U Fatyô u Zuan a Mkom Je Kpa?

“Orgen u i yer un ér Benjamin Franklin yô, kaa ér, “Mkom ngu a na atsanaior a hingir mbainyarev; myen u kwagh a yen mbainyarev la ngu a na ve hingir atsanaior.”

IOR kpishi nenge ér mkom ka kwagh u a fatyô u yamen un ken kasua ga yô, man kwagh ne tese mimi u injakwagh i í ter heen ne. Kape i lu ve mkom, inja na yô ka mlu u ken ishima u kwagh kuman or la, a ze ibyan ken tar u ú mgbeghan ior u lun a isharen i seer ombon akaa man i̱ eren akaa a vesen shin tômon mkpeyol u mbagenev yum je ne! Ma kwagh u i ter shin heen ne bende a wee?

• Mbayôôn kasua ka ve shi yôôn kasua kaan a we ér ú yam akaa kpishi yô u zua a mkom.

• Gesa u ior ve gbe hen ijiirtom you shin ken makeranta la na yô, ka u er saa u lu er ve nahan keng ve u fa wer u gba kwagh ye.

• Ka wea wase ior kpa mba wuese kwagh u ú er a ve la ga.

• Ahuraior a ou na yô u ngu tômon akaa a ve lu a mi la.

• U ngu a zua a mbamlumun sha mbampin mba hange hange mba u pinen sha kwagh u uma la ga.

Aluer u tagher ishigh a mbamlu mban nahan, u fatyô u zuan a mkom sha won je kpa? Apostoli Paulu yange ôr kwagh ter “gbenda u or nana fatyô u zuan a mkom” yô. Ashighe agen, yange á ngee a kwagh wuee, ashighe agen di á ban a kwagh. Yange doo ahuraior a Paulu a na, kpa mbagenev yô naha un tar. Nahan cii kpa, a kaa ér un ‘hen u kwagh kuman un ken hanma mlu cii.’—Mbafilipi 4:11, 12, mgem u Bibilo i i yer ér New International Version la.

Mkom ka gbenda u mba ve lu a gba eren akaa a vea zua a mi ga la ve fe u ga yô, kpa er Paulu yange ôr nahan, or a fatyô u henen gbenda u zuan a mkom. Yô, time ase sha igbenda i myer itian i zuan a mkom ken Bibilo, i̱ ị lu Mkaanem ma Aôndo la.