Se cii se mba henen sha kwagh u ken hemen. Ka se hen er se man ior asev se va lu ken hemen yô. Ka se pine ser: ‘Ônov av vea va lu ken tar u hemban doon je he? A va tim tar ne sha aahe shinii? Me er nan ve a va lum guda ken hemene?’ Isharen i fan akaa la ngi ken a vese; ka i sar se er ma i er se kwagh u ishima a kera nyian se ga, shi ma se fe er a va lu ken hemen la jighilii yô. Shi ka i sar se er akaa ma a zaan sha inja sha inja shi hanma kwagh ma a geman ga yô. Aluer u fa kwagh u una va er ken hemen jighilii yô, u wa iyol ken ishima man sha iyol cii u keghen a kegh.

U fatyô u fan kwagh a keghen we ken hemene? Ka an je nana fa? Mbatôvon sha akaa ka ve nôngo ér vea tsengaôron akaa a ken hemen, agen ka a er, kpa agen kpishi di a er ga. Nahan kpa, i kaa ér Aôndo una fatyô u tsengan ôron akaa a ken hemen la vough. Mkaanem nam kaa ér: “M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.” (Yesaia 46:10) Aôndo kur uityendezwa nav kpa?

Doo u kwagh a gba u sha mkur u akaa a Aôndo a tsenga pasen la sha ci u nyi? Aluer hanma iyange mbanan abaver mba tsengan pasen shighe u ura ua nôô hen ijiir you, shi ve er tom la anyom ngee kpa hanma shighe ura ka u nôô sha zwa ve vough yô, kwagh la una doo u. Aluer mba pasen er kper sev mbua lu yô, ka keng u kegh ato sha kwagh u ve lu ôron la. Kape aluer u fa er Aôndo tsenga pasen akaa a a lu kuren la ve, kwagh u a tsenge pasen sha kwagh u mlu wou u ken hemen la kpa una doo u je la.

MTIM U ZEGEGAR UGEN:

U tesen ikyav yô, lu kwagh u kiriki u tsengan pasen ér zegegar u lu gartamen anyom uderi imôngo yô, una yôhôr ga. Aôndo yange tsengaôron imba kwagh la sha zwa u profeti na ugen, ka mtim u gar u Nineve je la. (Sefania 2:13-15) Mbatôvon sha akaa a mbayiase nger nyi sha kwagh nee? Ikyav tese ér, Aôndo tsengaôron mtim u Nineve  anyom kar 15 cii ve Mbababilon man Mbamede yôhôr gar la ken inyom i 632 C.S.Y. (Cii man Shighe u Yesu) la ye. Heela tseegh ga, Aôndo vande kaan tsuaa je ér Nineve una hingir “ice man iomborinya er deserti nahan.” Kwagh ne er nahan vough kpa? Een. Shin er Nineve kehe je, lu u or a zende ukilomita 518 ve nana ningir un a tser nahan kpa, mbautyaav mba ve yôhôr un la undu vegher na ugen her ér a hingir u ve, er alaghga mbagenev vea hen la ga. Yange ve tim un gburu gburu. Á lu mba tsengan fan akaa a gomoti nahan, yange ma ve fatyô u tsengan pasen akaa a yange er Nineve la vough nahan kpa?

AKUHE A IOR AA HIA:

Ka an je nana cihi a tsengaôron iti man tsombor u or u nana nande akuhe a ior sha atse a nanden nagh, kua gar u atse shon aa lu her la vough, anyom aa kar 300 cii ve kwagh la una er nahan voughlo? Aluer kwagh er nahan vough yô, or u yange nan tsenga fan kwagh shon la nana za gwa. Profeti u Aôndo ngise yôô ér: “Yange igen á mar wan hen ya u Davidi, iti na er, Yoshia,” shi a kaa ér una “nande akuhe a ior sha” atse a nanden nagh sha mi hen gar u Betel. (1 Utor 13:1, 2) Anyom nga kar 300 yô, tor ugen u iti na lu Yoshia, u orgen môm ken Bibilo nan ye iti na ne ga yô, va due ken tsombor u Davidi. Yoshia tindi i za “dugh akuhe shin iwar la, a nande a sha atse” a ken Betel la, vough er i tsenga pasen nahan. (2 Utor 23:14-16) Aôndo una tindi or ga nahan nana fatyô u tsengaôron imbakwagh la vighe vighe kpa?

MKUR U TARTOR UGEN:

