yeren sha iwo, nahan m za na iyol yam sha ikyev i gomna u kpentar u Ilocos Norte. A er a mo doo doo, je yô a wasem u zuan a tom u dedoo kpaa. Nahan kpa, m za hemen a aeren a bo a m vanden eren la, m hemben ior ayou m iin ve akaa shi m anger ior kpaa.

GBENDA U BIBILO GEMA UMA WAM LA: Kwase ugen hen ijiirtom yam lu Kwaseshiada u Yehova, i yilan un ér Loida. Yange m zua a orgen sha ikyev i kwase ne, iti na ér Jovencio, nahan a hii u henen Bibilo a mo. Kpa, taver mo kpishi u den aeren am a bo la. Hanma shighe u i gbe u Jovencio una va hen Bibilo a mo yô, m vande man taav, shi m lu eren aferakaa heregh. Dasenda va hingir u kôron mo ken masejime zum u m per tindi yô; i wuhem ken purusu m tsa ker iwer 11. Shighe u m lu ken purusu la, m er msen hen Yehova, m zamber a na mer a wasem. M zamber a na mer a̱ dem asorabo am shi a nam icighan jijingi na a̱ hemen mo shi a̱ taver mo kpaa.

Shighe kar yô, Orshiada u Yehova ugen vam inya ken purusu shi nam Bibilo kpaa. M ôr Bibilo la, nahan m kav er Yehova a zungu mhôônom shi a eren kwagh a vese sha dooshima shi a den se asorabo a ase kpaa yô. M mase kaven er Yehova a lu zungwen mo mhôônom man er a nem ian i henen igbenda na kpaa yô. Nahan m sôn un mer a̱ nam agee á hemban aeren a bo. Kwagh u yange m ôr ken Anzaakaa 27:11 la kôrom ken ishima kpishi. M tôô mer ka mo jighilii je Yehova a lu lamen a mo ken ivur la ye. Ivur la kaa ér: “Wan wam, lu orfankwagh, na i saan mo  iyol, sha er me gema me kaa imo a or u a laham yô.”

Mba dughun mo ken purusu kera yô, m hide m hii u henen Bibilo vea Mbashiada mba Yehova, shi m hii u zan mbamkombo vev shi dondon akaawan a ken Bibilo la kpaa. Kure kure tsô Yehova wasem, nahan m de aeren am a bo la cii. Nahan m tsegha iyol yam sha ci u Yehova Aôndeo.

IWASEN I M ZOUGH A MI LA: Shin er yange m er akaabo ken uma wam kpishi nahan kpa, saan mo iyol hegen. Er m lu kpan u aeren a hôngorough nahan kpa, m hingir or u he hegen. (Mbakolose 3:9, 10) Nyian ne, kam kwagh u civirigh kpishi u lun imôngo vea ior mba Yehova mba lun wang shi wasen mbagenev sha u ve hen kwagh u Yehova, Aôndo uhembanagee la.

“Yange m soo u gban gesa u anumbegh . . . sha ci u tar u Brazil.”—JULIANA APARECIDA SANTANA ESCUDEIRO

ANYOM: 31

TAR NA: BRAZIL

INJA KWASE I YANGE LU YÔ: KWASE U FAN ANUMBE A NÔNGON NUM

YIASE YAM: Yange m vese ken gar u Londrina. Shin er ior mba hen ijiir la kpishi lu atsanaior nahan kpa, haregh la lu wang shi lu bem bem kpaa. Zum u m lu anyom pue la, anmgbian wam u nomso u vesen kaa a mo ér mo m kohol un se hen anumbe a nôngon num keren angahar a i yer ér tae kwon do la; inja i ishember ne ér “gbenda u ave man angahar.” Terem yange soo ér mo m hen anumbe ne ga, kpa a fatyô u yangen mo ga tsô á de.

