Kwagh U Se Hen Hen Yesu la

Gbenda u Mbatyomov Ve Benden a Vese La

Yesu yange lu ken tar u ujijingi vea Ter na “er i lu a gba tar ga la” je. (Yohane 17:5) Nahan yô, ka un a kom u una na se mbamlumun sha mbampin mba dondon mban ye.

Kwagh wase gba mbatyomov ishimaa?

▪ Yesu tese se ér kwagh u ior gba mbatyomov ishima kpishi je. A kaa ér: “M-ember una lu sha ishigh ki mbatyomov mba Aôndo sha ci u orsholibo môm u nan gem ishima yô.”—Luka 15:10.

Yesu pase ér i wa mbatyomov tom u wasen mbacivir Aôndo sha er vea za hemen u lun kôôsôô vea Aôndo yô. Sha nahan yô, zum u Yesu ta mbahenen nav icin ér ve de ne mbagenev gbev mbu nôngon ga la, a kaa ér: “Ver nen ishima, de lahan nen u môm ken mbakiriki mban ga, gadia M ngu kaan ne Mer, mbatyomov vev mba Shaav mba kenger ishigh ki Terem u A lu Sha la, gbem.” (Mateu 18:10) Yesu ôr kwagh ne nahan kpa, tese ér hanma ordondon na yô nan ngu a ma ortyom u i ver ér a̱ kuran nan ga. Kpa kwagh u Yesu ôr ne tese ér kwagh u ior mba ken nongo u Kristu gba mbatyomov mba ve eren Aôndo tom la ishima kpen kpen.

 Diabolo una fatyô u bulan se nena?

▪ Yesu ta mbadondon un icin ér Satan yangen ior u henen mimi sha kwagh u Aôndo. Yesu kaa ér: “Hanma or u ka nana ungwa kwaghôron u tartor man nana kav ga yô, or u ifer a va, a va tsuwe kwagh u i lee ken ishima i nan la kera.”—Mateu 13:19.

Yesu yange ôr ior injakwagh igen sha kwagh u ortanivor ken sule, nahan á pon gbenda môm u Satan a tsughun ior yô. Ortanivor la tile sha ityough ki Yesu, man uwua la di tile sha ityough ki Mbakristu mba mimi mba vea tema tor vea Yesu sha imôngo la. Kpa, Yesu kaa ér orihyom za va “va lôô ivor i bo ker atô u uwua.” Ivor i bo la tile sha ityough ki Mbakristu mba aiev. “Orihyom u a lee i la yô, ka diabolo.” (Mateu 13:25, 39) Alaghga mba ve senge ér ve mba Mbakristu la vea lu er ka mbacivir Aôndo sha mimi nahan, vough er ivor i bo ashighe agen ka i lu er ka uwua nahan. Ukwaghaôndo mba ve tesen atesen a aiegh la mba tsughun ior, nahan ior gema mba hemban Aôndo ato. Satan ngu yaren tom a kwaghaôndo u aiegh sha u yangen ior u yan ikyar vea Yehova.

Se er nan ve se yange Satan u bulan se?

▪ Yesu yila Satan ér “tor u tar ne.” (Yohane 14:30) Yesu pase gbenda u se fatyô u kuran ayol a ase sha ikyev i Satan ken msen na ugen u a er hen Aôndo yô. Yesu er msen sha ci u mbahenen nav hen Ter na u sha la ér: “Kura ve sha ifer [shin “iferor,” NW]. Ve mba ior i tar ne ga, er Mo kpaa M lu or u tar ne ga nahan. Tsegha ve ken mimi, ka kwaghôron Wou je a lu mimi ye.” (Yohane 17:15-17) Aluer se zua a mfe u Mkaanem ma Aôndo la yô, una kura se sha er aeren a tar u uumace, u Satan a lu hemen u ne aa bende a vese ga yô.

Mbatyomov mba eren akaa aa á benden a vese nyian nena?

▪ Yesu kaa ér sha shighe u ‘mkurtar la, Mbatyomov vea due, vea sange mbaaferev ken mbaperapera kera.’ (Mateu 13:49) Se mba ken ayange a ‘mkurtar’ hegen, nahan ior umiliôn umiliôn mba ungwan loho u dedoo u Tartor u Aôndo shi mba geman uuma vev kpaa.—Mateu 24:3, 14.

Kpa ka hanma or u nan hii u henen Mkaanem ma Aôndo cii, Aôndo una lumun a nan ga. Mbatyomov mba hemen mbacivir Yehova gbenda ken tom u ve eren la, nahan mba paven mba Aôndo a doo ve ishima sha mimi la veren kposo a mba ve soon u eren kwagh u ve lu henen ken Bibilo ga la. Yesu pase kwagh u mba Aôndo a lumun a ve la nahan ér: “Ka mba ve ongo kwaghôron la man ve kusu un ken ishima i mimi i dedoo man ve ume atam sha ishimawan” kpaa la.—Luka 8:15.

Wea soo u seer zuan a iwanger yô, nenge ityough 10 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Foto u sha peeji 24]

Mbatyomov mba wasen u van a ior mba asema a mimi ken nongo u Kristu