Aluer u fa er yange i tsengaôron iti i orgen u ica i gba cii i va mar un, u lu u una hemen ior vea za yôhôr gartamen u tartor u hemban tahav sha tar cii, je shi i tsenga pasen gbenda u or shon una kôrcio u yôhôr gar la kpa cica cii yô, a kpiligh we iyol kpishi. Aôndo ngise yôô ér orgen u i yilan un ér Shirushi yô, una hemen ior vea za hemba tartor ugen ityav. Shirushi ne shi una na Mbayuda mba ve lu ikpan la gbenda vea hide ken tar ve, shi una wase ve u hiden maan icighan tempel ve la. Heela tseegh ga, Aôndo shi tsenga pasen gbenda u Shirushi una nôngo ityav la ér, una uma mngerem shin uifi, shi a pase ér hen shighe la, a undu ihinda i gar la ivegher, nahan a lu ican u hemban gar shon ityav ga. (Yesaia 44:27–45:2) Akaa a Aôndo tsengaôron vighe vighe ne kure nahan vough kpa? Mbatôvon sha akaa  a mbayiase lumun ér Shirushi yange hemba Babilon, gartamen u tartor u Babilon la ityav. Mbautyaav mba Shirushi er tom u kiriki ga, yange ve time akpa, ve goom a mngerem ma shin ifi ugen ken Bibilon yem shimi, maa mngerem ma shin uifi mbagenev mba ve kase gar la cii uma. Shi akumautya a Shirushi nyôr sha ihindagar i i undu i ivegher la. Kwagh ne eren kera yô, Shirushi na Mbayuda gbenda ve hide ken tar ve, shi yôô ér ve hide ve maa tempel ve u ken Yerusalem la. Lu kwagh u or hen ér una er ga yô, sha ci u Shirushi civir Aôndo u Mbayuda ga. (Esera 1:1-3) Ka Aôndo tseegh yange ma fatyô u tsengan pasen akaa a ngise er la vighe vighe ga zee?

Se tese ikyav sha akaa atar, er Aôndo yange tsengaôron akaa a ken hemen vough yô. Akaa ne nga myer ga. Yosua, u hemen Mbaiserael la yange ôr kwagh u mimi, u mba lu lamen a ve la cii fa yô, ér: “Ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.” (Yosua 23:1, 2, 14) Ior mba Yosua hemen ve la fa er uityendezwa mba Aôndo man akaaôron a profeti na a gbe inya ga yô. Kpa er nan ve akaa a Aôndo a tsengeôron la a gbe inya ga? Akaa a vesen ga, a a tese er igbenda i Aôndo a eren kwagh la i lu kposo a i orumace yô. Gba hange hange u ú fa kwagh ne, sha ci u Aôndo yôô akaa a doon tsung a a sôôn eren yô, man ka akaa a aa wase u keng a bunde ga yô.

Ka i lu akaa a mbasainsi ve tôv ve fe, shin a ior ve nenge a lu eren, man gbenda u a eren la, shin jijingi u tsengan pasen akaa, u ior ka ve senge ér mba a mi la ka ve suur sha mi ve pasen akaa a aa va er ken hemen ye. Uumace ka vea tsengan pasen akaa a ve cii yô, ve hide ve tema ve gba veren ashe keghen ér vea nenge kwagh u una ér la.—Anzaakaa 27:1.

Ka akaa cii uumace ve fe ga, kpa Aôndo yô, fa akaa cii. A fa kwagh u orumace vindi vindi kua mhen u nan kpaa; nahan Aôndo ka una soo yô, a tsenga nengen a kwagh u hanma or, shin ityar ia va er ken hemen yô. Aôndo tsengan fan kwagh u ken hemen tseegh ga. Ngu a tahav mbu una fatyô u geman akaa a aa na ve kwagh la una er, man gbenda u una er la kpaa, sha er kwagh shon una kure sha zwa na vough yô. A kaa ér: “Kwaghôron Wam, u a dugh ken zwa Wam, . . . una hide her a Mo gbilin ga, . . . ikyôr ia lagh un sha kwagh u M tindi un u eren yô.” (Yesaia 55:11) Sha nahan yô, akaaôron a profeti a Aôndo agen ka a pasen se kwagh u a we ishima u va eren ken hemen yô. Aôndo ngu a er tom kpoghuloo, sha er kwagh u a kaa la una kure sha zwa na vough yô.

I tsenga pasen mlu wou u ken hemen man u ior ou, u ú fatyô u nan jighjigh a mi yôô? Aluer u vande fan wer ura u vihin ayou ngu sôôn nôôn hen ijiir you nahan, u er kwagh u waren uma wou ga he? Kape kwaghôron u profeti u ken Bibilo la kpa i gbe u ú er kwagh sha mi je la. Aôndo yôô ér akaa kpishi nga sôôn geman sha tar. (Nenge ngeren u kiriki u a lu a itinekwagh ér: “ Kwagh u ken Hemen, U Aôndo A Tsenge Pasen La.”) Kwagh u ken hemen ngun ngu kposo a u mbatôvon sha akaa ve tsengan pasen la.

Tôô wer akaaôron a profeti a Bibilo i er sha tar ne la nga pasen kwagh u una er tar ne shighe u akaaôron shon aa kure yô. I vande ngeren a shin inya, nahan u fatyô u tsengan fan kwagh u una va er tar ne la. Aôndo kaa ér: “M pasen hii sha mhii zan zan mkur, . . . M kaa Mer: Awashima Wam una lu je, Me er kwagh u a doom ken ishima u eren la cii.” (Yesaia 46:10) We vea tsombor wou cii, mlu wen una va doo ken hemen kpishi. Pine Mbashiada mba Yehova ve pase u akaa a Bibilo i kaa ér aa va er ken hemen yô. Mbashiada mba Yehova mba kpehen asor ga; ve senge ér ujijingi mba lamen a ve kpaa ga, shin mba a tahav mbu tsengan pasen akaa ga. Ka ior mba henen Bibilo mba vea tese u akaa a dedoo a Aôndo a lu eren tom sha mi kpoghuloo, sha ci u mlu wou u ken hemen yô.