M karen iyol sha anumbe ne kpoghuloo, nahan m tôô iyongo i tae kwon do acin imôngo ken kpentar u Parana la. Ken masejime yô, m hemba anumbe ne ken tar u Brazil sha ashighe kposo kposo; ken inyom i 1993 la, i nam iyongo i or u hemban fan anumbe a tae kwon do la ken tar u Brazil jimin cii. Yange m soo u za gban gesa u anumbe ne u ityar ityar la kpaa. Nahan kpa, tsombor wam lu a kwagh ave ga, nahan inyaregh lu ki tindin mo ken tar u ken won ga.

Yange m tômon a tom mer ma i eren anumbe ne ken gesa u anumbegh u i yer ér Olympics la; ken masejime yô i va hii u eren anumbe ne ken gesa u anumbegh u Olympics la. Yange m soo u gban gesa u anumbegh u Olympics la sha ci u tar u Brazil, tsô m gba karen iyol kpoghuloo, shi i nam iwasen i inyar, nahan m za gba gesa ken tar u France man Vietnam man South Korea man Japan, shi m gba gesa u anumbegh u i yer ér South American Games la kpaa. Awashima wam ugen yô, lu u za gban gesa u anumbegh u i yer ér Pan American Games la; yange m wa ago iyol tsembelee, nahan i tsuam ér mo m lu môm ken iorov utar mba vea gba gesa u anumbe a tae kwon do ne ken gar u Santo Domingo, ken tar u Dominican Republic, ken inyom i 2003 la yô.

GBENDA U BIBILO GEMA UMA WAM LA: Ken inyom i 2001 la, mo vea ikyeren yam, se zua a Mbashiada mba Yehova, nahan ve hii u henen Bibilo a vese. Sha hiihii la, kwaghhenen la maam iyol keng ga. Hanma shighe yô, i vôrom iyol kpishi, m fatyô u veren ishima sha kwaghhenen la ga; ashighe kpishi a henen kwagh a mo yô m yaven a yav. Nahan cii kpa, kwagh u m lu henen la kôrom sha mtema, man kwagh ne hingir u duen ken igbar zum u gba u shi me za gba zege gesa u anumbegh ugen yô.

 Er i tsuam ér mo m za gesa u anumbegh u i yer ér Pan American Games la yô, mbavesen mba tesen anumbe a tae kwon do la kaa ér mo m hii eren anumbe ne ken gesa u anumbegh u kiriki, cii man me za a vesen la ye. Nahan ka kom kwa wam u nôngon num yô, m gba tilen sha butu jikii tsô, ishima kera lum u nôngon num la ga. Her ave ave la je, baver mo er i doo u Orkristu nana nôngo num a mbagenev ga yô, a̱ lu ken anumbe je kpaa! M umbur tindi u Bibilo u a kaa ér, “or u nan we ndor a we yô, nana̱ doo u ishima er we iyol you nahan” la. (Mateu 19:19) Tsô m goom m kar kera, ishima tsô erem er m cin m hide ga. Ior gba haan ashe sha a mo tsô; kpiligh ve iyol saa her.

M hir ken ya yô, m tema inya m gba henen sha kwagh u i doo u me er a uma wam yô. M tôô antakerada ugen u Mbashiada mba Yehova ve gber yô; antakerada ne ôr kwagh u Aôndo a soo hen a vese yô. M nenge a Pasalmi 11:5 ken antakerada ne, ijiir ne ôr kwagh u Yehova ér: “Or u ipira i doo nan la yô, A kôr nan ihyom.” Mkaanem ma orpasalmi man kôrom ken ishima tsung, tsô m nenge mer doo u me de anumbe a tae kwon do la.

Kwagh ne vihi mbavesen av mba tesen mo tae kwon do la a mo kpishi. Tsô ve gba nôngon ér vea gemam ishima; ve kaa a mo ér m hemba fan anumbe ne a hanma or ken tar u Brazil cii, shi mo m sôôn za gban gesa u anumbegh ne ken anumbe a Olympics la. Kpa m venda u hiden ijime.

