U Fa Kpa?

Apostoli Paulu yange kaa ér un “ngu a ayol a avavegh a Yesu” iyol, nahan lu ayol a nyi lu ôron kwagh u a?—Mbagalatia 6:17.

▪ Alaghga ior mba sha derianyom u hiihii la yange vea kav inja i mkaanem ma Paulu man sha igbenda kposo kposo. U tesen ikyav yô, sha ayange a ngise la, i wa iyôugh ken usu, ki a nyian vong yô, i dugh ki i gber mbakwarev ikyav iyol kua mbaiv mba ken tempel man ikpan i yevese. Yange a̱ gber or ikyav iyol, nana lu a yolough iyol nahan, i lu kwagh u kunya kpen kpen.

Nahan kpa, lu hanma shighe cii i nengen ikyav i í gber or iyol ér ka kwagh u kunya ga. Ior kpishi mba sha ayange a ngise la gberen ikyav iyol sha u tesen ikyurior i ve lu shin ma kwaghaôndo u ve eren yô. Takerada u i yer ér Theological Dictionary of the New Testament (Dikishenali i Kwaghaôndo i Ikyuryan i He) la tese ikyav sha kwagh ne ér, “Mbashiria yange ve gber akav sha ave gayô sha mon sha u tseghan ayol a ve sha ci u aôndo ve u Hadad man Atargatis la . . . Or u civir aôndo u i yilan ér Dionysus la di yange i gber nan ikyav i lun er kwa u kile-iyongo nahan iyol.”

Mbapasen asember a ken Bibilo mbaainge kpishi gba henen tsô ér Paulu yange lu ôron kwagh u ayol a a lu a mi iyol sha ci u gbidiv mbu i gbidye un sha ashighe kposo kposo zum u a lu eren tom na u Orkristu u mishen la. (2 Mbakorinte 11:23-27) Nahan cii kpa, alaghga Paulu lu ôron kwagh u ayol a kpôô kpôô ga, kpa lu pasen er uma na jimin cii á tese ér un ngu Orkristu yô.

Agar a waren ker a ken tar u Iserael u tsuaa la yange hingir ajiir a mbaaferev za yeren her yôô?

▪ Sha ayange a tsuaa la, utempel kpishi ken ityar i mbafanaôndoga la lu ajiir a mbaaferev mba yevese shin mbaiv za yeren her yô. Sha ayange Mbakristu mba aiev mba ngise mbara kpa, ayou a aduaav a vesen lu ajiir a mbaaferev yeren her yô. Nahan kpa, agar a waren ker a ken tar u Iserael la yô, i wa atindi a yangen agar ne u lun ajiir a mbaaferev za yeren ker.

Tindi u Mose la pase ér agar a waren ker la nga sha ci u or u nan woo or abu tseegh. (Duteronomi 19:4, 5) Imbaor la yange nan yevese nan yem hen gar u waren ker u a lu ikyua a nan cii yô, sha er anmgbian u orkpen la u nomso nana wua nan sha u oron iyev i awambe a anngô u nan la ga yô. Oryevese la yange nana pasen mbatamen mba gar u waren ker la kwagh u a ze hemen cii yô, i yem a nan hen gar u a nengen sha ijiir i nan woo or her la sha u i za ôr nan ijiir her yô. Nahan nan zua a ian shighe u ijirigh la u pasen ishô i nan. Mbatamen mbara yange ve tôv sha mlu u oryevese ne man orkpen la sha u vea fa aluer ihyom ia vande lun hen atô ve yô.—Numeri 35:20-24; Duteronomi 19:6, 7; Yosua 20:4, 5.

Yange a zua oryevese la a ibo ga yô, nan hire nan yem ken gar u waren ker la, nan za lu ker shi nan zenden hen ningir u gar la tseegh. Agar ne lu purusu ga. Yange i gba u shiror ne nana eren tom shi nana lu ityô i nan a iwasen kpaa. Zegepristi yange una kpeen kera cii yô, mba ve lu ken agar a waren ker la cii ve undu a, kpa i kera wua ve hen shighe la ga.—Numeri 35:6, 25-28.

[Foto u tesen ijiir u sha peeji 9]

(U soo u ôron ngeren ne cii yô, nenge takerada u)

AGAR A WAREN KER

1 KEDESHI

2 GOLAN

3 RAMOTI-GILEADI

4 SHEKEM

5 BESER

6 HEBERON

Ifi u Yordan