Gbenda U Myer 1

Ior Ve Doo U Ishima, I̱ De Lu Inyaregh man Akaa á U Lu a Mi la Ga

BIBILO TESE SE NYI SHA KWAGH NE? “Mishe u hanma inja i kwaghbo cii yô, ka inyaregh ki saren.”—1 Timoteu 6:10.

ER NAN VE KA I TAVER SE U DONDON KWAGHWAN NEE? Mbayôôn kasua ka ve shi kumbur a vese sha akaayôôn sha u kwagh u se lu a mi la a̱ de kom se ga yô. Ka ve soo ér se eren tom ngeegh sha er se zua a inyaregh ki yamen akaa a he a hemban doon man a hemban kehen kpaa yô. Inyaregh fa u meen or, man aluer se ver ishima ga yô kia hingir u doon se ishima fese je. Kpa Bibilo gema ta se icin ér or u nan soo inyaregh yô kia kuma nan sha won ga. Tor Solomon yange nger ér: “Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga.”—Orpasenkwagh 5:10.

Ú ER NENA? Dondo ikyav i Yesu la, nahan hen u soon ior hemban akaa agen. Yesu yange kegh iyol u nan akaa a na cii, kua uma na kpaa, sha ci u ior, gadia ior doo un ishima. (Yohane 15:13) A kaa ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Aluer se hen u lun a shighe sha ci u mbagenev shi nan ve iwasen yô, se kpa ior a eren a vese nahan. Yesu yange kaa ér: “Na nen, nahan ne kpaa á na ne.” (Luka 6:38) Mba ve zendan inyaregh man akaa a injaa agen ityô la ka ve gbihi ayol a ve ken mzeyol man ican i yan. (1 Timoteu 6:9,10) Kpa mkom u mimi yô, or ka nan zua a mi shighe u ior ve doo nan ishima, shi nan kpa nan doo ior ishima yô.

Tôv sha uma wou nenge, aluer ka u ú gema eren akaa akuma akuma yô. U fatyô u panden akaa a u lu a mi shin a u we ishima u yamen la kpa? Aluer u er nahan yô, u mase kaven er u hembe lun a shighe man agee a eren akaa a a hembe lun a inja la yô, inja er u wasen ior shin civir Aôndo, u a ne u akaa a u lu a mi cii la nahan.—Mateu 6:24; Aerenakaa 17:28.

[Foto u sha peeji 4]

“Na nen, nahan ne kpaa á na ne”