Gbenda U Myer U Sha 4

Tsua Azende a Ou sha Kwaghfan

BIBILO TESE SE NYI SHA KWAGH NE? “Zende a mbafankwagh imôngo, nahan we kpaa ú hingir orfankwagh.”—Anzaakaa 13:20.

ER NAN VE KA I TAVER SE U DONDON KWAGHWAN NEE? Azende ase aa na se seer zuan a mkom shin aa na kwagh a kera kuman se ga. Aeren a ve man akaaôron a ve aa bende a gbenda u se nengen uma la kpee, a bunde ga.—1 Mbakorinte 15:33.

Nenge ase ikyav ken Bibilo sha kwagh u iorov 12 mba yange ve za nenge tar u kaanaan mker la. Mbakpishiv ken a ve hide va “ôr Mbaiserael akaavihin a sha kwagh u tar u ve za nenge u mker la.” Nahan cii kpa, mbauhar ken a ve gema ôr akaa a dedoo sha tar u Kanaan, ve yila u ér, “tar u doon kpishi.” Nahan je kpa, mhen u bo u mbamkerev mba pue mbara bende a ior cii. Bibilo kaa ér: “Ior cii ger mliam . . . Mbaiserael cii gba zan Mose man Aron ivever iyol.”—Numeri 13:30–14:9.

Nyian kpa kape i lu je la, ior kpishi “ka mbagbanahon mba ma kwagh a kom ve ga” yô. (Yuda 16) Or u nan lu a ahuraior a kwagh a kom a sha won ga yô, a taver nan kpishi u zuan a mkom.

Ú ER NENA? Time sha iliam i u lamen vea azende a ou la. Azende a ou nga te ihyagh sha ci u akaa a ve lu a mi laa, shin nga a shi vaan ican sha ato a ouwe? Man we di, ka nyi ijende u lu hen a ve? U sôôn azende ou aa akaa a u lu a mi la wer i sar vee, shin u taver ve ishima wer kwagh u ve lu a mi la a̱ kuma ve?

Nenge ase ikyav i dedoo i Davidi, u yange gba u una va tema tor la, man ikyav i Yonatan, u lu wan u tor Saulu la. Davidi lu orazendeazende u tsaan ken taaikyôngo yô. Saulu lu cian ér Davidi una va ngohol un hemen, nahan soo u wuan un kera. Shin er lu u Yonatan ma tema tor sha ityough ki ter na nahan kpa, gema lu môm ken azende a Davidi a sôngo sôngo. Yonatan kav er Aôndo a tsough Davidi ér a̱ va lu tor yô, nahan a lumun u suen ijende na ne.—1 Samuel 19:1, 2; 20:30-33; 23:14-18.

We kpa ka azende aa í gbe u ú lu a mi je la, azende a kwagh a kuman a, shi kwagh wou a gbe a ishima yô. (Anzaakaa 17:17) Kpa sha kpôô yô, aluer u soo u zuan a azende a lun inja nahan yô, saa we kpa u vande lun inja nahan keng.—Mbafilipi 2:3, 4.

[Foto u sha peeji 7]

Azende a ou nga wasen we u seer zuan a mkom, shin nga nan kwagh kera ngu kuman we ga?