Hen shighe ne nahan, m vôso ikyeren yam la. Un hii u pasen kwaghaôndo imôngo vea Mbashiada mba Yehova, kera kpaa. Yange una za una hide hen ya yô a lu saan saan, a gba ôron mo akaa a un za lam a ior sha mi yô. Yange m fa mer, mo kpa aluer m soo u eren tom ne yô, a gba u me gema uma wam. Tsô m de kwaghaôndo u m eren la, shighe kar yô m kuma u a erem batisema me hingir Kwaseshiada u Yehova.

IWASEN I M ZOUGH A MI LA: Saan mo vea orya wam iyol kpishi shi se mba eren kwagh ken mzough kpaa, sha ci u se mba nenge u dondo kwaghwan u Bibilo la ken ivaa yase. Ka i doom u wasen un sha akaa kpishi, gadia ngu wasen u nengen sha nongo u Kristu u se civir Aôndo a u imôngo la. Yange mea soo yô, ma m nôngo ma m tôô iyongo i hemban la, ma m za gwa kpaa. Kpa m nenge mer tar u ifer ne ngu a kwagh u ua na se u una kuma sha ian i se lu a mi i civir Yehova Aôndo la ga.

“Terem yange gba uwer u wasem mo ga.”—INGO ZIMMERMANN

ANYOM: 44

TAR NA: JAMANI

INJAOR I YANGE LU YÔ: ORMIGAADI U KURAN BAA U VINEN AMAR HER

YIASE YAM: Yange i marem hen gar u Gelsenkirchen, gar u i dughun kootar her yô. Kwaghaôndo u terem eren la lu kposo a u ngôm. Terem lu Orshiada u Yehova. Ngôm yange lumun ér a̱ tesem kua anmgbian wam u nomso man anmgbianev av mba kasev mba uhar mbara kwaghaôndo na la ga. Terem yange nahan umato mba vesen. Hanma iyange yô, a yar tom i kuma ahwa pue shin i hemba nahan. Ashighe kpishi á yar tom sha ahwa ahar shin ahwa atar sha use. Nahan cii kpa, gba uwer u tesen se kwagh u Aôndo sha er se lu ikyua a Aôndo ga. Kpa, iniôngon na la cii lum ibumekwagh.

Zum u m lu anyom 15 la, mbamkombo mba kwaghaôndo mba yange zaan a vese la duem ishima, nahan m venda mer me kera za ve ga. Inyom kar i môm yô, m nyôr nongo ugen u mba keren azu. Ken anyom ahar a a dondo la cii, m er akaa a nan terem ishima vihin kpen kpen. M kom anyom 18 yô maa m undu ya.

Anumbe doom kpishi, nahan m karen iyol kwa ataratar ken kasua môm; yange m hii karen iyol  sha anumbe a keren azu la, mea been yô m gba kenden myôm. Hanma iyange i sati man lahadi yô, mo vea azende am se banen hen ubaa mba vinen amar her ga. Sha shighe ugen la, m nôngo num a or u man msôrom ugen u mluashe na cieryol kpishi yô, kpa m gbidye or ne ngôôr mo ga. Or u ijiir i msôr la lu i na la nengen nahan yô, maa a kaa ér una tôôm tom u kuran baa na la. A tôndo zwa ér una kimbin mo inyaregh kpishi, nahan m lumun u eren tom ne.

Hanma iyange i sati man lahadi yô, m tile sha hunda u baa la, m tsuan a tsua ior mba vea nyôr ker yô. Ior yange ve ngee hen baa ne je i kuma 1,000 nahan, sha nahan yô m memen sha won ga. Num nôngon banen hen baa ne ga. Ashighe agen ior ve anger mo sha gbuuka kua akpe a msôr a hemben kpaa. Mbagenev yange mea lumun mer ve nyôr ken baa ne ga yô, ve tile ken won ve keghen mo a kegh ér vea or iyev. M lu anyom 20 hen shighe la, nahan m henen mer m gande cii. Sha kpôô yô, yange m gande ave—m vihi tu, m wa imanger, m hagher sha kwagh shi m taver ityough kpaa.

GBENDA U BIBILO GEMA UMA WAM LA: Terem yange gba uwer u wasem mo ga. Yange ker gbenda sha er a tindin mo a magazin u Iyoukura man Awake! * la henpe m lu la. A̱ tindim a mi kpa m ôr ga, nahan ve magh cimba ken iyou yam kpishi. Nahan kpa iyange igen yô, m tôô mbagenev ker, m gba bughun nengen. Ungeren mbagenev mba m ôr, mba ve pase er a va kar a mbapatii man mbakpengav kua ukwaghaôndo kera la kôrom ken ishima, tsô m yila anmgbian wam u kwase sha telefon. Un vea nom na ve lu Mbashiada mba Yehova. Ve kaa a mo ér vea hen Bibilo a mo, nahan m lumun.

Kwaghwan u ken Mbagalatia 6:7 la mgbegham, nahan m gema uma wam. Akaa a yange erem ken uma wam la, na yô m fa mer nyityôkwagh i m eren hegen shin m ôron shin m tsough cii ia bende a uma wam ken hemen. Kwagh u i nger ken Yesaia 1:18, u Aôndo a yer se ér se̱ va er la kpa, taver mo ishima kpishi; ijiir la kaa ér: “Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan.” Ken mhii u kwaghhenen wam la je tsô, ruamabera wasem sha u m de nengen iyol yam mer m kuma u me va sha ishigh ki Yehova shin me fatyô u hiden hen a na ga ze.

Ken iwer ataratar tseegh, m gema uma wam kpishi je, kpa yinam ga. Yange gba u me undu ijiir yam i dang ngee her kpishi la, kua shi azende am a wan dang la kpaa. Nahan m hii u ôron azende am mer m ngu henen Bibilo shi m hii u pasen ve kwagh u m lu henen la kpaa. Nahan ve hii u palegh mo, shi ve gema yilan mo ér pasetô. Anmgbian wam u kwase la yange wasem, nahan m zua a tom ugen u dedoo.

Shi m hii u zan mbamkombo ken Iyou i Tartor igen, ape anmgbian wam u kwase kua nom na ve zaan mbamkombo la, shin er ijiir ne gba ica a ya wam je kuma ukilomita 30 nahan kpaa. Iyou i Tartor igen lu ikyua a ya wam, kpa m lu cian mer me za her yô me kohol ior mba ve fam iyev wam je yô. Shi cier mo iyol u zenden sha uya uya, pasen kwaghaôndo hen haregh wam. M lu henen mer, me za zua a or u m sember zendan nan hen iyou i msôr la kera nahan me er nena, man or u m sember nan nan mcimbim ma bom yô á lu nena? Nahan kpa, m hen kwagh ken anumbe a karen iyol a m eren la—iyolkaren i hemban taver cii la ka i je í hembe lun a inja yum ye. Nahan yange m kom u me hii u pasen ior kwaghaôndo yô, m gba pasen kwaghaôndo kpoghuloo sha afatyô wam cii.

Shi m lu a mzeyol ugen u gba u me hemba un yô—m soon u ôron takerada shin henen kwagh ga. Nahan kpa, m fa mer aluer m soo u lun a jighjigh u nan taveraa yô, a gba u me gba uwer u henen akaa a mimi a ken Bibilo la ga. M mase kaven mer, aluer m soo u zuan a agee a civir Aôndo yô, a gba u me nôngo kwagh kpoghuloo, vough er myôm ma kenden kpa ka i gba u or nana nôngo kwagh ve nana kende ma nahan.

IWASEN I M ZOUGH A MI LA: Iwasen i môm i m zough a mi yô, m ngu uma her! Zan zan hegen kpa, gba u me waan ikyo hanma shighe sha er me hide me gba ken akaa a m vanden eren la ga yô. Kpa hegen ne, mo vea kwase wam se mba saan saan kpishi, gadia ka kwase u lun a aeren a dedoo a Orkristu je zua ga. M ngu a azende a mimi aa a lu Mbashiada mba Yehova, aa me fatyô u nan a jighjigh yô. Terem saa ku ka anyom ataan je ne, kpa cii man a̱ kpe yô, a zua a iember kpishi sha ci u a nenge mgemshima u mo wan na ne.

[Ngeren u shin kpe]